«ខ្ញុំនឹងចងចាំអំពើល្អគាត់នៅក្នុងបេះដូង និងក្រុមគ្រួសាររបស់យើងខ្ញុំទាំងអស់នឹងចងចាំគាត់។» នេះជាប្រសាសន៍របស់លោកលោកចាន់ សុភ័ណ្ឌ ជាកូនចិញ្ចឹមរបស់លោកបៀល បានថ្លែងនៅក្នុងពិធីបុណ្យសពនៅព្រះវិហារព្រះកុមារយេស៊ូបឹងទំពុន នារាជធានីភ្នំពេញ កាលពីថ្ងៃទី២៤ ខែមីនា ឆ្នាំ២០២២។
លោកសុភ័ណ្ឌបន្តថា គាត់សូមអរគុណដល់ព្រះជាម្ចាស់ដែលបានប្រទានលោកបៀលមកលើភពផែនដីនេះ។ គាត់បានជួយទាំងអស់មនុស្សនៅលើពិភពលោកនេះ មិនថាកូរ៉េ ចិន ជប៉ុនឬប្រទេសផ្សេងៗ ជាពិសេសគាត់បានជួយច្រើននៅប្រទេសកម្ពុជាយើង។
រយៈពេលកន្លងមក លោកបៀលបានរស់នៅជាមួយក្រុមគ្រួសាររបស់លោក សុភ័ណ្ឌ ក្រោយពេលវិលត្រឡប់មកពីសហរដ្ឋអាមេរិក។ សុភ័ណ្ឌបន្ថែមថា «ខ្ញុំក៏មិនដឹងសងគុណគាត់យ៉ាងម៉េច មានតែការមើលថែគាត់ ហើយខ្ញុំក៏សោកស្តាយផងដែរ ដែលខ្ញុំបានបាត់បង់អ្នកទីប្រឹក្សារបស់ខ្ញុំម្នាក់។ នៅពេលដែលខ្ញុំមានបញ្ហាអ្វីមួយខ្ញុំពិភាក្សាជាមួយគាត់មុនគេ ប៉ុន្តែមានតែគាត់ទេយល់ចិត្តខ្ញុំច្រើន។»
ពិធីបុណ្យសពរបស់លោកវីលៀម ថនតុន បឺន (បៀល) (Br. William Thornton Burns_Bill) នៃក្រុមគ្រួសារម៉ារីណុល ត្រូវបានធ្វើឡើងក្រោមអធិបតីភាពរបស់ លោកបូជាចារ្យ ដាមីញ៉ាំង ហ្វារនឺ និងបូជាចារ្យជាច្រើនរូបទៀត នៅព្រះវិហារព្រះកុមារយេស៊ូ បឹងទំពុន ក្នុងខណ្ឌមានជ័យ រាជធានីភ្នំពេញ។
តាមការឱ្យដឹងពីលោកបូជាចារ្យ ដាមីញាំង ហ្វានឺ បងប្រុសវីលៀម បៀល បានរស់នៅកម្ពុជាជាង២០ឆ្នាំ ធ្វើជាសក្ខីភាពអំពីព្រះយេស៊ូអំពីវត្តមានរបស់ព្រះជាម្ចាស់នៅក្នុងជីវិតរបស់យើង អំពីព្រះជាម្ចាស់ក្នុងព្រះសហគមន៍របស់យើងនៅកម្ពុជា។
លោកបូជាចារ្យ ដាមីញាំង «បងប្រុសបៀល មិនមែនជាបងប្រុសម៉ារីណុល ក៏ប៉ុន្តែចិត្តរបស់គាត់នៅជាមួយម៉ារីណុល ហើយអ្វីដែលគាត់បានធ្វើសម្រាប់ព្រះជាម្ចាស់ រួមជាមួយនិងក្រុមម៉ារីណុលតាមស្មារតី របស់ក្រុមម៉ារីណុល ហើយបងប្រុសបៀល គាត់ជាថ្មដ៏រឹងមាំមួយនៃព្រះវិហារយើង។»
កុមារបៀល កើតនៅថ្ងៃទី១៧ ខែឧសភា ឆ្នាំ១៩៤៣ នៅសហរដ្ឋអាមេរិក។ លោកជាកូនទី៣ ដែលមានបងប្រុសពីររូប។ ពេលចម្រើនវ័យ និងបញ្ចប់ការសិក្សា លោកបានអភិវឌ្ឍខ្លួនជាសាស្ត្រាចារ្យ ដោយបង្រៀននៅសាកលវិទ្យាល័យ Jesuit Sogang នៅប្រទេសកូរ៉េ ប្រទេសអារ៉ាប់ខាងត្បូង និងប្រទេសហ្វីលីពីន នាឆ្នាំ ១៩៦៥ដល់ឆ្នាំ២០០១។
