ជំទង់ចំនួន១៤០នាក់ មកពីមណ្ឌលសកម្មភាពទាំង៩របស់ព្រះសហគមន៍កាតូលិកភូមិភាគភ្នំពេញ ដែលមានអាយុចាប់ពី១៣ដល់១៨ឆ្នាំ បានចូលរួមកម្មវិធីបោះជំរំ ស្តីអំពី “បរិស្ថានជាជីវិត” ដែលរៀបចំដោយក្រុមការិយាល័យជំទង់ ភូមិភាគភ្នំពេញ ដែលធ្វើឡើងនៅឌឹវ៉ាញភ្នំវល្លិ៍ (The Vine Phnom Vor) នៃខេត្តកែប៧-៩ ខែតុលានេះ។
តាមការឱ្យដឹងពីអ្នកស្រី នូវ ម៉ាលីន អ្នកទទួលខុសត្រូវផ្នែកជំទង់ នៃការិយាល័យ យុវជន ជំទង់ កុមារ និងគ្រួសារភូមិភាគភ្នំពេញ បានឱ្យដឹងថា ជំនួបជំទង់ភូមិភាគភ្នំពេញឆ្នាំ ២០២២ នេះ ផ្តោតសំខាន់លើគុណតម្លៃនៃបរិស្ថាន និងឈ្វេងយល់អំពីស្នាព្រះហស្ដរបស់ព្រះជាម្ចាស់។
អ្នកស្រីម៉ាលីនបន្ថែមថា យើងក៏ចង់ឱ្យជំទង់ចេះស្រឡាញ់ ការពារបរិស្ថាន និងទទួលបទពិសោធការស្នាក់នៅព្រៃភ្នំ ឬគេងតង់ដោយឆ្លងកាត់ឧបសគ្គមានអាកាសធាតុប្លែកពីផ្ទះរបស់ពួកគាត់ និងសំខាន់បំផុតចង់ឲ្យគាត់ស្គាល់ព្រះជាម្ចាស់កាន់តែច្បាស់តាមរយៈការអធិដ្ឋាន ចូលរួមជាបូជានិងច្រៀងសរសើរតម្កើងព្រះជាម្ចាស់។
ជំទង់ទាំងនេះ ភាគច្រើនគឺជាពុទ្ធបរិស័ទ ហើយមានខ្លះកំពុងរៀនអប់រំជំនឿ និងមានសកម្មភាពជាមួយព្រះសហគមន៍ក្នុងក្រុមកាយឫទ្ធិ។
ក្នុងកម្មវិធីបោះជំរំរយៈពេល២ថ្ងៃនេះ ជំទង់ទាំងអស់បានយល់ដឹងអំពីអ្វីទៅជាបរិស្ថាន និងសារៈប្រយោជន៍របស់វា ព្រមទាំងរបៀបនៃការថែរក្សាឲ្យបានល្អ ដែលណែនាំដោយកញ្ញាប៉ាញ ចិន្តាមកពីអង្គការជេស្វីតសឺវីសកម្ពុជាផ្នែកបរិស្ថាន ឱ្យជំទង់រិះគិតអំពី ការបំពុលទឹក ការបំពុលខ្យល់ ព្រៃឈើ និងសំរាម ដោយគិតពីហេតុផល ផលប៉ះពាល់ វិធានការនៃការកាត់បន្ថយនិងគ្រប់គ្រង។
កញ្ញា ប៉ាញ ចិន្ដា វាគ្មិនបានបញ្ជាក់ថា សព្វថ្ងៃមនុស្សយើងកំពុងរស់នៅ ដោយអភិវឌ្ឍនិងផ្លាស់ប្ដូរលឿននៃរបត់សង្គម ដែលបង្កឲ្យមានការបម្រែបម្រួលអាកាសមានដូចជា ទឹកជំនន់ ខ្យល់ព្យុះ ទឹកជំនន់ ភ្លើងឆេះព្រៃជាដើម។
អ៊ុយ គឹមឡុង អាយុ១៤ឆ្នាំ កំពុងរៀនអប់រំជំនឿ នៅព្រះសហគមន៍កំពង់អំពិលនៃខេត្តតាកែវ បានឲ្យដឹងថា នេះជាលើកទី១ដែលគាត់បានមកចូលរួមក្នុងកម្មវិធីនេះ។ ក្រោយឈ្វេងយល់អំពីបរិស្ថាន គឹមឡុងយល់ថា “បរិស្ថានមានសារៈសំខាន់ជួយផ្ដល់អ៊ុកហ្ស៊ីហ្សែន និងជាជម្រកដល់សត្វនិងមនុស្ស និងក្រៅពីព្រៃឈើ បរិស្ថានក៏ជាអ្វីៗដែលនៅជុំវិញខ្លួនយើងដែរ ហើយកាចោលសំរាមគ្មានសណ្ដាប់ធ្នាប់ ធ្វើឱ្យបរិស្ថានគ្មានសោភណ្ឌភាព និងប៉ះពាល់ដល់សុខភាព”។
ទាក់ទិនទៅនឹងសារ:នៃបរិស្ថាននេះដែរ ង៉ូវ ឆយី មកពីព្រះសហគមន៍គីរីវង់ រៀបរាប់ថា «ប្រសិនបើគ្មានបរិស្ថានយើងក៏គ្មានជីវិតរស់នៅសព្វថ្ងៃនេះដែរ។» ឆយីបន្ថែមថា «យើងរស់នៅលើផែនដីនេះត្រូវថែរក្សាបរិស្ថានដោយអាចចូលរួមគ្នាម្នាក់បន្តិចៗដើម្បីឱ្យផែនដីយើងមានជីវិតបានយូរអង្វែង។»
ជាមួយការយល់ដឹងបន្ថែមអំពីជីវចម្រុះនិងបរិស្ថាន លោកអភិបាលអូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ សង្ឃឹមថា នៅក្នុងរយៈពេលបីថ្ងៃនេះអាចជួយជំទង់និងកុមារភ្ញាក់ស្មារតីនៅក្នុងការបង្កើតទំនាក់ទំនងថ្មីទាំងធម្មជាតិទាំងជាមួយបងប្អូនទាំងជាមួយគ្រួសារនិងទាំងជាមួយព្រះជាម្ចាស់ ដើម្បីឱ្យអនាគតពួកគាត់ក្លាយទៅជាមនុស្សពេញវ័យដ៏ពេញលក្ខណៈ។
លោកអភិបាលបន្តថា «នៅពេលដែលយើងនិយាយអំពីបរិស្ថាន យើងមិននិយាយត្រឹមតែអំពីដើមឈើនិងផ្កា ប៉ុន្តែគឺគ្រប់ទំនាក់ទំនងដែលយើងមាននៅក្នុងពិភពលោក។»
លោកអភិបាលអូលីវីយ៉េ បន្ថែមថា ទំនាក់ទំនងជាមួយឪពុកម្ដាយ សាលារៀន មិត្តភក្កិ និងសង្គមទូទៅជាពិសេសជាមួយព្រះជាម្ចាស់ ដែលជាបរិស្ថានរបស់យើង ដើម្បីណែនាំឱ្យយើងជាមនុស្សដែលបានទទួលជីវិតពីព្រះជាម្ចាស់ អាចរស់នៅក្នុងបរិស្ថាន ដូច្នេះយើងត្រូវចេះគោរពគ្នា គោរពឪពុកម្ដាយបងប្អូន សាសនានិងព្រះជាម្ចាស់ ដែលណែនាំឱ្យយើងទៅជាគ្រួសារដ៏សុខសាន្តមួយនៅលើផែនដី៕
ដោយដាលីស
