ដើម្បីឱ្យគ្រូអប់រំជំនឿយល់ដឹងអំពីដើមកំណើតនឹងយល់ពីអត្ថន័យនៃពាក្យមួយម៉ាត់ៗរបស់ធម៍ប្រកាសជំនឿ ការិយាល័យអប់រំជំនឿបានរៀបចំសិក្ខាសាលាមួយដល់គ្រូអប់រំជំនឿនៃមណ្ឌលសកម្មភាពបាសាក់ និងមេគង្គ ក្រោមប្រធានបទ«កំណើតធម៍ប្រកាសជំនឿ»។
សិក្ខាសាលានេះ ធ្វើឡើងនៅព្រះវិហារសន្តហ្វ្រង់ស្វ័រ សាវីយ៉េ(វត្តចំប៉ា) កាលពីថ្ងៃទី១៤ ខែកក្កដា ឆ្នាំ២០២៣កន្លងទៅនេះ ដោយមានសិក្ខាកាមចូលរួមប្រមាណជា៤០នាក់។
លោកបូជាចារ្យ សុខ ណា ជាបូជាចារ្យទទួលខុសត្រូវមណ្ឌលសកម្មភាពបាសាក់ បានប្រា់ឱ្យដឹងថា ធម៌ប្រកាសជំនឿគឺជាធម៌គ្រឹះដែលគ្រីស្តបរិស័ទត្រូវតែជឿ ព្រោះជាសេចក្ដីពិតដែលព្រះសហគមន៍ណែនាំតាំងពី២០០០ឆ្នាំ ដោយឱ្យគ្រីស្តបរិស័ទយកចិត្តទុកដាក់ប្រកាសជំនឿ។
លោកមានប្រសាសន៍ថា ៖ «ធម៌ប្រកាសជំនឿជាមធ្យោបាយ និងជាយានជំនិះដើម្បីឱ្យគ្រីស្តបរិស័ទផ្ញើជីវិតទាំងស្រុងទៅលើព្រះជាម្ចាស់នៅពេលដែលពួកគេប្រកាស គឺពួកគេប្រើជីវិត ប្រើសម្លេងប្រើស្មារតី ទាំងព្រលឹងវិញ្ញាណដែលជឿលើព្រះជាម្ចាស់ណែនាំឱ្យពួកគេ មានជំនឿដោយខ្លួនឯង»។
លោកបូជាចារ្យបានបន្តថា ៖ «ត្រូវប្រកាសជំនឿដោយខ្លួនឯង ដើម្បីទៅដល់ព្រះជាម្ចាស់ ដើម្បីទៅដល់ប្រភពនៃជីវិតដែលរំពឹងទុកនៅថ្ងៃចុងក្រោយនៃជីវិតគឺទទួលការសង្គ្រោះ»។
ធម៌ប្រកាសជំនឿជាអត្ថប្រយោជន៍របស់ព្រះសហគមន៍ ដែលត្រូវដឹងថាការរួមជាមួយព្រះសហគមន៍ដោយសារធម៌ ជឿណែនាំឱ្យគ្រប់គ្នាមានព្រះសហគមន៍ ជាសហភាពដែលជាធ្លុងតែមួយហើយដោយសារតែធម៌ណែនាំឱ្យគ្រីស្តបរិស័ទគ្រប់ទិសទីរួបរួមគ្នាជាសហភាពតែមួយ ជាធ្លុងតែមួយ និងដាក់ចិត្តផ្ញើជីវិតទាំងស្រុងលើព្រះជាម្ចាស់តែមួយដែលមានជំនឿតែមួយ និងចុងក្រោយទៅដល់ព្រះសហគមន៍នៅស្ថានបរមសុខ។ នេះបើតាមការបញ្ជាក់ពីលោក បូជាចារ្យ សុខ ណា។
អ្នកគ្រូ គឹម សុភា អាយុ៤០ឆ្នាំ ជាគ្រូអប់រំជំនឿមកពីព្រះវិហារគង្វាលដ៏សប្បុរស(រោងចក្រ)នៃមណ្ឌលសកម្មភាពមេគង្គ បានប្រាប់ឱ្យដឹងដែរថា ក្នុងការបម្រើព្រះសហគមន៍ជិត២០ឆ្នាំមកនេះ អ្នកគ្រូគិតថាគាត់មានជំនឿរឹងមាំដើម្បីបញ្ជូនបន្តទៅដល់អ្នកឯទៀតៗបាន ប៉ុន្តែឆ្លងកាត់កម្មវិធីសិក្ខាសាលារយៈពេលមួយថ្ងៃនេះធ្វើឱ្យគាត់យល់ថានៅមានចំណុចខ្វះខាត។
