គោរពវិន័យដើម្បីផលប្រយោជន៍រួម
បងប្អូនជាទីស្រឡាញ់
ខ្ញុំសូមជម្រាបសួរនិងសូមស្វាគមន៍បងប្អូនទាំងអស់ ដែលបានស្ដាប់នៅពេលនេះ ឬក៏ស្ដាប់នៅពេលក្រោយ នៅក្នុងភូមិភាគភ្នំពេញទាំងមូល។ គម្ពីរដែលយើងបានស្ដាប់ថ្ងៃនេះ ជាពិសេសអត្ថបទទីពីរនិងគម្ពីរដំណឹងល្អ ត្រូវតែបំភ្លឺយើងនៅក្នុងរបៀបពិសេស នៅក្នុងបរិយាកាសដែលយើងកំពុងរស់នៅសព្វថ្ងៃនៅក្នុងទីក្រុងភ្នំពេញ ក៏ដូចជានៅទីក្រុងតាខ្មៅ និងក៏ដូចជានៅក្នុងភូមិភាគភ្នំពេញយើងទាំងមូល។
យើងបានឃើញ ពីមួយថ្ងៃទៅមួយថ្ងៃផ្លូវត្រូវតែបិទខ្លាំងទៅៗ ពីមួយថ្ងៃទៅមួយថ្ងៃវិន័យនិងវិធានការត្រូវតែតឹងទៅៗ ដើម្បីឱ្យជំងឺកូវីដ-១៩នេះលែងលូតលាស់ និងលែងឆ្លងរាលដាលពីកន្លែងមួយទៅកន្លែងមួយទៀតបាន។ ប៉ុន្តែ យើងគួរឱ្យចាប់អារម្មណ៍ដែរព្រោះពីប៉ុន្មានខែកន្លងមកតាំងពីព្រឹត្តិការណ៍ទី២០ ខែកុម្ភៈ បានកើតឡើង នៅពេលនោះទាំងរដ្ឋាភិបាលជាពិសេសក្រសួងសុខាភិបាល បានបង្រៀន បានអប់រំ បានណែនាំ ជាពិសេស “បីកុំបីការពារ”។ យើងបានស្ដាប់ ក៏ប៉ុន្តែតើយើងបានអនុវត្តឬទេ? តើយើងបានយកចិត្តទុកដាក់ឬទេ? ពេលយើងឃើញនៅពេលហ្នឹង អ្វីដែលកំពុងផ្ទុះនៅក្នុងទីក្រុងភ្នំពេញជាពិសេស ពីមួយថ្ងៃទៅមួយថ្ងៃខ្លាំងទៅៗ។ សព្វថ្ងៃមាន៥២រោងចក្រ ដែលបានជាប់ជាមួយនឹងមេរោគកូវីដ-១៩ សព្វថ្ងៃមានផ្សារធំៗនៅទីក្រុងភ្នំពេញដែលកំពុងបិទពីមួយថ្ងៃទៅមួយថ្ងៃ ដំបូងគឺយើងបានឃើញគេបិទផ្សារអូរឬស្សី ក្រោយមកមានផ្សារចាស់ និងយប់មិញផ្សារដើមគរ។ ដោយដឹងថា ផ្សារដើមគរជាផ្សារនៃប្រភពបន្លែដើម្បីចែកចាយទូទាំងរាជធានីភ្នំពេញទាំងមូល។
ដូច្នេះ ពេលយើងឃើញនេះយើងត្រូវការសួរខ្លួនឯងរៀងៗខ្លួន តើយើងចេះតែនិយាយលាងដៃ ពាក់ម៉ាស់ អង្គុយឆ្ងាយពីគ្នា ឬយើងបានអនុវត្តវាយ៉ាងជាក់ស្ដែងក្នុងរយៈពេលពីរខែកន្លងមកនេះ?
