ខណៈដែលស្វាយទុំកំពុងធ្លាក់ថ្លៃ ដោយសារគ្មានទីផ្សារនាំចេញ ព្រោះតែការរីករាលដាលនៃកូវីដ១៩ លោកបូជាចារ្យអ៊ុន សុន បានប្រមូលកសិផលនេះ ចំនួន២តោន ដើម្បីចែកជូនទៅដល់អ្នកជាប់ក្នុងពន្ធនាគារនៅខេត្តព្រះសីហនុ កាលពីថ្ងៃទី២៥ ខែមីនា ឆ្នាំ២០២១។
កម្មវិធីនេះផងដែរ មានការចូលរួម ពីលោកប្រធានពន្ធធានាគារ សហការីរបស់លោក និង លោកបូជាជាចារ្យ
អ៊ុន សុន ព្រមទាំងគ្រីស្តបរិស័ទ មកពីព្រះសហគមន៍កាតូលិកសន្តមីកាអែលក្រុងព្រះសីហនុ។
លោកប្រធានពន្ធធានាគា បានថ្លែងអំណរគុណ ដល់ព្រះសហគមន៍ ដែលតែងតែយកចិត្តទុកដាក់ និងបានមកសួរសុខទុក្ខ រៀងរាល់ឆ្នាំមិនដែលខាន។
លោកបូជាចារ្យ យ៉ូហាន អ៊ុនសុន បានមានប្រសាសន៍ថា «ជាការពិតណាស់ បងប្អូននៅក្នុងពន្ធធាគា ទោះបីឃ្លានអ្វី ក៏មិនអាចទិញហូប ដូចអ្នកក្រៅ
ណាមួយឆ្នាំនេះ ស្វាយកំពុងធ្លាក់ថ្លៃ បងប្អូនខ្លះបានរត់ចោលចម្ការស្វាយ ខ្លះទៀតបេះយកទៅចោល យើងខ្ញុំឃើញសភាពបៀបនេះ ក៏បានបញ្ជាទិញពីត្រែងត្រយឹង ស្រុកភ្នំ ខេត្តកំពង់ស្ពឺ ដើម្បីយកមកចែកជូនបងប្អូននៅទីនេះ»។
លោកបូជាចារ្យបន្ថែមថា ក្នុងពេលនេះ ព្រះសហគមន៍កាតូលិកកំពុងស្ថិតនៅក្នុងរដូវអប់រំពិសេសដែលយើងមានបីចំណុចសំខាន់ៗ គឺអធិដ្ឋាន តមអាហារ និងធ្វើទាន។
លោកបន្តថា «បើយើងមានតែការអធិដ្ឋាន យើងអត់មានសកម្មភាពនោះអ្វីៗទាំងអស់ ក៏មិនដល់អ្នកដែលត្រូវការដែរ។ យើងឃើញមនុស្សជាច្រើនត្រូវការម្ហូបអាហារ មនុស្សជាច្រើនត្រូវការជួយ ហើយជាឱកាសមួយដែលយើងធ្វើមេត្តាករុណាឲ្យបានច្រើន ហើយយើងត្រូវតមជាច្រើន ដើម្បីឲ្យការអធិដ្ឋានរបស់យើងទៅដល់ព្រះជាម្ចាស់»។
ឆ្លៀតក្នុងឱកាសនេះ លោកក៏បានអរគុណចំពោះការចូលរួមរបស់គ្រីស្តបរិស័ទទាំងអស់ ជាពិសេស បងប្អូនគ្រីស្តបរិស័ទ
ព្រះសហគមន៍កាតូលិក សន្ត ម៉ាទីន នៃមណ្ឌលសកម្មភាពភ្នំពេញថ្មី បានជួយស្វាយមួយចំនួនធំ ដល់កម្មវិធីនេះ។
គួរបញ្ជាក់ផងដែរ រៀងរាល់ឆ្នាំ ព្រះសហគមន៍កាតូលិកសន្តមីកាអែល តែងរួមគ្នាជាមួយសាសនានានា នៅក្រុងព្រះសីហនុ រៀបចំគ្រឿងឧបភោគ និងសម្ភារប្រើប្រាស់ផ្សេងៗ ដើម្បីសួរសុខទុក្ខអ្នកដែលជាប់នៅក្នុងពន្ធធានាគា
តែឆ្នាំនេះ ដោយសារការរីករាលដាលនៃមេរោគកូវីដ១៩ កម្មវិធីនេះរៀបចំឡើងតែព្រះសហគមន៍កាតូលិកប៉ុណ្ណោះ៕
ដោយ ស៊ីអេសស៊ីភ្នំពេញ-លេង ហុង
