| អត្ថបទទី១៖ កិច្ចការ ២,១-១១មានអណ្ដាតភ្លើងបែកចេញពីគ្នា ចុះមកសណ្ឋិតលើពួកគេម្នាក់ៗ។ កក ២,៣អត្ថបទទី២៖ រ៉ូម ៨,៨-១៧បងប្អូនបានទទួលព្រះវិញ្ញាណដែលធ្វើឲ្យបងប្អូនទៅជាបុត្ររបស់ព្រះជាម្ចាស់។ រម ៨,១៥ដំណឹងល្អ៖ យ៉ូហាន ១៤,១៥-១៦.២៣ខ-២៦ព្រះដ៏ជួយការពារ គឺព្រះវិញ្ញាណដ៏វិសុទ្ធ។ យហ ១៤,២៦ |
“សេរីភាពនៃព្រះវិញ្ញាណដ៏វិសុទ្ធ”
បងប្អូនជាទីស្រឡាញ់
ថ្ងៃនេះ ជាថ្ងៃពិសេសសម្រាប់ព្រះសហគមន៍យើងនៅក្នុងពិភពលោក ដែលគោរពព្រះវិញ្ញាណដ៏វិសុទ្ធយាងមក។ ជាពេលវេលាដែលយើងទន្ទឹងរង់ចាំ ព្រះយេស៊ូបានផ្ញើព្រះវិញ្ញាណដ៏វិសុទ្ធ ដើម្បីឱ្យយើងទៅជាគ្រីស្តបរិស័ទអាចទៅប្រកាសដំណឹងល្អដ៏ពេញលក្ខណៈ ដើម្បីឱ្យយើងជាគ្រីស្តបរិស័ទរស់នៅដោយដង្ហើមដែលយើងទទួលពីព្រះជាម្ចាស់។ បងប្អូនទាំង១៩នាក់ ដែលនឹងទទួលអគ្គសញ្ញាលាបថ្ងាសថ្ងៃនេះ យើងទទួលព្រះវិញ្ញាណដ៏វិសុទ្ធ។ យើងបានទទួលពិធីជ្រមុជទឹកហើយមែន ប៉ុន្តែពេលយើងទទួលព្រះវិញ្ញាណដ៏វិសុទ្ធ បីដូចជាយើងពោរពេញដោយដង្ហើមរបស់ព្រះអង្គនៅក្នុងសួតរបស់យើង នៅក្នុងខ្លួនរបស់យើង គឺជីវិតរបស់ព្រះអង្គផ្ទាល់។
ខ្ញុំគិតថា សម្រាប់យើងនៅក្នុងឆ្នាំនេះជាពេលវេលាមួយ ប្រហែលមានបទពិសោធន៍ប្លែកអំពីអត្ថន័យនៃព្រះវិញ្ញាណដ៏វិសុទ្ធ នៅក្នុងជីវិតរបស់យើងជាគ្រីស្តបរិស័ទ។ ដោយសារ យើងបានរស់នៅក្នុងរយៈពេល២ឆ្នាំកន្លងមកជាមួយកូវីដ-១៩ នៅក្នុងបរិយាកាសដែលណែនាំឱ្យយើងមានអារម្មណ៍ថា ដង្ហើមរបស់យើងស្ទើរ។ យើងនៅដោយគ្មានសិទ្ធិជួបជុំគ្នា រយៈពេល២ឆ្នាំនេះណែនាំឱ្យយើងរស់នៅក្នុងកន្លែងដែលមានព្រំដែន ដែលមានជញ្ជាំង ណែនាំឱ្យយើងឥតមានបទពិសោធន៍អំពីសេរីភាព។ ប្រទេសចិនបានបិទទីក្រុងសៀងហៃ ដែលមានប្រជាជនប្រហែល២៥លាននាក់ គេបានបិទទាំងស្រុងក្នុងរយៈពេល២ខែកន្លងមក ដើម្បីអនុវត្តនយោបាយកូវីដស្មើសូន្យរបស់រដ្ឋាភិបាលចិន។ គេឱ្យប្រជាជននៅតែក្នុងផ្ទះតែម្តង