កាលពីពេលថ្មីៗនេះ លោកបូជាចារ្យដាមីញ៉ាំង ហ្វារនឺបានទទួលមុខងារថ្មីមួយជាទីប្រឹក្សាក្នុងក្រុមសាសនទូតក្រៅប្រទេសនាទីក្រុងប៉ារីស (MEP) ហើយត្រូវវិលត្រឡប់ទៅប្រទេសបារាំងវិញ។
ការរស់នៅក្នុងប្រទេសកម្ពុជាជាង១១ឆ្នាំ បានបន្សល់ទុកអនុស្សាវរីយ៍ជាច្រើនសម្រាប់រូបលោកផ្ទាល់ ដោយដំបូងឡើយគឺរៀនភាសាខ្មែរ ហើយរៀនស្គាល់ជីវិតរបស់ព្រះសហគមន៍និងប្រជាជនខ្មែរ ទាំងវប្បធម៌ និងប្រពៃណី។
អង្គុយនៅមុខរូងភ្នំព្រះនាងម៉ារី នៃព្រះវិហារព្រះកុមារយេស៊ូបឹងទំពុន ក្នុងទីក្រុងភ្នំពេញ លោកបូជាចារ្យ ដាមីញ៉ាំង ហ្វារនឺ អ្នកទទួលខុសត្រូវមណ្ឌលសកម្មភាពភ្នំពេញខាងត្បូង ក្នុងភូមិភាគភ្នំពេញមានប្រសាសន៍ថា «ខ្ញុំបានព្យាយាមបំពេញបេសកម្មជាច្រើន តាំងពីពេលដែលខ្ញុំមកដល់ប្រទេសកម្ពុជា។ បេសកម្មទី១ គឺខ្ញុំរៀនភាសាខ្មែររយៈពេល៣ឆ្នាំព្រមទាំងរៀនស្គាល់ចិត្តមនុស្ស ដោយយកចិត្តទុកដាក់ បើកចិត្ត បើកភ្នែក បើកត្រចៀក ជ្រាបនូវវប្បធម៌ខ្មែរ ព្យាយាមជា្របស្ថានភាពនៅស្រុកខ្មែរនិងស្ថានភាពព្រះសហគមន៍ក្នុងតំបន់។»
និយាយបណ្តើរសើចបណ្តើរ លោកបូជាចារ្យដាមីញ៉ាំង ប្រៀបធៀបថា ក្នុងពេលដែលលោកថ្វាយខ្លួនទៅព្រះជាម្ចាស់ លោកបានចាត់ទុក «ព្រះសហគមន៍ជាប្រពន្ធរបស់ខ្ញុំ ដូច្នេះដំបូងឡើយត្រូវរៀនស្គាល់ចិត្តប្រពន្ធ និងម៉្យាងទៀតឲ្យប្រពន្ធស្គាល់ចិត្តខ្ញុំដែរ»។
ក្រោយការតែងតាំងជាបូជាចារ្យកាតូលិកបានបីខែ ក្នុងក្រុមគ្រួសារសាសនទូតក្រៅប្រទេសនាទីក្រុងប៉ារីស (MEP) ក្នុងខែកញ្ញា ឆ្នាំ២០១១ លោកត្រូវបានចាត់ឲ្យមកប្រទេសកម្ពុជាដើម្បីបំពេញបេសកកម្ម។
ព្រះសហគមន៍កាតូលិកនៅកម្ពុជា បានកកើតឡើងក្នុងឆ្នាំ១៥៥៥ ប៉ុន្តែដោយសារតែសង្គ្រាម ជាពិសេសនៅក្នុងរបបប្រល័យពូជសាសន៍ប៉ុលពត អ្វីៗត្រូវចាប់ផ្តើមឡើងវិញ។
លោកដាមីញ៉ាំង បានមានប្រសាសន៍ទៀតថា ព្រះសហគមន៍នៅប្រទេសកម្ពុជាចាស់ហើយ ប៉ុន្តែនៅតែក្មេង នេះដោយសារតែប្រវត្តិសាស្ត្រនៃទុក្ខលំបាក។
លោកបន្ថែមថា ពេលនេះ ព្រះសហគមន៍កម្ពុជា មានយុវជន យុវនារី មានក្រុមគ្រួសារច្រើន មានបូជាចារ្យជាតិកម្ពុជាច្រើនដែរ ហើយក៏មានលោកអភិបាលខ្មែរម្នាក់ទៀត។
ដំណើរនៃប្រវត្តិសាស្ត្រនេះ បានធ្វើឲ្យរូបលោកដែលជាសាសនទូតបរទេស មើលឃើញថា បេសកកម្មនៅក្នុងប្រទេសកម្ពុជា ជាកិត្តិយសមួយចំពោះរូបលោក។
