គ្រីស្តបរិស័ទ១២រូបទទួលអគ្គសញ្ញាលាប នៅព្រះវិហារសន្តសិលានិងសន្តប៉ូល នាទីក្រុងភ្នំពេញ ក្រោមអធិបតីភាពលោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតហស្លេ រួមនិងលោកបូជាចារ្យសិលា សួន ហង្សលី នាព្រឹកថ្ងៃទី៧ វិច្ឆិកា ២០២១។
លោកបូជាចារ្យ សួន ហង្សលី មានប្រសាសន៍បើកកម្មវិធីអភិបូជាថា បេក្ខជនចំនួន១២រូបនេះ គឺខ្លះបានទទួលអគ្គសញ្ញាជ្រមុជទឹកតាំងពីឆ្នាំ២០១២ ២០២០ និង២០២១។ ដោយសារ covid-១៩ ពិធីបុណ្យក្នុងព្រះសហគមន៍ត្រូវផ្អាក។
លោកបូជាចារ្យទទួលខុសត្រូវព្រះវិហារនេះ មានប្រសាសន៍ទៀតថា «ថ្ងៃនេះគឺជាសញ្ញាពិសេសដែលបញ្ជាក់អំពីការរីកចម្រើននៃព្រះសហគមន៍របស់យើង ហើយប្អូនដែលទទួលអគ្គសញ្ញាលាបថ្ងាសនៅថ្ងៃនេះគឺជាសាក្សីនៃជំនឿរបស់យើង»។
ក្នុងពិធីបុណ្យនេះដែរ លោកអភិបាលអូលីវីយ៉េ មានប្រសាសន៍ថា នេះជាលើកទី១ បន្ទាប់ពីថ្ងៃ ២០ កុម្ភៈ យើងមានឱកាសដែលជួបជុំគ្នានៅក្នុងថ្ងៃនេះនៅក្នុងសេរីភាព បន្ទាប់ពី៨ ខែកន្លងមកដែលយើងមិនបានចូលក្នុងពិធីបូជាដែលមានគ្នាច្រើនដូចនេះ។ ហើយនេះក៏ជាលើកទី១ ដែលព្រះសហគមន៍យើងធ្វើអគ្គសញ្ញាលាបថ្ងាសនៅក្នុងឆ្នាំនេះ គឺបានប្រើប្រេងពិសិដ្ឋដែលបានប្រសិទ្ធិពរជាមួយលោកបូជាចារ្យមួយចំនួនកាលពីថ្ងៃទី២៤ ខែមិថុនា ឆ្នាំនេះដើម្បីធ្វើអគ្គសញ្ញានានា។
លោកថា ១២នាក់ក្នុងថ្ងៃនេះ និងខែខាងមុខនេះមានជាង១០០ នាក់នៅចំប៉ាដែលនឹងទទួលអគ្គសញ្ញាលាបថ្ងាស។ នេះជាឱកាស ដើម្បីប្រើប្រេងនេះដើម្បីផ្ដល់កម្លាំងដែលមកពីព្រះវិញ្ញាណដ៏វិសុទ្ធសម្រាប់ព្រះសហគមន៍យើង។
នៅក្នុងបរិបទនៃកូវីដ១៩ លោកអភិបាលបានមានប្រសាសន៍ថា ពេលយើងនិយាយអំពីការភ័យខ្លាច យើងនឹកឃើញដល់កូវីដ១៩ គឺយើងរស់នៅក្នុងភាពភ័យខ្លាច ការប្រុងប្រយ័ត្នដែលនាំឲ្យយើងភ័យខ្លាច សូម្បីតែទំនាក់ទំនងជាមួយមនុស្សឯទៀត។ នៅពេលយើងខ្លាចមនុស្សយើងបិទទ្វារផ្ទះ និងបិទទ្វារនៃដួងចិត្តរបស់យើងដែរ។ ពេលយើងភ័យខ្លាចយើងបាត់បង់ទំនាក់ទំនងផ្ទាល់ដោយនៅឆ្ងាយពីគ្នា។ មនុស្សគ្រប់កម្រិតចាប់ផ្ដើមស្គាល់គ្នាតាមរយៈzoom នៅតែតាមកញ្ចក់កុំព្យូទ័រនិងទូរសព្ទ។ យើងបង្កើតទំនាក់ទំនង ប៉ុន្តែមិនមែនទំនាក់ទំនងពិត។
