ពិធីសំណេះសំណាលនិងចែកអំណោយដល់អ្នករស់នៅជាមួយមេរោគអេដស៍ ជំងឺអេដស៍ចំនួន ១០០ គ្រួសារនៅវិទ្យាល័យបច្ចេកទេសឯកជនសន្តហ្រ្វង់ស្វ័រ នៅអង្គតាសោម ខេត្តតាកែវ ក្រោមអធិបតីភាពរបស់លោក អភិបាលអូលីវីយេ ជ្មីតអីស្ល៊ែរអភិបាលព្រះសហគមន៍កាតូលិកភូមិភាគភ្នំពេញ និងលោក គាំ ដាំផេង អនុប្រធានមន្ទីរធម្មការនិងសាសនាខេត្តតាកែវ នាព្រឹកថ្ងៃទី១៩ ខែមិថុនា ឆ្នាំ២០២០។

លោកអភិបាលអូលីវីយេមានប្រសាសន៍ថា “យើងធ្វើកម្មវិធីនេះនៅថ្ងៃបុណ្យរំលឹកអំពីព្រះហឫទ័យប្រណីសន្តោសរបស់ព្រះយេស៊ូ ដើម្បីនឹកអំពីព្រះបន្ទូលរបស់ព្រះយេស៊ូ សូមបើកឡើង អេផាថា ដូចជាឱ្យបងប្អូនមានកម្លាំងនៅក្នុងចិត្តគំនិត មានកម្លាំងនៅក្នុងសេចក្តីស្រឡាញ់ មិនឯកោ មិននៅម្នាក់ឯង។ យើងមានសហគមន៍យើង យើងមានព្រះសហគមន៍យើងជាអ្នកជួយ”។

ថ្លែងទៅកាន់ប្រជាពលរដ្ឋដែលបានចូលរួមលោកអភិបាលនិយាយថា សូមឱ្យពួកគាត់គិតគូរអំពីសុខភាពផ្ទាល់ខ្លួន ធ្វើបុណ្យទានឱ្យបានច្រើនតាមរបៀបសាសនារបស់ពួកគាត់។ លោកមានប្រសាសន៍ថា “ជីវិតរបស់យើងគឺត្រៀមត្រូវខ្លួនជានិច្ច”។

ក្នុងនោះដែរលោកអូលីវីយេក៏បានជម្រុញឪពុកម្តាយដែលមានកូនកំពុងសិក្សា ឱ្យពួកគាត់ចូលរួមអប់រំនិងបង្រៀនកូនរបស់ពួកគាត់បន្ថែមនៅតាមផ្ទះ និងរៀនតាមលទ្ធភាពដែលមាននៅក្នុងគ្រួសារ។

លោកប្រាប់ថា “ទោះបីអត់បើកសាលា អត់ទូរសព្ទ តែអាចយកសៀវភៅមកអាន ជួយកូនៗឱ្យជុំគ្នាអាន។ ការសិក្សាជាចំណេះដឹងសម្រាប់អនាគតកូនៗរបស់យើង”។

លោកអភិបាលបន្ថែមថាកុំភ្លេចខ្លួនអំពីសាសនា ព្រោះវាជួយឱ្យយើងមិនឯកោ។ លោកក៏បានជម្រុញឱ្យពួកគាត់ដាំបន្លែសម្រាប់ញ៉ាំខ្លួនឯង ដើម្បទទួលបានវីតាមីន សម្រាប់សុខភាព។

ក្នុងនោះដែរលោកអភិបាលបានសំណូមពរឱ្យអាជ្ញាធរគិតគូរអំពីការបើកផ្លូវសាលានៅផ្លូវជាតិលេខ៣ បើកសាលាឡើងវិញ និងបើកកម្មវិធីសាសនាផងដែរ។

លោកអនុប្រធានមន្ទីរធម្មការនិងសាសនាខេត្តតាកែវ មានប្រសាសន៍ថ្លែងអំណរគុណលោកពុកអូលីវីយេ ដែលតែងតែគាំទ្រដល់អ្នកជំងឺអេដស៍ ជារៀងរាល់ឆ្នាំ។ លោកដាំផេង បន្ថែមថា “ខ្ញុំសូមកោតសរសើរលោកពុកអូលីវីយេ និងសមាជិកដែលបានខិតខំគោរពប្រណិប័តន៍សាសនា សម្អាតកាយវាចាចិត្ត ជម្រះសេចក្តីសៅហ្មងនិងអំពើអាក្រក់ទាំងឡាយ ធ្វើដំណើរតាមគន្លងព្រះធម៌ ដែលមានសេចក្តីជ្រះថ្លា ប្រមូលផ្ដុំ អភិរក្ស អរិយធម៌ វប្បធម៌ ប្រជាធិបតេយ្យសេរីពហុបក្ស តាមគោលការណ៍នីតិរដ្ឋ”។

នេះជាចំនួនលើកទី៥ដែលព្រះសហគមន៍កាតូលិកបានរៀបចំពិធីសំណេះសំណាលជាមួយប្រជាជនដែលមានមេរោគអេដស៍និងជំងឺអេដស៍។ ប្រជាជនចំនួន១០០គ្រួសារក្នុងពេលនេះមកពីភូមិចំនួន៤៧ ក្នុងឃុំចំនួន១១នៃស្រុកចំនួន៣ក្នុងខេត្តតាកែវ។

