បេក្ខជនចំនួន២៧រូបទទួលអគ្គសញា្ញលាបថ្ងាស និង១៥នាក់ទទួលព្រះកាយលើកដំបូងនៅថ្ងៃបុណ្យគោរព ព្រះកាយ និងព្រះលោហិតព្រះគ្រីស្ត ពីលោកអភិបាល អូលីវីយ៉េ អភិបាលព្រះសហគមន៍កាតូលិក ភូមិភាគភ្នំពេញ​ នាព្រឹកថ្ងៃទី ១៩ មិថុនា ២០២២ នៅព្រះវិហារសន្តសិលានិងសន្តប៉ូល ភ្នំពេញថ្មី។

បេក្ខជន បេក្ខនារីទាំង២៧រូប ភាគច្រើនជាមនុស្សពេញវ័យដែលបានទទួលអគ្គសគ្គជ្រមុជទឹកក្នុងរយៈពេល​ ពីរ ឬបីឆ្នាំកន្លងទៅ ហើយមួយចំនួនទៀត ជាយុវជន ដែលបានទទួលអគ្គសញ្ញជ្រមុជទឹកតាំងពីទារកមកម្លេះ ដែលមានឪពុកម្តាយជាគ្រីស្តបរិស័ទ។ បងប្អូនបានទទួលការអប់រំ​ជំនឿយូរឆ្នាំ​ ដើម្បីយល់ដឹង និងមានជំនឿយ៉ាងបរិបូរណ៍ លើព្រះគ្រីស្តយេស៊ូ។​ ចំពោះបេក្ខជន ចំនួន ១៥នាក់ ដែលទទួលព្រះកាយលើកដំបូង ជាកូនចៅគ្រីស្តបរិស័ទ ដែលបានទទួលអគ្គសញ្ញាជ្រមុជទឹកពីកុមារ។ បន្ទាប់តទៅគេ នឹងទទួលអប់រំជំនឿបន្ថែម ត្រៀមខ្លួនអគ្គសញ្ញា លាបថ្ងាស ក្លាយជាគ្រីស្តបរិស័ទពេញលក្ខណៈ និងចេញផ្តល់សក្ខីភាពពីជំនឿរបស់លើព្រះគ្រីស្តដល់បងប្អូនឯទៀតៗ។​

នៅក្នុងធម្មទេសនា  លោកអភិបាលព្រះសហគមន៍មានប្រសាសន៍ ទៅកាន់ បេក្ខជន និងគ្រីស្តបរិស័ទទាំងអស់ថា យើងគោរព យើងទទួលព្រះកាយនិងព្រះលោហិតព្រះគ្រីស្ត ណែនាំឲ្យយើងចូលក្នុងអាថ៌កំបាំងដ៏សំខាន់សម្រាប់ជីវិតរបស់យើងជាគ្រីស្តបរិស័ទ គឺយើងបានចូលក្នុងព្រះកាយព្រះគ្រីស្ត។ ព្រះកាយគ្រីស្ត ដែលជា “ព្រះសហគមន៍”។

លោកអភិបាលបន្តថា ព្រះសហគមន៍ មិនត្រឹមតែជាគ្រួសារ១ដែលចួបជុំគ្នា ជួយអ្នកក្រីក្រ អ្នកជំងឺតែប៉ុណ្ណោះទេ ប៉ុន្តែជាព្រះសហគមន៍របស់ព្រះជាម្ចាស់ ដែលត្រាស់ហៅឲ្យចួបជុំគ្នាអធិដ្ឋាន ទទួលការអប់រំជំនឿ និងចែករំលែកសេចក្ដីស្រឡាញ់ជាក់ស្ដែងដែលជាធម៌មេត្តាករុណារបស់ព្រះជាម្ចាស់​។ យើងជាព្រះសហគមន៍ដែលព្រះជាម្ចាស់បង្កើតមក  ដែលមានព្រះយេស៊ូជាព្រះសិរសា និងមានព្រះវិញ្ញាណដ៏វិសុទ្ធជំរុញយើងឱ្យទៅមុខ។

