លោកអភិបាលអូលីវីយ៉េ ឲ្យគ្រីស្តបរិស័ទភ្ញាក់ស្មារតីភ្ជាប់ជាមួយព្រះជាម្ចាស់សាជាថ្មី
ក្នុងពិធីបុណ្យខួបលើកទី៩នៃការរកឃើញ រូបសំណាកព្រះនាងម៉ារីទី២ ពីបាតទន្លេមេគង្គ លោកអភិបាលព្រះសហគមន៍កាតូលិកភូមិភាគភ្នំពេញ អូលីវីយ៉េ ជ្មីតហស្លេ មានប្រសាសន៍ថា ព្រះនាងម៉ារីភ្ជាប់ជាមួយព្រះជាម្ចាស់រហូត។ ហើយនៅក្នុងពេលវេលាដែលបើកប្រទេសឡើងវិញនេះ ជាពេលវេលាដើម្បីភ្ញាក់ស្មារតីភ្ជាប់ជាមួយព្រះជាម្ចាស់សាជាថ្មី អធិដ្ឋានជាថ្មី ដើម្បីស្វាគមន៍ព្រះអង្គទាំងកម្លាំងកាយកម្លាំងចិត្ត។
ក្នុងកម្មវិធីនេះ ចាប់ផ្តើមដោយអធិដ្ឋានផ្គាំនៅមុខរូបសំណាកព្រះនាងម៉ារី ដែលមានកម្ពស់២,៣ម៉ែត្រ ធ្វើអំពីស្ពាន់ ដែលមានព្រះនាងម៉ារីបីព្រះកុមារយេស៊ូ ដែលបានដាក់នៅមុខទ្វារចូលនៃព្រះវិហារព្រះមាតានៃសន្តិភាព អរិយក្សត្រ។
ក្នុងធម្មទេសនានៅថ្ងៃប្រារព្ធពិធីនាថ្ងៃទី១៣ វិច្ឆិកា ២០២១ ដែលមានគ្រីស្តបរិស័ទចូលរួមជាច្រើនកុះករ ក្រោយពេលដែលរដ្ឋាភិបាលបានបើកប្រទេសឲ្យមានការជួបជុំសាសនានិងពិធីនានាឡើងវិញក្នុងរយៈពេលប៉ុន្មានថ្ងៃនេះ លោកមានប្រសាសន៍ដូច្នេះថា នេះជាឱកាសមួយ ដើម្បីរួមជាមួយម៉ារីនៅក្នុងអង្គព្រះយេស៊ូគ្រីស្តដែលណែនាំឱ្យយើងពោរពេញដោយសេចក្ដីសុខនៅក្នុងជីវិតរបស់យើង ដែលយើងកំពុងតែមានសកម្មភាពនៅមានជីវិតសារជាថ្មី។
លោកអភិបាលបន្ថែមថា នេះជាថ្ងៃមួយដែលយើងទទួលអំណោយពិសេសនៅក្នុងពេលវេលាដែលយើងគោរពព្រះនាងម៉ារី គឺយើងទទួលអំណោយពិសេសសម្រាប់សង្គមរបស់យើង និងព្រះសហគមន៍របស់យើងដែលអាចជួបជុំគ្នាដើម្បីអធិដ្ឋាន អប់រំជំនឿ និងចួបជុំដោយមានសេរីភាពមិនភ័យខ្លាច។
លោកអភិបាលអូលីវីយ៉េ សូមឲ្យគ្រីស្តបរិស័ទរំលឹកអំពីការសួរសុខទុក្ខរបស់ព្រះនាងម៉ារីចំពោះយាយអេលីសាប៊ែត ដែលមានចែងនៅក្នុងគម្ពីរដំណឹងល្អ និងការសួរសុខទុក្ខពីហោរាចារ្យ ដែលមកថ្វាយបង្គំព្រះយេស៊ូ។ លោកអភិបាលមានប្រសាសន៍ថា «យើងឃើញថាការសួរសុខទុក្ខមានរបៀបខុសៗគ្នា ដោយក្នុងរយៈពេលកន្លងមកនេះ យើងបានសួរសុខទុក្ខតាមរបៀបថ្មី តាមប្រព័ន្ធអ៊ីនធឺណែត»។
លោកអភិបាលពន្យល់ថា ការសួរសុខទុក្ខរបស់ព្រះនាងម៉ារី គឺព្រះជាម្ចាស់ដែលបានសួរសុខទុក្ខមនុស្សលោក។ ហើយហោរាចារ្យ គឺតំណាងឲ្យមនុស្ស សួរសុខទុក្ខព្រះជាម្ចាស់ដែលកំពុងរង់ចាំយើង។
