មនុស្សពេញវ័យចំនួន១២៧ នាក់បានទទួលពិធីត្រាស់ហៅឲ្យទទួលពិធីជម្រុជទឹកពីលោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍ភូមិភាគភ្នំពេញ កាលពីថ្ងៃទី៨ ខែមីនាកន្លងទៅ នៅព្រះវិហារសន្តសិលា និងសន្តប៉ូល ភ្នំពេញថ្មី នារាជធានីភ្នំពេញ។
ពិធីត្រាស់ហៅនេះ ធ្វើឡើងជារៀងរាល់ឆ្នាំ ដើម្បីអនុញ្ញាតឲ្យបេក្ខជនដែលបានសិក្សាអំពីជំនឿអាចទទួលអគ្គសញ្ញាជ្រមុជទឹកក្នុងឱកាសបុណ្យចម្លងខាងមុខនេះ។ មុនចាប់ផ្តើមពិធីនេះ លោកអភិបាលអូលីវីយ៉េ បានអប់រំណែនាំដល់បេក្ខជនទាំងអស់ ដោយផ្តោតសំខាន់លើ «ការរួមស្លាប់និងរួមរស់ជាមួយព្រះយេស៊ូ»។
លោកបញ្ជាក់ថា ពេលយើងចូលទៅក្នុងទឹក ឬចាក់ទឹកលើក្បាល នោះបង្ហាញថា «យើងជាមនុស្សថ្មី» ហើយពេលនោះដែរ លោកបូជាចារ្យលាបប្រេងឲ្យយើង «ដើម្បីទទួលកម្លាំងផ្ទាល់ពីព្រះយេស៊ូ»។ យើងទទួលអាវស «គឺបំពាក់ព្រះយេស៊ូផ្ទាល់» ព្រះអង្គនឹងមិនបោះបង់យើងចោលទេ ទោះបីយើងភ្លេចព្រះអង្គក៏ដោយ។
លោកអភិបាលរំលឹកបេក្ខជនថា បន្ទាប់ពីពិធីជម្រុជទឹក ម្នាក់ៗក្លាយជាសមាជិកនៃគ្រួសាររបស់ព្រះសហគមន៍ដែលមានព្រះគ្រីស្តជាសិរសា។ ហើយនៅក្នុងគ្រួសារនេះ ការងាររបស់យើងជាគ្រីស្តបរិស័ទ «គឺអធិដ្ឋាន បម្រើ និងស្រឡាញ់»។
ឲ្យយើងចេះអធិដ្ឋានគ្រប់កាលៈទេសៈសម្រាប់គ្នាទៅវិញទៅមក ហើយឲ្យយើងទៅជាអ្នកបម្រើដូចព្រះយេស៊ូដែលបានដាក់ខ្លួនបម្រើសាវ័កដោយលាងជើងរបស់ពួកគេ គឺឲ្យយើងបម្រើដោយឥតគិតថ្លៃ ដោយមិនត្រូវការតបស្នងសងគុណ។ លោកអភិបាលបន្ថែមថា ឲ្យយើងចេះស្រឡាញ់ដូចព្រះយេស៊ូដែលស្រឡាញ់យើង។
ចាប់ពីពេលនេះតទៅ សូមឲ្យយើងរើសយកព្រះជាម្ចាស់ មិនមែនមារសាតាំង ដែលណែនាំឲ្យយើងមានសុភមង្គល យើងមិនវង្វេងផ្លូវ ទោះបីលំបាកក្តី និងមានអំណរសប្បាយក្តី។ លោកអភិបាលបញ្ជាក់។
យ៉ឹម សំណាង អាយុ២០ឆ្នាំ មកពីព្រះសហគមន៍បឹងទំពុន ដែលជាបេក្ខជនត្រៀមខ្លួនទទួលពិធីជ្រមុជទឹក បានស្គាល់ព្រះសហគមន៍តាមរយៈមណ្ឌលស្នាក់សម្រាប់យុវតីរបស់ដូនជីឧបការគុណ និយាយថា នាង «ចង់ក្លាយជាបុត្រធីតារបស់ព្រះជាម្ចាស់ឲ្យកាន់តែជិតស្និទ្ធជាងនេះ»។
ក្រោយពេលបានឈ្វេងយល់អំពីជំនឿ សំណាងសង្កេតឃើញថា ជីវិតរបស់គ្រីស្តបរិស័ទ គឺរស់រវើកនិងស្វាហាប់ «ឃើញហើយ ខ្ញុំចង់ក្លាយជាគ្រីស្តបរិស័ទដូចពួកគាត់ដែរ»។