ប៉ុន្មានថ្ងៃមុនគេបានបើកឡើងវិញ ប្រជាជនចេញពីផ្ទះហើយគេបានផ្តល់សក្ខីភាពថា គេសប្បាយចិត្តណាស់។ ឥលូវនេះគេពោរពេញដោយសេរីភាព ពោរពេញដោយកម្លាំង យើងសប្បាយចិត្តជួបជុំគ្នាជាមួយបងប្អូន ជាមួយមិត្តភ័ក្តិ ជាមួយគ្រួសារ។ ដោយសារ យើងអាចទទួលខ្យល់ដង្ហើមបរិសុទ្ធនៅក្នុងដួងចិត្ត នៅក្នុងសួតរបស់យើង។
បងប្អូនជាទីស្រឡាញ់ នេះជាបទពិសោធន៍មួយពិសេស ដែលណែនាំឱ្យយើងយល់ថាយើងពោរពេញដោយអំណរសប្បាយ នៅពេលយើងដើរបាន នៅពេលយើងបានទទួលខ្យល់បរិសុទ្ធ នៅពេលយើងអាចជួបជុំគ្នា យើងអាចនិយាងបានថា “ជយោសេរីភាព”។ នៅឆ្នាំ២០១៤ ខ្ញុំបានទៅទីក្រុងសៀងហៃ ខ្ញុំបានធ្វើអគ្គសញ្ញាលាបថ្ងាសឱ្យគ្រីស្តបរិស័ទជនជាតិបារាំង។ ជាធម្មតា នៅពេលយើងធ្វើអគ្គសញ្ញាលាបថ្ងាសយើងប្រើប្រេងគ្រីស្មា (ប្រេងពិសិដ្ឋ ដែលលោកអភិបាលរៀបចំមុនបុណ្យចម្លង)។ ដែលមានបូជាចារ្យទាំងអស់ក្នុងភូមិភាគមកជួបជុំគ្នា ដើម្បីធ្វើព្រះពរលើប្រេងពិសិដ្ឋ។ ប៉ុន្តែ នៅឆ្នាំនោះគេគ្មានប្រេងពិសិដ្ឋទេ គេបានទៅខ្ចីនៅភូមិភាគផ្សេង។ ព្រោះថា នៅឆ្នាំ២០១៤លោកអភិបាលថ្មីក្រោយពេលទទួលអគ្គសញ្ញាតែងតាំងជាអភិបាលរួចហើយ ត្រូវប៉ូលីសចាប់និងបង្ខាំងគាត់ឱ្យនៅតែក្នុងផ្ទះមិនឱ្យទៅណា។ នេះជាជីវិតរបស់យើង ជួនកាលយើងពោរពេញដោយសេរីភាព ជួនកាលយើងរស់នៅក្នុងកន្លែងចង្អៀតចង្អល់ ដែលណែនាំឱ្យយើងបីដូចជាជាប់នៅក្នុងមន្ទីរឃុំឃាំងដែរ។
ម្សិលមិញ ខ្ញុំបានប្រសិទ្ធីពរលើព្រះវិហារថ្មីនៅកំពត យើងបានស្តាប់អត្ថបទអំពីសន្តប៉ូលដែលទៅដល់ទីក្រុងរ៉ូម។ សន្តប៉ូល គាត់សប្បាយចិត្ត គាត់បានជួលផ្ទះមួយហើយគាត់បង្រៀនមនុស្សទាំងអស់ដែលចង់មកស្តាប់គាត់ បង្រៀនអំពីព្រះរាជ្យរបស់ព្រះជាម្ចាស់ បង្រៀនអំពីព្រះយេស៊ូគ្រីស្តផ្ទាល់។ នៅពេលនោះ លោកប៉ូល គាត់បានសរសេរថា “ឥតមានអ្វីសោះ ដែលរារាំងផ្លូវដើម្បីបង្រៀន” គាត់ដូចជាពោរពេញដោយសេរីភាព។ ប៉ុន្តែ ពីរឆ្នាំក្រោយមកចាប់ផ្តើមមានបញ្ហាហើយ ប៉ូលីសនិងទាហានរបស់ចៅអធិរាជរ៉ូមាំង បានមកចាប់គាត់ហើយសម្លាប់គាត់ដោយកាត់ក បាត់បង់សេរីភាពអស់ហើយ។ បងប្អូនជាទីស្រឡាញ់ នេះជាជីវិតរបស់យើង មានសេរីភាពផង គ្មានសេរីភាពផង សេរីភាពនិងព្រំដែន សេរីភាពនិងជញ្ជាំងដែលណែនាំឱ្យយើងគាំង។ ប៉ុន្តែព្រឹកនេះ ជាព្រឹកពិសេសដែលព្រះវិញ្ញាណដ៏វិសុទ្ធយាងមក យើងបានស្តាប់នៅក្នុងអត្ថបទទី២ “បងប្អូនពុំបានទទួលវិញ្ញាណដែលធ្វើឱ្យបងប្អូនទៅជាខ្ញុំបម្រើ ហើយឱ្យនៅតែភ័យខ្លាចទៀតនោះទេ គឺបងប្អូនបានទទួលព្រះវិញ្ញាណដែលធ្វើឱ្យបងប្អូនទៅជាបុត្ររបស់ព្រះជាម្ចាស់”។ យើងលែងភ័យខ្លាច លែងរស់នៅក្នុងបន្ទប់ដ៏តូចដូចក្រុមគ្រីស្តទូតពីដើម ព្រះវិញ្ញាណដ៏វិសុទ្ធណែនាំឱ្យយើងលែងភ័យខ្លាច។ ណែនាំឱ្យយើងចេញ ពីមន្ទីរឃុំឃាំងដែលយើងកសាងនៅក្នុងដួងចិត្តរបស់យើង ដើម្បីរស់នៅក្នុងសេចក្តីសុខសាន្ត។
បងប្អូនជាទីស្រឡាញ់ ពេលយើងមើលឃើញការភ័យខ្លាចរបស់យើងក្នុងរយៈពេល២ឆ្នាំកន្លងមក បើកបិទសង្គម បើកបិទព្រំដែន មានព្រះវិហារយើងចូលមិនបាន…។ ប៉ុន្តែ ឥឡូវនេះយើងពោរពេញដោយអំណរសប្បាយ ដោយសារពីប៉ុន្មានសប្តាហ៍កន្លងមកយើងមានបទពិសោធន៍អំពីសេរីភាព។ បទពិសោធន៍អំពីសេរីភាពដែលយើងអាចជួបជុំគ្នា សេរីភាពដែលអាចដើរកំសាន្តជាមួយគ្នា សេរីភាពដែលអាចចូលព្រះវិហារ សេរីភាពដែលអាចធ្វើការបាន…។ ប៉ុន្តែ នេះជាសេរីភាពដែលបន្តនៅមានព្រំដែន ដោយសារថ្ងៃស្អែកអាចមានវិន័យថ្មីម្តងទៀត។ សេរីភាពសំខាន់បំផុតដែលយើងទទួលថ្ងៃនេះ ជាសេរីភាពផ្ទៃក្នុងនៅក្នុងដួងចិត្តរបស់យើង។ ព្រឹកនេះ ដោយទទួលព្រះវិញ្ញាណដ៏វិសុទ្ធយើងយល់ថា ព្រះវិញ្ញាណដ៏វិសុទ្ធយាងចូលនៅក្នុងដួងចិត្តរបស់យើង ដើម្បីណែនាំឱ្យយើងមានពិសោធន៍យ៉ាងពិសេសបំផុត។ ព្រះវិញ្ញាណដ៏វិសុទ្ធយាងមក ដើម្បីរំដោះយើងពីអំពើបាប រំដោះយើងពីទុក្ខលំបាក រំដោះយើងពីការឈឺចាប់ រំដោះយើងដើម្បីឱ្យយើងរស់នៅក្នុងព្រះជន្មរបស់ព្រះជាម្ចាស់ផ្ទាល់។