លោកអភិបាលបន្ថែមថា ព្រះវិញ្ញាណដ៏វិសុទ្ធ ជាដង្ហើម របស់ព្រះជាម្ចាស់ផ្ទាល់ ណែនាំឱ្យយើងមានភាពក្លាហានរស់នៅក្នុងសង្គមនិងព្រះសហគមន៍។ នៅពេលព្រះយេស៊ូឡើងស្ថានបរមសុខ ព្រះយេស៊ូមានបន្ទូល “សូមទៅប្រកាសដំណឹងល្អ ដោយធ្វើពិធីជ្រមុជទឹក រហូតដល់ដាច់ស្រយាលនៃផែនដី”។ លោកបញ្ជាក់ទៀតថានេះជាបេសកកម្មដែលយើងបានទទួល។ យើងមានសេខក្ដីថ្លៃថ្នូរ តាមលក្ខណ:ពិសេសមិនមែនតាមលោកីយ៍។ ទោះយើងរស់នៅក្នុងលោកីយ៍ តែយើងជាប្រជាជនរបស់ព្រះជាម្ចាស់ មានវិន័យតែមួយគត់ “ស្រឡាញ់គ្នាទៅវិញទៅមក ដូចព្រះយេស៊ូស្រឡាញ់យើង”។

លោកអភិបាលព្រះសហគមន៍ក្រើនរំឭកថា យើងមានតួនាទី ធ្វើជាអំបិល និងពន្លឺ និងចែករំលែកសេចក្តីស្រឡាញ់ ដល់បងប្អូនឯទៀតៗ… និងសំខាន់មានគោលដៅក្នុងជីវិតគឺ “ព្រះរាជ្យនៃស្ថានបរមសុខ” ជីវិតអស់កល្បជានិច្ច។ ពិតមែនយើងជាព្រះកាយព្រះគ្រីស្ត និងព្រះកាយព្រះគ្រីស្តដែលយើងទទួលគឺទទួលព្រះជាម្ចាស់ផ្ទាល់នៅក្នុងខ្លួនរបស់យើង ធ្វើឱ្យយើងយល់ថា យើងជាព្រះកាយព្រះគ្រីស្តនៅលើផែនដីនេះ និងជាពិសេសនៅលើទឹកដីកម្ពុជារបស់យើង។

ក្រោយពីបញ្ចប់ធម្មទេសនា លោកអភិបាល សួរបញ្ជាក់ជំនឿរបស់បេក្ខជនដែលសុខចិត្តបោះបង់ចោលមារសាតាំង ឈប់បម្រើកិច្ចការរបស់មារសាតាំង និងឈប់ជឿល្បិចកលរបស់មារ ហើយជឿសង្ឃឹមលើព្រះជាម្ចាស់ជាព្រះបិតាព្រះបិតា ព្រះបុត្រា និងព្រះវិញ្ញាណដ៏វិសុទ្ធ និងសហភាពរវាងជនដ៏វិសុទ្ធទាំងឡាយ។ លោកអភិបាលក៏បានសួរទៅកាន់គ្រីស្តបរិស័ទ ឲ្យប្រកាសជំនឿរបស់ខ្លួនតាមបែបព្រះសហគមន៍កាតូលិក។

ព្រះសហគមន៍អធិដ្ឋានអង្វរព្រះវិញ្ញាណយាងមក និងប្រោសឱ្យបេក្ខជនបានទៅជាបុត្រធីតាព្រះជាម្ចាស់ បានទទួលព្រះអំណោយទានពីព្រះវិញ្ញាណ ដើម្បីប្រកាសដំណឹងល្អដល់ពិភពលោក។ លោកអភិបាល ទ្រាបដៃលើបេក្ខជនទាំងអស់ដែលកំពុងបន្ទន់ក្បាលដល់កន្ទេលដើម្បីទទួលព្រះអំណោយទានទាំង៧នៃព្រះវិញ្ញាណដ៏វិសុទ្ធ។  ក្រោយមកលោកអភិបាលលាបប្រេងគ្រីស្មាលើថ្ងាសរបស់បងប្អូនទាំងអស់។

