អគារកម្ពស់២ជាន់ បានស្ថាបនាឡើងដើម្បីទទួលថែទាំកុមារតូច ដែលភាគច្រើនជាកូនៗរបស់កម្មករ-ការិនីរោងចក្រកាត់ដេរ នៅក្នុងភូមិព្រៃទាទី១ សង្កាត់ចោមចៅទី៣ ខណ្ឌពោធិ៍សែនជ័យ នារាជធានីភ្នំពេញ ត្រូវបានដាក់សម្ពោធឲ្យប្រើប្រាស់ ក្រោមអធិបតីភាព លោកអភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ និងបងប្អូនគ្រីស្តបរិស័ទនិងពុទ្ធបរិស័ទចូលរួមប្រមាណជា១០០នាក់។កាលពីថ្ងៃទី២២ ខែសីហា ឆ្នាំ២០២៣ ។
អគារថ្មីនេះ មានឈ្មោះថាមណ្ឌលលីនដាល់វា ដែលគ្រប់គ្រងដោយក្រុមគ្រួសារបុត្រីនៃមេត្តាករុណាកម្ពុជា។
ក្នុងពិធីសម្ពោធ ដោយមានពិធីថ្វាយអភិបូជាអរព្រះគុណព្រះជាម្ចាស់ លោកអភិបាល អូលីវីយ៉េ ជ្មីតហស្លេ បានមានប្រសាសន៍ក្នុងធម្មទេសនាថា មណ្ឌលនេះដូចជាភូមិបេថ្លេហឹមដ៏តូចមួយដែលជាកន្លែងយ៉ាងពិសេស ដើម្បីទទួលស្វាគមន៍កុមារឲ្យទទួលបានការសិក្សាអប់រំ ហើយជាកន្លែងមួយ ដែលផ្តល់សេចក្តីស្រឡាញ់ និងថែរក្សាតាមរបៀបព្រះនាងម៉ារី។
លោកអភិបាលបានបន្ថែមថា ស្នាដៃដែលមណ្ឌលមាន សេវាកម្មដែលមណ្ឌលមាន របៀបដែលមណ្ឌលបង្ហាញសេចក្ដីស្រលាញ់ដល់កុមារនិងអ្នកជិតខាង គឺមកពីការ លើកតម្កើងសិរីរុងរឿងរបស់ព្រះជាម្ចាស់ពីព្រឹកដល់យប់ និងព្រះនាងម៉ារីជាគំរូមួយដើម្បីថែរក្សាសេចក្ដីស្រលាញ់ដែលទទួលពីព្រះជាម្ចាស់។
មណ្ឌលលីនដាល់វា ត្រូវបានបង្កើតឡើងនៅក្នុងឆ្នាំ២០០៦ ដោយក្រុមគ្រួសារបុត្រីមេត្តាករុណានៃសន្តវ៉ាំងសង់ដឺប៉ូលនៅលើដីជួលមួយកន្លែង ក្នុងភូមិព្រៃទាទី១នេះដើម្បីឆ្លើយតបទៅនឹងតម្រូវការជាក់ស្ដែងសម្រាប់ សុវត្ថិភាព និងការថែទាំកុមារតូច។
ដូនជី ដេសាកូឡា ជូលី ជាតំណាងប្រធានអង្គការបុត្រីមេត្តាករុណានៅកម្ពុជាបានឱ្យដឹងថា ក្នុងតំបន់នេះភាគច្រើនមានជនចំណាកស្រុកពីខេត្តផ្សេងៗធ្វើការងារ និងរកចំណូល តាមរោងចក្រនានា ហើយក្រុមគ្រួសារខ្លះគ្មានលទ្ធភាពនិងគ្មានអ្នកមើលថែនិងដឹកជញ្ជូនកូនៗទៅសាលា ដូច្នេះ រាល់ថ្ងៃពួកគេបានចាក់សោរពីខាងក្រៅនៅពេលចេញទៅធ្វើការឬរកស៊ី ដោយឱ្យកូនៗរបស់ពួកគេនៅក្នុងបន្ទប់ ព្រោះខ្លាចមានបញ្ហាផ្សេងៗ។
សង្កាត់ចោមចៅ ជាតំបន់ឧស្សាហកម្មមួយដែលសំបូរដោយរោងចក្រនិងសហគ្រាស ផលិតនិងនាំចេញទំនិញមួយចំនួន។ ប្រជាជនចំណាកស្រុកពីខេត្តបានផ្តុំគ្នានៅតំបន់នេះមួយចំនួន ដោយធ្វើការងារនៅក្នុងរោងចក្រ ធ្វើសំណង់និងរើសអេតចាយ។
