មណ្ឌលអប់រំជំនឿកាតូលិកកម្ពុជា បានបង្កើតសិក្ខាសាលាស្ដីអំពី “ទម្រង់សិល្បៈកំណាព្យខ្មែរ” ជាលើកដំបូង នាថ្ងៃទី៩ ខែកក្កដា ឆ្នាំ២០២០ ដែលដឹកនាំដោយលោកប្រ៊ុយណូ កូសម៍ អភិបាលទទួលបន្ទុកមណ្ឌលអប់រំជំនឿកាតូលិកកម្ពុជា។ សិក្ខាសាលានេះមានសិក្ខាកាមមកពីភូមិភាគភ្នំពេញ និងកំពង់ចាមចូលរួមចំនួន២០នាក់ ដោយមានលោកយ៉ាន់ បូរិន្ទ ដែលជាសាស្ត្រាចារ្យ និងជាទីប្រឹក្សានៃក្រសួងវប្បធម៌ និងវិចិត្រសិល្បៈ រួមជាមួយលោក សីហា ឧត្ដម ជាគ្រូបង្គោលនៃក្លិបអភិរក្សមរតកកំណាព្យខ្មែរ និងជានាយកសាលាអភិរក្សមរតកសិល្បៈបូរាណខ្មែរ ជាវាគ្មិន។

ក្នុងឱកាសនេះដែរ លោកអភិបាល ប្រ៊ុយណូ បានមានប្រសាសន៍ថា សិល្បៈទាំងអស់សុទ្ធតែជាមធ្យោបាយដែលយើងគួរប្រើដើម្បីសម្ដែងពីជំនឿរបស់យើង។ លោកអភិបាលបញ្ជាក់ទៀតថា សិល្បៈទាំងអស់ដែលយើងប្រើជាប្រចាំថ្ងៃ ដើម្បីបង្ហាញពីសោភណ្ឌភាពឱ្យគេចាបប់អារម្មណ៍ ហើយយើងចង់ផ្ដល់សាក្ខីភាពអំពីជំនឿរបស់យើង និងអ្វីដែលទាក់ទងនឹងព្រះជាម្ចាស់។ លោកបន្តថា «ជាពិសេសថ្ងៃនេះយើងបានធ្វើសិក្ខាសាលាជាលើកទីមួយតែមួយព្រឹកអំពីកំណាព្យ អំពីទំនុកតម្កើង ព្រោះនៅពេលយើងអានព្រះគម្ពីរមិនសូវពិបាកទេ តែរបៀបស្មូត្រមិនសូវស្រួលទេ គឺមានន័យថាអ្វីៗទាំងអស់ដែលយើងចង់សម្ដែងពីព្រះបន្ទូលរបស់ព្រះជាម្ចាស់តាមរយៈវប្បធម៌ខ្មែរ នោះអាចនាំឱ្យប្រជាជនខ្មែរអាចយល់បាន ដោយសារវប្បធម៌និងសិល្បៈចូលជ្រៅក្នុងចិត្តរបស់មនុស្ស»។

លោកសាស្ត្រាចារ្យ បូរិន្ទ បានមានប្រសាសន៍ដោយស្ងើចសរសើរព្រះសហគមន៍កាតូលិកដែលបង្កើតសិក្ខាសាលានេះឡើង ដោយបានលើកយកពីបែបបទនៃការសូត្រ និងនិពន្ធកំណាព្យខ្មែរ ដើម្បីយកទៅប្រើប្រាស់នៅក្នុងលក្ខណៈខ្មែរ។ លោកបន្តថា នេះក៏ជាការផ្សព្វផ្សាយដើម្បីជួយជំរុញផ្នែកផ្លូវចិត្តនិងផ្លូវកាយរបស់អ្នកស្ដាប់ឲ្យកើតមាននូវការគោរពការស្រឡាញ់ ជាពិសេសគឺការដឹងគុណចំពោះព្រះជាម្ចាស់ដែលបានផ្ដល់នូវអ្វីៗល្អៗសម្រាប់អប់រំដល់បងប្អូនជាភាសាខ្មែរ។ លោកបន្ថែមថា «ព្រឹកនេះខ្ញុំបានបង្ហាញឱ្យស្ដាប់តាមបែបបទនៃការសូត្រកំណាព្យបានតាមទម្រង់បទផ្សេងៗ និងមានបងប្អូនបានសួរខ្ញុំថា តើទម្រង់ណាមួយដែលយើងអាចយកប្រើបាននៅក្នុងកម្មវិធីអាពាហ៍ពិពាហ៍ និងកម្មវិធីអប់រំផ្សេងៗ? តាមពិតនេះអាស្រ័យលើខ្លឹមសារ និងស៊ីសងលើដំណើរសូត្រ»។

យុវជន ឡឹម សម្បត្តិ ជាសមាជិកក្រុមចម្រៀងមកពីព្រះវិហារសន្តយ៉ូសែបផ្សារតូច បានឱ្យនិយាយថា «សិក្ខាសាលានេះពិតជាបានធ្វើឱ្យខ្ញុំមានចំណាប់អារម្មណ៍មែនទែន អំពីទំនាក់ទំនងរវាងព្រះសហគមន៍កាតូលិក និងប្រជាជន វប្បធម៌ខ្មែរ។ ហើយការអញ្ជើញសាស្ត្រាចារ្យ ដែលជាអធិរាជស្មូត្រកំណាព្យ ជាឱកាសដែលព្រះសហគមន៍អាចផ្សារភ្ជាប់ទៅនឹងវប្បធម៌ប្រពៃណី ដែលជាជំហានដែលនាំឱ្យយើងងាយស្រួលក្នុងការចែករំលែកជំនឿរបស់យើង តាមលក្ខណៈវប្បធម៌ប្រពៃណីខ្មែរ។ ជាពិសេសអាចជួយឱ្យប្រជាជនខ្មែរដែលមិនទាន់ក្លាយជាគ្រីស្តបរិស័ទ អាចឈ្វេងយល់ពីព្រះជាម្ចាស់តាមរយៈវប្បធម៌នេះ»។
សម្បត្តិបញ្ជាក់ថាសិក្ខាសាលានេះបានជួយដល់គាត់ឈ្វេងយល់បន្ថែមពីលក្ខណៈប្រពៃណីវប្បធម៌ និងចេះបែងចែកអ្វីជាស្មូត្រ និងការសូត្រ ជាពិសេសអាចដឹងពីរបៀបស្មូត្រតាមបទនីមួយៗ ដើម្បីយកទៅអនុវត្តនៅក្នុងព្រះសហគមន៍។

សិក្ខាសាលារយៈពេលមួយព្រឹកនេះ មានគ្រីស្តបរិស័ទចូលរួម ជាក្រុមចម្រៀងក្រុមយុវជន ក្រុមគ្រូអប់រំជំនឿ នៅក្នុងព្រះសហគមន៍។ សិក្ខាសាលានេះបានលើកបង្ហាញពីទម្រង់សិល្បៈដែលមាននៅក្នុងវប្បធម៌ខ្មែរ របៀបសូត្រ និងស្មូត្រកំណាព្យ ព្រមទាំងរបៀបនិពន្ធកំណាព្យផងដែរ៕
ដោយដាលីស