យូរៗម្តង ខ្ញុំបានទៅមន្ទីរឃុំឃាំងនៅព្រៃស ដើម្បីថ្វាយអភិបូជាសម្រាប់ពួកគាត់ រាល់ដងខ្ញុំមានអារម្មណ៍មួយប្លែក ណែនាំឱ្យខ្ញុំរំភើបដែរ។ ដោយសារ ខ្ញុំបានជួបជាមួយអ្នកជាប់នៅទីនោះ មានខ្លះជាប់១០ឆ្នាំ ២០ឆ្នាំ ៣០ឆ្នាំ… នៅពេលយើងទុកពេលឱ្យគេអធិដ្ឋានទូលអង្វរព្រះជាម្ចាស់ (ធម៌អង្វរសកល) ខ្ញុំបានទុកឱ្យគេអធិដ្ឋានដោយសេរី។ ពេលខ្ញុំបានស្តាប់ របៀបដែលគេអរព្រះគុណព្រះជាម្ចាស់ដែលណែនាំឱ្យគេមានជីវិត អរព្រះគុណព្រះជាម្ចាស់ដែលគង់នៅជាមួយគេ។ នៅពេលនោះ ខ្ញុំយល់ថា សេរីភាពមិនមែនតែរឿងដែលយើងអាចដើរទៅណាតាមចិត្ត ទោះបីយើងរស់នៅក្នុងមន្ទីរឃុំឃាំង គ្មានសេរីភាពរស់នៅក្នុងសង្គមជាមួយគ្រួសារផ្ទាល់ខ្លួនបាន។ ប៉ុន្តែ យើងមានសេរីភាពមួយទៀត គឺជាសេរីភាពផ្ទៃក្នុង ដែលយើងបានទទួលពីព្រះជាម្ចាស់ ហើយគ្មានមនុស្សណាម្នាក់អាចយកពីយើងបានទេ។ យើងបានស្តាប់ សក្ខីភាពពីគ្រីស្តបរិស័ទរបស់យើងនៅក្នុងសម័យខ្មែរក្រហម ដែលបាត់បង់សេរីភាពពិតមែន ប៉ុន្តែនៅក្នុងដួងចិត្តផ្ទាល់ខ្លួនយើងមានសេរីភាពដើម្បីអធិដ្ឋាន មានសេរីភាពដើម្បីទូលអង្វរព្រះជាម្ចាស់។ យើងមានសេរីភាពផ្ទៃក្នុង នេះជាអំណោយទានដែលយើងបានទទួលពីព្រះវិញ្ញាណដ៏វិសុទ្ធ។
ពិតមែន ព្រះសហគមន៍របស់យើងរស់នៅដោយសារព្រះវិញ្ញាណដ៏វិសុទ្ធ ព្រះសហគមន៍បានចាប់កំណើតនៅក្បែរឈើឆ្កាង។ នៅពេលគេយកលំពែងចាក់ទ្រូងព្រះយេស៊ូ នៅពេលនោះមានឈាម មានទឹក គឺព្រះវិញ្ញាណដ៏វិសុទ្ធដែលយាងចេញពីបេះដូងរបស់ព្រះយេស៊ូ ដើម្បីបង្កើតព្រះសហគមន៍។ ព្រះសហគមន៍បានទទួលបេសកកម្ម នៅពេលព្រះវិញ្ញាណដ៏វិសុទ្ធយាងមក រួមជាមួយព្រះនាងព្រហ្មចារិនីម៉ារី ដែលថ្ងៃស្អែកយើងគោរពជាមាតានៃព្រះសហគមន៍។ ពិតមែន ព្រះសហគមន៍របស់យើងរស់នៅក្នុងសេរីភាពមួយយ៉ាងពិសេស គឺសេរីភាពនៃព្រះវិញ្ញាណដ៏វិសុទ្ធ។ ជាសេរីភាពផ្សេងពីសេរីភាពដែលយើងបានទទួលតាមច្បាប់ ឬនៅក្នុងប្រទេសនីមួយៗ ជាសេរីភាពផ្ទៃក្នុងនៃដួងចិត្តរបស់យើង។
