ក្នុងរយៈពេល៣ថ្ងៃនៃសន្និសីទសមាគមអប់រំកាតូលិកជាន់ខ្ពស់នៅក្នុងអាស៊ីប៉ាស៊ីហ្វិកហៅកាត់ថា អាស៊ីគូ(ASEACCU) យុវនិស្សិតជាច្រើនបានឈ្វេងយល់បន្ថែមអំពីទំនាក់ទំនងរបស់ខ្លួនជាមួយអត្តសញ្ញាណនិងការចងចាំ សម្រាប់ជាប្រវត្តិសាស្ត្រនៃមនុស្សជាតិ។
និស្សិត ឈុនលីន ខ្យូអ៊ិ (Mr. CHUNLIN QI) ជាប្រធាននិស្សិតមកពីសកលវិទ្យាល័យ សូហ្វីយ៉ា (Sophia University) នៃប្រទេសជប៉ុន និយាយថា «ខ្ញុំគិតថា ពួកយើង និងមនុស្សជំនាន់ក្រោយគួរតែឈ្វេងយល់អំពីព្រឹត្តិការណ៍ប្រភេទនេះ ដើម្បីធ្វើឱ្យសង្គមល្អពីមួយថ្ងៃទៅមួយថ្ងៃ។»
ឈុនលីន បានឲ្យដឹងទៀតថា សិក្ខាសាលានេះមានសារៈសំខាន់ ព្រោះការចងចាំរឿងរ៉ាវពីអតីតកាល នាំឱ្យយើងអាចរីកចម្រើនទៅមុខ និងដើម្បីកសាងសង្គមឱ្យមានសន្តិភាពនិងយុត្តិធម៌ យើងត្រូវរៀនពីប្រវត្តិសាស្ត្រទោះល្អឬមិនល្អ។
រីឯយុវសិស្ស អ៊ុន ស្រីអូន ជានិស្សិតនៃវិទ្យាស្ថានសន្តប៉ូល បានឱ្យដឹងថា «សម្រាប់ខ្ញុំ ការចងចាំមានសារៈសំខាន់ ដោយយើងអាចស្គាល់ពីអតីតកាលរបស់ប្រជាជនកម្ពុជា ហើយការចងចាំនៅសម័យខ្មែរក្រហមនេះដែរ យើងក៏មិនចង់ឱ្យកើតមានម្ដងទៀតទេ។»
ស្រីអូន ជាយុវជនពុទ្ធបរិស័ទដែលបានកំពុងសិក្សានៅសាលាសន្តប៉ូល ក្នុងខេត្តតាកែវ ជាវិទ្យាស្ថានជាន់ខ្ពស់របស់ព្រះសហគមន៍កាតូលិកខាងគ្រីស្តសាសនា។ យុវតីរូបនេះ បន្ថែមថា ក្រៅពីការចងចាំនេះ នាងទទួលបានការផ្លាស់ប្ដូរទំនាក់ទំនងសាសនា ដែលណែនាំឱ្យមនុស្សដើរលើផ្លូវល្អដូចគ្នា។
«នៅក្នុងអន្តរសាសនានេះដែរ បានជួយឱ្យយើងមិនមានការរើសអើងជាតិសាសន៍និងសាសនា។» ស្រីអូនបញ្ជាក់។
នៅក្នុងសន្និសីទអាស៊ីគូ ដែលត្រូវបានរៀបចំឡើងដោយវិទ្យាស្ថានសន្តប៉ូល កាលពីថ្ងៃទី២៣-២៧ ខែសីហានេះ បានផ្តោតសំខាន់លើប្រធានបទ «ការចងចាំនិងអត្តសញ្ញាណ»។
ក្នុងសន្និសីទនេះ យុវនិស្សិតនិងសាស្ត្រាចារ្យមកពីតំបន់អាស៊ីប៉ាស៊ីហ្វិក ដែលមានចំនួនប្រមាណ១៨០នាក់ដែលជាបណ្តាញនៃអាស៊ីគូ បានចុះកម្មសិក្សាឈ្វេងយល់អំពីប្រវត្តិសាស្ត្រកម្ពុជា ក្នុងរបបប្រល័យពូជសាសន៍ប៉ុលពត និងបានចូលរួមសិក្ខាសាលាដែលមានសាស្ត្រាចារ្យជាច្រើនពីបរទេសនិងខ្មែរចូលរួមចែករំលែកនូវបទពិសោធទាក់ទងនឹងប្រធានបទផងដែរ។
លោកអភិបាលអូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិក និងជាស្ថាបនិកនៃវិទ្យាស្ថានសន្តប៉ូលកម្ពុជា មានប្រសាសន៍ថា សិក្ខាសាលានេះ មានប្រយោជន៍ខ្លាំងសម្រាប់និស្សិត ដើម្បីត្រៀមខ្លួនចូលក្នុងសង្គម រៀបចំគ្រួសារ រៀបចំជីវិត និងអនាគតរបស់ពួកគេ។
ទំនាក់ទំនងផ្ទាល់ជាកំលាំងមួយសម្រាប់និស្សិតនិងលោកគ្រូអ្នកគ្រូ ហើយនិស្សិតបរទេសដែលមកកម្ពុជាក៏ទទួលបានចំណេះដឹង អំពីប្រវត្តិសាស្ត្រ និងវប្បធម៌របស់ខ្មែរ ដែលណែនាំឲ្យគេមានក្តីរំភើប។ នេះបើតាមការបញ្ជាក់របស់លោកអភិបាល។
លោកអភិបាលអូលីវីយ៉េ ដែលជាប្រធានក្រុមប្រឹក្សាភិបាលនៃវិទ្យាស្ថានសន្តប៉ូលបានបន្ថែមថា នៅពេលយើងចូលទៅក្នុងកម្មវិធីអន្តរវប្បធម៌ អន្តរសាសនា អន្តរប្រវត្តិសាស្ត្រ ណែនាំឲ្យយើងអាចបង្កើតពិភពលោកពោរពេញដោយសេចក្តីសុខនិងសុខដុមរមនា «ព្រោះនៅពេលយើងស្គាល់គ្នា នៅពេលយើងយល់ចិត្តគ្នា យើងដឹងថា យើងអាចធ្វើដំណើរជាមួយគ្នាបាន។»
ក្នុងនោះដែរ លោកអភិបាលបានសង្កត់ធ្ងន់ថា «ការចងចាំនិងអត្តសញ្ញាណជាអ្វីដែលយើងត្រូវតែបន្តរិះគិត ថែរក្សាមើលឃើញដល់ប្រវត្តិសាស្ត្ររបស់យើង មើលឃើញដល់មូលដ្ឋានគ្រឹះរបស់យើងដើម្បីកសាងអនាគត។»
នៅក្នុងសន្និសីទអាស៊ីគូនេះ បានរៀបចំការបោះឆ្នោតក្រុមប្រឹក្សាភិបាលថ្មីផងដែរ ដែលមានអណត្តិចំនួន៣ឆ្នាំពី ២០២៣-២០២៥ ហើយប្រធានក្រុមប្រឹក្សាថ្មីគឺជាលោកឧបដ្ឋាក ស្ទេហ្វិន មោហ្គាន់ (Rev. Pro. Stephen Morgan, Ph.D)នៃសកលវិទ្យាល័យសន្តយ៉ូសែបនៃទីក្រុងម៉ាកាវប្រទេសចិន។ នេះបើតាមការបញ្ជាក់របស់លោកផុន សុផល នាយកនៃវិទ្យាស្ថានសន្តប៉ូលនាថ្ងៃទី២៧ ខែសីហានេះ។
លោកសុផលមានប្រសាសន៍ទៀតថា ក្នុងសន្និសីទនេះ ក៏មានការជ្រើសរើសតំណាងក្រុមប្រឹក្សាដែលមានសមាជិកចំនួន៨ប្រទេស ហើយក្នុងនោះលោកត្រូវបានជ្រើសរើសឲ្យចូលក្នុងក្រុមនេះផងដែរ។
អាស៊ីគូ ជាបណ្តុំស្ថាប័នសិក្សាអប់រំរបស់ព្រះសហគមន៍កាតូលិកដែលមានពីកម្រិតវិទ្យាល័យដល់មហាវិទ្យាល័យចំនួន៨៦ស្ថាប័នក្នុងតំបន់អាស៊ីប៉ាស៊ីហ្វិក។ វិទ្យាស្ថានសន្តប៉ូល ជាស្ថាប័នមួយរបស់ព្រះសហគមន៍កាតូលិកបានក្លាយជាសមាជិកនៃបណ្តាញនេះ ក្នុងឆ្នាំ២០១២។
សន្និសីទលើកទី២៩ របស់អាស៊ីគូ នឹងធ្វើឡើងនៅប្រទេសហ្វីលីពក្នុងឆ្នាំ២០២៣ខាងមុខនេះ៕
ដោយដាលីស
