គ្រីស្តបរិស័ទជាង២០០០នាក់ អាជ្ញាធរដែនដី និងព្រះសង្ឃជាច្រើនអង្គបានចូលរួមពិធីអគ្គសញ្ញាតែងតាំងជាបូជាចារ្យរបស់លោកម៉ាតាំង ជួរ ដាម៉ូ ក្នុងក្រុមបព្វជិតសហជីវិនព្រះយេស៊ូ ក្រោមអធិបតីភាពរបស់លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ រួមជាមួយលោកអភិបាលនិងបូជាចារ្យជាច្រើនអង្គ។
លោកអភិបាលអធិបតី មានប្រសាសន៍ក្នុងធម្មទេសនាថា ថ្ងៃនេះ ជាអំណរសប្បាយរបស់ក្រុមសហជីវិនព្រះយេស៊ូ និងព្រះសហគមន៍កាតូលិកនៅកម្ពុជាដែលជាម្ចាស់ផ្ទះនៅថ្ងៃនេះ ទទួលស្វាគមន៍លោកដាម៉ូក្នុងក្រុមបូជាចារ្យ។
«សម្រាប់ព្រះសហគមន៍យើងខ្ញុំ ទទួលបូជាចារ្យថ្មីមួយរូប មិនមែនរឿងធម្មតាទេ។ ជារឿងដែលយើងមានម្តងៗ។» លោកអភិបាលបន្ថែម។
ព្រះសហគមន៍ប្រទេសកម្ពុជា កម្រមានពិធីតែងតាំងបូជាចារ្យណាស់ ក្រោយពេលដែលកម្ពុជាបានធ្លាក់ក្នុងភ្លើងសង្គ្រាមរបបអាវខ្មៅ។ បច្ចុប្បន្ននេះ មានបូជាចារ្យជាតិខ្មែរជាបូជាចារ្យភូមិភាគ ចំនួន១០រូបក្នុងចំណោមសាសនាទូតនិងបព្វជិតជាង១០០នាក់ដែលកំពុងបម្រើការងារនៅក្នុងភូមិភាគទាំងបីដែលមានព្រះសហគមន៍ជាង១០០កន្លែង។
លោកអភិបាលបន្ថែមថា នៅពេលនេះ លោកដាម៉ូនឹងក្លាយជាអ្នកបម្រើរបស់ព្រះយេស៊ូ ដោយដើរតាមព្រះអង្គ និងជាអ្នកបម្រើក្នុងក្រុមសហជីវិនព្រះយេស៊ូដែលបានស្រឡាញ់ព្រះសហគមន៍កម្ពុជាជាពិសេស។
លោកអភិបាលបានដាស់តឿននូវមុខងារជាអ្នកបម្រើ ៣ចំណុចដល់លោកបូជាចារ្យថ្មីគឺ ទី១ ជាអ្នកបម្រើព្រះបន្ទូលដំណឹងល្អរបស់ព្រះជាម្ចាស់ដែលយើងត្រូវតែប្រកាស និងត្រូវណែនាំដល់កុមារនិងយុវជន ដល់មនុស្សគ្មានចំណេះដឹង និងត្រូវប្រកាសគ្រប់កាលៈទេសៈនៃជីវិត។
រីឯទី២ ជាអ្នកបម្រើតាមផ្លូវវិញ្ញាណ ដើម្បីជួយឲ្យព្រលឹងរបស់មនុស្សលោកអាចចូលយ៉ាងជ្រៅទៅក្នុងអាថ៌កំបាំងនៃជីវិតផ្ទាល់ខ្លួន ដើម្បីទទួលអគ្គសញ្ញានានា ដើម្បីចិញ្ចឹមផ្លូវវិញ្ញាណឲ្យរីកចម្រើននិងជាប់ជាមួយព្រះជាម្ចាស់ជានិច្ច។
និងទី៣ ជាអ្នកបម្រើព្រះហឫទ័យប្រណីសន្តោសរបស់ព្រះជាម្ចាស់ គឺត្រូវជួយសម្រុះសម្រួល ជួយអ្នកក្រីក្រ អ្នកជំងឺ និងទណ្ឌិត ជួយអ្នកតូចតាចដែលគេបានបោះបង់ចោល បងប្អូនគ្រីស្តបរិស័ទ អ្នកស្វែងរកព្រះជាម្ចាស់ និងបម្រើយុត្តិធម៌នៅក្នុងសង្គម។
