ក្នុងថ្ងៃចុងក្រោយដែលព្រះសហគមន៍សកលអធិដ្ឋានរំលឹកវិញ្ញាណក្ខន្ធរបស់សម្តេចប៉ាបហ្វ្រង់ស៊ីស្កូ លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកកម្ពុជាភូមិភាគភ្នំពេញបាន ទទួលស្វាគមន៍យ៉ាងកក់ក្តៅ និងស្និទ្ធស្នាល ចំពោះព្រះដំណើរសម្ដេចព្រះមហាអរិយវង្សបណ្ឌិត យ៉ន សេងយៀត ព្រះរាជតំណាងដ៏ខ្ពង់ខ្ពស់របស់សម្តេចព្រះអគ្គមហាសង្ឃរាជធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះមហាសង្ឃរាជនៃព្រះរាជាណាចក្រកម្ពុជា និងព្រះមន្ត្រីសង្ឃចំនួន៤២អង្គ បាននិមន្តបង្សុកូលថ្វាយព្រះវិញ្ញាណក្ខន្ធ សម្តេចប៉ាប ហ្វ្រង់ស៊ីស្កូ និងនាំយកព្រះរាជសារ រំលែកទុក្ខរបស់សម្តេចព្រះអគ្គមហាសង្ឃរាជ នន្ទ ង៉ែត ជូនលោក​អភិបាល អូលីវីយ៉េ នារសៀល ថ្ងៃទី ៤ ខែឧសភា ឆ្នាំ២០២៥ នៅមណ្ឌលសកម្មព្រះសហគមន៍ភូមិភាគភ្នំពេញ។

            សម្ដេចព្រះមហាអរិយវង្សបណ្ឌិត យ៉ន សេងយៀត ជាព្រះចៅអធិការវត្តឧណ្ណាលោម និងជាព្រះសកលវិទ្យាធិការ នៃពុទ្ធិកសាកលវិទ្យាល័យព្រះសីហនុរាជ មានសង្ឃដីកាអំពីទំនាក់ទំនងដ៏ល្អរវាងព្រះពុទ្ធសាសនានិងគ្រីស្តសាសនានិកាយកាតូលិក តាមរយៈសម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស អតីតសម្តេចព្រះសង្ឃរាជនៃព្រះរាជាណាចក្រកម្ពុជា គណៈមហានិកាយ និងសម្តេចប៉ាប យ៉ូហាន ប៉ូលទី២ សម្តេចប៉ាប បេណេឌីកទី១៦ និងសម្តេចប៉ាបហ្វ្រង់ស៊ីស្កូ នៅបុរីវ៉ាទីកង់ ហើយទ្រង់ទាំងអស់តែងតែបង្ហាញពីភាពស្និទ្ធស្នាលនិងភាព​ជាកល្យាមិត្ត។

សម្តេចយ៉ន សេងយៀត មានដីកាបន្តថា ក្នុងព្រះបរមនាម សម្តេចព្រះអគ្គមហាសង្ឃរាជ នៃព្រះរាជាណាចក្រកម្ពុជា ក្នុងនាមពុទ្ធបរិស័ទនិងក្នុងនាមសកលវិទ្យាល័យព្រះសីហនុរាជ «សូមចូលរួមរំលែកទុក្ខជាមួយព្រះសហគមន៍កាតូលិកទាំងអស់ដែលបានបាត់បង់សម្តេចប៉ាបជាទីគោរពស្រឡាញ់។»

ក្នុងនោះដែរព្រះអង្គ សូមអរគុណលោកអភិបាលអូលីវីយ៉េ ដែលបានរៀបចំអនុញ្ញាតឱ្យព្រះសង្ឃមានឱកាសមកបង្សុកូលថ្វាយព្រះរាជកុសលចំពោះសម្តេចប៉ាបដែលលោកបានលាចាកលោកនេះទៅ «សូមសម្តេចបានយាងទៅសោយសុខនៅឋានសួគ៌ជាមួយព្រះជាម្ចាស់»។