ក្នុងឆ្នាំ២០០១ លោកបានទទួលបេសកកម្មស្ម័គ្រចិត្តមកប្រទេសកម្ពុជាតាមរយៈអង្គការម៉ារីណុល ដោយបង្រៀនភាសាអង់គ្លេសនៅសាកលវិទ្យាល័យភូមិន្ទភ្នំពេញ និងចូលរួមជាសាមាជិកភាពនៃក្រុមអ្នកនៅលីវដើម្បីប្រកាសដំណឹងល្អ។ លោកបានវិលត្រលប់ទៅសហរដ្ឋអាមេរិកវិញក្នុងឆ្នាំ២០១៣ និង៤ឆ្នាំក្រោយមកលោកបៀលបានសម្រេចចិត្តកម្ពុជាម្តងទៀត រហូតដល់ជីវិតចុងក្រោយរបស់លោក ដោយទទួលមរណភាពនៅក្នុងប្រទេសកម្ពុជាកាលពីថ្ងៃទី១៥ ខែមីនា ឆ្នាំ២០២២។
ក្នុងពេលធម្មទេសនា ក្នុងពិធីបុណ្យសពនេះ លោកបូជាចារ្យឆាលី ឌីដម៉ែយ័រ ជាបូជាចារ្យនៃក្រុមគ្រួសារម៉ារីណុលបាននិយាយពីជីវិតរបស់លោកបៀលថា៖ ដោយបៀលបានមកកម្ពុជាមិនមែនព្រោះតែគ្មានអាហារបរិភោគនៅសហរដ្ឋអាមេរិកទេ ហើយក៏មិនមែនព្រោះតែបញ្ហានៅទីនោះដែរ។
លោកបូជាចារ្យឆាលីបន្ថែមថា បៀលមកដោយសារតែសេចក្ដីស្រឡាញ់ចំពោះបងប្អូននៅទីនេះ ដើម្បីជួយដល់បងប្អូនទៅតាមជំនាញនិងលទ្ធភាពដែលគាត់មាន។ បៀលបានរៀបចំកន្លែងពិសេសមួយនៅក្នុងបេះដូងរបស់គាត់ សម្រាប់ប្រជាជនកម្ពុជា ជាពិសេសសម្រាប់សុភណ្ឌ និងគ្រួសាររបស់គាត់ ទោះបីជាទំនៀមទម្លាប់ អាហារ និងភាសាខុសគ្នា ប៉ុន្តែសេចក្ដីស្រឡាញ់បានអញ្ជើញគាត់ឱ្យស្នាក់នៅកម្ពុជារហូតដល់ថ្ងៃស្លាប់។
នៅក្នុងជីវិតរបស់លោកបៀល មានទំនាក់ទំនងយ៉ាងជ្រៅជាមួយជនជាតិខ្មែរ នេះបើយោងតាមការឱ្យដឹងពី ដូនជីរីជីណា ពេលីគ័រ នៃក្រុមគ្រួសារម៉ារីណុលនៅកម្ពុជាដែលជាអ្នកអានសារលិខិតរបស់ក្រុមគ្រួសាររបស់លោកបៀល។
តាមខ្លឹមសារនៃលិខិតនោះ បានឱ្យដឹងថា «គ្រួសាររលាកបៀល សូមថ្លែងអំណរគុណដល់ប្រជាជនកម្ពុជាទាំងអស់ ដែលបានរួមចំណែកក្នុងជីវិតរបស់លោកបៀល។ លោក បៀល ពិតជាមានអារម្មណ៍ថាប្រទេសកម្ពុជា គឺជាផ្ទះរបស់គាត់ ហើយគាត់មានបំណងតម្កល់អដ្ឋិធាតុនេះ នៅព្រះវិហារដែលគាត់បានចូលរួមអភិបូជានៅកម្ពុជា។»
លោកបូជាចារ្យ ដាមីញ៉ាំង ហ្វារនឺ ប្រោះទឹកប្រទានពរជាចុងក្រោយដល់សពលោក បៀល និងទូលអង្វរព្រះជាម្ចាស់ដោយផ្ញើគាត់ក្នុងព្រះហស្តរបស់ព្រះអង្គ ដោយរួមជាមួយក្តីសង្ឃឹម និងជឿជាក់ថា យើងគ្រប់ៗគ្នា ដែលនិងទទួលជីវិតថ្មីដ៏រុងរឿង តាមរយៈព្រះយេស៊ូគ្រីស្ត។
សពលោកបៀលត្រូវបានបូជា ហើយអដ្ឋិធាតុរបស់លោកត្រូវបានតម្កល់នៅព្រះវិហារព្រះកុមារបឹងទំពុន នារាជធានីភ្នំពេញ៕
ដោយ កកស្រីនិ