លោកអភិបាលសង្កត់ធ្ងន់ថា «ដូច្នេះសូមឱ្យយើង យកចិត្តទុកដាក់សួរសុខទុក្ខគ្នាទៅវិញទៅមកជាមួយបងប្អូនឯទៀតៗផ្ទាល់ ដើម្បីយល់ពីការលំបាក ផ្ដល់សេចក្តីសង្ឃឹម ដោយលើកទឹកចិត្ត»។ ជាមួយគ្នានេះ លោកអភិបាលសូមឲ្យគ្រីស្តបរិស័ទចេះស្វាគមន៍ព្រះយេស៊ូនៅក្នុងដួងចិត្ត និងពិចារណាដើម្បីសួរសុខទុក្ខដល់បងប្អូនឯទៀតៗ។
លោក សុខ សិលា ប្រធានយុវជននៅព្រះសហគមន៍អរិយក្សត្រ បានឲ្យដឹងថា ចាប់តាំងពីមានរូបសំណាកព្រះនាងម៉ារីនៅទីនេះ គ្រីស្តបរិស័រត់មកអធិដ្ឋានជាមួយព្រះនាងម៉ារី មានទាំងអ្នកមិនមែនជាគ្រីស្តបរិស័ទផង។ លោកសិលាបន្តថា «ពិសេសអ្វីដែលខ្ញុំសង្កេតឃើញ គឺពួកគាត់បានទទួលនូវអ្វីដែលបានអធិដ្ឋាន។ ដូច្នេះព្រះនាងម៉ារីបានផ្ដល់នូវអ្វីដែលពួកគេបានសុំ ដូចជាគូស្រករដែលមិនមានកូន អាចទទួលបានកូនក្រោយពេលសុំពីព្រះនាងម៉ារីមួយឆ្នាំ»។
ប្រធានព្រះសហគមន៍រូបនេះ ក៏បាននិយាយដែរថា «នៅពេលភរិយាខ្ញុំសម្រាលកូន គាត់មានសភាពពិបាក។ ដោយសារព្រះនាងម៉ារីភរិយានិងកូនរបស់ខ្ញុំមានសុវត្ថិភាព សុខភាពល្អទាំងម្ដាយនិងកូន។ ដូច្នេះ សូមបងប្អូនរួមគ្នាអធិដ្ឋានជាមួយព្រះនាងម៉ារី សម្រាប់ព្រះសហគមន៍របស់យើង»។
លោកអភិបាលអូលីវីយ៉េ មុននឹងបិទបញ្ចប់កម្មវិធីថ្វាយអភិបូជា បានរំឭកគ្រីស្តបរិស័ទ ឱ្យរក្សា៣កុំ៣ការពារជានិច្ច និងប្រសិនបើបងប្អូនផ្ដាសាយ សូមផ្អាកការចូលរួមមួយរយ:ដោយធ្វើការព្យាបាលនិងនៅដាច់ដោយឡែករហូតដល់ជា ទើបអាចមកចូលរួមសកម្មភាពនានាសាជាថ្មី។
រូបសំណាកព្រះនាងម៉ារី ទី២ រកឃើញ ១៩ វិច្ឆិកា ២០១២ ក្នុងថ្ងៃដែលប្រទេសកម្ពុជាទទួលរៀបចំកិច្ចប្រជុំអាស៊ាន។ រូបសំណាកព្រះនាងម៉ារីទីពីរនេះបានស្រង់ចេញពីបាតទន្លេមេគង្គ ដោយលោក ផាង វ៉ាំង ហ៊ូ ជាអ្នកនេសាទ និងជាពុទ្ធសាសនិក បន្ទាប់ពីព្រះនាងម៉ារីបានបង្ហាញខ្លួននៅក្នុងសុបិន្តរបស់គាត់។ មុនពេលគាត់ទទួលមរណភាព លោក វ៉ាំងហ៊ូ ធ្លាប់និយាយថា “នៅពេលស្រង់រូបសំណាកនេះ ខ្ញុំមាអារម្មណ៍ថានេះមិនមែនជារូបសំណាកទេ គឺជារូបរាងមនុស្សដែលកំពុងមានជីវិតដូចយើង ខ្ញុំសប្បាយចិត្តផងភ័យផង ហើយបួងសួងព្រះនាងសូមឱ្យប្រពន្ធខ្ញុំបានជាសះស្បើយពីជំងឺ និងថ្វាយរូបសំណាកនេះទៅព្រះវិហារដោយមិនទាមទារអ្វីទាំងអស់»។ ច្រើនឆ្នាំកន្លងមក គ្រួសាររបស់គាត់ក៏ប្រែចិត្តគំនិតដោយជឿលើព្រះជាម្ចាស់ក្រោយពីស្រង់បានរូបសំណាកនេះ។ រីឯប្រពន្ធរបស់លោក ក៏ជាពីជំងឺមានសុខភាពល្អធម្មតារហូតមកដល់សព្វថ្ងៃនេះ៕
ដោយ៖ ដាលីស
