| អត្ថបទទី១៖ សុភាសិត ៨,២២-៣១ខ្ញុំជាមេជាងជួយធ្វើការព្រះអង្គ។ សុភ ៨,៣០អត្ថបទទី២៖ រ៉ូម ៥,១-៥ការអត់ធ្មត់នាំឲ្យយើងចេះស៊ូទ្រាំ ហើយការស៊ូទ្រាំនាំឲ្យយើងមានសេចក្ដីសង្ឃឹម។ រម ៥,៤ដំណឹងល្អ៖ យ៉ូហាន ១៦,១២-១៥ខ្ញុំមានសេចក្ដីឯទៀតៗជាច្រើន ដែលត្រូវនិយាយប្រាប់អ្នករាល់គ្នា។ យហ ១៦,១២ |
“ស្វាគមន៍ ចែករំលែក និងបម្រើ”
បងប្អូនជាទីស្រឡាញ់
ថ្ងៃនេះ ព្រះសហគមន៍ណែនាំឱ្យយើងគោរពបុណ្យលើកតម្កើងព្រះត្រៃឯក នេះជាពេលវេលាមួយដ៏ពិសេសដើម្បីឱ្យយើងចូលនៅក្នុងព្រះជន្មរបស់ព្រះជាម្ចាស់ នៅក្នុងជីវិតរបស់ព្រះជាម្ចាស់។ យើងជាគ្រីស្តបរិស័ទ យើងជាប់ជាមួយព្រះជាម្ចាស់ដែលជាព្រះបិតា ព្រះបុត្រា និងព្រះវិញ្ញាណដ៏វិសុទ្ធ។ ប្រសិនបើប្អូនចាំ សញ្ញាដែលយើងបានទទួលពីឪពុកម្តាយមុនគេបង្អស់ គឺគូសសញ្ញាឈើឆ្កាង ប្រហែលមុនយើងរៀនធម៌បពិត្រព្រះនាងម៉ារី មុនយើងរៀនធម៌ឱព្រះបិតា យើងត្រូវតែចូលនៅក្នុងការអធិដ្ឋានរបស់យើង ដោយគូសសញ្ញាឈើឆ្កាង (ដោយព្រះនាមព្រះបិតា ព្រះបុត្រា និងព្រះវិញ្ញាណដ៏វិសុទ្ធ)។
ជួនកាលយើងចេះតែគូសដូចជាទម្លាប់ ប៉ុន្តែនៅពេលយើងគូសសញ្ញាឈើឆ្កាងយើងមិនតែនឹកឃើញដល់ព្រះយេស៊ូដែលសោយទិវង្គត យើងនិយាយថា “ដោយព្រះនាមព្រះបិតា ព្រះបុតា និងព្រះវិញ្ញាណដ៏វិសុទ្ធ”។ ដូច្នេះ ទោះបីយើងមិនសូវគិតវែងឆ្ងាយ យើងមិនសូវដឹងខ្លួន ប៉ុន្តែតាមពិតនៅពេលហ្នឹងយើងកំពុងប្រកាសថា “ខ្ញុំជាគ្រីស្តបរិស័ទ ខ្ញុំជឿលើព្រះជាម្ចាស់តែមួយព្រះអង្គគត់ ដែលមានព្រះបិតា ព្រះបុត្រា និងព្រះវិញ្ញាណដ៏វិសុទ្ធ” ជាបីអង្គនៅក្នុងមួយអង្គ។ ព្រះជាម្ចាស់មានតែមួយព្រះអង្គ ដែលស្រឡាញ់យើងយ៉ាងខ្លាំងណាស់ ព្រះអង្គបានឃើញប៉ុន្មានដងយើងវង្វេងផ្លូវ ប៉ុន្មានដងយើងមិនដឹងខ្លួន។ ព្រះជាម្ចាស់បានបង្កើតយើងជាបុរសជាស្ត្រី ឱ្យយើងមានសេចក្តីសុខ មានសុភមង្គល ឱ្យមានការរីកចម្រើននៅក្នុងខ្លួនរបស់យើង។ ប៉ុន្តែ ប៉ុន្មានដងយើងដើរខុសផ្លូវ វង្វេងភ្លេចព្រះជាម្ចាស់ នៅក្នុងប្រវត្តិសាស្ត្រនៃការសង្រ្គោះយើងបានឃើញអស់ហើយ អាដាំ អេវ៉ា កាអ៊ិន អាបិល។ ក្រោយមក មានលោកណូអេដែលខិតខំសង្រ្គោះមនុស្សលោក ដោយសារមនុស្សលោកវង្វេងអស់ហើយ។ ប៉ុន្តែ ព្រះជាម្ចាស់មានព្រះហឫទ័យអត់ធ្មត់ជាមួយយើង ព្រះជាម្ចាស់បានចាត់ព្រះបុត្រាគឺព្រះយេស៊ូផ្ទាល់ ឱ្យយាងមកដើម្បីធ្វើដំណើរជាមួយមនុស្សលោក ដើម្បីណែនាំឱ្យយើងចូលនៅក្នុងជីវិតរបស់ព្រះជាម្ចាស់ថែមទៀត។
