មណ្ឌលមេត្តាករុណាដែលជាអតីតអាគារព្រះវិហារចាស់នៃព្រះសហគមន៍ជុំគិរី បានកែច្នៃពង្រីកនិងសម្ពោធប្រើប្រាស់ជាផ្លូវការ ដើម្បីផ្ដល់សេវាសុខភាពដល់ពលរដ្ឋ កុមារពិការសតិបញ្ញា និងកុមារដែលមានបញ្ញាលូតលាស់យឺត។
មណ្ឌលនេះធ្វើឡើងដើម្បីជួយបងប្អូនដែលកំពុងតែមានទុក្ខលំបាកខាងផ្នែកសុខភាពទាំងផ្លូវកាយនិងផ្លូវចិត្ត និងជួយដល់កុមារពិការអាចមានកន្លែងធ្វើចលនាផងដែរ។ នេះបើតាមប្រសាសន៍របស់លោកបូជាចារ្យ យ៉ាំងលូកា អ្នកផ្ដួចផ្ដើមបង្កើតឱ្យមានមណ្ឌលមេត្តាករុណានេះ។
មណ្ឌលមេត្តាករុណា ស្ថិតនៅក្នុង ភូមិតារាជ ឃុំត្រពាំងរាំង ស្រុកជុំគិរី ខេត្តកំពត។
លោកបូជាចារ្យរូបនេះបន្ថែមថា កិច្ចការងារនេះ គឺធ្វើឡើងតាមការបង្រៀនរបស់ព្រះយេស៊ូ ដែលផ្តាំឲ្យគ្រីស្តបរិស័ទយកចិត្តទុកដាក់ចំពោះអ្នកតូចតាច។ លោកបញ្ជាក់ថា «ជួយអ្នកជំងឺជាអ្វីដែលព្រះសហគមន៍យើងធ្វើតាំងពីដើមមក។»
អគារនេះជាអគារចាស់របស់ព្រះវិហារសន្តយ៉ូសែប នៃព្រះសហគមន៍ជុំគិរី ហើយត្រូវបានជួសជុលនិងបង្កើតជាសកម្មភាពមេត្តាករុណានេះឡើង។ លោកបូជាចារ្យយ៉ាំងលូកា បន្ថែមថា គម្រោងនេះ បានក្រោយពេលយើងធ្វើព្រះវិហារថ្មី យើងយល់ថាព្រះវិហារចាស់នឹងធ្វើសកម្មភាពនោះ។
នៅថ្ងៃទី៣ ខែកក្កដា ឆ្នាំ២០២២ អគារនេះត្រូវបានដាក់ឲ្យប្រើប្រាស់ជាមណ្ឌលមេត្តាករុណា ក្រោមអធិបតីភាព លោកបូជាចារ្យម៉ារីយ៉ូហ្គេហ្ស៊ី ប្រធានក្រុមយុវជននៃក្រុមគ្រឹះស្ថានសម្ដេចប៉ាបដើម្បីប្រកាសដំណឹងល្អ( PIME) និងលោកបូជាចារ្យ តាវ៉ូឡា យ៉ាំងលូកាប្រធានព្រះសហគមន៍មណ្ឌលសកម្មភាពកំពត។
លោកបូជាចារ្យ យ៉ាំងលូកា បានរំលឹកថា លោកសូមអរគុណដល់គំរូរបស់គ្រីស្តបរិស័ទដើមដំបូងម្នាក់ឈ្មោះជូ អាន ដែលធ្វើឱ្យព្រះសហគមន៍ជុំគិរីមានអត្តសញ្ញាណចេះជួយនិងយកចិត្តទុកដាក់ចំពោះអ្នកក្រីក្រ និងអ្នកជំងឺ។