ថ្ងៃនេះ យើងមានបេក្ខជន១៩នាក់ជាសញ្ញាសម្គាល់ ជាសាក្សីយ៉ាងពិសេស ដែលណែនាំឱ្យយើងយល់ថា នៅពេលយើងសុខចិត្តធ្វើដំណើរជាមួយព្រះយេស៊ូ យើងលែងនៅឯកោ យើងលែងនៅម្នាក់ឯង។ ដូចព្រះយេស៊ូមានព្រះបន្ទូលសន្យាថា “ខ្ញុំនឹងផ្ញើព្រះវិញ្ញាណដ៏វិសុទ្ធ ជាព្រះដែលជួយការពារ ដែលព្រះបិតាចាត់ឱ្យមកក្នុងនាមខ្ញុំ និងបង្រៀនសេចក្តីទាំងអស់ដល់អ្នករាល់គ្នា ព្រមទាំងរំលឹកអ្វីៗដែលខ្ញុំបានប្រាប់ឱ្យអ្នករាល់គ្នាផង”។ ហេតុនេះហើយ នៅក្នុងព្រះវិញ្ញាណដ៏វិសុទ្ធទោះបីព្រះយេស៊ូយាងឡើងស្ថានបរមសុខហើយ យើងដឹងថាជីវិតរបស់យើងពោរពេញដោយកម្លាំងថ្មី។ ពោរពេញដោយសេរីភាពយ៉ាងប្លែក តាមរយៈព្រះអំណោយទានទាំងប្រាំពីរ ដែលបងប្អូននឹងទទួលបន្តិចទៀត។ ប៉ុន្តែអ្វីដែលសំខាន់ដែរ គឺឱ្យយើងមើលផ្លែនៃអំណោយទានទាំងនោះ ផ្លែនេះណែនាំឱ្យយើងឈ្នះឧបសគ្គទាំងអស់។
ប្រសិនបើយើងពិចារណា ព្រះសហគមន៍របស់យើងក្នុងអំឡុងពេលកូវីដ-១៩រាតត្បាត ភូមិភាគភ្នំពេញយើងមិនបានងាប់ទេ។ យើងនៅមានជីវិតរបៀបផ្សេងៗពីធម្មតា ដោយសារព្រះវិញ្ញាណដ៏វិសុទ្ធណែនាំឱ្យយើងបង្កើតរបៀបថ្មីៗ ដើម្បីរស់នៅក្នុងការអធិដ្ឋាន នៅក្នុងធម៌មេត្តាករុណា នៅក្នុងជំនឿនឹងសេចក្តីសង្ឃឹមរបស់យើង។ ផ្លែដែលណែនាំឱ្យយើងឈ្នះឧបសគ្គទាំងអស់ គឺជំនឿ សេចក្តីស្រឡាញ់ សេចក្តីសុខសាន្ត អំណរសប្បាយ ការលើកលែងទោស ចិត្តស្លូតបូត ចិត្តបរិសុទ្ធ។ នេះណែនាំឱ្យយើងទៅមុខ នៅក្នុងគ្រប់កាលៈទេសៈនៃជីវិត ដូច្នេះថ្ងៃនេះយើងអាចនិយាយបានថា យើងពោរពេញដោយសេចក្តីសង្ឃឹម។ យើងនៅក្នុងសន្និបាត២០២១-២០២៣របស់ព្រះសហគមន៍សកល យើងធ្វើដំណើររួមជាមួយគ្នា។ ពីរសប្តាហ៍មុន យើងបានប្រមូលចម្លើយនៅក្នុងភូមិភាគភ្នំពេញទាំងអស់ ដែលជាចម្លើយសំខាន់ណាស់ដែលខ្ញុំនឹងផ្ញើទៅទីក្រុងរ៉ូម។
ខ្ញុំសូមលើកយកចំណុចសំខាន់ៗ ដើម្បីធ្វើដំណើររួមជាមួយគ្នានៅក្នុងព្រះសហគមន៍៖
