គ្លីនិកកូមីសូ (KOMISO CLINIC) គ្រប់​គង​ដោយសមាគមសាសនទូតកូរ៉េ ក្នុងភូមិត្រពាំងសាលា សង្កាត់ពងទឹក ខណ្ឌដង្កោរ រាជធានីភ្នំពេញ ត្រូវបានសម្ពោធដាក់ឱ្យប្រើប្រាស់ជាផ្លូវការណ៍ នាថ្ងៃទី៨ កុម្ភៈ ២០២២ ក្រោមអធិបតីភាព លោកអភិបាលព្រះសហគមន៍កាតូលិកភូមិភាគភ្នំពេញ អូលីវីយ៉េ ជ្មីតហស្លេរ ដោយមានវត្តមានអស់លោកបូជាចារ្យព្រមទាំងតំណាងគ្រីស្តបរិស័ទមួយចំនួនចូលរួមផងដែរ។

លោកបូជាចារ្យគីម ជីហ៊ុន អ្នកទទួលខុសត្រូវគ្លីនិកកូមីសូ ថ្លែងនៅក្នុងមតិស្វាគមន៍ថា គ្លីនិកនេះកសាងឡើងក្នុងគោលបំណងជួយអ្នកក្រីក្រដែលគ្មានលទ្ធភាពព្យាបាល នឹង​ក្លាយទៅជាឧបករណ៍របស់ព្រះជាម្ចាស់នៅក្នុងកិច្ចការបម្រើអ្នកក្រីក្រ។

លោកបូជាចារ្យរូបនេះ​ បន្ថែមថា កន្លង​មក​ក្រុម​គ្រូពេទ្យ​ស្ម័គ្រ​ចិត្ត​ពី​ប្រទេស​កូរ៉េ បាន​មក​បំពេញ​បេសកកម្ម​ជាច្រើន​នៅ​ក្នុង​ព្រះសហគមន៍​ផ្នែកសុខភាព មាន​ព្យាបាល​មាត់ធ្មេញ ពិនិត្យជំងឺ​ទូទៅ និង​ផ្តល់​ថ្នាំ​ដោយ​ឥតគិត​ថ្លៃ។ ហើយដោយ​មើល​ឃើញ​តម្រូវការ​ការ​និងមានទំនាក់ទំនងជាមួយប្រជាជននៅកម្ពុជា ទើបយើងបង្កើតឱ្យមានគ្លីនិក ដោយចាប់ផ្ដើមពីការជួលបន្ទប់តូចសម្រាប់​កិច្ច​ការងារ​របស់​គ្រូពេទ្យស្ម័គ្រ​ចិត្ត​ទាំងនោះ និងចាប់ពីឆ្នាំ២០២០មកយើងចាប់ផ្ដើមកសាងអាគារធំដើម្បីងាយស្រួលជួយដល់អ្នកជំងឺ។

ថ្លែងនៅក្នុងធម្មទេសនានៃពិធីបុណ្យអភិបូជាប្រទានពរគ្លីនិកនេះ លោកអភិបាលអូលីវីយ៉េ មានប្រសាសន៍រំឭកថា កន្លែងនេះធ្វើឱ្យយើងនឹកឃើញដល់ព្រះយេស៊ូ ព្រោះពេល​ព្រះអង្គទៅកន្លែងណាតែងតែមានប្រជាជននិងអ្នកជំងឺគ្រប់ប្រភេទទៅកន្លែងនោះ។

លោកអភិបាលព្រះសហគមន៍បន្ថែមថា «យើងត្រូវព្យាបាលទាំងរូបកាយ និងផ្លូវវិញ្ញាណ»។ លោកបញ្ជាក់​ថា សង្ឃឹមថាគ្លីនិកនេះមិនមែនជាកន្លែងមួយដែលជាបានត្រឹមតែរូបកាយទេ ក៏ប៉ុន្តែជាកន្លែងមួយដែលយល់ច្បាស់លាស់អំពីតម្រូវការរបស់អ្នកជំងឺ និងយល់ពីស្ថានភាពពួកគាត់ ដើម្បីជួយគាត់ឱ្យមានសេចក្ដីសុខសាជាថ្មី។

លោករំឭកទៀតថា ឆ្នាំ២០២១-២០២៣ សម្ដេចប៉ាបបានអញ្ជើញយើង ឲ្យចូលរួមក្នុងមហាសន្និបាតក្រោមប្រធានបទ “ដើរជាមួយគ្នា” និងយើងធ្វើដំណើរជាមួយគ្នានៅក្នុងព្រះសហគមន៍ភូមិភាគភ្នំពេញ ដោយរួមគ្នាប្រកាសដំណឹងល្អ តាមរយៈគ្រប់វិស័យទាំងអស់ ក្នុងនាមព្រះយេស៊ូដែលចាត់យើងឲ្យទៅប្រកាសដំណឹងល្អ។

