លោកអូលីវីយេ អភិបាលព្រះសហគមន៍កាតូលិកភូមិភាគភ្នំពេញ ទទួលមេដាយមាសស្ថាបនាជាតិពីរាជរដ្ឋាភិបាលកម្ពុជា ដោយសារលោកបានចូលរួមយ៉ាងសកម្មក្នុងកិច្ចការងារសង្គម និងអភិវឌ្ឍន៍មូលដ្ឋានរួមជាមួយរាជរដ្ឋាភិបាលកម្ពុជា។ ពិធីនេះបានប្រារព្ធធ្វើក្នុងពិធីសម្ពោធដាក់ឲ្យប្រើប្រាស់ជាផ្លូវការសមិទ្ធផលនានានៅក្នុងវត្តអង្គមន្ត្រីនៃស្រុកត្រាំកក់ ខេត្តតាកែវ ក្រោមអធិបតីរបស់លោក ចាន់ សារុន អ្នកតំណាងរាស្ត្រមណ្ឌលតាកែវ និងលោកជំទាវ នាព្រឹកថ្ងៃទី៦ ខែធ្នូ ឆ្នាំ២០១៩ កន្លងទៅ ។
តាមរបាយការណ៍របស់លោក អ៊ីង ណយ មេឃុំគូសបានឲ្យដឹងថា ស្របតាមការរីកចម្រើន របស់ប្រទេសជាតិទាំងផ្នែកពុទ្ធចក្រនិងអាណាចក្រ និងដោយការខិតខំប្រឹងប្រែងរបស់ព្រះគ្រូចៅអធិកា លោកអាចារ្យ គណៈកម្មការវត្តបានកសាងសមិទ្ធផលថ្មីៗមានដូចជា ជួសជុលថ្នល់១ខ្សែប្រវែង ១.៥០០ម ក្រាលការ៉ូសាលាឆាន់ជាន់ក្រោម តសំយាបសាលាភត្ត និងចាក់សាបក្នុងវត្ត សរុបការចំណាយមានចំនួន ៧៣.៩៦០.០០០ ៛ ដែលនឹងត្រូវដាក់សម្ពោធឆ្លងនាឱកាសនេះ។
លោកមេឃុំបន្តថា ក្នុងចំណោមថវិកាចំណាយលើសមិទ្ធផលទាំងនោះ បានមកពីសប្បុរសជននានា ក្នុងនោះមានលោកអូលីវីយេ អភិបាលព្រះសហគមន៍កាតូលិកភូមិភាគភ្នំពេញជាដើម។ ក្នុងនាមេអាជ្ញាមូលដ្ឋានលោកសូមថ្លែងអំណរគុណយ៉ាងជ្រោលជ្រៅចំពោះលោកអូលីវីយេ ដែលបានចូលរួមយ៉ាងសកម្មអភិវឌ្ឍមូលដ្ឋាន មានទាំងសាលារៀន ផ្លូវថ្នល់ និងវត្តអារាមជាដើម។ល។
លោកអភិបាលអូលីវីយេ ដែលសកម្មក្នុងការអភិវឌ្ឍនៅតំបន់ស្រុកត្រាំកក់ ក្នុងទស្សនវិស័យដ៏ជ្រាលជ្រៅនៃការប្រកាសដំណឹងល្អ និងការអភិវឌ្ឍបានមានប្រសាសន៍រលឹកឡើងវិញ នូវទំនាក់ទំនងរវាង ព្រះសហគមន៍កាតូលិក ជាពិសេសរូបលោកផ្ទាល់ជាមួយវត្តអង្គមន្ត្រីនេះ។ ក្នុងឆ្នាំ២០០២មក លោកបានកសាងផ្លូវលំ១ខ្សែប្រវែង២២០០ម៉ែត្រ តាមសំណូមពររបស់ប្រជាពលរដ្ឋ គណៈកម្មការវត្ត និងព្រះសង្ឃ។ ជាបន្តបន្ទាប់លោកអភិបាល មានទំនាក់ទំនងយ៉ាងជិតស្និទ្ធ ផ្លាស់ប្តូរការសន្ទនាគ្នា អំពីសាសនាគ្រីស្ត និងព្រះពុទ្ធសាសនា។ លោកនៅបន្តសកម្មភាពជួយគ្នាតាមសេចក្តីត្រូវការរបស់វត្ត។ លោកអភិបាលបន្តថា «យើងស្គាល់គ្នាតាំងពីឆ្នាំ២០០២ ហើយមានតាយាយមួយចំនួនបានលាចាកលោកនេះហើយ។ យើងសូមនឹករលឺកដល់ពួកគេផងដែរ»។
