ទោះបីជា មាន ភ្លៀង ធ្លាក់ក៏ក្បួន ដង្ហែដោយមាន ព្រះឈើឆ្កាង ព្រះគម្ពីរ ទៀន ផ្កាភ្ញី អមដោយស្នូរចម្រៀងលើកតម្កើងព្រះជាម្ចាស់ឥតដាច់ ដោយមានតំណាងគ្រីស្តបរិស័ទ អស់លោកបូជាចារ្យ និង លោក អភិបាលព្រះសហគមន៍កាតូលិក ភូមិភាគភ្នំពេញ អូលីវីយ៉េ ជ្មីត ហស្លេហែជុំវិញ ព្រះវិហារថ្មី ចំនួន៣ជុំ នាព្រឹក ថ្ងៃ ទី ៤ មិថុនា ២០២២ ដើម្បី ប្រសិទ្ធីព្រះវិហារថ្មីនេះ ទៅជាព្រះដំណាក់របស់ព្រះជាម្ចាស់។
ពិធីនេះប្រព្រឹត្តទៅ នៅភូមិសុវណ្ណសាគរ ស្រុកកំពង់បាយ ក្រុងកំពត និង មានតំណាងគ្រីស្តបរិស័ទមកពី ព្រះសហគមន៍នានាក្នុងភូមិភាគភ្នំពេញ ចូលរួមអបអរសាទរ យ៉ាងច្រើនកុះករ។
នាក់ កញ្ញា ជាគ្រីស្តបរិស័ទនៅមណ្ឌលសកម្មភាពកំពត រៀបរាប់ថា «នៅពេល ដែល បាន ឃើញ ព្រះវិហារថ្មី ខ្ញុំមាន អារម្មណ៍ សប្បាយរីករាយ រំភើប ដោយសារ យើងមានកន្លែងអភិបូជាស្អាត និងមានន្លែងសម្រាប់អធិដ្ឋាន ហើយព្រះវិហារនេះ សាងសង់ដោយមានរចនាគួរឱ្យទាក់ទាញ។»
កញ្ញាបានឲ្យដឹងទៀតថា ការរៀបចំតាក់តែងរបស់ព្រះវិហារនេះ បានធ្វើឲ្យនាងមានអារម្មណ៍ជិតស្និទ្ធនឹងព្រះជាម្ចាស់។ «កាលពីមុន ព្រះវិហារចាស់ តូចចង្អៀត ទ្រុឌទ្រោម ពិបាក។ ប៉ុន្តែព្រះវិហារ ថ្មី នេះ ធ្វើឱ្យ យើង អាច ចួបជុំគ្នាបានច្រើន និង មានភាពកក់ក្ដៅ នៅពេលយើងអធិដ្ឋានមានអារម្មណ៍ថារឹងមាំជាថ្មី។» នាក់កញ្ញាបន្ថែម។
ព្រះវិហារថ្មីនេះ មានឈ្មោះថា សន្តអូគូស្តាំង ដែលមានទំហំបណ្ដោយ១៧ម៉ែត្រ និង ទទឹង១៧ម៉ែត្រ។
លោកបូជាចារ្យ ទទួលខុសត្រូវ ព្រះវិហារ សន្តអូគូស្តាំង លោកតាវ៉ូឡា យ៉ាំងលូកា មានប្រសាសន៍ថា ព្រះវិហារថ្មីនេះជាសុបិន្តរបស់ព្រះសហគមន៍កំពត។
លោក បានរំឭកថា កាលពី ឆ្នាំ ២០០៩ ខណៈពេលលោកមកដល់កំពត គឺមានតែបន្ទប់អធិដ្ឋានមួយស្អាត ប៉ុន្តែ ជាសំយ៉ាបផ្ទះ ដែលលោកអភិបាលអូលីវីយ៉េ និង លោក ឪពុក លី បានរៀបចំ។ ហើយពេលនេះ ព្រះសហគមន៍ របស់យើងក៏បានលូតលាស់ ដោយពេលយើងថ្វាយអភិបូជា នៅថ្ងៃអាទិត្យ មានបងប្អូនមួយចំនួនអង្គុយ នៅខាង ក្រៅ នៅតាមសួន ដែលនាំឱ្យយើងចិញ្ចឹមគំនិតថា «ត្រូវតែរៀបចំឱ្យមានព្រះវិហារមួយ។»
លោកបន្តថា «ខ្ញុំជឿ និងសង្ឃឹមថា កន្លែងនេះ និងសកម្មភាព ដែលយើងមានជាប្រចាំនឹងជួយឱ្យព្រះសហគមន៍ របស់យើងរីកចម្រើន ជាពិសេសមានភាពជិតស្និទ្ធជាមួយព្រះយេស៊ូ ដោយមានកន្លែងសមរម្យដើម្បីអធិដ្ឋាន ស្ដាប់ព្រះបន្ទូល ព្រះជាម្ចាស់។»
លោក បូជាចារ្យ ក៏សង្ឃឹមថាព្រះវិហារថ្មីនេះ នឹងផ្ដល់កម្លាំងចិត្តឱ្យ ព្រះសហគមន៍ កំពត ទោះបីព្រះវិហារតូច ព្រះសហគមន៍តូច ប៉ុន្តែ យើងនៅតែរឹងមាំ ដោយមានឆន្ទៈបន្តទៅមុខដើម្បីប្រកាសដំណឹងល្អ។
