«ប្រើជីវិតសម្រាប់ព្រះគ្រីស្តអស់កល្បជានិច្ច មានន័យថា មិនមែនសម្រាប់ផ្ទាល់ខ្លួន ប៉ុន្តែសម្រាប់ព្រះជាម្ចាស់ជាអាទិភាព» នេះជាសម្តីរបស់និស្សិតទេវវិទ្យាល័យ ប៉ូល វិន កាន់ ដែលបានទទួលមុខងារជាអ្នកបម្រើអាសនៈ ពីលោកអភិបាល អូលីវីយ៉េ ជ្មីតអីស្ល៊ែ អភិបាលព្រះសហគមន៍កាតូលិភូមិភាគភ្នំពេញ នាល្ងាចថ្ងៃទី២៤ ខែមិថុនា ឆ្នាំ២០២១ នៅព្រះវិហារសន្ត សិលា និងសន្តប៉ូល នៃមណ្ឌលសកម្មភាពភ្នំពេញថ្មី ក្នុងឱកាសបុណ្យរំឭកដល់សន្តយ៉ូហានបាទីស្ត និងបិទឆ្នាំសិក្សានៅទេវវិទ្យាល័យសន្ត យ៉ូហានម៉ារីវីយ៉ាណែ ដោយមានតំណាងបូជាចារ្យ និងតំណាងគ្រីស្តបរិស័ទចូលរួមតិចតួបំផុត។
និស្សិតរូបនេះបន្តថា ជីវិតនៅទេវវិទ្យាល័យសប្បាយ ដោយយើងមិនត្រឹមតែរៀននៅក្នុងទេវវិទ្យាល័យទេ ប៉ុន្តែនៅចុងសប្ដាហ៍យើងទៅបម្រើព្រះសហគមន៍ដោយស្គាល់គ្រីស្តបរិស័ទដែលជាអ្នកផ្ដល់កម្លាំងចិត្តដល់ពួកយើងជានិស្សិតទេវវិទ្យាល័យ។
មុនពេលមានវិបត្តិកូវីដ១៩ និស្សិតទេវវិទ្យាល័យទាំងអស់ត្រូវមានសកម្មភាពរបស់ខ្លួននៅតាមព្រះសហគមន៍នីមួយៗជារៀងរាល់ថ្ងៃសៅរ៍និងអាទិត្យ ដើម្បីទទួលបានបទពិសោធន៍រួមជាមួយនឹងព្រះសហគមន៍ និងបម្រើបងប្អូនក្នុងជំនឿ ព្រមទាំងអ្នកផ្សេងទៀត។
បងប្រុស ប៉ូល វិន កាន់ មានប្រសាសន៍ថា «ពេលវេលានៅទេវវិទ្យាល័យពិតជាសំខាន់សម្រាប់ខ្ញុំមុននឹងចេញទៅប្រកាសដំណឹងល្អ និងសម្រាប់បងប្អូនឯទៀតៗដែលត្រៀមនឹងចូលទេវវិទ្យាល័យដែរ ដោយត្រូវការរៀនរស់នៅបម្រើព្រះជាម្ចាស់តាមរយៈការបម្រើព្រះសហគមន៍»។
បងប្រុសកាន់បន្ថែមថា ការអធិដ្ឋានពិតជាសំខាន់ដោយអាចរិះគិតដោយមានអំណរសប្បាយដែលជាកម្លាំងឱ្យយើងបន្តទៅមុខ «ដើម្បីយល់ថាជីវិតយើងនៅក្នុងទេវវិទ្យាល័យមិនមែនរស់នៅផ្ទាល់ខ្លួន ប៉ុន្តែត្រូវត្រៀមខ្លួនជានិច្ចដើម្បីបម្រព្រះជាម្ចាស់ដែលមានវត្តមាននៅក្នុងបងប្អូនដែលយើងទៅចួបរាល់សប្ដាហ៍»។
នៅក្នុងធម្មទេសនា នាឱកាសនោះ លោកអភិបាល អូលីវីយ៉េ មានប្រសាសន៍ថា សូមឲ្យនិស្សិតទេវវិទ្យាល័យទាំងអស់គ្នា ចេះបង្ហាញព្រះគ្រីស្តដូចលោកយ៉ូហានបាទីស្ត។ លោកបន្ថែមថា ថ្ងៃនេះយើងធ្វើពិធីតែងតាំងបងប្រុស ប៉ូល វិន កាន់ ជាអ្នកបម្រើអាសនៈ ជាជំហានមួយដើម្បីក្លាយទៅជាបូជាចារ្យ ធ្វើសក្ការៈបូជាដោយនាមព្រះយេស៊ូ ដោយណែនាំឱ្យបងប្អូនលែងមើលយើងតែមើលឃើញព្រះយេស៊ូវិញ។