អាគារមណ្ឌលមេត្តាករុណាមាន១៦បន្ទប់ ដើម្បីបម្រើសេវាកម្មសុខភាពផ្លូវកាយ និងសុខភាពផ្លូវចិត្ត ដោយសហការជាមួយអង្គការម៉ារីណុលផ្នែកកម្មវិធីសុខភាពផ្លូវចិត្ត។ ក្នុងនេះមាន បន្ទប់ទទួលភ្ញៀវ២បន្ទប់ ការិយាល័យមួយ បន្ទប់អប់រំពិសេសមួយ បន្ទប់ហាត់ចលនាមួយ បន្ទប់ហាត់ភាសាមួយ បន្ទប់ពិគ្រោះសុខភាពផ្លូវកាយមួយ បន្ទប់សុខភាពផ្លូវចិត្តមួយ បន្ទប់ប្រឹក្សាផ្លូវចិត្តមួយ ឃ្លាំងដាក់សម្ភារមួយ និងបន្ទប់ទឹកចំនួនប្រាំមួយបន្ទប់។
លោកបូជាចារ្យបន្តថា យើងមានទស្សនវិស័យជួយដល់អ្នកក្រីក្រ និងកុមារពិការនិងខ្សោយសតិបញ្ញាឱ្យទទួលបានការអប់រំរៀនសូត្រ ទទួលបានការព្យាបាលទាំងសុខភាពផ្លូវកាយ ផ្លូវចិត្ត ស្មារតី ដើម្បីឱ្យជីវិតពួកគេប្រកបដោយសេចក្ដីសុខសាន្ត និងមានសេចក្ដីថ្លៃថ្នូរក្នុងសង្គម។
នៅក្នុងប្រទេសកម្ពុជា កុមារខ្សោយសតិបញ្ញា មានការកើនចំនួន។ បើតាមអង្គការសាលារៀនទន្សាយដែលមានទីតាំងស្ថិតនៅក្នុងរាជធានភ្នំពេញ គិតត្រឹមឆ្នាំ២០១៨ បានទទួលសិស្សឱ្យចូលរៀននិងព្យាបាលប្រមាណជិត៦០០នាក់។ អង្គការនេះក៏បានរកឃើញដែរថា រាជធានីភ្នំពេញមានកុមារពិការសតិបញ្ញាជិត១០០នាក់ទៀតដែលមិនទាន់បានចូលសាលា។
រីឯសាលាអប់រំពិសេសនៃការលូតលាស់ដែលមានទីតាំងនៅក្នុងសង្កាត់បឹងទំពុន ខណ្ឌមានជ័យរាជធានីភ្នំពេញ ជាសាលាមួយរបស់ព្រះសហគមន៍កាតូលិកបានឲ្យដឹងថា ក្នុងឆ្នាំ២០២១ សាលានេះបានទទួលសិស្សចំនួន១៥៥នាក់ និងមានសិស្សស្ថិតក្នុងបញ្ជីរង់ចាំចំនួន៥០នាក់ផ្សេងទៀត។
តាមការឱ្យដឹងពីលោក ភន សំ អ្នកសម្រមសម្រួលមណ្ឌលមេត្តាករុណា បានឱ្យដឹងថា កម្មវិធី សុខភាពផ្លូវចិត្ត បានបង្កើតឡើងតាំងពី២០១៩ ប៉ុន្តែសម្រាប់កុមារសតិបញ្ញា ព្រះសហគមន៍ទើបចាប់ផ្តើមទទួល កាលពីថ្ងៃទី១០ ខែមករា ឆ្នាំ២០២២។
លោកសំ បន្ថែមថា «បច្ចុប្បន្នមានកុមារយឺតយ៉ាវបញ្ញាចំនួន១៤នាក់ ដោយមានរបៀបខុសពីការអប់រំកុមារទូទៅធម្មតា។»
កម្មវិធីនេះបើកទទួលកុមារឱ្យចូលរៀនរៀងរាល់ថ្ងៃចន្ទដល់សុក្រ ចាប់ពីម៉ោង៧៖៣០ ដល់ម៉ោង៣រសៀល។
លោកសំបន្តថា មណ្ឌលនេះមិនតម្រូវឲ្យអាណាព្យាបាលបង់ប្រាក់ប្រចាំខែឡើយ «គឺពួកគាត់អាចស្ម័គ្រចិត្តបរិច្ចាគជាអង្ករ ឬថវិកាមកមណ្ឌលបាន។»