ក្នុងនោះដែរ លោកអភិបាលអូលីវីយ៉េ បានជំរុញឲ្យគ្រីស្តបរិស័ទគិតអំពីតួនាទីជាអ្នកបម្រើនេះដែរ។ លោកបន្ថែមថា ឲ្យយើងទៅជាអ្នកបម្រើក្នុងការប្រណីសន្តោសដោយហ៊ានសម្រុះសម្រួលគ្រប់កាលៈទេសៈនៃជីវិត ឲ្យយើងទៅជាអ្នកបម្រើសុខសន្តិភាពនៅកន្លែងសង្គ្រាម ទាស់ទែងគ្នា ច្រណែន ស្អប់ដើម្បីឲ្យក្តីស្រឡាញ់របស់ព្រះជាម្ចាស់ផុសចេញមក និងឲ្យយើងទៅជាអ្នកបម្រើដោយលុតជង្គង់នៅក្បែរបងប្អូនដែលតូចតាចគ្រប់កាលៈទេសៈ ដែលកំពុងរង់ចាំភាពញញឹម សេចក្តីស្រឡាញ់ ថ្នាក់ថ្នម និងលើកទឹកចិត្ត។
លោកម៉ាតាំង ជួរ ដាម៉ូ ជាបូជាចារ្យខ្មែរដំបូងបង្អស់ដែលបានចូលបួសក្នុងក្រុមសហជីវិនព្រះយេស៊ូក្នុងប្រទេសកម្ពុជា ដែលត្រូវបានតែងតាំងកាលពីថ្ងៃទី១៩ ខែសីហាកន្លងទៅ នៅព្រះវិហារព្រះជាម្ចាស់លើកព្រះនាងម៉ារីឡើងស្ថានបរមសុខ (ពេទ្យយាយជី) ក្នុងក្រុងបាត់ដំបង ខេត្តបាត់ដំបង ស្ថិតក្នុងភាគខាងលិចនៃប្រទេសកម្ពុជា ប្រមាណជា២៩១គីឡូម៉ែត្រពីរាជធានីភ្នំពេញ។
ក្នុងពេលដែលប្រជាជនកម្ពុជាបានភៀសខ្លួនទៅជំរំខ្មែរ-ថៃ សមាជិកនៃក្រុមសហជីវិនព្រះយេស៊ូបានជួយដល់ប្រជាជនខ្មែរមួយចំនួនក្នុងជំរំ ហើយពេលមាតុភូមិនិវត្តន៍ ពួកលោកបានមកបម្រើការក្នុងប្រទេសកម្ពុជាក្នុងឆ្នាំ១៩៩០។ បេសកកម្មរបស់ក្រុមនេះ គឺជួយដល់ជនក្រីក្រ ជាពិសេសជនមានពិការភាព។
លោកបូជាចារ្យ ស៊ីម៉ូន អូ ឆាង ជាប្រធានក្រុមសហជីវិនព្រះយេស៊ូនៅប្រទេសកម្ពុជា មានប្រសាសន៍ថា ថ្ងៃនេះ គាត់មានអំណរសប្បាយខ្លាំងណាស់។ «ខ្ញុំជាបេសកជនមកពីប្រទេសផ្សេង បើសិនយើងឃើញថា កូនខ្មែរអាចបន្តបេសកកម្មនេះ និងប្រកាសដំណឹងល្អតាមរយៈភាសារបស់គាត់ ជាការអស្ចារ្យ ហើយខ្ញុំរំភើបមែនទែន។»
បច្ចុប្បន្នក្រុមសហជីវិនព្រះយេស៊ូ មានយុវ័នខ្មែរ៣រូបផ្សេងទៀតដែលកំពុងរៀនបួស។
អ្នកស្រី តេរេសា សួន ប៊ុនថា ជាម្តាយរបស់លោកបូជាចារ្យថ្មី មានប្រសាសន៍ថា គោលដៅជាបូជាចារ្យរបស់លោកដាម៉ូកើតឡើងនៅអាយុ៨ឆ្នាំមកម្ល៉េះ។
«ខ្ញុំប្រាប់គាត់ថា កូនអត់ចេះធ្វើអីផង បោកខោអាវមិនទាំងស្អាតផង ទៅបម្រើអ្នកណាបាន បើកូនចង់ទៅអីចឹង ត្រូវចេះធ្វើអីខ្លួនឯងកុំឲ្យម៉ាក់ពិបាក។ ដល់ពេលហ្នឹងកូនចាប់ផ្តើមជួយខ្លួនបាន។»អ្នកស្រីបញ្ជាក់។