លោកបន្ថែមថា ថ្ងៃនេះបងប្រុស ប៉ូល វិន កាន់ ទទួលតួនាទីអ្នកបម្រើអាសនៈជាផ្លូវការណ៍ ជាពេលវេលាមួយដើម្បីហាត់ថែមទៀត ដើម្បីស្គាល់ព្រះយេស៊ូ និងនៅថ្ងៃអនាគតអាចបង្ហាញស្នាព្រះហស្ត និងសិរីរុងរឿងរបស់ព្រះជាម្ចាស់ ដើម្បីលើកតម្កើងព្រះនាមព្រះអង្គ។
«សម្រាប់ជីវិតជាបូជាចារ្យ ខ្ញុំបានរិះគិតជាច្រើន។ សម្រាប់ខ្ញុំកំពុងបន្តរិះគិតក្នុងការត្រាស់ហៅ សូមផ្ដែផ្ដាំដល់យុវជន សូមមានចិត្តក្លាហានលះបង់បំណងផ្ទាល់ខ្លួន ដើម្បីគិតពីព្រះជាម្ចាស់ និងព្រះសហគមន៍ត្រូវការយើងទាំងអស់គ្នា»។ នេះជាការលើកឡើងរបស់អ្នកបម្រើតុអាសនៈ វិន កាន់។
លោក ប៉ូល វិន កាន់ ជាគ្រីស្តបរិស័ទមកពីព្រះសហគមន៍ចំប៉ានៃមណ្ឌលសកម្មភាពទន្លេមេគង្គ មានបងប្អូនទាំងអស់ ៦នាក់ ហើយឪពុកម្ដាយប្រកបមុខរបរជាអ្នកនេសាទ។ លោកជាកូន ៥ក្នុងក្រុមគ្រួសារកាតូលិកតាំងពីជំនាន់ដូនតាមក។ លោកបានចូលរៀននៅទេវវិទ្យាល័យក្នុងឆ្នាំ២០១៤ ដោយមានការលើកទឹកចិត្តនិងជំរុញពីក្រុមគ្រួសារលោក ឱ្យបន្តដំណើរការត្រាស់ហៅរបស់ព្រះជាម្ចាស់ជាបូជាចារ្យ។
បូជាចារ្យកាតូលិក គឺរស់នៅលីវអស់មួយជីវិត និងរស់នៅដោយបម្រើព្រះសហគមន៍ ដោយបម្រើអគ្គសញ្ញានានា និងបម្រើបងប្អូនឯទៀតៗ ក្នុងបេសកកម្មប្រកាសដំណឹងល្អរបស់ព្រះយេស៊ូគ្រីស្ត។
លោកអភិបាល អូលីវីយ៉េ មានប្រសាសន៍ទៀតថា នៅទីនេះទេវវិទ្យាល័យ ប្រៀបបាននឹងវត្តអារាមផងដែរ ដូចព្រះសង្ឃនៅជាមួយកូននេន ហើយនៅទីនេះយើងមានកូនសិស្សរបស់លោកអភិបាល៤នាក់នៅជាមួយគ្នា ងាយស្រួលអប់រំ ប៉ុន្តែក្នុងពេលនេះ មិនសូវមានឱកាសយកបទពិសោធតាមព្រះសហគមន៍នីមួយៗ ដោយសារត្រូវបានបិទទ្វារព្រោះកូវីដ១៩។
លោកអភិបាលសង្ឃឹមថា ឆ្នាំក្រោយការអប់រំនៅទេវវិទ្យាល័យនឹងងាយស្រួលជាង ដើម្បីបន្តការរៀបចំខ្លួនជាបូជាចារ្យរបស់និស្សិតទាំងអស់។ សព្វថ្ងៃពួកគេកំពុងរៀនតាមអនឡាញខ្លះ និងមានបូជាចារ្យខ្លះមកបង្រៀន។
នៅក្នុងប្រទេសកម្ពុជា សព្វថ្ងៃ ព្រះសហគមន៍មាននិស្សិតទេវវិទ្យាល័យ ចំនួន៥រូប ដែល៤រូបទទួលជាសិស្សរបស់លោកអភិបាល និងមួយរូបទៀតកំពុងត្រៀមខ្លួន។ ជាមួយគ្នានេះ លោកអភិបាលឲ្យដឹងថា ព្រះសហគមន៍ក៏មាននិស្សិតទេវវិទ្យាល័យ ចំនួន៣នាក់ទៀតកំពុងរៀននៅប្រទេសថៃផងដែរ។
លោកបន្ថែមថា «ដូច្នេះនេះជាបរិយាកាស ជាស្ថានភាពពិភពលោកសព្វថ្ងៃ យើងមានតែអធិដ្ឋានដើម្បីឱ្យមានសេរីភាពក្នុងការធ្វើដំណើរនិងរៀនក្នុងពេលឆាប់ៗនេះ ដោយមានការបង្កើតទំនាក់ទំនង និងជាពិសេសអធិដ្ឋានឱ្យមានកូនសិស្សលោកអភិបាលមួយចំនួនទៀតនាឆ្នាំសិក្សាថ្មីខាងមុខនេះ»៕
ដោយ ដាលីស
