ថ្ងៃនេះ យើងនឹកឃើញសេចក្តីស្រឡាញ់របស់ព្រះជាម្ចាស់តាមរយៈព្រះយេស៊ូ។ ជាពេលវេលាដែលយើងត្រូវរិះគិតពីសកម្មភាពរបស់យើងប្រចាំថ្ងៃ ជាគ្រីស្តបរិស័ទអំពីភាពកត្តញូចំពោះព្រះបិតា។ លោកអភិបាលអូលីវីយ៉េមានប្រសាសន៍បែបនេះទៅកាន់គ្រីស្តបរិស័ទនៅព្រះវិហារព្រះបេះដូងព្រះយេស៊ូ កាលពីល្ងាចថ្ងៃទី២៤ ខែមិថុនា ឆ្នាំ២០២២។
នៅក្នុងថ្ងៃបុណ្យគោរពព្រះបេះដូងរបស់ព្រះយេស៊ូ លោកអភិបាលអូលីវិយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ បានរំលឹកថា នៅក្នុងជីវិតកូនខ្មែរយើងអ្វីដែលសំខាន់ គឺត្រូវមានចិត្តកត្តញ្ញូចំពោះឪពុកម្តាយដែលបានបង្កើតយើង ចំពោះលោកគ្រូអ្នកគ្រូដែលបានបង្រៀនយើង ចំពោះព្រះមហាក្សត្រនៃប្រទេសយើង។ “ប៉ុន្តែចំពោះយើងជាគ្រីស្តបរិស័ទ យើងក៏ត្រូវកត្តញូចំពោះព្រះបិតាជាប្រចាំ ព្រោះចួនកាលយើងភ្លេចសេចក្តីស្រឡាញ់របស់ព្រះជាម្ចាស់ចំពោះយើង។” លោកអភិបាលបញ្ជាក់។
លោកអភិបាលអូលីវីយ៉េពន្យល់ថា ពេលបាត់គ្រីស្តបរិស័ទម្នាក់ “ព្រះបិតាព្រួយបារម្ភ ព្រះអង្គរត់តាម តែមិនមែនដើម្បីស្តីអោយ មិនមែនវ៉ៃ ឬពិន័យ តែដើម្បីទទួលស្វាគមន៍សារថ្មី លើកលែងទោសអោយ បង្ហាញអំណរសប្បាយដែលរកឃើញកូនវិញ។”
ក្នុងឱកាសនោះ លោកអភិបាលរំឭកលោកបូជាចារ្យទទួលខុសត្រូវព្រះសហគមន៍យ៉ាងនេះថា នៅក្នុងព្រះសហគមន៍របស់យើងមានគ្នាតិច ជួនកាលយើងខ្ចាត់ខ្ចាយ ប៉ុន្តែលោកពុកដែលរកឃើញកូនមកវិញសប្បាយចិត្ត តែគ្រីស្តបរិស័ទមិនអាចត្រឡប់មកវិញបានទេ ប្រសិនបើលោកឪពុកមិនទៅតាម។
លោកអភិបាលបានដាស់តឿនឱ្យគ្រីស្តបរិស័ទត្រូវមាន ភាពកត្តញូចំពោះព្រះបិតា គឺត្រូវ “អធិដ្ឋាន អោយចេះស្តាប់ព្រះបន្ទូល អោយចេះនឹកឃើញព្រះបិតាគ្រប់ពេលវេលា” និងត្រូវ “យកចិត្តទុកដាក់ជាមួយបងប្អូនឯទៀតៗ” ស្របតាមព្រះបន្ទូលព្រះយេស៊ូ ដែលមិនត្រឹមតែស្តាប់ តែត្រូវអនុវត្តជាក់ស្តែង។” លោកបន្ថែមថា “ដូច្នេះចិត្តកត្តញូរបស់យើងនឹងពេញលក្ខណៈ។”
ព្រះវិហារព្រះបេះដូងព្រះយេស៊ូនៃព្រះសហគមន៍ព្រែកតាទែន ជាព្រះសហគមន៍ថ្មី បង្កើតឡើងក្នុងឆ្នាំ២០១១ ស្ថិតនៅឃុំព្រែកតាទែន ស្រុកពញាឮ ខេត្តកណ្តាលដែលមានចម្ងាយប្រមាណ២០គីឡូម៉ែត្រពីទីក្រុងភ្នំពេញ។ ព្រះសហគមន៍នេះមានគ្រីស្តបរិស័ទចំនួន៨នាក់ប៉ុណ្ណោះ។ នេះបើតាមប្រសាសន៍របស់លោកបូជាចារ្យចន ពេញ អ្នកទទួលខុសត្រូវព្រះសហគមន៍នេះ។
ក្នុងពិធីបុណ្យនេះ មានប្រជាជនក្នុងភូមិមកចូលរួមយ៉ាងច្រើនកុះករ។ លោកអភិបាលអូលីវីយ៉េ មានប្រសាសន៍បន្តថា ការចូលរួមរបស់ពួកគាត់ថ្ងៃនេះ បង្ហាញថាយើងជាគ្រួសារមួយដែលចេះស្វាគមន៍គ្នាទៅវិញទៅមក នៅក្នុងនាមរបស់ព្រះយេស៊ូដែលស្រឡាញ់យើង និងត្រាស់ហៅយើងអោយក្លាយជាបុត្រាបុត្រីរបស់ព្រះជាម្ចាស់។ ហើយក្នុងនាមព្រះយេស៊ូយើងត្រូវបង្ហាញសេចក្តីស្រឡាញ់និងធម៌មេត្តាករុណាចំពោះគ្នាទៅវិញទៅមក។
លោកបូជាចារ្យចន ពេញ បានឱ្យដឹងថា ព្រះសហគមន៍តូចនេះមានសកម្មភាព ភាគច្រើនគឺផ្នែកធម៌មេត្តាករុណា ដូចជាចែកម្ហូបអាហារដល់អ្នកក្រខ្សត់ បានសង់ផ្ទះចំនួន២ដល់អ្នកភូមិក្រីក្រ ផ្តល់ការអប់រំដល់កុមារតូចៗ។ លោកបូជាចារ្យបន្ថែមថា ពេលនេះព្រះសហគមន៍កំពុងមានមនុស្សមួយចំនួនឈ្វេងយល់អំពីព្រះជាម្ចាស់។ ហើយនៅចុងខែនេះនឹងមានបេក្ខជន៣រូបនឹងទទួលពិធីជ្រមុជទឹក ដែលធ្វើឱ្យព្រះសហគមន៍មានសមាជិកទាំងអស់១១នាក់៕
ដោយកែវ កញ្ញា