ថ្ងៃនេះ យើងបានស្តាប់នៅពេលព្រះយេស៊ូបានយាងឡើងស្ថានបរមសុខ យើងថាយើងវង្វេងទៀតដោយសារយើងអស់ព្រះយេស៊ូម្តងទៀត។ ប៉ុន្តែ ផ្ទុយទៅវិញព្រះយេស៊ូបានប្រទានព្រះវិញ្ញាណដ៏វិសុទ្ធដើម្បីឱ្យយើងធ្វើដំណើរតទៅទៀត ដោយយើងស្គាល់ព្រះជាម្ចាស់ថែមទៀត ដោយយើងមានកម្លាំងថែមទៀត។ យើងពោរពេញដោយសេចក្តីស្រឡាញ់ដែលមកពីព្រះជាម្ចាស់ ដើម្បីឱ្យយើងជាគ្រីស្តបរិស័ទនៅពេលយើងបានទទួលពិធីជ្រមុជទឹក លោកឪពុកបាននិយាយថា “ខ្ញុំជ្រមុជទឹកកូននៅក្នុងនាមព្រះបិតា ព្រះបុត្រា និងព្រះវិញ្ញាណដ៏វិសុទ្ធ”។ យើងពោរពេញដោយកម្លាំងនៅក្នុងព្រះជាម្ចាស់ ថ្ងៃនេះដែលយើងទទួលព្រះវិញ្ញាណដ៏វិសុទ្ធ គឺយើងមានកម្លាំងថែមទៀត ដើម្បីឱ្យយើងទៅជាគ្រីស្តបរិស័ទរឹងមាំនៅក្នុងជីវិតរបស់យើង។ គ្រីស្តបរិស័ទដែលរឹងមាំ ជាគ្រីស្តបរិស័ទដែលពោរពេញដោយសេចក្តីសង្ឃឹម។
ម្សិលមិញ នៅតាំងគោកយើងបានគោរពមរណៈសាក្សី មានន័យថាគោរពគ្រីស្តបរិស័ទមួយចំនួន ដូចជាលោក ឆ្មារ សាឡាស់ លោក ឆ្មារ សាឡឹម បងស្រីនិងគ្រីស្តបរិស័ទមួយចំនួន ដែលបានលះបង់ចោលសម្រាប់ព្រះជាម្ចាស់។ នៅពេលនោះ ខ្ញុំបាននិយាយទៅគ្រីស្តបរិស័ទថា មើលទៅ យើងបានធ្វើដំណើររយៈពេល២ឆ្នាំនៅក្នុងបញ្ហាកូវីដ-១៩ ប៉ុន្មានដងយើងបាត់សេចក្តីសង្ឃឹមយើង យើងចូលព្រះវិហារមិនបាន យើងមានទុក្ខលំបាកនៅក្នុងការរកស៊ី។ ដូច្នេះ យើងបានជួបទុក្ខលំបាកច្រើននៅក្នុងរយៈពេល២ឆ្នាំកន្លងមក ប៉ុន្តែទោះបីយើងមានទុក្ខលំបាកក៏ដោយ ពេលយើងមើលឃើញមរណៈសាក្សីរបស់យើង នៅក្នុងសម័យប៉ុលពតដែលសម្លាប់ប្រជាជនជាង២លាននាក់។ នៅពេលនោះ យើងត្រូវតែនឹកឃើញដល់ទុក្ខលំបាកយ៉ាងធ្ងន់ធ្ងរ ម្ហូបអាហារក៏មិនគ្រប់គ្រាន់ គ្មានសិទ្ធិសេរីភាព ធ្វើការងារធ្ងន់ គ្មានមន្ទីរពេទ្យដើម្បីព្យាបាលជំងឺ គ្មានសាលារៀន… គ្មានអ្វីដែលណែនាំឱ្យមនុស្សយើងមានសេចក្តីសុខសោះ។ ប៉ុន្តែ បានឆ្លងផុតរហូតដល់សព្វថ្ងៃព្រះសហគមន៍របស់យើងនៅមានជីវិត ដោយសារយើងជាគ្រីស្តបរិស័ទ យើងពោរពេញដោយសេចក្ដីសង្ឃឹម។
ថ្ងៃនេះ យើងបានស្តាប់នៅក្នុងអត្ថបទទី២ “ព្រោះតែព្រះគ្រីស្ត និងដោយសារជំនឿ យើងមានមាគ៌ាចូលទៅកាន់ជីវិតថ្មី ហើយយើងក៏ស្ថិតនៅក្នុងជីវិតថ្មីនេះទាំងភ្ជាប់ខ្លួនយ៉ាងខ្ពស់មុខ ដោយសង្ឃឹមថានឹងបានទទួលសិរីរុងរឿងរបស់ព្រះជាម្ចាស់”។ នេះជាបទពិសោធន៍របស់មរណៈសាក្សីយើង ទោះបីពិបាកក៏ដោយ ទោះបីអស់សង្ឃឹមក៏ដោយ គេដឹងថាគេមានសេចក្ដីសង្ឃឹម។ មិនមែនគេមានសេចក្តីសង្ឃឹមដោយសារអាចរកស៊ីបាន មិនមែនគេមានសេចក្តីសង្ឃឹមដោយសារអាចដើរទៅណាក៏បាន។ មានសេចក្តីសង្ឃឹម ដោយសារបានទទួលសិរីរុងរឿងរបស់ព្រះជាម្ចាស់។ បងប្អូនជាទីស្រឡាញ់ យើងជាគ្រីស្តបរិស័ទនៅក្នុងសម័យដែលមានសុខសន្តិភាព ប៉ុន្តែជួនកាលណែនាំឱ្យយើងភ្លេចគោលដៅនៃជីវិតរបស់យើង។ សេចក្តីសុខសាន្តសម្រាប់យើងជាគ្រីស្តបរិស័ទ មិនមែនតែយើងរកស៊ីបាន យើងដើរលេងបាន យើងមានម្ហូបអាហារគ្រប់គ្រាន់ មានទ្រព្យសម្បត្តិច្រើន។ សេចក្តីសុខសាន្តរបស់យើង គឺយើងដឹងថាយើងមានព្រះជាម្ចាស់ដែលស្រឡាញ់យើង យើងដឹងថាយើងមានផ្លូវនៅថ្ងៃអានាគតនៅស្ថានបរមសុខ ដែលមានព្រះជាម្ចាស់ទទួលស្វាគមន៍យើង។ យើងដឹងថា យើងមានសមត្ថភាពដើម្បីស្រឡាញ់បងប្អូនឯទៀតៗ នេះជាសេចក្ដីសង្ឃឹមរបស់យើង។
លោកប៉ូលបាននិយាយថា “ពិតមែន យើងរងទុក្ខវេទនា យើងរងទុក្ខលំបាក ក៏ប៉ុន្តែទុក្ខវេទនាណែនាំឱ្យយើងចេះអត់ធ្មត់ ការអត់ធ្មត់ណែនាំឱ្យយើងចេះស៊ូទ្រាំ ការស៊ូទ្រាំណែនាំឱ្យយើងមានសេចក្តីសង្ឃឹម”។ នេះជាជីវិតរបស់មរណៈសាក្សីពីដើម វេទនាប៉ុន្តែអត់ធ្មត់ អត់ធ្មត់ណែនាំឱ្យចេះតស៊ូ តស៊ូណែនាំឱ្យមានសេចក្ដីសង្ឃឹមដើម្បីទៅមុខ ដោយដឹងថាអនាគតរបស់យើងគឺព្រះជាម្ចាស់ផ្ទាល់។ ខ្ញុំមិនដឹងថា នៅក្នុងពេលវេលាដែលមានជំងឺកូវីដ-១៩រាតត្បាត តើបងប្អូនបានគិតអំពីអ្វី? ជួនកាលយើងមើលមិនឃើញអនាគត បើកព្រំដែនហើយបិទវិញ បើកផ្សារហើយបិទវិញ។ ដូច្នេះ ប៉ុន្មានខែកន្លងមកយើងវង្វេងអស់ហើយ យើងមិនដឹងថាអនាគតរបស់យើងទៅណា ប៉ុន្តែប្រសិនបើយើងគិតពិចារណាយើងជាគ្រីស្តបរិស័ទ អនាគតយើងនៅមាន។ ជាអនាគតស្ថិតស្ថេរ សិរីរុងរឿងរួមជាមួយព្រះជាម្ចាស់ នេះជាសេចក្តីសង្ឃឹមរបស់យើងដែលយើងបានទទួល។