ពិធីឆ្លងព្រះវិហារថ្មីនេះ ចាប់ផ្ដើមដោយមេជាងប្រគល់កូនសោរទៅលោកអភិបាល ហើយលោកអភិបាលជូនទៅលោកបូជាចារ្យយ៉ាំងលូកា បើកទ្វារដើម្បីនាំគ្រីស្តបរិស័ទ ចូលក្នុងព្រះដំណាក់ព្រះជាម្ចាស់។
លោកអភិបាលអូលីវីយ៉េ បានប្រោះទឹកព្រះពរ លាបប្រេងលើអាសនៈ បញ្ចុះធាតុរបស់សន្តអូគូស្តាំងកាលពី៧០០ឆ្នាំមុន និងលាបប្រេងលើជញ្ជាំងព្រះវិហារ។
ថ្លែងនៅក្នុងធម្មទេសនា លោកអភិបាលបានរំលឹកថា ក្នុងឆ្នាំ២០០១ លោកនៅជាបូជាចារ្យ ហើយបានបំពេញបេសកកម្មនៅក្នុងតំបន់កំពតជាមួយលោកបូជាចារ្យសួនហង្សលី ដោយធ្វើកិច្ចការមេត្តាករុណា ដើម្បីប្រកាសដំណឹងល្អ។
លោកអភិបាលបានជំរុញឲ្យគ្រីស្តបរិស័ទយកគំរូរបស់សន្តប៉ូលដែលខិតខំ ប្រកាសដំណឹងល្អរហូតដល់ចុងក្រោយនៃជីវិតរបស់លោក។
លោកលើកឡើងថា ត្រូវស្វាគមន៍មនុស្សដែលមករកយើង ហើយយើងផ្ទាល់ខ្លួនដែលជាគ្រីស្តបរិស័ទ ត្រូវតែមាន សេចក្ដីសុខសាន្ត សេចក្ដីសង្ឃឹម សេចក្ដីស្រឡាញ់ ការចេះយល់ចិត្តគ្នា ការចេះបង្កើតទឹកសន្តិភាព ការចេះបង្កើតសុខដុមរមនា។ ជាមួយគ្នានេះ ការប្រកាសព្រះរាជ្យព្រះជាម្ចាស់មិនមែនបង្ខំ ប៉ុន្តែផ្ដល់សាក្ខីភាពអំពីជីវិតដែលព្រះជាម្ចាស់ទាននិងដោយយកចិត្តទុកដាក់អប់រំខ្លួន ដូចសន្តប៉ូលដែលមានចិត្តអង់អាច។
លោកក៏បានក្រើនរំឭកគ្រីស្តបរិស័ទទៀតថា យើងត្រូវចេញពីកន្លែងផ្ទាល់ខ្លួនដើម្បីទៅដល់កន្លែងដែលបងប្អូនមានសេចក្ដីត្រូវការ និងមានទុក្ខលំបាក ហើយបន្តសក្ខីភាពរបស់យើងជាមួយបងប្អូន ដើម្បីនាំគេឱ្យមានជីវិតពេញបរិបូរណ៍។
នៅក្នុងពិធីឆ្លងនេះ លោកមានប្រសាសន៍ទៀតថា «ពិតមែនព្រះដំណាក់របស់ព្រះជាម្ចាស់ផ្ទះដោយសក្ការៈរបស់ព្រះជាម្ចាស់មិនមែនត្រឹមតែព្រះវិហារទេ ប៉ុន្តែនៅក្នុងដួងចិត្តរបស់យើង ជាយើងដែលជាវត្តមានរបស់ព្រះជាម្ចាស់។»
ព្រះសហគន៍កាតូលិកកំពត កកើតឡើងក្នុងខែកុម្ភៈ ឆ្នាំ២០០២ ដោយ មានបេសកកម្មស្វែងរកគ្រីស្តបរិស័ទពីដើម មុនសម័យប៉ុលពត។ ឆ្នាំ២០០៣ ព្រះសហគមន៍បានទិញផ្ទះមួយ រួចបង្កើតឱ្យមានមណ្ឌលសិស្សអូគូស្តាំង បង្កើតឱ្យមានក្រុមមេត្តាករុណា និងអប់រំជំនឿ មជ្ឈមណ្ឌលវប្បធម៌និងភាសាបរទេស និងសាលាមត្តេយ្យ ដោយមានគ្រឹះនៃសាសនទូតព្រះសហគមន៍កាតូលិកបានណែនាំជាច្រើនជំនាន់។ រីឯព្រះវិហារសន្តអូគូស្តាំង ដែលបានជួសជុលកែលម្អពង្រីកបន្ថែមនេះ បានកែប្រែពីផ្ទះរបស់ពុទ្ធសានិកមកជាផ្ទះដែលមានបន្ទប់អធិដ្ឋានរបស់ព្រះសហគមន៍កាតូលិក និងបន្តកែលម្អពង្រីកជាព្រះវិហារក្នុងបរិបទកូវីដ១៩កន្លងទៅ ដោយបញ្ចប់កិច្ចការសំណង់កាលពីដើមឆ្នាំ២០២២នេះ៕
ដោយ ដាលីស