រហូតដល់សព្វថ្ងៃ រដ្ឋាភិបាលត្រូវការប្រើអំណាចយ៉ាងខ្លាំង ដើម្បីឱ្យប្រជាជនយល់ ដើម្បីឱ្យប្រជាជនយកចិត្តទុកដាក់។ រហូតដល់សព្វថ្ងៃ មានមនុស្សមួយចំនួនបានគេចខ្លួនពីភ្នំពេញដើម្បីចូលខេត្ត ដោយឥតបាននិយាយធ្វើដោយស្ងាត់ៗ មានមនុស្សខ្លះបានធ្វើដំណើរចេញពីខេត្តមួយទៅខេត្តមួយ ដោយធ្វើតាមផ្លូវងងឹត ដោយមិនស្ដាប់ការណែនាំ។ ដូច្នេះ ផ្លែដែលយើងបានឃើញសព្វថ្ងៃគឺហ្នឹងពិបាកទៅៗ។ កុំឱ្យយើងសង្ឃឹមការពិបាកនេះ អាចសម្រុះសម្រួលមួយភ្លែតៗបាន មិនមែនស៊ីសងលើក្រសួងសុខាភិបាល មិនមែនស៊ីសងលើរដ្ឋអំណាច ប៉ុន្តែស៊ីសងលើយើងជាបុគ្គលម្នាក់ៗ ម្នាក់ៗត្រូវតែយកចិត្តទុកដាក់។
ដូចយើងបានស្ដាប់អត្ថបទទីពីរ តាមរយៈសន្តយ៉ូហានព្រះយេស៊ូបានរំលឹកអំពីធម្មវិន័យ ធម្មវិន័យរបស់ព្រះអង្គគឺឱ្យយើងធ្វើដូចម្ដេច ដើម្បីរស់់នៅក្នុងធម្មវិន័យនេះ មានន័យថា “ស្រឡាញ់គ្នាទៅវិញទៅមកដូចព្រះយេស៊ូបានស្រឡាញ់យើង ប្រសិនបើមានអ្នកណាពោលថា ខ្ញុំស្គាល់ព្រះអង្គហើយ តែមិនកាន់តាមធម្មវិន័យរបស់ព្រះអង្គ អ្នកនោះនិយាយកុហក ហើយសេចក្តីពិតមិនស្ថិតនៅក្នុងខ្លួនគេទេ”។ ព្រះយេស៊ូមិនប្រើអំណាច ដើម្បីឱ្យយើងដើរតាមធម្មវិន័យរបស់ព្រះអង្គ ប៉ុន្តែម្យ៉ាងព្រះយេស៊ូដូចជាមានរបៀបមួយដែរ ដើម្បីឱ្យយើងភ្ញាក់ស្មារតី “ប្រសិនបើយើងមិនដើរតាមធម្មវិន័យរបស់ព្រះយេស៊ូ យើងត្រូវតែស្ថិតស្ថេរនៅក្នុងទុក្ខលំបាកនិងវេទនា ផ្ទុយទៅវិញប្រសិនបើយើងដើរតាមធម្មវិន័យរបស់ព្រះយេស៊ូ យើងស្ថិតស្ថេរនៅក្នុងសេចក្តីសុខ និងសេចក្តីសង្ឃឹម ដោយដឹងថាព្រះជាម្ចាស់ជាប់នឹងយើង និងសេចក្តីស្រឡាញ់របស់ព្រះជាម្ចាស់ភ្ជាប់នឹងយើង”។
ប្រៀបធៀបនឹងបញ្ហាដែលកើតឡើងសព្វថ្ងៃ តាមពិតវិន័យ ច្បាប់ មិនត្រូវតែអនុវត្តដោយសារគេគំរាម ឬដោយសារគេបង្ខំ ប៉ុន្តែត្រូវទៅជាធម្មជាតិរបស់យើងជាពលរដ្ឋមួយរូប។ ច្បាប់ដែលយើងមាននៅក្នុងប្រទេសនីមួយៗ មិនមែនដើម្បីធ្វើបាបប្រជារាស្រ្ត ច្បាប់នីមួយៗគឺដើម្បីឱ្យប្រជារាស្ត្ររស់នៅក្នុងសេចក្តីសុខ រស់នៅក្នុងសុខដុមរមនា លុះត្រាតែប្រជាជនម្នាក់ៗយកចិត្តទុកដាក់គោរពច្បាប់ហ្នឹង។ នៅក្នុងរដូវកូវីដ-១៩នេះ រដ្ឋាភិបាលបានបង្កើតច្បាប់ថ្មីៗ ប៉ុន្តែច្បាប់ថ្មីៗទាំងនេះមិនមែនដើម្បីពិន័យ ពិន័យប្រសិនបើយើងមិនបានអនុវត្តន៍មែន។ ប៉ុន្តែ ប្រសិនបើយើងរៀងៗខ្លួនមានការទទួលខុសត្រូវយ៉ាងខ្ពស់ នៅក្នុងការអនុវត្តវិន័យនិងច្បាប់ដែលយើងមានសព្វថ្ងៃ យើងដឹងថាប្រហែលយើងអាចទៅមុខបាន។ ប៉ុន្តែ ប្រសិនបើយើងរៀងៗខ្លួនមិនធ្វើ វាយ៉ាប់ទៅៗហើយជះឥទ្ធិពលដល់ប្រទេសយើងទាំងមូល មិនមែនតែសម្រាប់ទីក្រុងភ្នំពេញតែប៉ុណ្ណឹង។
នៅពេលនេះ ខ្ញុំកំពុងផ្សាយចេញពីខេត្តតាកែវ ប៉ុន្តែយើងបានឃើញនៅក្នុងខេត្តតាកែវក៏កំពុងពិបាកដែរ ពីមួយថ្ងៃទៅមួយថ្ងៃយើងបានឃើញកូវីដ-១៩ចាប់ផ្ដើមលូតលាស់។ ដូច្នេះ យើងត្រូវការគិតពិចារណាអំពីរបៀបដែលយើងត្រូវតែធ្វើ រហូតដល់សព្វថ្ងៃដើម្បីឱ្យយើងស្ដាប់ច្បាប់ថ្មីៗដែលទើបតែបង្កើតឡើង ត្រូវតែចាប់អ្នកដែលល្មើស។ ដូចយើងបានឃើញ នៅទីក្រុងភ្នំពេញយើងមានទាហាន ប៉ូលីស ច្រើនណាស់ ដើម្បីចាប់ប្រជាជនដែលមិនបានអនុវត្តនិងគោរពតាមច្បាប់ថ្មីៗនោះ។ យើងកុំគិតថាយើងអាចគេចខ្លួនបាន យើងបានឃើញហើយថាឧត្តមសេនីយ៍ (ផ្កាយបី)ម្នាក់ ដែលបានជិះឡានហើយអួតខ្លួនដោយបានស្ដាប់បទចម្រៀងសប្បាយៗ ហើយនិយាយថាខ្ញុំមានសិទ្ធិ ខ្ញុំជាមេធំ ក្រោយមកកងកម្លាំងក៏បានចាប់គាត់ដែរ។ ដូច្នេះ មិនមានមនុស្សម្នាក់ដែលមានអំណាចនៅលើច្បាប់បានទេ ច្បាប់ណែនាំឱ្យយើងរស់នៅក្នុងសុខដុមរមនា រស់នៅក្នុងសេចក្តីសុខ។ ដូច្នេះ ត្រូវការឱ្យយើងទាំងអស់គ្នាចូលនៅក្នុងផលប្រយោជន៍រួម គឺដោយគោរពច្បាប់ ដូចព្រះយេស៊ូមានព្រះបន្ទូលថ្ងៃនេះ ធម្មវិន័យរបស់ព្រះយេស៊ូគឺបានណែនាំឱ្យយើងមានសេចក្តីសុខ លុះត្រាតែយើងគោរពធម្មវិន័យហ្នឹង។