លោកអភិបាលព្រះសហគមន៍បន្តថា ផ្ទុយនឹងភ័យគឺអំណរសប្បាយដោយមានសេចក្ដីសុខ ដោយត្រូវបង្កើតទំនាក់ទំនងផ្ទាល់ និយាយជាមួយគ្នា លើកទឹកចិត្តគ្នា និងសួរសុខទុក្ខគ្នាទៅវិញទៅមក។ គ្រីស្តបរិស័ទត្រូវប្រកាសដូចក្រុមគ្រីស្តទូតពីដើម គឺក្រោយបុណ្យទី៥០ គេចេញទៅ ហើយពេលនេះ យើងប្រកាសដោយធ្វើជាសក្ខីភាពភាពដ៏ពិតប្រាកដ។
ក្នុងនោះដែរ លោកអភិបាលបានបន្ថែមថា ថ្ងៃនេះប្អូន១២ នាក់ទទួលអគ្គសញ្ញាលាបថ្ងាសជាពេលវេលាដើម្បីទទួលអំណោយទៀតនៃព្រះវិញ្ញាណដ៏វិសុទ្ធ ដែលណែនាំឱ្យយើងខ្លាច គោរពព្រះជាម្ចាស់អស់ពីដួងចិត្តអស់ពីស្មារតី មកពីសេចក្ដីស្រឡាញ់និងជំនឿរបស់យើង។
យ៉ាងណាមិញលោកអភិបាលអូលីវីយ៉េ ឱ្យបេក្ខជនទាំង១២រូប យកចិត្តទុកដាក់ធ្វើជាសាក្សីអំពីព្រះយេស៊ូទៅកាន់មនុស្សឯទៀតៗ។ ត្រូវហ៊ានប្រកាសអំពីដំណឹងល្អដូចក្រុមគ្រីស្តទូត តាមទេពកោសល្យ និងសមត្ថភាពរៀងៗខ្លួន។ និងត្រូវបង្កើតទំនាក់ទំនងជាមួយព្រះជាម្ចាស់តាមរយៈការអធិដ្ឋាន ស្តាប់ព្រះបន្ទូល និង បន្តបង្ហាញមេត្តាករុណារបស់ព្រះជាម្ចាស់។
លោកអភិបាលអូលីវីយ៉េបន្ថែមទៀតថា «ដូច្នេះទាំងអនុវត្តជាក់ស្ដែងពីមួយថ្ងៃទៅមួយថ្ងៃ ដោយយើងជាព្រះសហគមន៍ដើរជាមួយគ្នាយ៉ាងជិតស្និទ្ធ ដោយមានគ្រីបរិស័ទលោកឪពុកលោកអភិបាលបងស្រីយើងគ្រួសារតែមួយធ្វើដំណើរជាមួយគ្នាយើងទាំងអស់គ្នាមានតួនាទីដើម្បីធ្វើជាអ្នកបម្រើ។ សូមឱ្យយើងយកចិត្តទុកដាក់បម្រើព្រះសហគមន៍របស់យើងទៅយើងជាគ្រីស្តបរិស័ទមិនមែនជាភ្ញៀវដែលចូលព្រះសហគមន៍តែមួយភ្លែតរួចចេញទៅវិញ។ ដូច្នេះថ្ងៃនេះយើងពោរពេញដោយកម្លាំងថ្មីនៅក្នុងព្រះវិញ្ញាណដ៏វិសុទ្ធដែលណែនាំឱ្យយើងបើកទ្វារបើកបង្អួចនៃបេះដូង