អ្នកស្រី ភោគ ម៉ានី នាយិកាសាលាអប់រំពិសេសនៃការលូតលាស់ បានលើកឡើងថា «សូមកុំយកកុមារអូទីស្សឹមជាជំនួញ» អ្នកស្រីបានថ្លែងឡើងបែបនេះក្នុងឱកាសប្រារព្ធនូវទិវាអូទីស្សឹមពិភពលោកនាថ្ងៃទី២ ខែមេសា កន្លងទៅ ទៅកាន់ភ្ញៀវកិត្តិយសជាតិនិងអន្តរជាតិ និងអ្នកចូលរួមប្រមាណ១០០០នាក់ នាបរិវេនព្រះសហគមន៍ព្រះកុមារយេស៊ូបឹងទំពន់នារាជធានីភ្នំពេញ ក្រោមប្រធានបទ«លើកកម្ពស់/ អបអរភាពផ្សេងៗគ្នារបស់ជនដែលមានអូទីស្សឹម ដើម្បីជំរុញឲ្យមានបរិយាបន្ន»។
អ្នកស្រីបានលើកឡើងបែបនេះ ក្នុងនាមអ្នកស្រីជាស្ថាបនិកសាលាផង និងជាមាតាដែលមានកូនជាអូទីស្សឹមមួយរូបផងដែរ។ អ្នកស្រីថា នេះគឺជាបញ្ហា និងជាក្តីបារម្ភរបស់មាតាបិតា អាព្យាបាលដែលមានកុមារអូទីស្សឹមគ្រប់រូប។
ការតម្លើងថ្លៃសាលាហួសហេតុចំពោះកុមារអូទីស្សឹម នៅតាមសាលាឯកជនមួយចំនួន ធ្វើឲ្យកុមារមិនទទួលបានការសិក្សា ព្រោះមាតាបិតា អាណាព្យាបាល គ្មានលទ្ធភាព។ អ្នកស្រីបានអំពាវនាឱ្យរដ្ឋាភិបាល និងក្រសួងពាក់ព័ន្ធ ជួយសម្រួលដល់ការចូលរៀនរបស់កុមារអូទីស្សឹម នៅតាមសាលាឯកជនផ្សេងៗ ដោយបញ្ចុះតម្លៃ។
អ្នកស្រីថា «ពួកយើងមានកូនពិសេស មិនមានន័យថាពិសេសត្រូវយកតម្លៃគុណនឹង២ គុណនឹង៣ដងនៃតម្លៃធម្មតានោះទេ តែសូមឱ្យពាក្យពិសេសនេះ មានន័យថាពេលបញ្ជូនកូនទៅរៀននៅសាលាអន្តរជាតិផ្សេងៗ គួរតែបានបញ្ចុះតម្លៃ កុំគិតថាយើងពិសេសហើយគុណលុយទ្វេដង»។
រីឯអ្នកស្រី សុផល សុម៉ាលី មាតាមួយរូប ដែលមានកូនរៀននៅសាលាអប់រំពិសេសនៃការលូតលាស់ បានថ្លែងឡើងពីចំណាប់អារម្មណ៍ថា រូបអ្នកស្រីពិតបានឆ្លងកាត់នូវបញ្ហាជាច្រើន មិនថាការរើសអាង រឺការមិនអើពើ។
កូនរបស់អ្នកស្រីធ្លាប់ត្រូវបានគេបណ្តេញ មិនឱ្យចូលលេងនិងចូលក្នុងហាងរបស់គេ។ អ្នកស្រីសុម៉ាលី បានប្រាប់ថា «ឱ្យតែមានការរើសអើង កុមារអូទីស្សឹមនឹងពិបាកចូលក្នុងសង្គម»។ អ្នកស្រីបារម្ភថា កូនរបស់គាត់នឹងមិនអាចធ្វើបរិយាប័ន្នបានទេ ប្រសិនបើសង្គមនៅតែធ្វើបែបនេះ។
អ្នកស្រីបានអំពាវនាឱ្យមានការយកចិត្តទុកដាក់បន្ថែមទៀត ពីក្រសួងពាក់ព័ន្ធ មិនថា ការឱ្យកូនចូលទៅក្នុងសង្គម ក្នុងវិស័យសុខាភិបាល រឺ សាលារៀននោះទេ។
អាណាព្យាបាលម្នាក់ទៀត គឺលោក ម៉ាក ចម្រើន បាននិយាយដែរថា យើងទាំងអស់គ្នាសុទ្ធតែធ្លាប់ឆ្លងកាត់ការលំបាក ដោយសារអាប្បកិរិយារបស់កូនៗ និងការមិនសូវយល់អំពីបញ្ហាអូទីស្សឹម ដូចនេះហើយការជ្រោមជ្រែងសម្រាប់កុមារពិតជាសំខាន់។
