ក្នុងអាទិត្យទី២នៃរដូវរង់ចាំ លោកអភិបាលអូលីវីយ៉េ ជ្មីតហស្លេ រំលឹកដល់គ្រីស្តបរិស័ទឲ្យយកចិត្តទុកដាក់បន្ថែមលើការរួបរួមគ្នាជាធ្លុងតែមួយក្នុងព្រះសហគមន៍។
លោកមានប្រសាសន៍ថា ព្រះរាជ្យរបស់ព្រះជាម្ចាស់គឺបងប្អូនចេះទទួលស្វាគមន៍គ្នាដោយរាក់ទាក់ ដូចព្រះគ្រីស្តទទួលបងប្អូនដែរ។ ទោះបីនៅសង្គមខាងក្រៅ ការសហការគ្នាបានបាត់បង់ខ្លះក៏ដោយ តែព្រះសហគមន៍ត្រូវតែបន្ត ជាគ្រួសារមួយដែលចេះជួយគ្នាទៅវិញទៅមក ដែលចេះរាក់ទាក់គ្នាទៅវិញទៅមក ដើម្បីបង្កើតគ្រួសារតែមួយដែលជាធ្លុងតែមួយ ចិត្តគំនិតតែមួយ ចិត្តថ្លើមតែមួយ សំឡេងតែមួយ។
មានប្រសាសន៍កាលពីថ្ងៃអាទិត្យទី៤ខែធ្នូកន្លងទៅ លោកអភិបាលបានរំលឹកថា នៅក្នុងភូមិភាគភ្នំពេញមានសាសនទូតពីប្រទេសផ្សេងៗជាច្រើនមកបម្រើ ប៉ុន្តែនៅក្នុងព្រះសហគមន៍ដោយសារយើងមានព្រះគ្រីស្តជាសិរិសា «យើងធ្វើដំណើរជាមួយគ្នា ដោយចិត្តគំនិតតែមួយ ដោយសំឡេងតែមួយ ដើម្បីបម្រើព្រះសហគមន៍របស់យើង។»
ការចូលរួមជាមួយគ្នាក្នុងកិច្ចការមួយរួម គឺជារបៀបនៃគ្រួសារដែលចេះសហការគ្នា ប៉ុន្តែយើងត្រូវការមានកំលាំងដើម្បីទៅមុខនោះគឺព្រះវិញ្ញាណដ៏វិសុទ្ធ។ មានប្រសាសន៍ទៅកាន់គ្រីស្តបរិស័ទដែលនឹងទទួលអគ្គសញ្ញាលាបថ្ងាសនៅព្រះវិហារសន្តយ៉ូសែប ជុំគិរីក្នុងខេត្តកំពត លោកអភិបាលអូលីវីយ៉េ បានរំលឹកថា កំលាំងរបស់យើង គឺមកពីព្រះវិញ្ញាណដ៏វិសុទ្ធ ដែលបំភ្លឺនិងឲ្យយើងគោរពកោតខ្លាចព្រះជាម្ចាស់។
លោកបញ្ជាក់ថា ការកោតខ្លាចព្រះជាម្ចាស់គឺត្រូវចូលរួមអភិបូជាជារៀងរាល់ថ្ងៃអាទិត្យ មិនមែនធ្វើតាមអំពើចិត្តរបស់យើងឡើយ។
«ថ្ងៃអាទិត្យជាថ្ងៃទី៧ ដែលព្រះជាម្ចាស់សម្រាក មិនមែនជាពេលដេក តែជាពេលទុកឲ្យគ្រីស្តបរិស័ទមានពេលវេលាកោតសរសើរព្រះជាម្ចាស់ លើកតម្កើងព្រះនាមព្រះអង្គក្នុងវិហារ ដើម្បីទទួលកំលាំងថ្មី ជាពិសេសកំលាំងថ្មីពីព្រះបន្ទូលរបស់ព្រះជាម្ចាស។» លោកអភិបាលបញ្ជាក់។