សម្រាប់ការងារអភិវឌ្ឍក្នុងតំបន់នេះ គឺអភិវឌ្ឍធនធានមនុស្ស និង អភិវឌ្ឍមនុស្សតូចតាច ជាពិសេសស្ត្រីមេម៉ាយ ឲ្យមានការងារធ្វើ កុមារពិការ និងជនមានពិការភាពជាដើម តាមមណ្ឌលភូមិសុខសាន្តដែលទទួលកុមារពិការ សាលារៀនពីមត្តេយ្យដល់វិទ្យាល័យ ដែលទទួលសិស្សបានចំនួនជាង៦០០នាក់ និងភូមិសិប្បកម្ម។
ក្នុងឱកាសនោះលោកអភិបាលក៏បានរំលឹកឡើងវិញនូវគោលការណ៍របស់ព្រះសហគមន៍កាតូលិក ដែលបានយកចិត្តទុកដាក់លើកិច្ចសន្ទនាជាមួយសាសនានានា។ លោកអភិបាលមានប្រសាសន៍ថា៖ «ការសន្ទនា ជោគជ័យ គឺត្រូវការយើងបង្កើតទំនាក់ទំនងផ្ទាល់ មិនគ្រាន់តែនិយាយអំពីទស្សនៈអស្ចារ្យៗ ប៉ុន្តែទំនាក់ទំនងដែលយើងមានផ្ទាល់ដើម្បីយល់ចិត្ត ដែលនាំឲ្យសាសនាទាំងពីរអាចរស់នៅក្នុងភាពសុខដុមរមនាពិតប្រាកដមែន»។
លោកអភិបាលអូលីវីយេក៏បានវាយតម្លៃខ្ពស់ពីការយកចិត្តទុកដាក់ និងផ្តល់សិទ្ធិសេរីភាពពេញលេញពីសំណាក់រាជរដ្ឋាភិបាលកម្ពុជា ចំពោះពលរដ្ឋក្នុងជំនឿសាសនា ដែលប្រជាជនអាចជឿសាសនាក៏បាន។
ក្នុងពិធីប្រសើរនេះលោកចាន់ សារុន អ្នកតំណាងរាស្ត្រមានប្រសាសន៍ កោតសរសើរចំពោះសប្បុរសជនទាំងអស់ ជាពិសេសលោកអូលីវីយេ ដែលបានចូលរួមយ៉ាងសកម្មអភិវឌ្ឍរួមជាមួយរាជរដ្ឋាភិបាលកម្ពុជា ទាំងសាសនា និងសង្គម។ លោកបន្តថា នេះក៏ដោយសារតែប្រទេសកម្ពុជាពោរពេញដោយសន្តិភាពពិតប្រាកដ។ ហេតុនេះសូមចូលរួមទាំងអស់គ្នា ថែរក្សាសន្តិភាពកុំឲ្យបាត់បង់ទៅវិញ។ លោកអ្នកតំណាងរាស្ត្រខេត្តតាកែវ ក៏បានជំរុញឲ្យប្រជាពលរដ្ឋយកចិត្តទុកដាក់ខិតខំប្រកបរបរបន្ថែម និងថែរក្សាសុខភាពផងដែរក្នុងពេលរដូវត្រជាក់នេះ។
បន្ទាប់មក លោកតំណាងរាស្ត្រ ចាន់ សារុន បានបំពាក់មេដាយមាសស្ថាបនាជាតិ ដល់លោកអភិបាល អូលីវីយេ និងសប្បុរសជននានា ព្រមទាំងកាត់ខ្សែបូរសម្ពោធដាក់ឲ្យប្រើប្រាស់ជាផ្លូវការ នូវសមិទ្ធផលទាំងឡាយក្នុងវត្តអង្គមន្ត្រីយ៉ាងឱឡារិក។
ក្រោយពីកាត់ខ្សែបូររួច លោកចាន់សារុន បានអញ្ជើញទស្សនកិច្ចភូមិសិប្បកម្មរបស់ព្រះសហគមន៍កាតូលិក ដែលបង្កើតដោយផ្ទាល់ដោយលោកអភិបាលអូលីវីយេ។ ក្នុងភូមិសិប្បកម្មនេះមានរោងចក្រផលិតស្ករគ្រាប់ដូង តម្បាញ កាត់ដេរនិងប៉ាក់ សិប្បកម្មដូង ជាងទង ភោជនីយដ្ឋាន និងការផលិតសាប៊ូ ប្រេងដូង។ល។ ក្នុងភូមិនេះបានបង្កើតការងារយ៉ាងល្អសម្រាប់ប្រជាពលរដ្ឋ ដែលគេអាចទទួលប្រាក់កម្រៃតាមកម្រិតនៃការងាររបស់គេយ៉ាងសមរម្យ៕