បងប្អូនជាទីស្រឡាញ់ តើយើងធ្វើដូចម្តេចដើម្បីថែរក្សាសេចក្តីសង្ឃឹមនេះ? ថ្ងៃនេះយើងមានប្អូនៗ៤៥នាក់នឹងទទួលព្រះអំណោយទានដែលមកពីព្រះវិញ្ញាណដ៏វិសុទ្ធ។ ព្រះអំណោយទាននេះរួមមាន៖
- មានប្រាជ្ញាឈ្លាសវៃ
- ចេះពិចារណាដឹងខុសដឹងត្រូវ
- ដឹងសេចក្តីពិត
- មានយោបល់ល្អ
- មានសេចក្តីអង់អាច (សេចក្តីក្លាហាន)
- ប្រព្រឹត្តតាមការណែនាំរបស់ព្រះវិញ្ញាណ
- គោរពកោតខ្លាចព្រះបិតា។
នេះជាព្រះអំណោយទានទាំង៧ដែលយើងទទួលថ្ងៃនេះ ប្រាជ្ញាឈ្លាសវៃ ដឹងខុសដឹងត្រូវ ដឹងសេចក្ដីពិត មានយោបល់ល្អ មានចិត្តក្លាហាន ប្រព្រឹត្តិតាមការណែនាំរបស់ព្រះវិញ្ញាណ និងគោរពកោតខ្លាចព្រះបិតា។ អំណោយទាននេះ មិននិយាយអំពីការរកស៊ីបាន ដើរកំសាន្តបាន គឺនិយាយអំពីអ្វីដែលសំខាន់បំផុតសម្រាប់ជីវិតរបស់យើង។ ហេតុនេះហើយ នៅក្នុងកាលៈទេសៈណាក៏ដោយ ទោះបីពិបាកក៏ដោយ ទោះបីយើងរស់នៅយ៉ាងស្រួលក៏ដោយ យើងដឹងថាយើងមានព្រះវិញ្ញាណដ៏វិសុទ្ធ។ ជាអំណោយទាន ដែលណែនាំឱ្យយើងឆ្លងផុតទុក្ខលំបាកទាំងអស់ ដូច្នេះពេលលោកប៉ូលនិយាយអំពី “ទុក្ខវេទនាណែនាំឱ្យយើងមានចិត្តអត់ធ្មត់ ចិត្តអត់ធ្មត់ណែនាំឱ្យយើងស៊ូទ្រាំ ស៊ូទ្រាំណែនាំឱ្យយើងមានសេចក្ដីសង្ឃឹម”។ យើងអាចធ្វើបាន ដោយសារយើងភ្ជាប់ជាមួយព្រះវិញ្ញាណដ៏វិសុទ្ធដ៏ពិតប្រាកដ ដើម្បីរស់នៅក្នុងជីវិតប្រចាំថ្ងៃ យើងត្រូវធ្វើដូចម្តេចដើម្បីទៅមុខ។
ថ្ងៃនេះ យើងគោរពព្រះត្រៃឯកដែលមានរូបមួយបង្ហាញអំពីលោកអប្រាហាំដែលទទួលភ្ញៀវ៣នាក់។ មានថ្ងៃមួយ លោកអប្រាហាំកំពុងអង្គុយនៅក្រោមដើមឈើ ហើយមានភ្ញៀវ៣នាក់មកសួរសុខទុក្ខគាត់ លោកអប្រាហាំបានរៀបចំជប់លៀងស្វាគមន៍ភ្ញៀវទាំង៣នាក់នោះ។ មុន៣នាក់នោះ ជាភ្ញៀវគាត់មិនដែលស្គាល់ចេញធ្វើដំណើរតទៅទៀត គេបានប្រាប់លោកអប្រាហាំថា “បន្តិចទៀតយាយសារានិងមានផ្ទៃពោះ”។ យាយសារាជាស្ត្រីចំណាស់មិនដែលមានកូនសោះ ណែនាំឱ្យយាយសារាមិនជឿ ប៉ុន្តែក្រោយមកកើតឡើងមែន។ គាត់មានផ្ទៃពោះ បង្កើតបានកូនម្នាក់ឈ្មោះអ៊ីសាក់ នេះជាដំណឹងល្អដែលភ្ញៀវទាំង៣នាក់នោះបានប្រាប់គាត់។ មិនមែនជាទេវទូតកាព្រីអែលដែលប្រាប់ដំណឹងល្អដូចព្រះនាងម៉ារី គឺ៣នាក់នេះ ដែលណែនាំឱ្យយើងយល់ថា នេះជាព្រះជាម្ចាស់ផ្ទាល់ គឺព្រះបិតា ព្រះបុត្រា និងព្រះវិញ្ញាណដ៏វិសុទ្ធ ដែលបានយាងមកជួបជាមួយលោកអប្រាហាំ។ នៅពេលនោះ គេបានរួមតុហូបអាហារជាមួយគ្នា លោកអប្រាហាំបានស្វាគមន៍គេយ៉ាងកក់ដៅ។