លោកអភិបាលពន្យល់ថា ព្រះកាយរបស់ព្រះគ្រីស្តគឺជាកំលាំងមួយ ដើម្បីឲ្យយើងទៅជាគ្រួសារតែមួយ។ ពេលបងប្អូនទទួលព្រះកាយតូចមួយ គឺទទួលព្រះយេស៊ូពេញលក្ខណៈ ដែលឲ្យយើងទៅជារូបកាយព្រះយេស៊ូ។ «យើងជាគ្រួសារតែមួយមែនទែន ដោយសារយើងរៀងៗខ្លួនបានទទួលព្រះយេស៊ូផ្ទាល់។»
ក្នុងរដូវរង់ចាំនេះ លោកអភិបាលសូមបងប្អូនត្រៀមខ្លួនរៀបចំចិត្តគំនិត លើកិច្ចការដែលត្រូវធ្វើក្នុងអាទិត្យខាងមុខៗទៀត។ លោកអភិបាលបានស្នើសុំឲ្យគ្រីស្តបរិស័ទម្នាក់ៗរៀបចំកន្លែងទទួលព្រះកុមារយេស៊ូនៅតាមផ្ទះរបស់ខ្លួន មានដូចជា ទៀន និងរោងព្រះយេស៊ូផងដែរ។
លោកក៏ស្នើឲ្យព្រះវិហារនីមួយៗរៀបចំកម្មវិធីបុណ្យព្រះយេស៊ូប្រសូតឲ្យបានល្អប្រសើរ ជាពិសេសការសម្តែងរឿង ដើម្បីប្រកាសដំណឹងល្អតាមរយៈសិល្បៈ ទោះបីមានគ្នាច្រើនឬតិចក្តី គឺដើម្បីឲ្យប្រជាជនក្នុងភូមិមានអំណរសប្បាយរួមជាមួយគ្រីស្តបរិស័ទ។
«អ្វីដែលយើងសាបព្រោះ អាចមានផ្លែយ៉ាងច្រើនដែលណែនាំឲ្យព្រះរាជ្យរបស់ព្រះជាម្ចាស់ពិតមែនជិតមកដល់ហើយ។» លោកអភិបាលបន្ថែម។
ក្នុងឱកាសនោះ មានគ្រីស្តបរិស័ទចំនួន១៨នាក់ទទួលអគ្គសញ្ញាលាបថ្ងាស និងមាន២នាក់ទទួលព្រះកាយព្រះគ្រីស្តលើកដំបូង។
លោកហុក ចិត្រា អាយុ១៩ឆ្នាំ សព្វថ្ងៃកំពុងរៀននៅមហាវិទ្យាល័យនាទីក្រុងភ្នំពេញ បានទទួលពិធីជ្រមុជទឹកក្នុងឆ្នាំ២០១៣ តាមឪពុកម្តាយរបស់គាត់ ដែលបានផ្លាស់ប្តូរជំនឿជាគ្រីស្តបរិស័ទ។
ចិត្រា ទើបទទួលអគ្គសញ្ញាលាបថ្ងាសក្នុងថ្ងៃនេះ បានឲ្យដឹងថាការរស់នៅជាគ្រីស្តបរិស័ទ នៅពេលមានទុក្ខលំបាកណាមួយគាត់តែងនឹកដល់ព្រះយេស៊ូជានិច្ច ដើម្បីទទួលបានសេចក្តីសង្ឃឹមនិងទំនុកចិត្ត។
ក្នុងនាមជាគ្រីស្តបរិស័ទ ចិត្រាបានជួយសកម្មភាពមួយចំនួនក្នុងព្រះសហគមន៍របស់គាត់។ «ខ្ញុំចូលក្នុងព្រះសហគមន៍តាំងពីតូចដូចជា ចូលក្នុងក្រុមកាយឫទ្ធិជាយុវជន ជាជំទង់ និងជាគ្រូកាយឫទ្ធិ និងជាអ្នកបម្រើអាសនៈ៕»
ដោយ កែវ កញ្ញា
