កាលពីថ្ងៃទី៣ ខែធ្នូកន្លងទៅ លោកអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ បានណែនាំគ្រីស្តបរិស័ទចេះប្រកាសដំណឹងល្អនិងផ្តល់សក្ខីភាពអំពីជំនឿដូចសន្តហ្វ្រង់ស្វ័រសាវីយេ។
ក្នុងធម្មទេសនានៅព្រះវិហារសន្តីម៉ារីញញឹមចំការទៀង ក្នុងខេត្តតាកែវ ក្នុងពិធីផ្តល់អគ្គសញ្ញាលាបថ្ងាសដល់បេក្ខជនចំនួន៤០នាក់ ដែលមានគ្រីស្តបរិស័ទជិត២០០នាក់ចូលរួមពីព្រះសហគមន៍នានាមកពីព្រះសហគមន៍ទាំង៨ក្នុងមណ្ឌលសកម្មភាពតាកែវ លោកអភិបាលមានប្រសាសន៍ថា សន្តហ្វ្រង់ស្វ័រសាវីយេ បានចាកចេញពីប្រទេសរបស់គាត់ ទៅប្រកាសដំណឹងល្អដោយសារគាត់ពោរពេញដោយអំណរសប្បាយដែលបានទទួលព្រះបន្ទូលរបស់ព្រះជាម្ចាស់ បានស្គាល់ព្រះអង្គ ហើយលោកចង់ផ្តល់សក្ខីភាពដោយខ្ជាប់ខ្ជួន ដែល«នេះជាតួនាទីរបស់យើង»។
លោកអភិបាលបន្ថែមថា សូមឲ្យព្រះអំណោយទាន៧ដែល៤០នាក់ទទួលនៅថ្ងៃនេះ នាំឲ្យពួកគាត់ក្លាយជាសន្តហ្វ្រង់ស្វ័រសាវីយេថ្មី និងឲ្យភូមិបេថ្លេហិមនិងក្រុងយេរូសាឡឹមរបស់យើងអាចរស់និងដុះឡើងនៅកន្លែងនីមួយៗ។
សន្តហ្វ្រង់ស័រសាវីយេ ជាអ្នកនាំដំណឹងល្អដល់ប្រជាជាតិអាស៊ីមុនគេ។ នៅក្នុងព្រះសហគមន៍ចំការទៀងរបស់យើង យើងមានរបៀបប្រកាសដំណឹងល្អនិងថែរក្សាព្រះសហគមន៍តាមរបៀបរបស់សន្តរូបនេះដែរ ដោយមានលោកបូជាចារ្យ៤ជំនាន់ហើយ។ លោកអភិបាលបញ្ជាក់ ថា គឺមានរូបលោកផ្ទាល់ មានលោកបូជាចារ្យវណ្ណាថាយ៉ា អារ៉ូគីយ៉ាដុស្ស លោកបូជាចារ្យហ្វេរណាន់ដូ អារាំងហ្គោ និងបច្ចុប្បន្នមានលោកបូជាចារ្យ ឆាលស៍ ឡិឈិប៉ាន។
លោកថា វត្តមានរបស់អ្នកទទួលអគ្គសញ្ញាលាបថ្ងាសទាំង៤០នាក់ និងវត្តមានរបស់គ្រីស្តបរិស័ទដែលបានជួបជុំគ្នានៅទីនេះ ជាសញ្ញាសម្គាល់នៃវត្តមានរបស់ព្រះជាម្ចាស់ និងជាសញ្ញាសម្គាល់ដែលយើងមើលឃើញជាក់ស្តែងថា «ពិតមែនព្រះជាម្ចាស់បានចាប់កំណើតជាមនុស្ស»។
លោកអភិបាលបញ្ជាក់ថា ព្រះយេស៊ូមិនមែនចាប់កំណើតនៅតែភូមិបេថ្លេហិមមួយនោះទេ «គឺបានចាប់កំណើតនៅកន្លែងណាដែលមានគ្រីស្តបរិស័ទ» ហើយកន្លែងណាដែលមានគ្រីស្តបរិស័ទ «គឺជាទីក្រុងយេរូសាឡឹមដ៏តូចមួយដែលព្រះយេស៊ូសោយទិវង្គតនិងមានព្រះជន្មរស់ឡើងវិញនិងឡើងស្ថានបរមសុខ»។
