នារសៀលថ្ងៃទី៣ ខែកញ្ញា ឆ្នាំ២០២៦ លោកអភិបាល អូលីវីយ៉េ បានអញ្ជើញសួរសុខទុក្ខបងប្អូនគ្រីស្តបរិស័ទ នៅព្រះសហគមន៍កាតូលិកបាទី ស្ថិតក្នុងស្រុកបាទី ខេត្តតាកែវ ប្រកបដោយបរិយាកាសកក់ក្តៅ និងស្និទ្ធស្នាលជាទីបំផុត។
ព្រះសហគមន៍កាតូលិកបាទី គឺជាព្រះសហគមន៍ទើបបង្កើតថ្មីមួយ ប៉ុន្តែពោរពេញដោយភាពសកម្មរស់រវើកក្នុងជីវិតជំនឿ ដូចជាការប្រារព្ធពិធីអភិបូជានាថ្ងៃអាទិត្យ ការអប់រំជំនឿដល់បងប្អូនអ្នកស្វែងយល់ ទទួលជំហានទី១ សកម្មភាពមេត្តាធម៌ប្រចាំខែជួយដល់អ្នកខ្វះខាត និងដំណើរការថ្នាក់សាលាមត្តេយ្យមួយកន្លែង ដែលបច្ចុប្បន្នមានកុមារតូចៗកំពុងសិក្សាចំនួន ៣០ នាក់។
ក្នុងឱកាសជួបសំណេះសំណាលនោះ លោកអភិបាល អូលីវីយ៉េ បានលើកទឹកចិត្ត និងរំឭកដល់បងប្អូនគ្រីស្តបរិស័ទ ព្រមទាំងបងប្អូនដែលកំពុងស្វែងយល់អំពីជំនឿកាតូលិក ឱ្យយល់ច្បាស់អំពីខ្លឹមសារនៃជំនឿដែលខ្លួនកំពុងប្រតិបត្តិ គឺការជឿជាក់ និងពឹងផ្អែកទាំងស្រុងលើព្រះយេស៊ូគ្រីស្ត ដែលទ្រង់មានព្រះជន្មរស់ឡើងវិញ។
ទន្ទឹមនឹងនេះ លោកអភិបាលបានផ្តាំផ្ញើឱ្យបងប្អូនទាំងអស់គ្នា បង្ហាញសេចក្តីស្រឡាញ់ចំពោះអ្នកដទៃឱ្យដូចព្រះយេស៊ូ ដោយលោកបានសង្កត់ធ្ងន់ថា៖ ទោះបីជាយើងក្រីក្រ ប៉ុន្តែនៅតែមានបងប្អូនជាច្រើនទៀតដែលក្រីក្រ និងខ្វះខាតជាងយើង ដែលកំពុងត្រូវការជំនួយពីយើង។
គួរបញ្ជាក់ផងដែរថា ព្រះសហគមន៍បាទី គឺជាព្រះសហគមន៍មួយក្នុងចំណោមព្រះសហគមន៍ទាំង ៨ នៃមណ្ឌលសកម្មភាពតាកែវ ដែលស្ថិតក្រោមការមើលថែ និងគង្វាលដោយ លោកបូជាចារ្យ ឆាល និងលោកបូជាចារ្យ ចន ប៉េង ជាជំនួយការ។ ព្រះសហគមន៍ទាំង ៨ នោះរួមមាន៖ ព្រះសហគមន៍ចំការទៀង, គិរីវង់, ព្រៃកប្បាស, សន្តប៉ូល, បាទី, តាកែវ, កំពង់អំពិល និងត្រពាំងក្រញូង