តំណាងឪពុកម្ដាយបេក្ខជន លោក រស់​ វុត្ថា រំភើបដោយកូនៗបានទទួលអគ្គសញ្ញាព្រះកាយព្រះគ្រីស្ត និងប្អូនៗដែលទទួលអគ្គសញ្ញាលាបថ្ងាស ជាពិសេសសូមអរគុណដល់លោកអភិបាល លោកឪពុក លោកគ្រូអ្នកគ្រូអប់រំជំនឿ ដែលបានបង្ហាត់បង្រៀនកូនៗ ក្នុងអំឡុងពេលទទួលអប់រំជំនឿ បានឃើញថាកូនៗបានកែប្រែអកប្បករិយាមួយចំនួន ដោយសូមឲ្យប្អូនៗមានចិត្តក្លាហានហ៊ានប្រកាសជំនឿរបស់កូនៗ និងប្អូនៗ។

បេក្ខជន អគ្គសញ្ញាលាបថ្ងាស ទន់ សៀវផរ ដែលមានដើមកំណើតមកពីព្រះសហគមន៍សន្តហ្វ្រង់ស្វ័រសាវីយ៉េ និងទទួលការអប់រំជំនឿនៅព្រះសហគមន៍ភ្នំពេញថ្មី រៀបរាប់ថា សម្រាប់ខ្ញុំផ្ទាល់អគ្គសញ្ញាលាបថ្ងាសនេះពិសេសសម្រាប់ខ្ញុំ ព្រោះមួយជីវិតនេះទទួលបានតែម្ដងទេ និងរង់ចាំយូរហើយ ដោយសារខ្ញុំទទួលអគ្គសញ្ញាជ្រមុជទឹកតាំង២០១៩ ប៉ុន្តែមិនទាន់បានទទួលអគ្គសញ្ញាលាបថ្ងាសដោយកូវីដ១៩។ ចំពោះព្រះសហគមន៍ខ្ញុំយល់ឃលញថាកាន់តែរីកចម្រើនទៅមុខ និងមានទំពាំងស្នងឫស្សីច្រើននិងមកពីកន្លែងផ្សេងៗ ប៉ុន្តែមើលទៅដូចជាក្រុមគ្រួសារមួយ។ « ខ្ញុំស្រឡាញ់ការរស់នៅរបស់ព្រះសហគមន៍ ដោយសារឃើញជីវិតជាបូជាចារ្យ បងប្រុស បងស្រី គាត់បង្ហាញសេចក្ដីស្រឡាញ់ និងធ្វើឱ្យយល់ថាគ្រប់ទង្វើគឺចេញពីសេចក្ដីស្រឡាញ់ទៅកាន់អ្នកជុំវិញខ្លួនមិនថាអ្នកដែលស្រឡាញ់ឬអ្នកដែលស្អប់យើងក៏ដោយ តែលក្ខណៈបែបនោះគឺធ្វើឱ្យខ្ញុំមានសេចក្ដីសុខមែនទែន»។ បន្ទាប់ពីទទួលអគ្គសញ្ញាលាបថ្ងាសនេះហើយ បេក្ខជនរូបនេះប្តេជ្ញានឹងរួមដំណើរជាមួយព្រះសហគមន៍ដើម្បីប្រកាសដំណឹងល្អ ដោយនេះជាកាតព្វកិច្ចរបស់គ្រីស្តបរិស័ទផ្ទាល់ខ្លួន ទោះបីមិនអាចប្រកាសដំណឹងល្អខ្លាំងៗដូចសន្តបុគ្គល ប៉ុន្តែអាចប្រកាសតាមរយៈជំនឿ ការអនុវត្តការរស់នៅប្រចាំថ្ងៃរបស់យើងដោយមិនខ្លាចក្នុងការបង្ហាញអត្តសញ្ញាណជាគ្រីស្តបរិស័ទដល់អ្នកឯទៀតៗ។

