នៅក្នុងពិធីអគ្គសញ្ញាលាបថ្ងាសដល់បេក្ខជន៤៨រូបនៃមណ្ឌលសកកម្មភាពបាសាក់ លោកអភិបាលអូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ បានណែនាំឲ្យគ្រីស្តបរិស័ទយកគំរូតាមនាងប៉ូលីន ចារីខុត (Pauline Jaricot ) ដែលសម្តេចប៉ាបបានប្រកាសពេលថ្មីៗនេះ ថា នាងជាអ្នកពោរពេញដោយសុភមង្គល។
លោកអភិបាលបានមានប្រសាសន៍ថា ប៉ូលីន ជាយុវនារីបារាំងដែលកើតនៅក្នុងគ្រួសារអ្នកមានក្នុងឆ្នាំ ១៧៩៩ ដោយបានបង្កើតក្រុមដើម្បីឧបត្ថម្ភសាសនទូតដែលទៅប្រកាសដំណឹងល្អតាមប្រទេសនីមួយៗក្នុងពិភពលោកក្នុងឆ្នាំ ១៨០០ និងពេលនេះគ្រប់២០០ឆ្នាំហើយ។
លោកអភិបាលរំលឹកថា នាងបានកែប្រែចិត្តគំនិតដោយផ្ញើជីវិតលើព្រះជាម្ចាស់និងបម្រើព្រះសហគមន៍ ដោយសារគំរូនៃការលះបង់ជីវិតរបស់ម្តាយដើម្បីឲ្យគាត់មានសុខភាពល្អឡើងវិញ។
ក្រោយមកក្នុងឆ្នាំ១៨១៧ ក្នុងវ័យ១៨ឆ្នាំ ប៉ូលីនបានបង្កើតសមាគមនារី ដើម្បីបង្ហាញឱ្យមនុស្សលោកដឹងថា ព្រះបេះដូងព្រះយេស៊ូមានសេចក្ដីស្រឡាញ់សម្រាប់មនុស្សទាំងអស់។ សមាគមនេះ បានលើកតម្លៃអ្នកជំងឺ អ្នកក្រីក្រ និងមនុស្សដែលគេបោះបង់ចោល «ដោយដឹងថា ពេលយើងលះបង់ចោលនរណាម្នាក់យើងក៏បានបោះបង់ព្រះយេស៊ូដែរ។» នេះបើតាមការរៀបរាប់របស់លោកអភិបាលប្រាប់ដល់បេក្ខជននិងគ្រីស្តបរិស័ទដែលបានចូលរួមក្នុងពិធីនោះ នៅព្រះវិហារសន្តយ៉ូសែប (ជ្រៃធំ)ក្នុងខេត្តកណ្តាល កាលពីថ្ងៃទី២២ ខែឧសភាកន្លងទៅនេះ។
លោកអភិបាលសង្កត់ធ្ងន់ទៀតថា វីរភាពរបស់ស្ត្រីរូបនេះ ក្នុងវ័យ២៣ឆ្នាំ បានបង្កើតសមាគមព្រះមាលាដ៏មានជីវិត ដើម្បីរួមគ្នាអធិដ្ឋានផ្គាំ និងផ្តល់ប្រាក់ឧបត្ថម្ភដល់សាសនទូតក្រៅប្រទេសនានា ដែលខ្វះខាតប្រាក់និងរងការបៀតបៀនពីរដ្ឋអំណាច ក្នុងការប្រកាសដំណឹងល្អ។ ពេលនេះ សមាគមនេះមាននៅក្នុងប្រទេសបារាំងនិងប្រទេសមួយចំនួនក្នុងពិភពលោក។
ក្នុងនោះដែរ លោកអភិបាលអូលីវីយ៉េ បានឲ្យគ្រីស្តបរិស័ទប្រើប្រាស់ជីវិតរបស់ខ្លួនឲ្យសកម្មដូចប៉ូលីន ដែលតែងតែនឹកគិតដល់ផ្លូវវិញ្ញាណរបស់មនុស្ស។ ក្នុងសម័យនោះ កម្មករកម្មការិនីរោងចក្រ ធ្វើការងារច្រើនម៉ោង គ្មានពេលអធិដ្ឋាន និងស្ដាប់ព្រះបន្ទូលរបស់ព្រះជាម្ចាស់។ ឃើញដូច្នេះ ប៉ូលីន ដែលជាកូនក្នុងគ្រួសារអ្នកមានទ្រព្យ បានបង្កើតរោងចក្រកាតូលិកមួយ ដើម្បីឲ្យពួកគេអាចធ្វើការផង អធិដ្ឋាននិងស្តាប់ព្រះបន្ទូលផង។
តាមរយៈគំរូនិងសមាគមរបស់ប៉ូលីន ចារីខុត បានធ្វើឲ្យព្រះសហគមន៍នៃប្រទេសនីមួយៗជារៀងរាល់ឆ្នាំ ប្រមូលលុយដើម្បីផ្ញើទៅទីក្រុងរ៉ូម ដែលជាសញ្ញាសម្គាល់ថាព្រះសហគមន៍ក្នុងពិភពលោកជួយគ្នាទៅវិញទៅមកក្នុងការប្រកាសដំណឹងល្អ។ លោកអភិបាលបន្ថែម។
លោកអភិបាលបន្តថា «គាត់បានណែនាំឲ្យយើងយល់ថា យើងត្រូវការភ្ជាប់ជាមួយប្រភពនៃជីវិតរបស់យើង គឺព្រះជាម្ចាស់ ឲ្យយើងអធិដ្ឋានផង ឲ្យយើងស្រឡាញ់យ៉ាងជាក់ស្តែង។»
ហើយសម្រាប់យើងសព្វថ្ងៃ យើងត្រូវពិចារណដែរ អំពីសកម្មភាពអ្វីខ្លះដែលយើងបានធ្វើសម្រាប់សង្គមរបស់យើង ធ្វើអ្វីខ្លះដើម្បីប្រកាសដំណឹងល្អ និងអ្វីខ្លះដើម្បីធ្វើជាគ្រីស្តបរិស័ទសកម្ម។ លោកអភិបាលសង្កត់ធ្ងន់យ៉ាងនេះ «ខ្ញុំជឿថា យុវនាទីប៉ូលីន ចារីខុត ជាគំរូមួយដ៏អស្ចារ្យសម្រាប់យើងទាំងអស់គ្នា។…ជីវិតរបស់គាត់គឺបូជាជីវិតនៅក្បែរឈើឆ្កាង។»
លោកអភិបាលបន្ថែមថា ប៉ូលីនមិនដែលចង់មានឈ្មោះល្បីទេ ព្រោះគាត់ដឹងថា ព្រះជាម្ចាស់ដឹងទាំងអស់ ហើយអ្វីដែលសំខាន់យើងបានទទួលព្រះវិញ្ញាណដ៏វិសុទ្ធ និងព្រះវិញ្ញាណដ៏វិសុទ្ធណែនាំឲ្យយើងអធិដ្ឋាន ណែនាំឲ្យយើងដឹងថា ព្រះជាម្ចាស់មានវត្តមាននៅក្នុងជីវិតរបស់យើង ណែនាំឲ្យយើងចេះស្រឡាញ់បងប្អូនឯទៀតៗ។
ជាមួយគ្នានេះ លោកអភិបាលបានរំលឹកថា ប៉ូលីន បានទទួលសារលើកទឹកចិត្តមួយឃ្លាពីសន្តយ៉ូហាន ម៉ារី វីយ៉ាណែរ ដែលបានប្រាប់ថា «យើងមានព្រះជាម្ចាស់តែមួយអង្គគត់ដែលជាសាក្សីរបស់យើង ព្រះយេស៊ូតែមួយអង្គគត់ដែលជាគំរូសម្រាប់យើង យើងមានព្រះនាងម៉ារីតែមួយគត់ដែលជួយគាំទ្រនិងលើកទឹកចិត្តយើង ហើយនៅក្នុងជីវិតរបស់យើងគឺមានរឿងតែមួយគត់ដែលសំខាន់ គឺធ្វើអ្វីៗទាំងអស់នៅក្នុងសេចក្តីស្រឡាញ់ដោយបូជាជីវិត។»
ក្នុងពិធីនោះ មានបេក្ខជនទទួលអគ្គសញ្ញាលាបថ្ងាសចំនួន៤៨រូបមកពីព្រះសហគមន៍ជ្រៃធំចំនួន៣៧នាក់ ព្រះសហគមន៍កោះទាវ១០នាក់ និងស្អាងម្នាក់។
អ្នកស្រី ទ្រឿង យ៉ុង ប្រធានគណៈកម្មការព្រះសហគមន៍ និងជាតំណាងអាណាព្យាបាលបេក្ខជន នៅថ្ងៃនេះព្រះសហគមន៍របស់យើងបានទទួលផលជាច្រើន ហើយផលទាំងនោះគឺមកពីព្រះវិញ្ញាណដ៏វិសុទ្ធ ជាពិសេសប្អូនៗ និងកូនៗយើងដែលទទួលអគ្គសញ្ញាលាបថ្ងាស ឱ្យក្លាយជាគ្រីស្តបរិស័ទដ៏ពេញលក្ខណៈ គឺជាគំរូនៃជំនឿ ជាសាក្សីនៃជំនឿ បញ្ជាក់ពីជំនឿ និងហ៊ានស៊ូប្ដូរជីវិតដើម្បីជំនឿ ជាពិសេសគឺដើម្បីព្រះគ្រីស្ត។ ក្នុងនាមយើងខ្ញុំជាឪពុកម្ដាយ អាណាព្យាបាល សូមថ្លែងអំណរគុណដល់លោកអភិបាលដែលបានយកចិត្តទុកដាក់ជួយណែនាំជីវិតខាងផ្លូវវិញ្ញាណរបស់យើងខ្ញុំ៕
ដាលីស