- ដោយទុកឱ្យព្រះវិញ្ញាណដ៏វិសុទ្ធដឹកនាំយើង ដោយទុកឱ្យសេរីភាពនៅក្នុងខ្លួនយើងអាចរីកចម្រើនថែមទៀត គឺកែប្រែចិត្តគំនិត។
- ធម៌មេត្តាករុណា ដែលយើងសម្តែងយ៉ាងសកម្ម គ្រប់ពេលវេលានៅក្នុងជីវិតរបស់យើង។
- ឱ្យយើងសហការគ្នាជាគ្រីស្តបរិស័ទ ខ្ញុំសូមអរគុណដល់បងប្អូនដែលនិយាយភាសាកូរ៉េ និយាយភាសាបារាំង និងនិយាយភាសាអង់គ្លេស ដែលបានចូលរួមថ្ងៃនេះ។ ដោយសារនេះ ជាសញ្ញាសម្គាល់ថាព្រះសហគមន៍របស់យើងជាព្រះសហគមន៍តែមួយ។
- ឱ្យយើងធ្វើដំណើររួមជាមួយគ្នា ដោយរកឃើញផ្លូវថ្មីដើម្បីប្រកាសដំណឹងល្អ កុំឱ្យយើងគាំង កុំឱ្យយើងខ្លាច កុំឱ្យយើងភ័យ។ នេះជាអត្ថន័យនៃពិធីបុណ្យរបស់យើងថ្ងៃនេះ នៅពេលយើងទទួលព្រះវិញ្ញាណដ៏វិសុទ្ធ យើងរកឃើញផ្លូវថ្មីជានិច្ច។ ជាមូលហេតុ ដែលព្រះសហគមន៍របស់យើងមានអាយុជាង២០២០ឆ្នាំ ដោយសារវត្តមានរបស់ព្រះវិញ្ញាណដ៏វិសុទ្ធ ដែលបានណែនាំឱ្យយើងថែរក្សាជំនឿពីដើម ដែលយើងបានទទួលពីក្រុមគ្រីស្តទូត។ ប៉ុន្តែ ណែនាំឱ្យយើងរកផ្លូវថ្មី មធ្យោបាយថ្មី ដើម្បីណែនាំឱ្យការសង្រ្គោះយាងមកនៅក្នុងព្រះសហគមន៍របស់យើង ជាពិសេសនៅក្នុងភូមិភាគរបស់យើង។
បងប្អូនជាទីស្រឡាញ់ ពិតមែនព្រះវិញ្ញាណដ៏វិសុទ្ធស្ថិតនៅជាមួយយើង ព្រះវិញ្ញាណដ៏វិសុទ្ធណែនាំឱ្យយើងទៅជាបុត្រធីតារបស់ព្រះជាម្ចាស់ ឱ្យយើងទៅជាអ្នកដែលទទួលមរតករបស់ព្រះជាម្ចាស់នៅក្នុងអង្គព្រះគ្រីស្ត។ ពិតមែន ព្រះវិញ្ញាណដ៏វិសុទ្ធរំដោះ ព្រះវិញ្ញាណដ៏វិសុទ្ធត្រាស់ហៅយើងឱ្យយើងចេះស្រឡាញ់គ្នាទៅវិញទៅមក។ ព្រះវិញ្ញាណដ៏វិសុទ្ធត្រាស់ហៅយើង ឱ្យយើងទៅជាគ្រីស្តទូត ឱ្យយើងទៅជាសាសនៈទូតនៃសុខសន្តិភាព។ ព្រះវិញ្ញាណដ៏វិសុទ្ធត្រាស់ហៅយើង ឱ្យយើងធ្វើដំណើររួមជាមួយគ្នា នៅក្នុងព្រះសហគមន៍រួមជាមួយព្រះនាងម៉ារី ដែលជាមាតារបស់យើង ដែលជាមាតានៃព្រះសហគមន៍។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