លោកបន្តថា រាជរដ្ឋាភិបាលមានភារកិច្ចដោះស្រាយលើគោលនយោបាយទាំងលើសេវាកម្មផ្សេងៗ ទាំងការអប់រំទៅដល់កុមារអូទីស្សឹម ហើយសហគមន៍និងអង្គការក្រៅរដ្ឋភិបាលក៏ត្រូវជួយគាំទ្រ មិនតែប៉ុណ្ណោះ គឺគ្រួសាររប់សកុមារខ្លួនឯង គឺត្រូវសិក្សាឈ្វេងយល់ឱ្យបានច្រើនពីតម្រូវការកុមារ និងវិធីសាស្រ្តមួយចំនួនដើម្បីជួយគាំទ្រដល់កូន។
លោកចម្រើនបានថ្លែងអំណរគុណ និងសសើរដល់ការខិតខំប្រឹងប្រែងដោយ សេចក្តីស្រឡាញា់របស់លោកគ្រូអ្នកគ្រូ និងថ្លែងអំណរគុណដល់ព្រះសហគមន៍ ដែលបានផ្តល់ទីតាំងសម្រាប់សាលា។
សាលាអប់រំពិសេសសម្រាប់ការលូតលាស់ បច្ចុប្បន្នមានទីតាំងនៅលើផ្ទះជួលចំនួន២ល្វែងដែលនៅជាប់នឹងព្រះវិហារព្រះកុមារយេស៊ូបឹងទំពន់ក្នុងរាជធានីភ្នំពេញ ដែលគាំទ្រដោយព្រះសហគមន៍កាតូលិក ហើយបានបង្កើតឡើងក្នុងឆ្នាំ២០១៧។ បច្ចុប្បន្ននេះ មានសិស្សសរុប ៣៥០នាក់ និងបុគ្គលិក ១១៦នាក់។ ក្នុងរយៈពេលប៉ុន្មានឆ្នាំនេះ សាលាបានធ្វើបរិយាបន្នសិស្ស ទៅសិក្សានៅសាលាខាងក្រៅ ប្រមាណជា ៥៩នាក់ ដែលនេះជាការខិតខំប្រែងប្រែងមួយដើម្បីអាចឱ្យកុមារចូលរួមនៅក្នុងសង្គមបាន។
ក្នុងឆ្នាំ២០២៤ ព្រះសហគមន៍កាតូលិកមានគម្រោងកសាងអគាសិក្សាថ្មី ដែលមានកំពស់១០ជាន់ សម្រាប់អប់រំដល់កុមារដែលចូលដល់វ័យជំទង់។ អ្នកស្រីនាយិការសាលាឲ្យដឹងថា « ការកសាងអគារទំនើបនេះ មិនគ្រាន់តែបំពេញតម្រូវការផ្នែកអប់រំប៉ុណ្ណោះទេ តែជាកន្លែងដើម្បីឱ្យកុមារអាចរីកលូតលាស់ ទាំងជំនាញ និងបំណិនជីវិត និងអាចរស់នៅដោយខ្លួនឯង។»
ក្នុងពេលបច្ចុប្បន្ននេះ ព្រះសហគមន៍កាតូលិកនិងសាលាផ្ទាល់កំពុងគៀងគរការបរិច្ចាគពីសប្បុរសជនដើម្បីឲ្យគម្រោងនេះអាចដំណើរការទៅបាន។
នៅក្នុងទិវាយល់ដឹងអំពីអូទីស្សឹមនេះ សាលាអប់រំពិសេសសម្រាប់ការលូតលាស់ បានផ្តល់បណ្ណសរសើរដល់កុមារអូទីស្សឹមឆ្នើមៗជាច្រើននាក់ ហើយក្នុងនោះក៏មានការអប់រំផ្លូវចិត្តពីព្រះភិក្ខុ វជិវប្បញ្ញោបណ្ឌិត គូ សុភាព និងពិធីបង្ហោះប៉េងប៉ោងដើម្បីអបអរសាទរទិវាយល់ដឹងពីអូទីស្សឹមផងដែរ។
គួររំលឹកផងដែរថា អង្គការសហប្រជាជាតិ កំណត់យកថ្ងៃទី២ ខែមេសា ជារៀងរាល់ឆ្នាំ ដើម្បីប្រារព្ធទិវាយល់ដឹងពីអូទីស្សឹមពិភពលោក តាំងពីឆ្នាំ២០០៨ ហើយប្រទេសកម្ពុជា បានប្រារព្ធវាជាលើកដំបូងចាប់ពីឆ្នាំ២០១៤៕