អ្នកស្រីប៊ុនថា បានសារភាពថា ពេលរៀននៅមហាវិទ្យាល័យ អ្នកស្រីបានបង្វៀងកូនឲ្យនៅឆ្ងាយពីព្រះសហគមន៍ព្រោះគាត់យល់ថា ជារឿងកូនក្មេងប៉ុណ្ណោះ។ ទោះបីយ៉ាងនេះក្ដី យុវ័នដាម៉ូ បានខិតខំសុំលោកបូជាចារ្យទទួលខុសត្រូវមណ្ឌលនិស្សិតកាតូលិក ឲ្យទទួលគាត់ស្នាក់នៅនិងរៀននៅទីនោះ។
«ពេលកូនបានចូលមណ្ឌលនិស្សិត កូនចាប់ផ្តើមរឹងប៉ឹង» ហើយប្តីរបស់គាត់តែងប្រាប់គាត់ថា ពួកយើងអាចចិញ្ចឹមកូនតែរូបកាយ និងឲ្យគេរៀនសូត្រចេះដឹង តែមិនអាចសម្រេចអនាគតឲ្យគេបានឡើយ ហើយបួសនេះក៏មិនមែនជារឿងអាក្រក់ដែរ «កូនទៅធ្វើអ្នកសង្គ្រោះ ជាអំពើល្អមួយជួយមនុស្សទូទៅនៅលើផែនដី។» អ្នកស្រីបញ្ជាក់។
ចាប់ពីពេលនោះមកអ្នកស្រី បានលើកទឹកចិត្តនិងអធិដ្ឋានសម្រាប់កូនប្រុសរបស់គាត់រូបនេះ ឲ្យទទួលបាននូវអ្វីដែលគាត់ប្រាថ្នាក្នុងជីវិតរហូតមកដល់ថ្ងៃនេះ។
និយាយដោយអួលដើមក យកដៃជូតទឹកភ្នែកផង ស្ត្រីជាម្ដាយរូបនេះ បន្តថា «សប្បាយឡើងស្រក់ទឹកភ្នែក មិនមែនដោយសារស្ដាយកូនទេ តែរំភើប ព្រោះកូនខ្ញុំជាង២០ឆ្នាំទំរាំបានបួស។ កូនត្រូវរៀនលុតដំសព្វគ្រប់បែបយ៉ាង។»
លោកម៉ាតាំង ជួរ ដាម៉ូ អាយុ៣៨ឆ្នាំ កើតនៅខេត្តកំពង់ចាម ជាកូនទី៣ក្នុងចំណោមបងប្អូន៤នាក់។ លោកបញ្ចប់ការសិក្សាបរិញ្ញាបត្រផ្នែកគ្រប់គ្រងធុរកិច្ចក្នុងឆ្នាំ២០០៦ ហើយក្នុងឆ្នាំ២០១២ លោកបានចូលរួមជាសាមណេរក្នុងក្រុមសហជីវិនព្រះយេស៊ូ។ ក្នុងឆ្នាំ២០២២ លោកបានទទួលពិធីតែងតាំងជាឧបដ្ឋាកនៅទីក្រុងម៉ានីលប្រទេសហ្វីលីពីន។
នៅថ្ងៃតែងតាំង លោកបព្វជិត ជួរ ដាម៉ូត្រូវបានប្រកាសចាត់ឲ្យទទួលមុខងារលើការត្រាស់ហៅ និងបម្រើយុវជនសម្រាប់ព្រះសហគមន៍ក្នុងភូមិភាគទាំង៣។
ចំពោះកិច្ចការងារនេះលោកបូជាចារ្យថ្មី បន្ថែមថា គាត់ត្រូវបើកចិត្តទូលាយដើម្បីជួយណែនាំយុវជន ឲ្យបានគាប់ព្រះហឫទ័យព្រះជាម្ចាស់។ ចំពោះគាត់មិនមែនធ្វើការងារសម្រាប់តែការត្រាស់ហៅក្នុងក្រុមសហជីវិនព្រះយេស៊ូ ឬចូលជាអ្នកបួសទេ ព្រោះក្នុងជីវិតរស់នៅរបស់យុវជន គឺត្រូវការអ្នកណែនាំជាពិសេសខាងផ្លូវវិញ្ញាណ។