ព្រះយេស៊ូមិនបានប្រើអំណាច ប៉ុន្តែប្រសិនបើយើងចាប់អារម្មណ៍ ព្រះយេស៊ូបានគំរាមម្យ៉ាងដែរ “អ្នកណាមិនធ្វើតាមធម្មវិន័យ អ្នកនោះត្រូវតែវេទនា អ្នកណាមិនគោរពតាមធម្មវិន័យ អ្នកនោះជាអ្នកដែលនិយាយកុហក និងឥតមានសេចក្តីពិតស្ថិតស្ថេរទេ”។ ដូច្នេះ ប្រសិនបើបងប្អូនទាំងអស់គ្នាចង់មានសេចក្តីសុខ ឱ្យយើងយកចិត្តទុកដាក់រួមជាមួយគ្នា ជាពិសេសយើងដែលជាគ្រីស្តបរិស័ទនៅក្នុងភូមិភាគភ្នំពេញទាំងមូល ដើម្បីធ្វើតាមច្បាប់របស់រដ្ឋ ដើម្បីផលប្រយោជន៍រួម និងឱ្យយើងធ្វើតាមធម្មវិន័យរបស់ព្រះយេស៊ូ ដែលអញ្ជើញយើងឱ្យយើងចេះស្រឡាញ់គ្នាទៅវិញទៅមកដូចព្រះយេស៊ូបានស្រឡាញ់យើង។ ក្នុងពេលវេលាកូវីដ-១៩នេះ ឱ្យយើងស្រឡាញ់គ្នាទៅវិញទៅមកដោយគោរពរដ្ឋាភិបាលផង ដោយគោរពគ្នាទៅវិញទៅមកផង ដោយបង្ហាញសេចក្តីស្រឡាញ់យ៉ាងជាក់ស្ដែងផង។
ដំណឹងល្អថ្ងៃនេះ ព្រះយេស៊ូបានណែនាំឱ្យយើងធ្វើជាសាក្សីអំពី ព្រះយេស៊ូមានព្រះជន្មរស់ឡើងវិញ។ នៅពេល ព្រះយេស៊ូបង្ហាញខ្លួនដល់ក្រុមគ្រីស្តទូត ក្រុមគ្រីស្តទូតចេះតែសង្ស័យ ក្រុមគ្រីស្តទូតចេះតែមិនដឹងថាជាព្រះយេស៊ូឬជាខ្មោចលង។ ដើម្បីឱ្យព្រះយេស៊ូបង្ហាញខ្លួនឱ្យគេយល់ថាជាព្រះអង្គពិតមែន ព្រះយេស៊ូមិនបានចាប់ផ្ដើមដោយអប់រំព្រះយេស៊ូមិនចាប់ផ្តើមដោយទេសនារំលឹកអំពីព្រះគម្ពីរ អំពីព្យាការីទេ។ ប៉ុន្តែ ព្រះអង្គបានមានព្រះបន្ទូលសួរគេថា តើនៅទីនេះអ្នករាល់គ្នាមានអ្វីបរិភោគឬទេ? គេឆ្លើយថាគេមានត្រី ព្រះយេស៊ូបានសោយត្រីហ្នឹង។ បន្ទាប់មក ព្រះយេស៊ូបានចាប់ផ្តើមលើកទឹកចិត្តគេ ចាប់ផ្ដើមបង្ហាញអំពីផ្លូវនៃជីវិត ដើម្បីឱ្យគេនឹកឃើញគម្ពីរដំណឹងល្អ ឱ្យគេនឹកឃើញធម្មពិន័យពីដើម ឱ្យគេយល់ថាតាមពិតអ្វីដែលគង់នៅជាមួយគេ គឺព្រះយេស៊ូផ្ទាល់។
បងប្អូនជាទីស្រឡាញ់
កាលពីម្សិលមិញ ខ្ញុំបានអញ្ជើញឱ្យយើងជាគ្រីស្តបរិស័ទនៅក្នុងភូមិភាគភ្នំពេញទាំងមូល យកចិត្តទុកដាក់ដើម្បីមើលទុក្ខវេទនារបស់បងប្អូនយើង ជាពិសេសដល់បងប្អូននៅរាជធានីភ្នំពេញដែលបានភ្ជាប់នៅក្នុងផ្ទះ គ្មានសិទ្ធិចេញពីផ្ទះ។ ពីមួយថ្ងៃទៅមួយថ្ងៃកំពុងតែយ៉ាប់ទៅៗដោយសារឥឡូវនេះនៅទីក្រុងភ្នំពេញ គេបានចងខ្សែបិទនៅមុខផ្ទះនីមួយៗកុំឱ្យយើងចេញពីផ្ទះបាន។ មិនមែនតែឆ្លងពីម្ខាងទៅម្ខាងមិនបាន គឺយើងចេញពីផ្ទះមិនបានតែម្ដង។ ដូច្នេះ យើងត្រូវការយល់អំពីទុក្ខវេទនាដែលកំពុងកើតឡើង ប្រសិនបើយើងចាប់អារម្មណ៍ជួនកាលគេបង្ហោះទាំងអ្នកធាក់ស៊ីក្លូ ទាំងយាយតាដែលគ្មានម្ហូបអាហារ ទាំងអ្នករត់កង់បី ទាំងអ្នករត់ម៉ូតូឌុប ទាំងកម្មករមួយចំនួនដែលកំពុងតែពិបាកដោយសារតែគ្មានប្រាក់ខែ ដើម្បីទិញម្ហូបអាហារពីមួយថ្ងៃទៅមួយថ្ងៃ។
សព្វថ្ងៃ យើងទៅផ្សារមួយសប្តាហ៍តែម្ដងឬពីរដង ដោយក្នុងមួយគ្រួសារអាចចេញបានតែម្នាក់ដើម្បីទៅទិញម្ហូប។ ម្ហូបអាហារក៏ឡើងថ្លៃហួសហេតុនៅកន្លែងមួយចំនួន ដូច្នេះយើងត្រូវតែគិតពិចារណា យើងគ្មានសមត្ថភាពដើម្បីសង្គ្រោះមនុស្សទាំងអស់។ ប៉ុន្តែ ព្រះជាម្ចាស់មានព្រះបន្ទូលថ្ងៃនេះតាមរយៈលោកយ៉ូហាន “ខ្ញុំមកដើម្បីប្រកាសដំណឹងល្អ ណែនាំឱ្យមនុស្សទាំងអស់បានទទួលការសង្គ្រោះ” មិនមែនតែពីរបីនាក់ប៉ុន្តែមនុស្សទាំងអស់។ ដូច្នេះ យើងត្រូវការគិតយើងជាគ្រីស្តបរិស័ទ គ្រីស្តបរិស័ទម្នាក់ជាសង្គហៈមួយរូប គ្រីស្តបរិស័ទម្នាក់ជាក្រុមមេត្តាករុណាមួយរូប។ ដូច្នេះ យើងនៅកន្លែងណាឱ្យយើងមើល ខ្ញុំបានរៀបចំតំបន់ភ្នំពេញច្បាស់លាស់ យើងមានទំនាក់ទំនងបន្ទាន់ លេខទូរសព្ទនៅខាងភ្នំពេញថ្មីមានលោកឪពុក លី ភ្នំពេញខាងត្បូងមានលោកឪពុក ដាមៀន ភ្នំពេញខាងជើងមានលោកឪពុក ឆ័ត្រសិរី ទន្លេមេគង្គមានលោកឪពុក វីរៈជ័យ តាខ្មៅមានលោកឪពុក ចូវ៉ាន់នី។ មានអ្នកទទួលខុសត្រូវប្រមូលម្ហូបអាហារ គឺលោក វិចិត្រ ដែលអាចផ្ញើម្ហូបអាហារពីកន្លែងមួយទៅកន្លែងមួយដល់បងប្អូនជាបន្ទាន់ យើងមានលោក សារឿន ទទួលខុសត្រូវប្រមូលព័ត៌មាននិងចែកអ្វីដែលយើងមាន យើងមានលោក ចន្នី ខាងគណនេយ្យ។