និងជីវិតរបស់យើង ដើម្បីឱ្យយើងរួមរស់នៅក្នុងអំណរសប្បាយជាមួយព្រះជាម្ចាស់។ យើងបានរៀនរស់ជាមួយកូវីដ១៩ ប៉ុន្តែជីវិតរបស់យើងសំខាន់ណាស់ដើម្បីរួមរស់ជាមួយព្រះយេស៊ូប្រចាំថ្ងៃ។ លោកអភិបាលអូលីវីយេទទូចស្នើដល់គ្រីស្តបរិស័ទទាំងអស់សូមឱ្យយើងធ្វើជាសក្ខីភាពពិតៗ ជាគ្រីស្តបរិស័ទសកម្ម»។
នៅក្នុងថ្ងៃនេះដែរ បេក្ខជន សុង គឹមហេង បានឲ្យដឹងថា «នៅពេលដែលខ្ញុំបានទទួលអគ្គសញ្ញាលាបថ្ងាសនេះ ខ្ញុំពិតជាមានអំណរសប្បាយរីករាយ និងរំភើបជាខ្លាំង ព្រោះនេះជាចំណុចមួយដែលជំរុញយើងជាគ្រីស្តបរិស័ទហ៊ានប្រកាសជំនឿ បង្ហាញសេចក្ដីស្រឡាញ់ ជាពិសេសធ្វើជាសក្ខីភាពអំពីព្រះសហគមន៍ដល់បងប្អូនឯទៀតៗដែលមិនទាន់ស្គាល់ព្រះសហគមន៍»។ គឹមហេង បន្តថា គឺយើងធ្វើដោយទំនុកចិត្តដូចជាការទៅសួរសុខទុក្ខដល់បងប្អូនក្រីក្រ ក្នុងនាមជាព្រះគ្រីស្ត ហើយគាតនឹងបន្តសន្យាធ្វើជាគ្រីស្តបរិស័ទពេញលេញ និងធ្វើជាគ្រីស្តបរិស័ទគំរូក្រោយពេលធ្វើអគ្គសញ្ញាលាបថ្ងាសនេះ។
រីឯបេក្ខជិនី ឈាង ស្រីនា បានឱ្យដឹងថា «សម្រាប់ខ្ញុំផ្ទាល់គិតថាព្រះវិញ្ញាណដ៏វិសុទ្ធជួយឱ្យខ្ញុំមានភាពរឹងមាំ ក្លាហាន ដើម្បីប្រកាសជំនឿ និងចែកសេចក្ដីស្រឡាញ់ដល់ជនដែលខ្វះខាត ទោះបីដឹងថាបរិបទនេះជាសម័យកូវីដរក្សាគម្លាត និងប្រជាជនគ្រប់គ្នាមានភាពភ័យខ្លាច។ ដូច្នេះដោយសារព្រះវិញ្ញាណដ៏វិសុទ្ធបានធ្វើឱ្យពួកខ្ញុំរឹងមាំក្នុងការប្រកាសជំនឿ តាមរយៈការចុះចែកអំណោយដល់ជនក្រីក្រ»។
នៅក្នុងព្រះសហគមន៍កាតូលិក អគ្គសញ្ញាមានចំនួន៧ មានដូចជា ជ្រមុជទឹក ព្រះកាយនិងព្រះលោហិតព្រះគ្រីស្ត លាបថ្ងាស សម្រុះសម្រួល តែងតាំង (ឧបដ្ឋាក បូជាចារ្យ) អាពាហ៍ពិពាហ៍ លាបប្រេងអ្នកជំងឺ។ ព្រះសហគមន៍ប្រើប្រាស់អគ្គសញ្ញាទាំង៧នេះ ដើម្បីបញ្ជាក់អំពីវត្តមានរបស់ព្រះជាម្ចាស់គង់នៅជាមួយមនុស្សលោកអស់កល្បជានិច្ច៕
ដោយ៖ ដាលីស
