គណៈកម្មការពលករនៃព្រះសហគមន៍កាតូលិកភ្នំពេញ បានរៀបចំកម្មវិធីសិក្ខាសាលាស្ដីអំពី «សុខភាពកម្មករ» ដោយមានសិក្ខាកាមចូលរួមជិត៣០នាក់ ធ្វើឡើងនៅព្រះសហគមន៍សន្តសិលា សន្តប៉ូល ភ្នំពេញថ្មី នាល្ងាចថ្ងៃអាទិត្យ ទី០១ ខែឧសភា ឆ្នាំ២០២២ ។
កញ្ញា ម៉ៅ ស្រីកែវ ជាលេខាធិការនៃគណៈកម្មការពលកររបស់ព្រះសហគមន៍កាតូលិកភូមិភាគភ្នំពេញ និងជាអ្នកសម្របសម្រួលនៅក្នុងកម្មវិធីនេះបានឲ្យដឹងថា យើងចង់ឲ្យខាងកម្មករកម្មការិនី យល់ដឹងបន្ថែមទៀត ទៅលើការបៀតបៀនកេរ្ត៍ខ្មាសនៅក្នុងរោងចក្រ និងចេះការពារខ្លួនរបស់គាត់ និងមិត្តរួមការងារពីអំពើនេះ។
កម្មវិធីសិក្ខាសាលាដែលរៀបចំឡើងដោយគណៈកម្មការពលករព្រះសហគមន៍កាតូលិកភ្នំពេញ ដែលមានសិក្ខាកាមដែលជាកម្មករកម្មការិនី មកពីរោងចក្រនានាដែលកំពុងបំពេញការងារនៅក្នុងទីក្រុងភ្នំពេញ ចំនួន២៩នាក់ ធ្វើឡើងដោយមានអ្នកស្រី នៅ សុវ៉ាត់ថា ដែលជាវាគ្មិនកិត្តិយស មកពីអង្គការឃែរ កម្ពុជា (Care Cambodia)។
កញ្ញាស្រីកែវ បានបន្ថែមថា ជាទូទៅគណៈកម្មការពលកររបស់ព្រះសហគមន៍កាតូលិកភូមិភាគភ្នំពេញតែងតែចុះសួរសុខទុក្ខបងប្អូនកម្មករ-ការិនី ជារៀងរាល់ខែ ដោយឈ្វេងយល់អំពីការងារនិងការរស់នៅរបស់ពួកគាត់ ដើម្បីលើកទឹកចិត្ត និងអប់រំសុខភាពដល់ពួកគាត់។
អ្នកស្រី អ៊ូ អន អាយុ៤១ឆ្នាំ ជាកម្មការនីមកពីរោងចក្រ ក្វាន តុង បានឲ្យដឹងថា កម្មវិធី ក្នុងថ្ងៃនេះ ផ្តល់ចំណេះដឹង និងជំរុញឲ្យមានភាពក្លាហានដោះស្រាយបញ្ហារំលោភបំពានឬបៀតបៀនកេរ្តិ៍ខ្មាសជាមួយថ្នាក់លើ និងហ៊ាននិយាយណែនាំដល់មិត្តរួមការងារដែលនឹងជួបបញ្ហានេះ។
អ្នកស្រីអន បន្ថែមថា គាត់ចង់ចូលរួមកម្មវិធីផ្តល់ចំណេះដឹងល្អៗបែបនេះបន្ថែមទៀត។ គាត់ក៏បានសូមឲ្យកម្មករ-ការិនី ដែលរងប៉ះពាល់រំលោភផ្លូវភេទ «សូមកុំខ្លាច យើងមានការតស៊ូ យើងកុំភ័យ យើងត្រូវតែហ៊ានប្រឈមមុខដើម្បីដោះស្រាយបញ្ហានេះទាំងអស់គ្នា។»
ទន្ទឹមនឹងនោះ លោក សេង សារិទ្ធ អាយុ ២៨ឆ្នាំ ដែលជាបុគ្គលិកផ្នែកអគ្គិសនី បាននិយាយថា «ខ្ញុំគិតថាកម្មវីធីនេះ ជួយដល់កម្មករជាច្រើន ហើយខ្ញុំសង្ឃឹមថា នឹងមានកម្មវិធីបែបនេះបន្តរហូតដល់ឆ្នាំក្រោយៗទៀត។ ខ្ញុំក៏សំណូមពរដល់បុគ្គលិក កម្មករ កម្មការិនីទាំងអស់គ្នាចូលរួមក្នុងកម្មវិធីនេះអោយបានញឹកញាប់ ដើម្បីទទួលបានចំណេះដឹងថ្មីៗ និងល្អៗបន្ថែមទៀត ហើយកម្មវិធីនេះគឺជាថ្នាលបណ្ដុះបណ្ដាលផ្នត់គំនិត នឹងផ្លាស់ប្ដូរការគិត របស់ពួកយើងផងដែរ។»
កញ្ញាម៉ៅ ស្រីកែវ បន្ថែមថា ក្រៅពីជំនួបកម្មករ គណៈកម្មការនេះ ក៏មានកម្មវិធីជាច្រើនទៀតជាមួយពួកគាត់ដែរ ដូចជា កិច្ចប្រជុំរៀងរាល់២ដងក្នុងមួយខែ បោះជំរំជាមួយគ្នា និងប្រារព្ធទិវាពលកម្មអន្តរជាតិជាដើម៕
ដោយ ចាន់ ម៉ានុត