ក្នុងពេលនេះតទៅ សំណាងបានពោលថា «ខ្ញុំត្រូវពង្រឹងការអធិដ្ឋានរបស់ខ្លួនឯង ខ្ញុំនឹងជួយដល់អ្នកដែលមិនទាន់ស្គាល់ព្រះវិហារ និងជួយបង្ហាញផ្លូវដើម្បីឲ្យគេស្គាល់ព្រះយេស៊ូ»។
ព្រុំ ម៉ី អាយុ២៤ឆ្នាំ មកពីចំការទៀងក្នុងខេត្តតាកែវ ឲ្យដឹងដែរថា នាងចង់រួមស្លាប់រួមរស់ជាមួយព្រះយេស៊ូ និងសង្ឃឹមថា ថ្ងៃមួយនាងអាចរស់នៅជាមួយព្រះយេស៊ូនៅស្ថានបរមសុខ។ ម៉ីជាសិស្សរៀននៅសាលាសន្តហ្វ្រង់ស្វ័រ របស់ព្រះសហគមន៍កាតូលិកនៅក្នុងខេត្តតាកែវ ដោយឆ្ងល់អំពីរបៀបប្រណិប័តន៍របស់គ្រីស្តបរិស័ទក្នុងវិហារដែលនៅក្បែរសាលារៀន នាងសាកល្បងចូលរួមជាមួយ ក្រោយមកនាងបានចូលរៀនអប់រំជំនឿ។
ម៉ីបាននិយាយថា «ចង់ដើរតាមព្រះបន្ទូលដែលព្រះជាម្ចាស់ផ្តល់ឲ្យ។ ព្រះបន្ទូលជួយឲ្យយើងមានចិត្តជ្រះថ្លា ចេះស្រឡាញ់បងប្អូនឯទៀតដូចព្រះអង្គដែលស្រឡាញ់យើង ចេះចែករំលែកសេចក្តីស្រឡាញ់ និងផ្តល់សេចក្តីសង្ឃឹមដល់អ្នកដទៃ»។
លោកបូជាចារ្យ ឆាលស៍ លិឈិប៉ាន បូជាចារ្យទទួលខុសត្រូវមណ្ឌលសកម្មភាពតាកែវ ដែលមានបេក្ខជនប្រមាណ៧៨នាក់នឹងទទួលពិធីជ្រមុជទឹកឆាប់ៗនេះ។ ដើម្បីអប់រំនិងឲ្យពួកគេអាចរស់នៅជាគ្រីស្តបរិស័ទល្អក្នុងសង្គម លោកបានឲ្យដឹងថា ព្រះសហគមន៍នឹងបន្តអប់រំពួកគេតាមរយៈការអប់រំជំនឿ យើងជាលោកបូជាចារ្យនឹងនៅជាមួយគេ និងឲ្យពួកគេចូលរួមក្នុងសិក្ខាសាលាផ្សេងរបស់ព្រះសហគមន៍ ហើយនឹងជួយជំរុញឲ្យគេចូលរួមក្នុងអភិបូជា។
លោកបន្ថែមថា យើងនឹងបន្តអធិដ្ឋាន ពីព្រោះព្រះជាម្ចាស់ត្រាស់ហៅគេ ហើយយើងផ្តល់ឲ្យគេតាមអ្វីដែលយើងមាន និងទុកឲ្យព្រះជាម្ចាស់ថែរក្សាគេដែរ។
ក្នុងរដូវអប់រំពិសេស ដែលមានរយៈពេល៤០ថ្ងៃនេះ លោកអភិបាលបានជំរុញឲ្យលោកបូជាចារ្យនៅតាមមណ្ឌលសកម្មភាពនីមួយៗយកចិត្តទុកដាក់ធ្វើពិធីជម្រះចិត្តនានាដល់បេក្ខជនមុនពេលទទួលអគ្គសញ្ញាជ្រមុជទឹក និងអប់រំជំនឿបន្ថែមដើម្បីឲ្យគេអាចរស់នៅជាគ្រីស្តបរិស័ទគំរូ ដោយយកព្រះជាម្ចាស់ទីពឹង ព្រះបន្ទូលជាទីពឹង និងព្រះសហគមន៍ជាទីពឹង។
តាមកាលវិភាគរបស់ព្រះសហគមន៍ ពិធីបុណ្យចម្លងខាងមុខនេះ នឹងប្រព្រឹត្តទៅនៅថ្ងៃទី១៩ ខែមេសា៕
ដោយកែវ កញ្ញា
