ក្រុម
បន្ទាប់ពីមានបេសកកម្មនៅក្នុងប្រទេសកម្ពុជា ជាង១០ឆ្នាំមកនេះ ក្រុមគ្រួសារបងស្រីតូចតាច (Little Sisters of Jesus) ដែលមានសមាជិកចំនួន២រូប បានធ្វើមាតុភូមិនិវត្តន៍ទៅកាន់ប្រទេសកូរ៉េវិញ នាព្រឹកថ្ងៃទី២៩ ខែមីនា ២០២២។
ដូនជីសូហ្វីយ៉ា គីយ៉េន (Sophia Kyeng)មានប្រសាសន៍ឱ្យដឹងថា ទិសដៅសំខាន់របស់ក្រុមគ្រួសារបងស្រីតូចតាចនៃព្រះយេស៊ូមកកម្ពុជា គឺចង់ពង្រីកសមាជិក នៅតាមបណ្ដាប្រទេសក្នុងទ្វីបអាស៊ីបន្ថែមទៀត។ ក្រុមអ្នកបួសនេះ បានមកដល់កម្ពុជាក្នុងឆ្នាំ២០១១ ដោយមានបេសកកម្មដំបូងក្នុងខេត្តតាកែវ ហើយបានមកបម្រើការងារនៅទីក្រុងភ្នំពេញក្នុងឆ្នាំ២០១៤។
ដូនជីសូហ្វីយ៉ា បានឲ្យដឹងថា បេសកកម្មក្រុមបងស្រីតូចតាចនៃព្រះយេស៊ូ គឺរស់នៅ និងធ្វើកិច្ចការងារតូចតាច ដើម្បីបង្ហាញពីវត្តមានរបស់ព្រះជាម្ចាស់ទៅដល់អ្នកក្រីក្រតូចតាចនៅក្នុងសង្គម។
ដូនជីសូហ្វីយ៉ាបានឲ្យដឹងថា រយៈពេល៩ឆ្នាំដែលគាត់និងដូនជីម្នាក់ទៀត បានរស់នៅនិងធ្វើការងារក្នុងនាមជាដូនជីកាតូលិក គឺដើម្បីបង្ហាញសក្ខីកម្មជាគ្រីស្តបរិស័ទទៅដល់មនុស្សដទៃទៀតក្នុងកន្លែងការងារ។
ដូនជីសូហ្វីយ៉ា ជាជនជាតិកូរ៉េខាងត្បូង និយាយខ្មែរបានខ្លះៗ ឲ្យដឹងទៀតថា «ខ្ញុំមានបទពិសោធច្រើនជាមួយមនុស្សជនជាតិកម្ពុជា។ នៅរោងចក្រ ខ្ញុំមិនត្រឹមតែជាអ្នកធ្វើការជាមួយគ្នា ប៉ុន្តែជាមិត្តភក្តិ ជាបង និងជាអ្នកជិតខាង។»
ជាច្រើនឆ្នាំមកនេះតាមការសង្កេតរបស់ក្រុមដូនជី បានឲ្យដឹងថា ប្រជាជនកម្ពុជាមិនសូវចាប់អារម្មណ៍ពីជីវិតអ្នកបួស ឬគ្រីស្តបរិស័ទទេ។ ពួកគេចាប់អារម្មណ៍លើជីវិតធម្មតា ដោយក្រៅពីធ្វើការងាររួមគ្នា ព្រោះពួកគេបានផ្សារភ្ជាប់ជីវិតយ៉ាងជ្រៅក្នុងព្រះពុទ្ធសាសនា។ ដូនជីបញ្ជាក់ថា «នៅពេលដែលខ្ញុំនិយាយ គេលើកពីវត្តមកភ្ជាប់ជាមួយ។»
ទោះបីជាយ៉ាងនេះក្តី ដូនជីបានបន្ថែមថា គាត់មានអំណរនៅ «ពេលពួកគេមានបញ្ហា គេអាចចែករំលែកជាមួយខ្ញុំ ដោយគេគិតថាខ្ញុំជាអ្នកបួស ជាមនុស្សចាស់មានបទពិសោធច្រើនអាចទុកចិត្ត ចែករំលែកពីជីវិតគេ។»
ដើម្បីឲ្យគេស្គាល់ព្រះយេស៊ូនិងជំនឿរបស់ខ្លួន ក្នុងឱកាសបុណ្យធំៗ ក្រុមដូនជីបានរៀបចំកាដូសម្រាប់កុមារ១៣០នាក់ដែលជាកូនចៅកម្មករកម្មការិនី និងកុមារក្រីក្រ ដូចជាបុណ្យព្រះយេស៊ូប្រសូតជាដើម ដែលធ្វើឲ្យពួកគេនឹកចាំថ្ងៃនោះ។
ការរស់នៅជាមួយកម្មករ-រិនីក្នុងរោងចក្រ ធ្វើឲ្យក្រុមដូនជីអាចចូលទៅក្នុងជីវិតឯកជនរបស់ពួកគាត់បាន «ពេលពួកគេមានកម្មវិធី មានពិធីរៀបការ មានបុណ្យផ្សេងៗនៅផ្ទះគេនៅខេត្ត ខ្ញុំទៅចូលរួមទៅគេងនៅផ្ទះគេ ទោះគេមិនមកព្រះវិហារយើងច្រើនដង ប៉ុន្តែខ្ញុំកន្លែងគេទៅច្រើនដងនៅវត្ត និងផ្ទះដោយរីករាយជាមួយគ្នា។» ដូនជី សូហ្វីយ៉ាបញ្ជាក់។
អ្នកបួសរូបនេះរៀបរាប់ទៀតថា “ខ្ញុំធ្លាប់អញ្ជើញពួកគេមកព្រះវិហារច្រើនដង ប៉ុន្តែពួកគេមិនចូលចិត្ត មិនចាប់អារម្មណ៍ដោយថា នៅវត្តពួកគេចាប់អារម្មណ៍ជាង”។ បងស្រីបន្តថា នៅពេលពួកគេមកផ្ទះយើង ញ៉ាំបាយជាមួយគ្នា និយាយគ្នាពីជីវិតទូទៅបាន ប៉ុន្តែពួកគេមិនសូវចូលចិត្តនិយាយពីសាសនាទេ។
ក្រៅពីជីវិតជាកម្មការិនីរោងចក្រដោយប្រកបកិច្ចការជាមួយអ្នកក្រីក្រ ក្រុមបងស្រីក៏បានចូលរួមជាមួយសកម្មភាពខ្លះៗរបស់ព្រះសហគមន៍នៅក្នុងក្រុមត្រាស់ហៅ ដោយចូលរួមបង្ហាញវត្តមានជាមួយក្រុមអេម៉ាណូអែលនិងសាម៉ូអែលផងដែរ។
ក្រុមគ្រួសារបងស្រីតូចតាចនៃព្រះយេស៊ូមានវត្តមានជិត៣០០ប្រទេសទូទាំងពិភពលោក ដោយមានដូនជីជិត១៣០០នាក់។ ហើយនៅពេលនេះ សមាជិក២រូប គឺដូនជីសូហ្វីយ៉ា គីយ៉េង(Sophia Kyeng) និងបងស្រីអាណា ហឿង (Anna Huong) បានត្រលប់ទៅវិញនាថ្ងៃទី២៩ ខែមីនា ឆ្នាំ២០២២៕
ដោយ៖ ដាលីស
