លោកបូជាចារ្យ ខ័នរុយ ឃេវិន អ្នកទទួលខុសត្រូវអង្គការម៉ារីណុល និងជាប្រធានកម្មវិធីម៉ារីណុលដើម្បីសុខភាពផ្លូវចិត្ត បានលើកឡើងថា សុខភាពផ្លូវចិត្តនៅក្នុងបរិបទកូវីដ១៩នេះ គឺជាកត្តាសំខាន់ដែលកើតមានលើបុគ្គលផ្ទាល់ខ្លួន ក៏ដូចជាសង្គមផងដែរ។
លោកបូជាចារ្យ ឃេវិន បានថ្លែងឡើងដូចនេះកាលពីថ្ងៃទី១០ ខែមេសា ឆ្នាំ២០២១ ជាមួយនឹងក្រុមការងារការិយាល័យផ្សព្វផ្សាយព័ត៌មានកាតូលិក។ លោកបានបញ្ជាក់ថា ៖ «ក្នុងអំឡុងនៃការរីករាលដាលជំងឺឆ្លងកូវីដ១៩នេះ អ្វីដែលខ្ញុំបានមើលឃើញ និងមានក្ដីបារម្ភនៅក្នុងសហគមន៍គឺ បញ្ហាសុខភាពផ្លូវចិត្ត ព្រោះកង្វះនូវសេចក្ដីត្រូវការមូលដ្ឋាន (ម្ហូបអាហារ) និងសម្ភារអនាម័យ ជាបញ្ហាចាំបាច់នៅក្នុងសម័យកូវីដ១៩នេះ»។
លោកបូជាចារ្យរូបនេះ បានបន្តថា ប្រជាជនមួយចំនួនធំនៅតាមសហគមន៍មានការព្រួយបារម្ភច្រើនអំពីស្ថានភាពនៃការរីករាលដាលនៃជំងឺកូវីដ១៩ ជាបញ្ហាមួយផ្នែក ហើយមួយផ្នែកទៀតគឺការភ័យបារម្ភ ដោយសារការទទួលនូវព័ត៌មានក្លែងក្លាយដែលនាំឱ្យមានភាពច្របូកច្របល់។ លោកថា៖ «ស្ថានភាពដែលកំពុងប្រឈមខ្លាំងគឺធ្លាក់ទៅលើ កម្មកររោងចក្រ ពលករចំណាកស្រុកដែលទើបតែត្រឡប់មកពីក្រៅប្រទេស និងប្រជាជនក្រីក្រ»។
លោកបូជាចារ្យ ឃេវិន បានបន្ថែមទៀតថា ចំពោះយុវជន និងកុមារ ការសិក្សាជារឿងចាំបាច់បំផុត ប៉ុន្តែពួកគាត់មិនអាចទៅសាលាបាន ហើយរយៈពេលជាងមួយឆ្នាំមកនេះការសិក្សារបស់សិស្សសាលាមិនទៀងទាត់ រីឯការៀនតាមអនឡាញក៏ផ្ដល់ផលលំបាកចំពោះយុវជន និងកុមារនៅកម្ពុជាផងដែរ។
លោកថា ៖ «កត្តាទាំងនេះហើយ ជាផលប៉ះពាល់ ជាសម្ពាធផ្លូវចិត្តចំពោះកុមារ យុវជន និងអាណាព្យាបាលរបស់សិស្ស»។
កញ្ញា គឹម សាឡាត់ ជាកម្មការិនីរោងចក្រក្នុងតំបន់កាណាឌីយ៉ា ក្នុងសង្កាត់ស្ទឹងមានជ័យ ដែលជាតំបន់ត្រូវបានរដ្ឋបាលរាជធានីភ្នំពេញដាក់ជាតំបន់ក្រហម ដោយមិនអាចធ្វើដំណើរចេញក្រៅផ្ទះ បានឱ្យដឹងថា ដោយសារតែមានអ្នកធ្វើការរោងចក្រឆ្លងជំងឺកូវីដ១៩នេះច្រើន ជាពិសេសអ្នកជិតខាងរបស់បន្ទប់ជួលនាង បានធ្វើឱ្យនាងមានការភ័យតក់ស្លុតជាខ្លាំង។
កញ្ញាបាននិយាយថា ៖ «ខ្ញុំភ័យ ញ័រដៃញ័រជើងលែងឃ្លានបាយ ជាពិសេសនៅពេលឃើញឡានពេទ្យតម្រង់ជួរគ្នាមកទទួលអ្នករោងចក្រទៅព្យាបាល។ បច្ចុប្បន្ននេះពួកខ្ញុំពិបាកមែនទែន ទោះបីជាមានលុយក៏ពិបាករកទិញអាហារដែរ ព្រោះមិនសូវមានអ្នកលក់ ហើយពេលចេញក្រៅម្តង គេឲ្យពេលតែ៥នាទីរត់ចង់ដាច់ខ្យល់»។
រីឯលោក ម៉ៃ វឌ្ឍនា ទីប្រឹក្សារាជរដ្ឋាភិបាល នៅទីស្ដីការគណៈរដ្ឋមន្ត្រី ដែលមានផ្ទះនៅតំបន់ស្ទឹងមានជ័យដែរនោះបានឱ្យដឹងថា ក្នុងនាមជាអាណាព្យាបាលកូនបីនាក់ដែលកំពុងតែសិក្សាតាមអនឡាញដូចដែលក្រសួងអប់រំយុវជននិងកីឡាបានកំណត់ លោកយល់ថា ការរៀនតាមរយៈអនឡាញមិនដូចទៅរៀននៅសាលាទេ គឺឪពុកម្ដាយត្រូវមានការយកចិត្តទុកដាក់ខ្ពស់ដោយត្រូវជួយបង្រៀនកូនៗថែមទៀត ហើយតម្លៃការសិក្សាដែលកំណត់ដោយសាលាគឺនៅដដែល។
លោកបានមានប្រសាសន៍ថា ៖ «នេះជាអម្រែក មួយទៀតដែលធ្លាក់លើឪពុកម្ដាយទាំងពេលវេលានិងថវិកាដែលប៉ះពាល់ដល់សតិអារម្មណ៍របស់ឪពុកម្ដាយ»។
គួរបញ្ជាក់ផងដែរថា មួយរយៈចុងក្រោយនេះ ព្រះសហគមន៍កាតូលិក ជាពិសេសភូមិភាគភ្នំពេញ បានយកចិត្តទុកដាក់លើអ្នកដែលងាយរងគ្រោះដោយសារជំងឺកូវីដ១៩ ជាពិសេសនៅក្នុងរាជធានីភ្នំពេញនិងក្រុងតាខ្មៅនៃខេត្តកណ្តាល។
តាមរយៈលោកអភិបាលអូលីវីយេ អភិបាលភូមិភាគភ្នំពេញ និងអង្គការការីតាសកម្ពុជា បានចូលរួមជាគ្រឿងបរិភោគដល់អ្នកដែលកំពុងតែខ្វះខាត និងមានកម្មវិធីអធិដ្ឋានជារៀងរាល់ថ្ងៃតាមបណ្ដាញសង្គមផងដែរ ដើម្បីលើកទឹកចិត្តពួកគាត់ឱ្យមានសង្ឃឹមឡើងវិញ៕