ថ្ងៃស្អែកនេះ ខ្ញុំនឹងបង្កើតគណនី អេប៊ីអេ (ABA)ថ្មី ប្រសិនបើបងប្អូនចង់ចូលរួមចំណែកជាថវិកាខ្លះៗ បងប្អូនអាចផ្ញើតាមគណនីអេប៊ីអេ (ABA)នេះបាន ដោយសារ ទុក្ខវេទនាដែលកំពុងកើតឡើង។ ឥឡូវនេះយើងកំពុងនិយាយអំពីបីថ្ងៃតែប៉ុណ្ណឹង ប៉ុន្តែនៅសល់ជាង១០ថ្ងៃទៀត។ ម្សិលមិញ ដែលគេបានបិទផ្សារដើមគរ រហូតដល់ថ្ងៃទី១ ខែឧសភា មានន័យថាចេះតែលើកថ្ងៃហើយលើកថ្ងៃទៀត ដូច្នេះយើងត្រូវតែសហការគ្នាមែនទែន។ ម្សិលមិញ យើងចាប់ផ្ដើមចេញសញ្ញាមួយតូចពីព្រះសហគមន៍យើង ដែលថ្ងៃនេះយើងបានជួយ១០០គ្រួសារ ដោយមានអង្ករពីសាលាវិទ្យាល័យបច្ចេកទេសឯកជន សន្តហ្រ្វង់ស្វ័រ មានជ្រូកដែលយកពីកសិដ្ឋានភ្នំវល្លិ៍ មានបន្លែដែលយកពីកសិដ្ឋានភ្នំវល្លិ៍ដែរ។
ខ្ញុំសង្ឃឹមថា វិទ្យាល័យបច្ចេកទេសឯកជន សន្តហ្រ្វង់ស្វ័រ ក៏ដូចជាវិទ្យាស្ថាន សន្តប៉ូល នៅបន្តដាំបន្លែ ដើម្បីផ្គត់ផ្គង់ដល់បងប្អូនយើង។ នៅភ្នំពេញ ពេលគេបានទទួលបន្លែ បានទទួលសាច់ជ្រូក គេសប្បាយចិត្តណាស់។ ដូច្នេះ ឱ្យយើងយកចិត្តទុកដាក់លើគ្នាទៅវិញទៅមក ដើម្បីជួយបងប្អូនយើងដែលកំពុងរងទុក្ខលំបាក។
ម្យ៉ាងទៀត យើងមិនកំពុងតែពិបាកតាមផ្លូវម្ហូបអាហារ ពេលព្រះយេស៊ូបានបរិភោគជាមួយគេហើយ ពេលព្រះយេស៊ូបានចែកម្ហូបអាហារឱ្យគេហើយ ព្រះយេស៊ូបានបន្តអប់រំ បង្ហាញអំពីព្រះគម្ពីរ ដើម្បីលើកទឹកចិត្តខាងផ្លូវវិញ្ញាណ និងតាមផ្លូវចិត្តដែរ។
ចាប់ពីថ្ងៃស្អែក យើងបង្កើតហ្វេសប៊ុកថ្មីមួយ (https://www.facebook.com/LIVECatholicChannel) ដើម្បីឱ្យយើងផ្សាយផ្ទាល់ពីម៉ោង៦.៣០នាទីព្រឹកចាប់ផ្ដើមដោយអភិបូជា រហូតដល់ម៉ោង៥.៣០នាទីល្ងាចជាមួយអធិដ្ឋានផ្គាំ។ ក្នុងនោះយើងមានពេញម៉ោង មួយម៉ោងៗយើងមានផ្សាយបន្តដូចជា បទចម្រៀងសាសនា បទចម្រៀងប្រពៃណីខ្មែរ រឿងវីដេអូខ្លះៗដែលយើងបានបកប្រែជាភាសាខ្មែរ រឿងតុក្កតាគម្ពីរសម្រាប់កូនក្មេង… ហើយនៅម៉ោង៤.៣០នាទីល្ងាច យើងផ្សាយកម្មវិធីហាត់ប្រាណដើម្បីសុខភាព។ ដោយសារ យើងមានឯកសារពីអាមេរិកខ្លះ ពីខ្មែរយើងខ្លះ ពីគ្រីស្តបរិស័ទនិងបងប្អូនយើងខ្លះ ដែលបានបង្ហាញអំពីការហាត់ប្រាណនៅផ្ទះ។ សព្វថ្ងៃ បងប្អូននៅតាមជនបទបានឃើញផ្កាយ បានឃើញដើមឈើ មានកន្លែងវាលធំ ប៉ុន្តែបងប្អូននៅជាប់ក្នុងបន្ទប់តូចមួយនារាជធានីភ្នំពេញ ដោយចេញមិនបានក៏ពិបាកមែនទែន ដើម្បីគ្រប់គ្រងផ្លូវវិញ្ញាណ ផ្លូវចិត្ត និងផ្លូវកាយដែរ។
