«ការលើកកម្ពស់បរិយាបន្នសង្គម ជាប្រធានបទសំខាន់បំផុតនៅកម្ពុជាក៏ដូចពិភពលោកទាំងមូល ដើម្បីលើកកម្ពស់ជនដែលមានពិការភាព និងជនរងគ្រោះឱ្យទទួលប្រយោជន៍ពីសង្គម ឱ្យរស់នៅក្នុងស្ថានភាពសង្គមរីកចម្រើនប្រកបដោយសុភមង្គលនិងសុខដុមរនា»។ នេះជាប្រសាសន៍របស់លោក គឹម រតនា ប្រធានអង្គការការីតាសកម្ពុជា ក្នុងពិធីបើកសិក្ខាសាលាស្ដីពី ”បរិយាបន្នសង្គមក្នុងប្រទេសកម្ពុជា” នៅវិទ្យាស្ថានសន្តប៉ូល ក្នុងខេត្តតាកែវ។
កម្មវិធីសិក្ខាសាលារយៈពេល២ថ្ងៃនេះ ធ្វើឡើងនាថ្ងៃទី២៣និង២៤ វិច្ឆិកា ២០២១ តាមរយៈ ZOOM ដោយមានសិក្ខាកាមចូលរួមចំនួន២០០នាក់ ជានិស្សិត ដែលមានកិច្ចសហការពីអង្គការការីតាសកម្ពុជា កិច្ចសហប្រតិបត្តិការអាល្លឺម៉ង់ និងអង្គការការីតាសអាល្លឺម៉ង់។
លោកគឹម រតនាបន្ថែមថា ការលើកកម្ពស់នេះផ្ដល់ឱកាសពិសេស ដោយមិនគ្រាន់តែជាតួនាទីរបស់រដ្ឋាភិបាលទេ តែជាភារកិច្ចនិងតួនាទីរបស់យើងទាំងអស់គ្នា ដើម្បីរួមគ្នាធ្វើយ៉ាងណាឱ្យសង្គមរបស់យើងប្រកបដោយបរិយាកាសគ្មានការរើសអើង និងផ្ដល់លទ្ធភាពដល់អ្នកទាំងអស់ស្មើៗគ្នា ជាពិសេសជនមានពិការភាពមានសិទ្ធិពេញលេញដើម្បីទទួលបានសមធម៌ទាំងអស់គ្នា។
លោកគឹម រតនា បានរៀបរាប់អំពីគម្រោងនៃអង្គការការីតាសកម្ពុជាថា អង្គការការីតាសកម្ពុជា ជាអង្គការនៃព្រះសហគមន៍កាតូលិកក៏បានចូលរួមជាមួយគោលនយោបាយរបស់រាជរដ្ឋាភិបាលកម្ពុជា ក្នុងការចូលរួមលើកកម្ពស់បរិយាបន្នសង្គម១៥រាជធានីខេត្តនៅកម្ពុជា ដោយបង្កើតឱ្យមានកិច្ចការសង្គមកិច្ច ក្រុមជួយខ្លួនឯង បង្កើតឱ្យមានការចូលរួមខាងផ្នែកសេដ្ឋកិច្ច លើកកម្ពស់ការការពារសិទ្ធិអ្នកដែលសង្គមមិនរាប់រក និងជនជាតិដើមភាគតិច ដើម្បីឱ្យពួកគាត់មានសំឡេង មានឱកាសការងារនៅក្នុងសង្គម។
អង្គសិក្ខាសាលានៅថ្ងៃទី២៣នេះ ធ្វើឡើងក្រោមអធិបតីភាពលោកអូលីវីយ៉េ ជ្មីតហស្លេរ អភិបាលព្រះសហគមន៍កាតូលិកភូមិភាគភ្នំពេញ និងជាស្ថាបនិកវិទ្យាស្ថានសន្តប៉ូល រួមនុងវាគ្មិន ឯកឧត្តម ម៉ៅ វណ្ណា ទីប្រឹក្សាក្រសួងសង្គមកិច្ច អតីតយុទ្ធជន និងយុវនីតិសម្បទា។
នៅក្នុងកិច្ចស្វាគមន៍នេះដែរ លោកអភិបាលអូលីវីយ៉េ បានថ្លែងថា នេះជាពេលវេលាមួយដើម្បីរិះគិតតាមវិស័យនីមួយៗ ដើម្បីរួមគ្នាឱ្យប្រជាជនយើងរកឃើញសេចក្ដីសុខដោយសុខដុមរមនា។ អ្នកក្រីក្រមានខ្លះនៅជនបទ និងខ្លះនៅទីក្រុង និងធ្វើដូចម្ដេចដើម្បីឱ្យអ្នកទាំងអស់មានអារម្មណ៍ចូលនៅក្នុងសង្គមបច្ចុប្បន្ន ទៅជាគ្រួសារមួយចេះជួយគ្នាទៅវិញទៅមក លើកទឹកចិត្តគ្នាទៅវិញទៅមក?