ខ្ញុំមាន៣ចំណុចសម្រាប់បងប្អូន ដើម្បីរស់នៅក្នុងសេចក្ដីសង្ឃឹមបច្ចុប្បន្ននេះ អំពីការទទួលភ្ញៀវទាំងបីនាក់របស់លោកអប្រាហាំ។ ចំណុចទី១ លោកអប្រាហាំមិនស្គាល់គេ ប៉ុន្តែគាត់បានស្វាគមន៍គេយ៉ាងរាក់ទាក់។ ចំណុចទី២ គាត់បានចែករំលែកម្ហូបអាហារដែលគាត់មានដល់គេយ៉ាងបរិបូណ៌។ ចំណុចទី៣ នៅពេលគេកំពុងបរិភោគគាត់បានបម្រើគេ។ នេះជាចំណុចទាំង៣ ដែលខ្ញុំចង់ឱ្យប្អូនៗទុកនៅក្នុងដួងចិត្តរបស់យើង ដើម្បីរស់នៅជាគ្រីស្តបរិស័ទ។ ស្វាគមន៍បងប្អូនឯទៀតៗយ៉ាងរាក់ទាក់ ដោយសារនៅក្នុងបងប្អូនឯទៀតៗយើងមានវត្តមានរបស់ព្រះជាម្ចាស់។ ចែករំលែកអ្វីដែលយើងមានដល់បងប្អូន មិនមែនតែលុយ មានម្ហូបអាហារ ពេលវេលា សេចក្ដីស្រឡាញ់ ការលើកទឹកចិត្ត…។ ចែករំលែក កុំឱ្យយើងទុកអំណោយទានដែលមាននៅក្នុងជីវិតរបស់យើង អំណរសប្បាយ សេចក្តីសុខដែលយើងមានចែករំលែកជាមួយបងប្អូនឯទៀតៗ។ បម្រើបងប្អូនឯទៀតៗ ដើម្បីឱ្យគេមានសេចក្ដីសុខ យើងបម្រើដោយសេចក្តីស្រឡាញ់ យើងជួយដោយសេចក្ដីស្រឡាញ់។ នេះជាជីវិតរបស់យើងជាគ្រីស្តបរិស័ទ ផ្សេងពីលោកីយ៍មិនដែលជួយដោយគ្មានការតបស្នងនោះទេ ថ្ងៃនេះយើងមាន៣ចំណុចនេះ ស្វាគមន៍ ចែករំលែក និងបម្រើ។
ថ្ងៃនេះ យើងអធិដ្ឋានសម្រាប់គ្នាទៅវិញទៅមក ឱ្យយើងចូលបន្តិចម្តងៗនៅក្នុងព្រះជាម្ចាស់របស់យើង ដែលជាព្រះបិតា ព្រះបុត្រា និងព្រះវិញ្ញាណដ៏វិសុទ្ធ ដែលបានស្រឡាញ់យើងយ៉ាងខ្លាំង។ ព្រះជាម្ចាស់ ដែលបានណែនាំឱ្យយើងទៅជាគ្រីស្តបរិស័ទយ៉ាងសកម្ម ដែលចេះស្វាគមន៍យ៉ាងរាក់ទាក់ ដែលចេះចែករំលែក និងដែលចេះបម្រើអស់ពីកម្លាំងកាយកម្លាំងចិត្ត អស់ពីសេចក្ដីស្រឡាញ់សម្រាប់បងប្អូនឯទៀតៗជានិច្ច។ សូមព្រះជាម្ចាស់ប្រទានពរឱ្យយើងទាំងអស់គ្នា ដើម្បីឱ្យយើងបន្តធ្វើដំណើរនៅក្នុងលោកីយ៍នេះ និងឱ្យយើងរស់នៅក្នុងសេចក្តីសុខជានិច្ច។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