ដូច្នេះ ខ្ញុំសង្ឃឹមថាហ្វេសបុកនេះអាចជួយដើម្បីឱ្យបងប្អូនមានអារម្មណ៍ស្រួលបន្តិច កុំឱ្យពិបាកចិត្ត និងឈឺចិត្តរហូត។
យើងអធិដ្ឋាន ដើម្បីឱ្យព្រះសហគមន៍របស់យើងអនុវត្តជាក់ស្ដែង ច្បាប់សង្គមនិងភ្ជាប់ជាមួយធម្មវិន័យរបស់ព្រះយេស៊ូ ទាំងការចែករំលែកម្ហូបអាហារនិងសេចក្តីត្រូវការបន្ទាន់ ឱ្យយើងស្ដាប់គ្នា ឱ្យយើងបើកភ្នែក កុំឱ្យយើងគិតដល់តែយើងតែប៉ុណ្ណឹង ដោយមានចិត្តចង្អៀតចង្អល់។ ឱ្យយើងបន្តយកចិត្តទុកដាក់លើគ្នាទៅវិញទៅមក និងលើកទឹកចិត្តគ្នាទៅវិញទៅមក។
ដោយសារ ហ្វេសប៊ុកដែលយើងនឹងបង្កើតគឺជារបៀបមួយ ប៉ុន្តែកុំឱ្យយើងខ្លាចលើកទូរសព្ទដើម្បីទាក់ទងនិយាយផ្ទាល់មាត់ ដើម្បីសួរសុខទុក្ខគ្នាទៅវិញទៅមក ដូចព្រះយេស៊ូបានបង្ហាញខ្លួន។ ពេលព្រះយេស៊ូបង្ហាញខ្លួនដល់ក្រុមគ្រីស្តទូត ព្រះអង្គមិនបានបង្ហាញខ្លួនតាមទូរទស្សន៍ទេ ព្រះយេស៊ូមិនបានផ្ញើសារតាមហ្វេសប៊ុក ឬតាមសារទូរសព្ទ ឬអ៊ីមែលទេ គឺព្រះយេស៊ូបានមកផ្ទាល់ដើម្បីបង្ហាញព្រះអង្គ។
ដូច្នេះ សព្វថ្ងៃយើងប្រើទូរសព្ទរបស់ក្នុងប្រព័ន្ធក៏មិនសូវគិតលុយច្រើនប៉ុន្មានទេ ដើម្បីទាក់ទង សួរសុខទុក្ខគ្នា។ ជាពិសេសបងប្អូនគ្រីស្តបរិស័ទ ដែលមានបងធម៌ ដែលមានប្អូនធម៌ ដែលមានកូនធម៌ សូមទាក់ទងគ្នាដើម្បីសួរសុខទុក្ខគ្នា។ បើបងប្អូននៅជនបទ ឬនៅខេត្តដែលស្គាល់បងប្អូននៅភ្នំពេញ សូមទាក់ទងបងប្អូនយើង ដូចជាផ្ញើរូបថតឱ្យគ្នាទៅវិញទៅមក ដើម្បីឱ្យពួកគាត់បន្ធូរអារម្មណ៍បន្តិច។ ដោយសារ យើងតស៊ូបីថ្ងៃមិនសូវជាបញ្ហាប៉ុន្មានទេ ប៉ុន្តែប្រសិនបើយើងតស៊ូពីរអាទិត្យ បីអាទិត្យ មួយខែយ៉ាប់ណាស់។
យើងអធិដ្ឋាន ទូលអង្វរព្រះជាម្ចាស់សូមព្រះអង្គប្រទានកម្លាំងកាយកម្លាំងចិត្តដល់បងប្អូនទាំងអស់ផង។ អាម៉ែន៕
+លោកអភិបាល អូលីវីយ៉េ ជ្មីតហរស្លេ
អភិបាលព្រះសហគមន៍កាតូលិកភូមិភាគភ្នំពេញ
ប្រទេសកម្ពុជា