រយៈពេល១៤ឆ្នាំកន្លងមកនេះ តម្លៃជួលផ្ទះបានកើនឡើងជាបន្តបន្ទាប់ ហើយក្នុងរដូវវស្សា ផ្ទះជួលនោះលិចទឹកជាប្រចាំ ដែលពិបាកបន្តសកម្មភាព។
ដូនជី ដេសាកូឡា ជូលី បន្ថែមថា ដោយការលំបាកនេះ និងតម្រូវការរបស់កុមារ សប្បុរជនជនជាតិខ្មែរមួយរូប បានផ្ដល់ដីមួយនេះដល់ក្រុមដូនជីយើង ប្រើប្រាស់លើកិច្ចការធម៌មេត្តាករុណា ហើយក្រុមយើងបានស្វែងរកជំនួយផ្សេងៗ ដើម្បីសាងសង់អគារមួយនេះឡើង រួចរាល់នៅថ្ងៃទី២២ ខែសីហា ឆ្នាំ២០២៣នេះ។
«មណ្ឌលលីនដាល់វាបានជួយឱ្យកូនរបស់ខ្ញុំចូលសាលា ទទួលការសិក្សារៀនសូត្រតាំងពីអាយុ៤ឆ្នាំរហូតមកដល់សព្វថ្ងៃនេះ ហើយបើគ្មានមណ្ឌលជួយអនាគតជីវិតកួនរបស់ខ្ញុំមិនដឹងជាល្ងង់ដល់កម្រិតណាទេ» នេះជាសម្ដីរបស់អ្នកស្រី ហួន ថាវី វ័យ៥៦ឆ្នាំ សព្វថ្ងៃជាកម្មការិនីកាត់ដេរនៅរោងចក្រមួយកន្លែងក្នុងតំបន់នេះ។
អ្នកស្រីបន្តថា មណ្ឌលលីនដាល់វាសម្រាលទុក្ខព្រួយរបស់គ្រួសារគាត់ ជាកន្លែងដែលផ្ដល់សេចក្ដីស្រលាញ់ សេចក្ដីសុខ និងសង្គ្រោះកូនក្មេងទាំងអស់ ដែលគ្រួសារមានជីវភាពខ្វះខាតបានចូលសាលាសិក្សារៀនសូត្រ មានចំណេះដឹងដើម្បីមានអនាគតភ្លឺស្វាងដូចកូនគេដទៃទៀតបាន។
យុវតី អូន លីហ្សា អាយុ២០ឆ្នាំ បានស្គាល់មណ្ឌលលីនដាល់វាតាំងពីអាយុ១០ឆ្នាំ បានរៀបរាប់ថា មណ្ឌលលីនដាល់វា ជាកន្លែងដែលផ្ដល់ជីវិត ផ្ដល់ភាពកក់ក្ដៅ ផ្ដល់សេចក្ដីស្រលាញ់ ការមើលថែទាំយ៉ាងកក់ក្ដៅពីក្រុមគ្រួសារដូនជីបុត្រីមេត្តាករុណា។
លីហ្សាតែងតែទទួលបានសម្លៀកបំពាក់ គ្រឿងឧបភោគ សម្ភារសិក្សា និងថវិកាមួយចំនួនដែរ។
នាងបន្តទៀតថា រូបនាងបានក្លាយជាមនុស្សថ្មីម្នាក់ ដោយមានភាពក្លាហាន មានចំណេះដឹង ហ៊ានធ្វើការងារសង្គមនិងមានការងារធ្វើ ដើម្បីជួយដល់បន្ទុកឪពុកម្តាយ ទៀតផង។
មណ្ឌលលីនដាល់វា ទទួលកុមារចាប់ពីអាយុ៤ឆ្នាំឡើងទៅ ដោយផ្តល់ការថែទាំ ផ្តល់អាហាររូបត្ថម្ភ និងមានកម្មវិធីមេត្តេយ្យសិក្សា កម្មវិធីអក្ខរកម្មសម្រាប់កុមារដែលមិនអាចទៅសាលារដ្ឋបាន ផ្តល់អាហាររូបករណ៍ដល់កុមារក្រីក្រនៅថ្នាក់ធម្យមសិក្សានិងឧត្តមសិក្សា។
ដូនជីប្រធានមណ្ឌលឲ្យដឹងថា ក្នុងកុមារម្នាក់មណ្ឌលឲ្យបង់ប្រាក់វិភាគទាន ១៥០០០៛ក្នុងមួយខែ ប្រសិនបើឪពុកម្តាយគ្មានលទ្ធភាពជាអ្នករើសអេតចាយ និងជាកម្មកររើសសំរាម មណ្ឌលផល់សេវាឲ្យឥតគិតថ្លៃ។
ដូនជីជូលី បន្ថែមថា កន្លងមកមានកុមារប្រមាណជា១៥០នាក់ដែលបញ្ចប់ការសិក្សានៅមណ្ឌលហើយត្រូវបានចុះឈ្មោះចូលរៀននៅសាលារដ្ឋ៕
ដោយចាន់ ម៉ានុត