ចំណែក កញ្ញា សែត ឃុនណារី បេក្ខនារីទទួលអគ្គសញ្ញាលាបថ្ងាសបាននិយាយថា អគ្គសញ្ញាលាបថ្ងាសបានរំឭកខ្ញុំពីជំហ៊ានទីមួយ និងអគ្គសញ្ញាជ្រមុជទឹក។ ណារីបញ្ជាក់ថា «ខ្ញុំរង់ចាំថ្ងៃនេះយូរហើយ ព្រោះនៅពេលខ្ញុំជាគ្រីស្តបរិស័ទពេញលេញ ខ្ញុំនឹងជួយអភិវឌ្ឍព្រះសហគមន៍របស់យើងឱ្យមានការរីកចម្រើន»។​ កញ្ញារូបនេះប្តេជ្ញាណែនាំឱ្យក្មេងៗស្គាល់ពីព្រះជាម្ចាស់ ស្គាល់ពីព្រះសហគមន៍កាន់តែច្រើន និងឱ្យក្មេងជំនាន់ក្រោយដឹងថា នៅពេលយើងរស់នៅក្នុងព្រះវិញ្ញាណព្រះជាម្ចាស់ យើងមានសេចក្ដីសុខនិងសុភមង្គលខ្លាំងមែនទែន។ នាងបញ្ជាក់ថា «នៅពេលខ្ញុំមិនក្លាយជាគ្រីស្តបរិស័ទពេញលេញ ខ្ញុំគិតតច្រើនចំពោះលោកីយ៍ និងមិនមានភាពអំណត់ តែក្រោយពីក្លាយជាគ្រីស្តបរិស័ទមានព្រះសហគមន៍ យើងដូចជាបងប្អូនគ្នា ស្រឡាញ់គ្នា រាប់អានគ្នា ធ្វើឱ្យយើងមានសុភមង្គលទាំងផ្លូវចិត្ត និងផ្លូវកាយ»។

ដោយឡែក យុវជន ជុំ សុខសំបូរ ដែលបានទទួលអគ្គសញ្ញាព្រះកាយព្រះគ្រីស្តនៅថ្ងៃនេះ បានឱ្យដឹងថា «ខ្ញុំសប្បាយចិត្តនិងរំភើបដែលបានទទួលអគ្គសញ្ញាព្រះកាយព្រះគ្រីស្ត ដោយសារខ្ញុំមានបំណងចង់ទទួលព្រះកាយនេះតាំងពីតូចមកម្ល៉េះ»។ សំបូរ ឱ្យដឹងទៀតថា រូបគេនឹងខំប្រឹងប្រែងរៀនសូត្រ និងទទួលការអប់រំជំនឿឱ្យមានជំនឿរឹងមាំជាងមុន និងធ្វើជាគ្រីស្តបរិស័ទមួយដ៏ល្អ ហើយនឹងជួយណែនាំបងប្អូនឯទៀតៗឱ្យស្គាល់ព្រះយេស៊ូជានរណា? ព្រះជាម្ចាស់ជានរណា? តាមរយៈការសិក្សារបស់គេផងដែរ។

ក្រោយពីប្រទេសបានបើកឲ្យ​ដំណើរការឡើងវិញនូវសកម្មភាពចួបជុំ​សាសនា ព្រះសហគមន៍កាតូលិកភូមិភាគភ្នំពេញ អាចចួបជុំគ្នាដោយរីករាយ ប្រារព្ធអគ្គសញ្ញានានា ជាពិសេស អគ្គសញ្ញាជ្រមុជទឹក​ អគ្គសញ្ញាលាបថ្ងាស និងព្រះកាយព្រះគ្រីស្ត។  តាមប្រពៃណីព្រះសហគមន៍កាតូលិក មានតែលោកអភិបាលទេទើបមានសិទ្ធិផ្ដល់អគ្គសញ្ញាលាបថ្ងាសដល់គ្រីស្តបរិស័ទបាន។

ដោយដាលីស