ក្នុងកិច្ចប្រជុំរិះគិតរបស់លោកបូជាចារ្យ និងលោកឧបដ្ឋាកក្នុងភូមិភាគភ្នំពេញ ដែលណែនាំដោយលោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ កាលពីព្រឹកថ្ងៃទី១៥ កុម្ភៈនេះ បានរិះគិតអំពីរដូវអប់រំពិសេស(៤០ថ្ងៃ)សម្រាប់ឆ្នាំ ២០២៣ ដោយរួមដំណើរជាមួយសន្តីតេរេសានៃព្រះកុមារយេស៊ូនៅទីក្រុងលីស្យឺ។
លោកអភិបាលអូលីវីយ៉េ ណែនាំអំពីផ្លូវដ៏តូចរបស់សន្តីតេរេសានៃព្រះកុមារយេស៊ូដែលមានចំនួន ៥ចំណុច គឺរួមមាន ទី១ គោលបំណងប្ដេជ្ញាចិត្តដែលចង់ចូលក្នុងភាពដ៏វិសុទ្ធដែលមានប្រភពជាព្រះជាម្ចាស់ ដូច្នេះសម្បត្តិរបស់តេរេសាមិនមែននៅលើលោកិយនេះទេ។
ក្នុងចំណុចទី២ គឺត្រូវទទួលស្គាល់ព្រំដែនដែលយើងមាននៅក្នុងជីវិត និងភាពទន់ខ្សោយរបស់យើង។ ទី៣ ទុកចិត្តលើព្រះជាម្ចាស់ដោយព្រះជាម្ចាស់ជាប្រភពនៃអ្វីៗទាំងអស់ដែលយើងចង់រស់នៅក្នុងព្រះជន្មរបស់ព្រះអង្គ។ ត្រង់ចំណុចនេះលោកអភិបាលពន្យល់ថា យើងមិនទីពឹងលើអំណោយទាននិងកម្លាំងផ្ទាល់ខ្លួន ប៉ុន្តែយើងទីពឹងលើព្រះជាម្ចាស់ជាព្រះដ៏វិសុទ្ធ និងជាព្រះតែមួយគត់។
រីឯចំណុចទី៤លោកអភិបាលឲ្យដឹងថា ជីវិតយើងត្រូវចាប់ផ្ដើមធ្វើដំណើរពិតប្រាកដ និងប្រកបដោយភាពតស៊ូ។ ទី៥ ស្វាគមន៍ដោយអរព្រះគុណព្រះជាម្ចាស់ ដែលទ្រង់បានចាប់កំណើតជាមនុស្ស និងបូជាជីវិតសម្រាប់យើងផ្ទាល់ ហើយព្រះអង្គនេះហើយដែលបានចាប់សន្តីតេរេសាដោយផ្ទាល់ព្រះអង្គ។
រដូវអប់រំពិសេស ឬហៅថា រដូវ៤០ថ្ងៃ ឬរដូវត្រណមត្រូវបានព្រះសហគមន៍កាតូលិករៀបចំ៤០ថ្ងៃមុនបុណ្យព្រះយេស៊ូមានព្រះជន្មថ្មីដ៏រុងរឿង ឬហៅថាបុណ្យចម្លង ដែលជាបុណ្យកំពូលរបស់គ្រីស្តសាសនា។
លេខ៤០មានអត្ថន័យពិសេសណាស់សម្រាប់គ្រីស្តបរិស័ទ គឺតាមប្រវត្តិសាស្ត្ររបស់ជនជាតិយូដា បានឆ្លងកាត់វាលរហោស្ថានរយៈពេល៤០ឆ្នាំ លោកម៉ូសេនៅលើភ្នំស៊ីណៃរយៈពេល៤០ថ្ងៃដើម្បីទទួលវិន័យ១០ប្រការ និងព្រះយេស៊ូបានចូលក្នុងវាលរហោស្ថាន៤០ថ្ងៃដើម្បីមានទំនាក់ទំនងជាមួយព្រះជាម្ចាស់កាន់តែជិតស្និទ្ធ។ នេះបើតាមការពន្យល់របស់លោកអភិបាលអូលីវីយ៉េ។
