លោកអភិបាលថ្មីដែលទើបនឹងត្រូវជ្រើសរើសដើម្បីដឹកនាំព្រះសហគមន៍ភូមិភាគកំពង់ចាម លោកសិលា សួន ហង្សលី បានជួបប្រជុំជាមួយលោកបូជាចារ្យក្នុងតំបន់ បព្វជិត-ជិតា នៅក្នុងភូមិភាគកំពង់ចាមលើកដំបូង កាលពីថ្ងៃទី១៩ ខែកក្កដា ឆ្នាំ២០២២នេះ នៅក្រុងកំពង់ចាម។
សម្តេចប៉ាបហ្វ្រង់ស៊ីស្កូ បានជ្រើសតាំងលោកបូជាចារ្យសិលា សួន ហង្សលី ដែលបច្ចុប្បន្នកំពុងបម្រើការងារនៅមណ្ឌលសកម្មភាពភ្នំពេញថ្មី ជាតំណាងពេញសិទ្ធិលោកអភិបាលព្រះសហគមន៍ភូមិភាគភ្នំពេញ និងជានាយកទេវវិទ្យាល័យសន្តយ៉ូហានម៉ារីវីយ៉ាណែរ ដើម្បីទទួលមុខងារជាអភិបាលទទួលខុសត្រូវព្រះសហគមន៍កាតូលិកភូមិភាគកំពង់ចាម កាលពីថ្ងៃទី១៥ ខែកក្កដា ឆ្នាំ២០២២នេះ។
លោកត្រូវបានបន្តមុខងារពីលោកអភិបាលអន់តូនីសាមី ស៊ូសៃរាជ្យ និងលោកអភិបាលប្រ៊ុយណូ កូសម៍( Apostolic Administor) នៃព្រះសហគមន៍ភូមិភាគកំពង់ចាម។
បន្ទាប់ពីសារត្រូវបានផ្សព្វផ្សាយកាលពីថ្ងៃទី១៥ ខែកក្កដា ឆ្នាំ២០២២ លោកបូជាចារ្យហង្សលី ទទួលសារលើកទឹកចិត្តជាច្រើនសម្រាប់បេសកកម្មថ្មីរបស់លោក។
«ខ្ញុំមានចិត្តរំភើប ដោយមិននឹកស្មានថា ជាបូជាចារ្យម្នាក់អាចជួយណែនាំភូមិភាគមួយនោះទេ។» នេះជាប្រសាសន៍របស់លោកអភិបាលថ្មីនៃភូមិភាគកំពង់ចាម ដែលបានផ្តល់បទសំភាសន៍កាលពីថ្ងៃទី១៨ ខែកក្កដាកន្លងទៅនេះ។
លោកបន្ថែមថា គាត់បានទទួលសារពីលោកបូជាចារ្យ គ្រីស្តបរិស័ទ និងលោកអភិបាលផ្សេងៗទៀតបានផ្ញើសារជួយគាំទ្រ ហើយពួកគាត់បង្ហាញអំណរសប្បាយ និងលើកទឹកចិត្តឲ្យលោកបម្រើក្នុងឋានៈជាអ្នកជួយណែនាំភូមិភាគកំពង់ចាម។
«ខ្ញុំនឹងយកចិត្តទុកដាក់ ប្រើអស់ពីសមត្ថភាព ដើម្បីបំពេញមុខងារថ្មី ដែលព្រះសហគមន៍បានជ្រើសរើស។» លោកហង្សលីបន្ថែម។
និយាយអំពីបេសកកម្មនៃការបម្រើក្នុងភូមិភាគនេះ លោកអភិបាលបានឲ្យដឹងទៀតថា គាត់ត្រូវរៀបចំកន្លែងដែលគាត់កំពុងទទួលខុសត្រូវឲ្យមានអ្នកទទួលការងារជំនួសសិន បន្ទាប់មកពេលទៅកំពង់ចាម គឺត្រូវមានជំនួបជាមួយលោកបូជាចារ្យ ក្រុមអ្នកបួស និងលោកអភិបាលក្នុងភូមិភាគពីមុន ដើម្បីសិក្សាឈ្វេងយល់អំពីព្រះសហគមន៍ក្នុងតំបន់ទាំងនោះ មុននឹងរៀបចំផែនការការងារ។
ខេត្តកំពង់ចាម ជាទីស្នាក់ការកណ្តាលសម្រាប់ព្រះសហគមន៍ភូមិភាគកំពង់ចាម ដែលស្ថិតនៅភាគខាងត្បូងនៃប្រទេសកម្ពុជា មានចម្ងាយប្រហែល១២៤គីឡូម៉ែត្រពីរាជធានីភ្នំពេញ។
លោកអភិបាលសង្កត់ធ្ងន់ថា «កម្លាំងដែលខ្ញុំមាន គឺបានមកពីលោកបូជាចារ្យ បងប្រុសបងស្រី និងគណៈកម្មការនៅទីនោះដែលគេផ្តល់ជាគំនិតនិងជួយខ្ញុំតាមរបៀបផ្សេងៗ ដើម្បីឲ្យខ្ញុំអាចបំពេញមុខងារណែនាំភូមិភាគនេះបាន។»
លោកមានប្រសាសន៍ទៀតថា មុខងារនេះ ណែនាំឲ្យគ្រីស្តបរិស័ទរិះគិតអំពីរបៀបនៃការកសាងព្រះសហគមន៍កម្ពុជា ហើយក៏ជាឱកាសដើម្បីឲ្យមនុស្សទូទៅឈ្វេងយល់ថា ព្រះសហគមន៍កាតូលិកមិនមែនជាសាសនាបរទេស ប៉ុន្តែជាសាសនាសកលមួយ។
ព្រះសហគមន៍កាតូលិកបានមកដល់ទឹកដីកម្ពុជាក្នុងឆ្នាំ១៥៥៥ ប៉ុន្តែដោយសារតែសង្គ្រាម ព្រះសហគមន៍រងគ្រោះនិងមិនសូវរីកចម្រើន។ លោកអភិបាលបានសុំឲ្យគ្រីស្តបរិស័ទទាំងអស់ អធិដ្ឋានឲ្យបានច្រើន សម្រាប់គាត់ផង និងខ្លួនពួកគេផង និងសម្រាប់ព្រះសហគមន៍ក្នុងការប្រកាសដំណឹងល្អដល់បងប្អូនឯទៀតៗ។
លោកបូជាចារ្យ សិលា សួន ហង្សលី ជាបូជាចារ្យខ្មែរទី៣ ដែលត្រូវបានជ្រើសតាំងឲ្យណែនាំព្រះសហគមន៍។ លោកបូជាចារ្យ យ៉ូសែប ឆ្មារ សាឡាស់ បានក្លាយជាអភិបាលព្រះសហគមន៍កាតូលិកភូមិភាគភ្នំពេញក្នុងឆ្នាំ១៩៧៥-១៩៧៧ និងលោកអភិបាលប៉ូល ទេព អ៊ីម សុត្ថា អភិបាលព្រះសហគមន៍ភូមិភាគបាត់ដំបង ដែលអស់លោកត្រូវបានស្លាប់និងត្រូវបានសម្លាប់ដោយរបបប្រល័យពូជសាសន៍ប៉ុលពត។
ពិធីប្រគល់មុខងារជាអភិបាលព្រះសហគមន៍ភូមិភាគកំពង់ចាមសម្រាប់លោកអភិបាលថ្មី នឹងប្រព្រឹត្តទៅក្នុងពេលខាងមុខ៕
សុវណ្ណា និងកញ្ញា