អ្នកគ្រូបន្តថា ៖ «ធម៌ប្រកាសជំនឿជាធម៌បង្ហាញពីព្រះសហគមន៍ ពីជីវិតព្រះយេស៊ូយ៉ាងក្បោះក្បាយ ហើយយើងគ្រាន់តែសូត្រឱ្យចាំមាត់តែប៉ុណ្ណឹងដោយយើងមិនសូវចាប់អារម្មណ៍ប៉ុន្តែក្នុងសិក្ខាសាលានេះបានពន្យល់ណែនាំឱ្យជំនឿរបស់យើងរឹងមាំជាងមុន ហើយគោលសំខាន់របស់ធម៌ប្រកាសជំនឿដែលកម្មវិធីបានពន្យល់ នឹងធ្វើឱ្យយើងយល់កាន់តែច្បាស់ជាងមុនដើម្បីបញ្ជូនបន្តទៅកាន់ប្អូនៗជំនាន់ក្រោយឱ្យស្គាល់ជីវិតរបស់ព្រះយេស៊ូ និងអត្ថន័យនៃឃ្លានីមួយៗដែលមាននៅក្នុងធម៌ប្រកាសជំនឿ»។
ដោយនេះជាលើកទីមួយដែលបានចូលរួមសិក្ខាសាលាគ្រូអប់រំជំនឿ លោក អ៊ី សៀវធាន ជាគ្រូអប់រំជំនឿមកពីព្រះវិហារសន្តយ៉ូសែបជ្រៃធំ បានរៀបរាប់ថា លោកពិតជាមានអំណរសប្បាយយ៉ាងខ្លាំង។
លោកថា ការចូលរួមសិក្ខាសាលានេះធ្វើឱ្យលោកទទួលបានបទពិសោធន៍ថ្មីៗ ចំណេះដឹងបន្ថែមទាក់ទងជាមួយធម៌ប្រកាសជំនឿ យល់អត្ថន័យនៃឃ្លានីមួយៗរបស់ធម៌ជឿ ធ្វើឱ្យលោកកាន់តែមានភាពក្លាហាន និងមានជំនឿរឹងមាំជាងមុនដើម្បីបញ្ជូនបន្តជំនឿទៅកាន់ប្អូនៗនៅព្រះសហគមន៍របស់ខ្លួន។
ជាមួយគ្នានេះដែរ លោក ដួង សាវង់ ប្រធានការិយាល័យអប់រំជំនឿ បានប្រសាសន៍ថា ៖ «តាមពិតធម៌ប្រកាសជំនឿ បើយើងសរសេរនៅក្នុងសៀវភៅមិនបានមួយទំព័រទេ ប៉ុន្តែធម៌ប្រកាសជំនឿជាប្រភពនៃជំនឿដែលបុព្វបុរសរបស់យើងបានសង្ខេបមកក្លាយជាធម៌ប្រកាសជំនឿ»។
លោកបានបន្តថា ៖ «ដូច្នេះពាក្យមួយម៉ាត់ៗនៃធម៌ប្រកាសជំនឿមានអត្ថន័យវែងឆ្ងាយ ហើយនៅក្នុងសិក្ខាសាលារបស់យើងនេះព្យាយាមយកមកចែកជូនដល់លោកគ្រូអ្នកគ្រូអប់រំជំនឿឱ្យកាន់តែយល់បន្ថែមទៀតដោយយើងពឹងផ្អែកលើគោលលិទ្ធិនៃជំនឿរបស់ព្រះសហគមន៍»។
លោក ដួង សាវង់ ក៏បានបញ្ជាក់ដែរថា សិក្ខាសាលាគ្រូអប់រំជំនឿភាគទី២ ដែលនិយាយអំពី «ខ្ញុំជឿលើព្រះយេស៊ូគ្រីស្តជាព្រះបុត្រាតែមួយនៃព្រះបិតាហើយព្រះអម្ចាស់យើងខ្ញុំ» នឹងប្រព្រឹត្តទៅនៅចុងឆ្នាំ២០២៣នេះផងដែរ៕