លោកអភិបាលបញ្ជាក់ថា រយៈពេល៤០ថ្ងៃនេះ គឺឲ្យយើងចូលក្នុងដំណើរជីវិត ដោយទទួលស្គាល់ភាពខ្សោយនិងអ្វីដែលមានក្នុងជីវិត ហើយដើម្បីដឹងថា ក្នុងភាពខ្សោយរបស់យើង គឺយើងមិនឯកោនោះទេ គឺមានព្រះជាម្ចាស់នៅជាមួយយើង ដោយសារព្រះយេស៊ូឆ្លងកាត់ការល្បួង៤០ថ្ងៃ «គឺឈ្នះអំណាច និងការចង់ឈ្នះ» ដែលជាបញ្ហាបន្តកើតមានរហូតដល់សព្វថ្ងៃនៅក្នុងសកលលោកទាំងមូល លើកលែងតែគ្រោះធម្មជាតិ គឺប្រទេសមួយប្រឆាំងនិងប្រទេសមួយ។
លោកអភិបាលបន្ថែមថា ក្នុងពេល៤០ថ្ងៃនេះ «ជាមួយសន្តីតេរេសា គឺឲ្យយើងដាក់ខ្លួន គឺមានតែព្រះជាម្ចាស់ទេ ដែលស្គាល់ខ្ញុំច្បាស់»។
លោកបូជាចារ្យ អ៊ុន សុន បូជាចារ្យជំនួយមណ្ឌលសកម្មភាពភ្នំពេញថ្មី និងតាខ្មៅ មានប្រសាសន៍ថា អ្វីដែលលោកអភិបាលបានណែនាំ ដើម្បីជួយយើងបំភ្លឺដំណើរជីវិតរបស់ព្រះសហគមន៍ក្នុងរដូវ៤០ថ្ងៃ ជាឱកាសសម្រាប់គ្រីស្តបរិស័ទដោយមិនត្រឹមតែបូជាចារ្យ បងប្រុស បងស្រី គឺត្រូវរៀនតាមមាគ៌ារបស់ព្រះយេស៊ូ។
លោកបន្ថែមថា ផ្លូវដ៏សាមញ្ញរបស់សន្តីតេរេសានៃព្រះកុមារយេស៊ូ គឺជួយឱ្យយើងមើលឃើញសេចក្ដីស្រឡាញ់របស់ព្រះជាម្ចាស់គ្មានព្រំដេន ដែលជាសេចក្ដីដ៏សំខាន់ ដើម្បីទទួលស្គាល់ខ្លួនយើងជាមនុស្សទន់ខ្សោយ អាចចូលជ្រៅនៅក្នុងជីវិតរបស់ព្រះយេស៊ូក្នុងរដូវ៤០ថ្ងៃនេះ។
លោកបន្តថា ផ្លូវរបស់សន្តីតេរេសា ជួយឱ្យយើងសម្លឹងមើលការរស់នៅរបស់ខ្លួនជាប់ជាមួយព្រះយេស៊ូ ដោយដាក់គោលដៅ ជំនឿ ក្ដីសង្ឃឹម អំណររបស់យើងនៅក្នុងព្រះយេស៊ូ។ លោកបូជាចារ្យសុនបន្ថែមថា សព្វថ្ងៃផ្លូវនៃលោកីយ៍មានសម្ភារនិយមនិងបច្ចេកវិទ្យាទំនើប ធ្វើឱ្យមនុស្សងាយស្រួលភ្លេចខ្លួនដោយអាចមើលឃើញគ្រប់រឿងទាំងអស់ ដែលធ្វើឱ្យយើងងាយនឹងជាប់តែជាមួយរឿងទាំងនោះគ្រប់ពេលវេលា។
កិច្ចប្រជុំរិះគិតសម្រាប់បូជាចារ្យក្នុងភូមិភាគភ្នំពេញ គឺធ្វើឡើងមួយខែម្តង ដោយណែនាំដោយលោកអភិបាលអូលីវីយ៉េដោយផ្ទាល់។
មុនបិទកិច្ចប្រជុំរិះគិតនេះ លោកអភិបាលអូលីវីយ៉េ ស្នើសុំឲ្យលោកបូជាចារ្យទាំងអស់ជួយលើកទឹកចិត្តយុវជនឲ្យអាចបញ្ចេញសមត្ថភាពក្នុងកិច្ចការបម្រើរបស់ព្រះសហគមន៍និងធ្វើការងារក្នុងព្រះសហគមន៍។
ជាមួយគ្នានោះដែរលោកក៏បានលើកឡើងអំពីរបាយការណ៍មួយចំនួនដែលសភាលោកអភិបាលឡាវនិងកម្ពុជាឆ្លើយតបនឹងសន្និបាតរបស់ព្រះសហគមន៍សកល (Synodal Church) ផងដែរ៕
ដោយដាលីស