កម្មវិធីនេះបានធ្វើឡើងស្របតាមការណែនាំរបស់សុខាភិបាលនិងក្រសួងធម្មការ ដោយមានការជួបជុំពីរវគ្គ ដោយចែកជាពីរក្រុម ដោយលើកនេះធ្វើនៅវិទ្យាល័យបច្ចេកទេសឯកជនសន្តហ្រ្វង់ស្វ័រ ដែលមានទីធ្លាទូលាយ ដើម្បីរក្សាគម្លាតសុវត្ថិភាពសង្គម។

លោកដាំផេងក៏បានរំលឹកអ្នកចូលរួម ឱ្យគោរពតាមវេជ្ជបញ្ជាពេទ្យ លេបថ្នាំតាមពេលកំណត់ និងថែរក្សាសុខភាពក្នុងអំឡុងពេលកូវីដ១៩នេះ។ អំណោយផ្តល់ជូនដល់គ្រួសារចំនួន១០០នោះរួមមានអង្ករមាន១០គីឡូ មី ទឹកត្រី សាប៊ូ ម៉ាស់ ស្ករស និងនំមួយចំនួន។

អ្នកស្រីវ៉ាន់ ចន្ធូ ជាអ្នកផ្តល់ប្រឹក្សាអ្នកផ្ទុកមេរោគអេដស៍និងជំងឺអេដស៍ និងជាតំណាងប្រជាពលរដ្ឋ ឱ្យដឹងថា ការចែកជូននេះ គឺផ្តល់អាទិភាពដល់អ្នកជំងឺដែលមានជីវភាពក្រីក្រខ្លាំង។ អ្នកស្រីបន្តថា “យើងសូមអរគុណដល់លោកពុក(អូលីវីយេ)ដែលជួយដល់អ្នកមានមេរោគអេដស៍ មិនទុកអោយយើងនៅឯកោ ដែលយើងរងគ្រោះហើយ ត្រូវបោះបង់ចោលនោះទេ”។

អ្នកស្រីបន្តថាក្នុងខេត្តតាកែវ មានអ្នកមានមេរោគអេដស៍និនជំងឺអេដស៍ចំនួន៧០០នាក់ដែលកំពុងទទួលសេវាសុខភាពពីមណ្ឌលសុខភាព ប៉ុន្តែមនុស្សមួយចំនួនមិនបានយកចិត្តទុកដាក់នឹងជំងឺរបស់ខ្លួនឡើយ។ អ្នកស្រីសំណូមពរដល់អ្នកចូលរួម សូមកុំធ្វេសប្រហែស សូមតាមដានសុខភាពនៅតាមមណ្ឌលសុខភាពតាមការណាត់ជួប។

លោកហៀម សុភ័ក្រ្ត អាយុ៣៩ឆ្នាំ សព្វថ្ងៃនេះដោយសារតែកូវីដ១៩ លោកនិងភរិយាសម្រាកនៅផ្ទះចិញ្ចឹមសត្វនិងដាំបន្លែបន្តិចបន្តួច ដោយមានកូន៣នៅក្នុងបន្ទុក បានរៀបរាប់ថា ជីវភាពរបស់គាត់មិនសូវធូរធារឡើយតាំងពីកូវីដ១៩កើតឡើង។ លោកសុភ័ក្រ្តបញ្ជាក់ថា “ពីមុនដើរលេងអ័រកាដង់ ពេលការ ពេលបុណ្យ តែដល់ពេលគេបិទ អត់អីធ្វើ”។ និយាយអំពីការសិក្សារបស់កូនៗ លិកបានឱ្យដឹងថា ដោយសារគាត់មានកូនប្រុសបួសជាសង្ឃគង់នៅវត្ត ដូច្នេះកូនៗ៣នាក់ផ្សេងទៀតបានទៅរៀនេជាមួយលោកនៅវត្ត តាំងពីពេលសាលាបានបិទ។

លោកបានសំណូមពរដល់ប្រជាពលរដ្ឋដែលមានមេរោគនិងជំងឺអេដស៍ទាំងអស់ឱ្យខំថែរក្សាសុខភាពក្នុងអំឡុងពេលកូវីដ១៩នេះ។ លោកក៏សូមអរគុណដល់ព្រះសហគមន៍កាតូលិកដែលយកចិត្តទុកដាក់ជាមួយមនុស្សមានមេរោគអេដស៍និងជំងងអេដស៍កន្លងមក។

មុនពេលបញ្ចប់កម្មវិធីសំណេះសំណាលនេះ លោកអភិបាលអូលីវីយេបានប្រកាស អាហារូបករណ៍ដល់កូនអ្នកផ្ទុកមេរោគអេដស៍និងជំងឺអេដស៍ទាំងអស់ ដែលចង់រៀន ដោយចប់ថ្នាក់ទី៩ឡើងទៅ។ គឺអាចរៀននៅវិទ្យាល័យបច្ចេកទេសឯកជនសន្តហ្រ្វង់ស្វ័រ និងវិទ្យស្ថានសន្តប៉ូល ដែលជាសាលារបស់ព្រះសហគមន៍កាតូលិកនៅខេត្តតាកែវ។

បន្ទាប់មកលោកបាន ប្រោសទឹកព្រះពរដល់អ្នកចូលរួមទាំងអស់ និងផ្តល់ថវិកា៤០០០០៛បន្ថែមទៀតដល់គ្រួសារនីមួយៗ៕