លោកគ្រោងនឹងចុះសួរសុខទុក្ខយុវជនកាតូលិក បង្កើតទំនាក់ទំនង និងអប់រំផ្លូវវិញ្ញាណដល់ពួកគាត់បន្ថែម ដើម្បីឲ្យពួកគាត់អាចរកឃើញព្រះបំណងរបស់ព្រះជាម្ចាស់ក្នុងជីវិតប្រចាំថ្ងៃ និងជីវិតទៅអនាគត។
លោកអេនរីគេ ហ្វីការេដូ អភិបាលព្រះសហគមន៍ភូមិភាគបាត់ដំបង បានឲ្យដឹងថា គាត់រំភើបដោយបានឃើញយុវជនខ្មែរឆ្លើយតបការត្រាស់ហៅជាបូជាចារ្យ ហើយការចូលរួមពីសំណាក់លោកអភិបាល បូជាចារ្យ បព្វជិត-ជិតា អាជ្ញាធរ ព្រះសង្ឃ និងគ្រីស្តបរិស័ទទាំងបីភូមិភាគ ជាសញ្ញាមួយថា យើងជួបជុំគ្នាកសាងព្រះរាជ្យរបស់ព្រះជាម្ចាស់។
លោកក៏សង្ឃឹមថា ព្រះសហគមន៍ភូមិភាគបាត់ដំបងនឹងមានយុវជន ចាប់អារម្មណ៍អំពីការត្រាស់ហៅនេះ។ លោកប្រាប់ថា ដើម្បីឲ្យយើងអាចទៅខាងមុខក្នុងជីវិតត្រាស់ហៅ គឺទី១ យើងត្រូវស្តាប់ព្រះជាម្ចាស់ដោយបើកចិត្តដើម្បីអាចប្រព្រឹត្តតាមព្រះហឫទ័យព្រះជាម្ចាស់ ទី២គឺមិនតាមអារម្មណ៍និងចិត្តយើង តែត្រូវលះបង់ច្រើន ដើម្បីប្រយោជន៍រួម គឺព្រះជាម្ចាស់ និងព្រះសហគមន៍។
«ព្រះសហគមន៍ត្រូវការយុវជនយកចិត្តទុកដាក់ស្តាប់ការត្រាស់ហៅពីព្រះជាម្ចាស់ និងបូជាជីវិតសម្រាប់ប្រយោជន៍រួមដូចព្រះយេស៊ូ។» លោកអភិបាលអេនរីគេបញ្ជាក់។
ក្នុងបទសំភាសន៍លោកអភិបាលអូលីវីយ៉េឲ្យដឹងថា លោកដាម៉ូ រួមជាមួយព្រះសហគមន៍ភូមិភាគទាំងបី សហការគ្នា ដើម្បីបម្រើព្រះបន្ទូល បម្រើខាងផ្លូវវិញ្ញាណ និងបម្រើអ្នកក្រីក្រ។ «ខ្ញុំសង្ឃឹម ដាម៉ូដែលជាបូជាចារ្យJesuit (សហជីវិនព្រះយេស៊ូ) ដែលជាខ្មែរដំបូង អាចចូលយ៉ាងជ្រៅនៅក្នុងព្រះសហគមន៍និងវប្បធម៌ ដើម្បីជួយឲ្យព្រះសហគមន៍ផង និងប្រទេសកម្ពុជាផង អាចផ្តល់សក្ខីភាពអំពីជីវិតរបស់ព្រះយេស៊ូ និងឲ្យយើងបង្កើតមិត្តសម្លាញ់របស់ព្រះគ្រីស្តយ៉ាងច្រើន។»
លោកអភិបាលក៏សូមអធិដ្ឋានសម្រាប់យុវជន ឲ្យរកឃើញការត្រាស់ហៅរបស់ខ្លួនក្នុងពិធីតែងតាំងបូជាចារ្យម៉ាតាំង ជួរ ដាម៉ូនេះ។
ក្នុងពិធីនេះដែរ សម្តេចប៉ាបហ្វ្រង់ស៊ីស្កូ ក៏បានផ្ញើសារលិខិតចូលរួមអបអរសាទរដល់លោកបូជាចារ្យ ម៉ាតាំង ជួរ ដាម៉ូផងដែរ ដោយទ្រង់បានលើកទឹកចិត្តនិងស្វាគមន៍ការចូលក្នុងក្រុមបូជាចារ្យរបស់ព្រះយេស៊ូគ្រីស្ត៕
ដោយ កែវ កញ្ញា