«ព្រះសហគមន៍និងព្រះជាម្ចាស់ផ្ញើខ្ញុំមកទីនេះ ដោយសាបព្រោះព្រះបន្ទូលរបស់ព្រះអង្គ ហើយដើម្បីច្រូតផលផ្លែដែលមកពីព្រះជាម្ចាស់ ហើយនេះជាមោទនភាពនិងអំណរសប្បាយសម្រាប់ខ្ញុំ។» លោកបូជាចារ្យបញ្ជាក់។
ក្នុងរយៈពេល៨ឆ្នាំចុងក្រោយនេះ លោកត្រូវបានចាត់ឲ្យទៅបម្រើតាមកន្លែងផ្សេងៗ ក្នុងភូមិភាគភ្នំពេញមានកំពង់សោម និងភ្នំពេញ។ ក្នុងនោះលោកក៏ទទួលខុសត្រូវណែនាំមណ្ឌលនិស្សិតរបស់ព្រះសហគមន៍កាតូលិកអន្តរភូមិភាគ ហើយលោកក៏បានណែនាំក្នុងក្រុមពិធីបុណ្យបកប្រែក្បួនពិធីផ្សេងៗសម្រាប់ព្រះសហគមន៍។
លោកដាមីញ៉ាំងបញ្ជាក់ទៀតថា «បូជាចារ្យជាអ្នកបម្រើ។» ដោយមានទាំងពិធីបុណ្យផងដែរ។ ពិធីបុណ្យជាប្រភពនៃជីវិតខាងផ្លូវវិញ្ញាណរបស់យើងដែលជាមនុស្ស។
ក្នុងពិធីជម្រាបលា កាលពីថ្ងៃទី២ ខែតុលានេះ កញ្ញាឃុន កញ្ញា តំណាងគណៈកម្មការព្រះសហគមន៍ បានថ្លែងថា ក្នុងពេលលោកទទួលខុសត្រូវព្រះសហគមន៍ លោកបានផ្ដល់ឱកាសឱ្យគ្រីស្តបរិស័ទ ហ៊ានកែតម្រូវគ្នាជាមួយលោក និងហ៊ានចែករំលែកយោបល់នានាចំពោះកិច្ចការផ្សេងៗ។
កញ្ញាបានបន្ថែមថា លោកតែងតែចង់ទៅលេងផ្ទះនិងញ៉ាំបាយជាមួយគ្នាគ្រីស្តបរិស័ទ និងព្យាយាមជិតស្និទ្ធជាមួយនឹងគ្រីស្តបរិស័ទទាំងអស់។ លោកឪពុកដូចជាមិត្តស្និទ្ធស្នាល។ លោកបានជួយឱ្យព្រះសាគមន៍របស់យើងមានដំណើរការផ្នែកពិធីបុណ្យយ៉ាងរលូន។
សូមអរគុណនូវអ្វីៗទាំងអស់ដែលលោកបានធ្វើ ទាំងអគ្គសញ្ញាអាពាហ៍ពិពាហ៍ ប្រទានពរឱ្យកុមារ អប់រំកុមារគ្រីស្តបរិស័ទជាអ្នកបម្រើអាសនៈ ណែនាំពួកគេឲ្យក្លាយជាកុមារល្អជាអ្វីដែលគ្រួសារនីមួយៗចង់បាន។ នេះជាការលើកឡើងរបស់អ្នកស្រី ភោគ ម៉ានី ជាគ្រីស្តបរិស័ទនៅព្រះវិហារព្រះកុមារយេស៊ូបឹងទំពុនក្នុងមណ្ឌលសកម្មភាពភ្នំពេញខាងត្បូង។
លោកបូជាចារ្យរូបនេះ បានអរគុណដល់គ្រីស្តបរិស័ទទាំងអស់ដែលបានរួមដំណើរជាមួយលោក ដើម្បីបម្រើព្រះបន្ទូល។ លោកប្រាប់ថា «គ្មាននរណាល្អឥតខ្ចោះ តែយើងជាអ្នកបម្រើក្នុងព្រះសហគមន៍ យើងត្រូវតែក្លាយជាមនុស្សដែលប៉ិនប្រសប់ ដើម្បីដើរតាមព្រះគ្រីស្តរួមជាមួយគ្នា ដោយបន្ទាបខ្លួនដោយចេះតស៊ូទ្រាំជាមួយគ្នា ដោយធ្វើជាអំបិលសម្រាប់ពិភពលោកទាំងមូល។»
លោកបូជាចារ្យដាមីញ៉ាំង ហ្វារនឺ បានត្រឡប់ទៅប្រទេសបារាំងវិញកាលពីថ្ងៃទី៣ ខែតុលានេះ។ លោកបូជាចារ្យបាននិយាយទៀតថា ទោះបីរូបគាត់បានឃ្លាតឆ្ងាយពីកម្ពុជាទៅប្រទេសបារាំង៦ឆ្នាំក៏ដោយ «ប៉ុន្តែចិត្តរបស់ខ្ញុំជាបូជាចារ្យ គឺនៅទីនេះ៕»
ដាលីស និងម៉ានុត
