តំណាងសាសនា នៅក្នុងប្រទេសកម្ពុជា បានចូលរួមសិក្ខាសាលាដឹកនាំដោយក្រសួងធម្មការនិងសាសនា ក្រោមប្រធានបទ «សាសនិករួមគ្នាបង្កើនការអភិវឌ្ឍន៍ជាតិ កិច្ចគាំពារសុខសន្តិភាព និងសេរីភាពខាងជំនឿសាសនា» ដែលមានអ្នកចូលរួម៤៥៣នាក់ នៅទីស្ដីការក្រសួងធម្មការនិងសាសនា រាជធានីភ្នំពេញកាលពីថ្ងៃទី២១ មិថុនា។
ក្នុងសិក្ខាសាលានេះ មានវាគ្មិនចំនួន៨រូប ពីស្ថាប័ននានាបានលើកឡើងអំពីប្រវត្តិរបស់សាសនានៅប្រទេសកម្ពុជា ភាពខុសគ្នារវាងសាសនានិងសាសនា ការចូលរួមដោយមិនប្រកាន់សាសនា ការថែរក្សាសុខដុមនីយកម្មសាសនា ជាដើម។
លោកដួងសាវង់ តំណាងព្រះសហគមន៍កាតូលិកកម្ពុជានិយាយថា «សិក្ខាសាលាថ្ងៃនេះ រំឭកយើងឱ្យយល់អំពីតម្លៃសន្តិភាព ដែលអាចអភិវឌ្ឍសង្គមជាតិ ជាពិសេសនាំឱ្យសង្គមនៃសាសនាអាចបន្តទៅមុខទៀតបានដោយសុខសន្តិភាព។»
លោកបញ្ជាក់ទៀតថា សិក្ខាសាលានេះជួយឱ្យយើងកុំភ្លេចខ្លួន ដើម្បីឱ្យសាសនាទាំងអស់នៅតែមានវត្តមាន និងសង្គមរបស់យើងនៅស្ថិតស្ថេរ។ ដូច្នេះសូមយើងទាំងអស់គ្នាយកចិត្តទុកដាក់អំពីការកសាងសន្តិភាព។
មុនពេលបិទបញ្ចប់អង្គសិក្ខាសាលានាថ្ងៃនោះ តំណាងសាសនានីមួយៗបានធ្វើសេចក្តីសម្រេចរួមមួយ ដែលមាន៥ចំណុចសំខាន់ៗ គឺ
១. ដឹងគុណដល់សម្តេចហ៊ុនសែន ដែលបានរក្សាសន្តិភាពនិងអភិវឌ្ឍ រក្សាបានសុខដុមនីយកម្មគ្រប់សាសនា
២. គោរពកិច្ចសហប្រតិបត្តិការសាសនា បង្កើតសាមគ្គីភាព ស្មោះត្រង់ ដោយឈរលើគោលការណ៍យោគយល់ អធ្យាស្រ័យ គ្រប់កាលៈទេសៈ
៣. គោរពនិងអនុវត្តគោលនយោបាយរបស់រដ្ឋាភិបាល
៤. គោរពនិងប្រណិប័តន៍វិន័យសាសនារបស់ខ្លួនដោយគោរពសិទ្ធិអ្នកកាន់សាសនាដទៃ
៥. គោរពនិងថែរក្សាឲ្យបាននូវប្រពៃណី វប្បធម៌និងទំនាមទម្លាប់ ដែលជាអត្តសញ្ញាណជាតិ ហើយរួមចំណែកអភិវឌ្ឍសង្គម និងជីវភាពរស់នៅរបស់ប្រជាជន
តាមប្រសាសន៍របស់ព្រឹទ្ធាចារ្យ សាវង់ បានឱ្យដឹងទៀតថា សេចក្ដីថ្លែងការណ៍សម្រេចនៅក្នុងថ្ងៃនេះ តាមពិតព្រះសហគមន៍កាតូលិកបាននិងកំពុងអនុវត្តរួចទៅហើយនិង យើងត្រូវចាប់អារម្មណ៍ដើម្បីបន្តអនុវត្តបន្តទៅមុខទៅទៀត។ គ្រប់ចំណុចទាំងនោះត្រូវតែយកតែអនុវត្តគឺ ឱ្យយើងយកចិត្តទុកដាក់អំពីសាសនានិមួយៗ និងអប់រំសាសនិក តាមគោលការណ៍សាសនារៀងៗខ្លួននិងបន្ត យកចិត្តទុកដាក់អំពីបញ្ហាសង្គមតាមរយៈការរស់នៅប្រចាំថ្ងៃ ព្រោះសាសនានិងសង្គមត្រូវតែមានទំនាក់ទំនងជាមួយគ្នា។
នៅក្នុងប្រទេសកម្ពុជាដែលមានប្រជាជនសរុបជិត១៦លាននាក់ មានសាសនាធំៗចំនួន៤គឺ ព្រះពុទ្ធសាសនាថេរវាទី មានបរិស័ទប្រមាណ ៩៣% ឥស្លាមសាសនាមានចចំនួន៣,៣៦% គ្រីស្តសាសនា០,៦៩% ព្រះពុទ្ធសាសនាមហាយាន០,១៤% រួមនិងសាសនាឯទៀតចំនួនប្រមាណជិត១%៕
សួន ស្រីហួច ដាលីស