លោកអភិបាលបន្ថែមថា «កន្លែងនេះជាកន្លែងដែលយើងប្រកាសដំណឹងល្អក្នុងនាមជាគ្រីស្តបរិស័ទ។ និងជាឱកាសមួយដើម្បីឱ្យយើងគិតសាជាថ្មីតាមរយៈកម្មវិធីផ្សេងៗដើម្បីទៅជាសាក្សីរបស់ព្រះជាម្ចាស់ដោយណែនាំឱ្យអ្នកតូចតាចជាពិសេសអ្នកដែលគ្មានទីពឹងអាចរកឃើញពន្លឺថ្មី និងអាចធ្វើដំណើរទៅមុខបាន»។

លោកអភិបាល​ព្រះសហគមន៍បាន​ឲ្យ​ដឹងថា «នេះពេលវេលាមួយដើម្បីឱ្យយើងគិតសារជាថ្មីដើម្បីកសាងព្រះសហគមន៍នៅលើទឹកដីកម្ពុជា»។

លោកអភិបាល​ព្រះសហគមន៍​ភូមិភាគភ្នំពេញបាន​បន្ថែម​ថា ទោះបីជាមាន​សាសនទូត​នានា​ពីប្រទេស​ផ្សេងៗ​ ប៉ុន្តែ​ការ​ធ្វើដំណើររួមជាមួយគ្នាដោយចែករំលែកបទពិសោធ ការ​ចូលរួម​សហការគ្នាពី​ស្ថាប័ន​មួយ​ទៅ​ស្ថាប័ន​មួយទៀត​ក្នុងព្រះសហគមន៍គឺ​ជា​ចំណុច​សំខាន់។  លោកអភិបាល​អូលីវីយ៉េ បន្ត​ថា វិស័យសុខភាពអាចទៅមុខ លុះត្រាតែយើងរួមគ្នានៅក្នុងការសហការ នៅក្នុងការយល់ដឹងក្នុងនាមបព្វជិតបព្វជិតាដែលមានព្រះយេស៊ូពន្លឺបំភ្លឺយើង ដើម្បីណែនាំបងប្អូនឲ្យទៅជាពលរដ្ឋល្អ មានសុខភាពល្អ មានសេចក្ដីសង្ឃឹម និងមានកម្លាំងកាយកម្លាំងចិត្ត ដើម្បីប្រកាសដំណឹងល្អលើទឹកដីកម្ពុជា។

ក្រោយអភិបូជា លោកអភិបាលព្រះសហគមន៍ប្រសិទ្ធិពរលើទឹក និងប្រោសទឹកព្រះពរលើមនុស្សនិងអាគារគ្លីនិក រួចកាត់ខ្សែបូណ៌ដែលជាសញ្ញាបង្ហាញថាដាក់ឱ្យប្រើប្រាស់ជាផ្លូវការណ៍។

តាមការឱ្យដឹងពីលោក អៀ ទីទី (Ea Titi) ប្រធានផ្នែកកម្មវិធីសុខភាពនៃគ្លីនិកកូមីសូ មានប្រសាសន៍ថា អាគារទាំង​នោះ​ចែក​ចេញ​ជា​ៗ​ផ្នែក​ធំៗគឺ សម្រាប់​ផ្នែកមាត់​ធ្មេញ និង​ពិគ្រោះ​ជំងឹ​ទូទៅ។ អគារផ្នែកធ្មេញ ដោយបំពាក់កៅអី​ធ្មេញ​ដែលមានឧបករណ៍ចំនួន៥ និងម៉ាស៊ីនថតx-ray បន្ទប់សម្អាតធ្មេញ បន្ទប់ពិគ្រោះ បន្ទប់សម្អាតសម្ភារ។ រីឯផ្នែកជំងឺទូទៅមាន៦បន្ទប់ ក្នុងនោះមាន បន្ទប់អ្នកជំងឺសម្រាករយ:ពេលខ្លី បន្ទប់ការិយាល័យ បន្ទប់វះកាត់ជំងឺ​ស្រាល បន្ទប់សម្អាតសម្ភារ បន្ទប់ថ្នាំពេទ្យ បន្ទប់ថតនិងតេស្តឈាម និងឃ្លាំងដាក់​សម្ភារ ហើយ​ក៏​មាន​បន្ទប់ក្រុមហ៊ុនកូមីសូដើម្បីគ្រប់គ្រងដីគ្លីនិកផងដែរ។

តាមការ​ឲ្យ​ដឹង​របស់​លោក​ទីទី ឲ្យ​ដឹងថា បច្ចុប្បន្ន​គ្លីនិក​មាន​បុគ្គលិក​ចំនួន​៣នាក់ និង​វេជ្ជបណ្ឌិត​២​នាក់។ គ្លីនិកកូមីសូ នឹងចាប់ផ្ដើមទទួលអ្នកជំងឺឱ្យមកទទួលសេវាកម្មព្យាបាលនៅបុណ្យចូលឆ្នាំខ្មែរខាងមុខនេះ ដោយ​ឥតបង់​ថ្លៃ៕

ដោយដាលីស