តបតាមការអញ្ជើញរបស់សម្តេចប៉ាបហ្វ្រង់ស៊ីស្កូ សម្រាប់សន្និបាតព្រះសហគមន៍សកលដែលធ្វើឡើងសម្រាប់ឆ្នាំ២០២១-២០២៣ ក្រោមប្រធានបទ «យើងជាព្រះសហគមន៍ធ្វើដំណើរជាមួយគ្នា ជាធ្លុងតែមួយ ចូលរួមប្រកាសដំណឹងល្អ» លោកអភិបាលព្រះសហគមន៍កាតូលិកភូមិភាគភ្នំពេញ បានរៀបចំបើកកម្មវិធីនេះ កាលពីថ្ងៃទី ១៧ តុលា ២០២១ ដោយមានអ្នកតំណាងព្រះសហគមន៍ តំណាងការិយាល័យព្រះសហគមន៍កាតូលិកភូមិភាគភ្នំពេញ និងអង្គការការីតាសដែលជាតំណាងធម៌មេត្តាករុណារបស់ព្រះសហគមន៍សរុបជាង៤០នាក់ចូលរួម។
ក្នុងអង្គពិធីបើក ដោយមានអភិបូជា លោកអភិបាលអូលីវីយ៉េ ជ្មិតហស្លេ អភិបាលនៃព្រះសហគមន៍កាតូលិកភូមិភាគភ្នំពេញបានរំលឹកអំពីពាក្យជាធ្លុងតែមួយសម្រាប់ព្រះសហគមន៍ ដោយមានប្រសាសន៍ថា ព្រះសហគមន៍មានអ្នកដឹកនាំមួយរូប គឺព្រះយេស៊ូ ហើយក្នុងនាមព្រះយេស៊ូយើងជាព្រះសហគមន៍ ជាគ្រួសារមួយ យើងត្រូវជួយគ្នាទៅវិញទៅមក រួមដំណើរជាមួយគ្នា និងធ្វើឲ្យគ្រួសារនេះ មានជីវិត។
លោកអភិបាល បន្ថែមទៀតថា ព្រះសហគមន៍កម្ពុជាមិនមែនជាព្រះសហគមន៍ឯកោនោះទេ យើងចូលរួមធ្វើដំណើរជាមួយព្រះសហគមន៍ឡាវ ព្រះសហគមន៍ក្នុងទ្វីបអាស៊ី និងព្រះសហគមន៍ទូទាំងពិភពលោក។
ការយកចិត្តទុកដាក់ប្រណិប័តន៍ជំនឿគឺជាចំណុចស្នូលនៃគ្រីស្តបរិស័ទ ដោយ«យើងបានយកចិត្តទុកដាក់បង្ហាញធម៌មេត្តាករុណាដល់បងប្អូនរបស់យើងដែលកំពុងរងទុក្ខលំបាក។ នេះហើយជាផ្លែនៃជំនឿរបស់យើង» លោកអភិបាលបន្ថែម។
អង្គសន្និបាតសកលនេះ បានចាប់ផ្តើមបើកដំណើរការឡើងនៅទីក្រុងរ៉ូមដោយសម្តេចប៉ាបហ្វ្រង់ស៊ីស្កូ កាលពីថ្ងៃទី៩ ខែតុលាកន្លងទៅនេះ ដែលមានរយៈពេលពីរឆ្នាំ បានដាក់សំណួរបីសំខាន់ៗសម្រាបព្រះសហគមន៍នៅតាមតំបន់នីមួយៗរិះគិត ក្នុងនោះរួមមាន៖
២) នៅពេលយើងដើររួមជាមួយគ្នានៅក្នុងព្រះសហគមន៍របស់យើងផ្ទាល់ តើយើងជួបឧបសគ្គអ្វីខ្លះ? តើយើងជួបអំណរសប្បាយអ្វីខ្លះ?
៣) តាមបទពិសោធរបស់យើងនៅក្នុងការធ្វើដំណើររួមជាមួយគ្នានៅក្នុងព្រះសហគមន៍របស់យើងផ្ទាល់តើយើងត្រូវការកែប្រែអ្វីខ្លះ ដើម្បីឱ្យយើងរីកចម្រើននៅក្នុងការប្រកាសដំណឹងល្អដល់បងប្អូនទាំងអស់?
លោកបានបញ្ជាក់ថា រាល់របាយការណ៍របស់ព្រះសហគមន៍នីមួយៗ លោកនឹងសំយោគវាធ្វើរបាយការណ៍ទៅកាន់ក្រុមសភាលោកអភិបាលឡាវ-កម្ពុជា (CELAC) ដើម្បីសរុបរបាយការណ៍ផ្ញើទៅកាន់ទីក្រុងរ៉ូម៕