លោកអភិបាលបន្តថា សិក្ខាសាលានេះនាំឱ្យពិចារណារួមគ្នា សហការគ្នា ជួយគ្នាទៅវិញទៅមកទាំងនៅកម្ពុជា អាស៊ាន និងពិភពលោកទាំងមូល។ លោកអភិបាលបន្ថែមថា «សង្ឃឹមថាសិក្ខាសាលានេះ អាចជួយយើងឱ្យរកឃើញសង្គមថ្មី ដែលមានសេចក្ដីសុខសម្រាប់ប្រជាជនទាំងអស់នៅគ្រប់ទីកន្លែង មិនមែនត្រឹមតែសង្គមមួយ តែសម្រាប់មនុស្សដែលរស់នៅក្នុងពិភពលោកទាំងអស់»។
សិក្ខាសាលានាថ្ងៃនេះក៏មានបទបង្ហាញអំពីច្បាប់ និងគោលនយោបាយអ្វីខ្លះពាក់ព័ន្ធនឹងបរិយាបន្នសង្គមដែលបកស្រាយដោយ ឯក. ម៉ៅ វណ្ណា។ នៅក្នុងការបកស្រាយនេះ លោកថា ដោយសារជនងាយរងគ្រោះ និងជនរងគ្រោះគ្មានសមត្ថភាព ឱកាស និងសេចក្ដីថ្លៃថ្នូរ ហើយខ្លះទៀតត្រូវបានគេផាត់ចេញពីសង្គម។ លោកថា បរិយាបន្នសង្គម ជាផ្នែកមួយនៅក្នុងសុខដុមសង្គម ដោយមានទាំងសមាហរណកម្មសង្គម។
រីឯលោក សាន រតនា មជ្ឈមណ្ឌលជាតិគាំពារមនុស្សចាស់ មានប្រសាសន៍ថា រដ្ឋាភិបាលកម្ពុជា មានគោលបំណងអភិវឌ្ឍ ប្រព័ន្ធអប់រំ ហើយបរិយាបន្ននៃការអប់រំ គឺដំណើរការដ៏ស្វាហាប់នៃការដោះស្រាយ និងឆ្លើយតបជាវិជ្ជមានចំពោះតម្រូវការចម្រុះភាពរបស់បុគ្គល និងក្រុមតាមរយៈការចូលរួមក្នុងការសិក្សាវប្បធម៌ និងសហគមន៍ និងកាត់បន្ថយ និងលុបបំបាត់ការមិនរាប់បញ្ចូលក្នុងនិងពីការអប់រំ។ ជាពិសេសគឺតម្រូវការអប់រំពិសេស ដែលមានគ្រប់វ័យអាស្រ័យលើតម្រូវការដោយទាមការគាំទ្របន្ថែម និងវិធីសាស្ត្រក្នុងការអប់រំ ហើយឥទ្ធិពលនៃកម្មវិធីសិក្សានៅឧត្តមសិក្សា ឆ្លើយតបនឹងបរិយាបន្នសង្គម ជាអ្វីដែលសំខាន់។
លោកសឿង សម្បត្តិ នាយកអង្គការ APSWC បានឱ្យដឹងថា អ្នកសង្គមកិច្ចចូលរួមចំណែកក្នុងបរិយាបន្នសង្គមកម្ពុជាដូចជា យុត្តិធម៌សង្គម សិទ្ធិមនុស្ស និងភាពផ្សេងៗគ្នាឱ្យរួមគ្នានៅក្នុងសង្គមបាន។ លោកសម្បត្តិ ឲ្យដឹងថា នៅកម្ពុជាមានសាកលវិទ្យាល័យ ផ្នែកសង្គមកិច្ចចំនួន៣ប៉ុណ្ណោះ «ហើយកង្វះអ្នកសង្គមកិច្ចជាបញ្ហាដែលមិនអាចប្រកែកបានឡើយនៅក្នុងប្រទេសរបស់យើង និងដើម្បីឱ្យមានបរិយាបន្នសង្គមនេះទាល់តែយើងទាំងអស់គ្នារួមគ្នាគ្រប់ផ្នែក»។
លោករតនា សង្ឃឹមថា សិក្ខាសាលាថ្ងៃនេះនឹងទទួលបានមតិពីអ្នកចូលរួមទាំងអស់ ជាពិសេសផ្នែកសាសនា ដែលជាផ្នែកមួយដ៏សំខាន់ក្នុងការជំរុញឱ្យមានបរិយាបន្នសង្គមនៅកម្ពុជា និងដើម្បីឱ្យយើងរួមគ្នាជាធ្លុងតែមួយដើម្បីលើកកម្ពស់សិទ្ធិជនដែលមានពិការភាព។
នេះជាលើកទី២ហើយដែលវិទ្យាស្ថានសន្តប៉ូលបានរៀបចំឱ្យមានសិក្ខាសាលាស្ដីពី បរិយាបន្នសង្គម ហើយសិក្ខាសាលាលើកទី១បានប្រព្រឹត្តទៅកាលពីខែមីនា ២០២០ ដោយមានអ្នកចូលរួម១០៧នាក់ ជានិសិ្សតមកពីសកលវិទ្យាល័យនានាក្នុងប្រទេសកម្ពុជា៕
ដោយ ដាលីស