សម្ដេចព្រះមហាអរិយវង្សសង្ឃឹមថា ទាំងព្រះពុទ្ធសាសនា ទាំងគ្រីស្ត​សាសនាកាតូលិកនឹង«ធ្វើដំណើររួមគ្នាក្នុងបុព្វហេតុមនុស្សជាតិ សេចក្តីល្អ សេចក្តីសុខរបស់មនុស្សជាតិ និងពិភពលោក»។

ក្នុងឱកាសនោះដែរ លោកអភិបាលអូលីវីយ៉េ មានប្រសាសន៍ផងដែរអំពីចេតនានិងទស្សនវិស័យរបស់សម្តេចប៉ាបហ្វ្រង់ស៊ីស្កូដែលយកចិត្តទុកដាក់ ជំរុញប្រជាជននិងមេដឹកនាំសាសនាទាំងអស់ឲ្យមានទំនាក់ទំនងល្អរវាងសាសនានិងសាសនា «ទាំងគ្រីស្តបរិស័ទ ពុទ្ធបរិស័ទ ឥស្លាមបរិស័ទ ឱ្យមានឱកាសធ្វើដំណើររួមជាមួយគ្នា»។

លោក​បាន​រំលឹកថា ក្នុងពេល​ដែល​លោកតែងតាំ​ង​ជា​អភិបាល​ព្រះសហគមន៍​នៅ​កម្ពុជា អតីត​សម្តេច​ព្រះសង្ឃរាជ ទេព​ វង្ស​ បាន​និមន្ត​ចូលរួម​ផងដែរ។ នេះ​បញ្ជាក់​អំពី​ទំនាក់ទំនង​ល្អ​រវាង​សាសនា​ទាំងពីរ។​

ព្រះសហគមន៍កាតូលិក​ភូមិភាគ​ភ្នំពេញ​បាន​ប្រារព្ធ​ពិធី​រំលឹក​ព្រះវិញ្ញាណ​ក្ខន្ធរបស់​​​សម្តេចប៉ាប​ហ្វ្រង់ស៊ីស្កូ​តាំង​ពីថ្ងៃទី​២៤ ខែ​មេសា​មក​ ក្នុងនោះ​​មានការ​ចូលរួម​ពី រដ្ឋមន្ត្រីក្រសួងធម្មការនិងសាសនា រួមទាំងមន្ត្រីជាន់ខ្ពស់ពីស្ថាប័នធំៗ មួយចំនួនទៀតនៃរាជរដ្ឋាភិបាលកម្ពុជា អង្គទូតនានា មន្ត្រីសង្ឃជាន់ខ្ពស់ពី​គណៈធម្មយុត្តិ​កនិកាយ​ គណៈដឹកនាំសាសនាឥស្លាមនៅកម្ពុជា មេដឹកនាំក្រុមជំនុំគ្រីស្តបរិស័ទធំៗមួយចំនួន ក្រុមបព្វជិត-ជិតា អង្គការកាតូលិក ការិយាល័យភូមិភាគភ្នំពេញ និងគ្រីស្តបរិស័ទតាមព្រះសហគមន៍នានា។​

លោកអភិបាលអូលីវីយ៉េ​បានបន្ថែមថា ក្នុងពេលបន្តិចទៀត ព្រះសហគមន៍នឹងមានសម្តេចប៉ាបថ្មី ដែលនឹងត្រូវជ្រើសរើសដោយក្រុមលោកកាឌីណាល់ នៅទីក្រុងរ៉ូមក្នុងចំណោមកាឌីណាល់ចំនួន១៣៣រូប ដែលមានអាយុក្រោម៨០ឆ្នាំ។

សម្តេចប៉ាបហ្វ្រង់ស៊ីស្កូ ជាសម្តេចប៉ាបលើកទី២៦៦ បន្តវេនពីសន្តសិលា បានសោយទិវង្គតកាលពីថ្ងៃទី២១ ខែឧសភាកន្លងទៅនាទីក្រុងរ៉ូមដោយរោគាពាធ ក្នុងព្រះជន្ម៨៨ព្រះវស្សា៕

ដោយកែវ កញ្ញា