ទោះបីយើងជាមនុស្សទន់ខ្សោយ ជាមនុស្សមានបាប ជួនកាលវង្វេងផ្លូវ ថ្ងៃនេះស្រឡាញ់ព្រះយេស៊ូថ្ងៃស្អែកភ្លេចព្រះអង្គ ថ្ងៃនេះស្រឡាញ់បងប្អូនឯទៀតៗតែស្អែកនិយាយដើមគេ ព្រោះតែយើងជាមនុស្សសមញ្ញធម្មតា តែទោះបីយើងយ៉ាងនេះក្តី ព្រះជាម្ចាស់មានព្រះហឫទ័យស្មោះត្រង់ចំពោះយើងជានិច្ច គឺព្រះអង្គនៅតែស្រឡាញ់យើង។ លោកអូលីវីយ៉េ បន្ថែមថា ដោយសារហេតុនេះ វា«ជាកម្លាំងមួយពិសេសដើម្បីឲ្យយើងដើរទៅមុខ ហើយព្រះអង្គទន្ទឹងរង់ចាំយើងជានិច្ច»។
លោក ឆាលស៍ ឡិឈិប៉ាន បូជាចារ្យទទួលខុសត្រូវមណ្ឌលសកម្មភាពតាកែវ និយាយថា សព្វថ្ងៃមានយុវជនកំពុងចាប់អារម្មណ៍នឹងព្រះសហគមន៍ច្រើន ដោយចូលរួមក្នុងសកម្មភាពព្រះសហគមន៍ដោយមានទាំងអប់រំជំនឿ និងសកម្មភាពធម៌មេត្តាករុណា។
លោកឆាលស៍បន្តថា «នេះនាំឲ្យលោកពុកមានអំណរសប្បាយ តាមរយៈសកម្មភាពមេត្តាករុណា និងតាមរយៈលោកអភិបាលបន្ថែមលោកបូជាចារ្យ នាំឲ្យយើងសង្ឃឹមថា មានមនុស្សជាច្រើននឹងដើរតាមព្រះយេស៊ូ»។
លោកបូជាចារ្យណែនាំមណ្ឌលសកម្មភាពតាកែវរូបនេះបន្ថែមថា ក្នុងព្រះសហគមន៍នីមួយៗមានសកម្មភាព អប់រំជំនភ សួរសុខទុក្ខអ្នកជំងឺ សកម្មភាពមេត្តាករុណា សិក្ខាអប់រំគ្រីស្តបរិស័ទនិងអ្នកភូមិនិងនាំឲ្យពួកគាត់ឲ្យយល់ដឹងអំពីជីវិតមានតម្លៃនិងមិនអស់សង្ឃឹម។
រុំ ឧត្តម អាយុ២៤ឆ្នាំ ឲ្យដឹងថា បន្ទាប់ទទួលអគ្គសញ្ញាលាបថ្ងាសហើយ លោកយល់ថា ខ្លួនគាត់មានថាមពល ជីវិតត្រូវបានបន្ថែមអត្ថន័យ។
ឧត្តមបញ្ជាក់ថា «ខ្ញុំជឿជាក់ថា ខ្ញុំក្លាយជាសមាជិកគ្រួសារមួយដ៏ពេញលេញក្នុងព្រះសហគមន៍កាតូលិកក្នុងពិភពលោកនេះតែម្តង មិនមែនត្រឹមតែក្នុងប្រទេសកម្ពុជានោះទេ។ ជាកូនរបស់ព្រះជាម្ចាស់ពិតប្រាកដ»។
យុវ័នរូបនេះ ចាត់ទុកខ្លួនគាត់ជាគ្រាប់ពូជមួយក្នុងការដឹកនាំចែករំលែកនិងផ្សព្វផ្សាយដំណឹងល្អដល់មនុស្សឯទៀតៗ ដើម្បីឲ្យពួកគាត់ទទួលបានក្តីស្រឡាញ់ និងក្លាយជាធ្លុងតែមួយក្នុងការរស់នៅជាបងប្អូនក្នុងព្រះសហគមន៍។
មណ្ឌលសកម្មភាពតាកែវ បានចាប់ផ្តើមកកើតឡើងពីព្រះសហគមន៍ភូមិចំការទៀង ដោយចាប់ផ្តើមឡើងមានតែគ្រីស្តបរិស័ទតែម្នាក់ ហើយបច្ចុប្បន្នមានព្រះសហគមន៍៨កន្លែងក្នុងមណ្ឌលសកម្មភាពតាកែវ ដែលក្នុងនោះមាន ព្រះវិហារសន្តីម៉ារីញញឹមចំការទៀង ព្រះវិហារព្រះត្រៃឯក(គិរីវង់) ព្រះវិហារសន្តីតេរេសា (ព្រៃកប្បាស) ព្រះសហគមន៍សន្តប៉ូល ព្រះសហគមន៍សន្តយ៉ូហានបាទីស្ត(បាទី) ព្រះសហគមន៍កំពង់អំពិល ព្រះសហគមន៍ត្រពាំងគ្រញូង និងព្រះសហគមន៍ក្រុងតាកែវ ដែលមណ្ឌលសកម្មភាពតាកែវបច្ចុប្បន្ននេះមានគ្រីស្តបរិស័ទជិត១០០០នាក់៕
