គ្រួសារជនរងគ្រោះជាង១០គ្រួសារ ទទួលជំនួយសង្គ្រោះបន្ទាន់ពីព្រះវិហារសន្តអង់ទន់ ព្រែកដាច់ បន្ទាប់ពីការបាក់ដី និងលំនៅឋានចូលក្នុងទន្លេ ក្នុងភូមិព្រែកដាច់ ស្រុកលើកដែក ខេត្តកណ្ដាល នាថ្ងៃ ២៥ ឧសភា ២០២១  តាមរយៈលោកបូជាចារ្យ ទទួលខុសត្រូវព្រះសហគមន៍ ដានីញ៉ែល យ៉ុន ជាអ្នកសម្របសម្រួល។

លោកបូជាចារ្យ ដានីញ៉ែល មានប្រសាសន៍ថា ព្រះសហគមន៍ព្រែកដាច់តែងតែស្វាគមន៍បងប្អូនទាំងអស់ដែលមានទុក្ខលំបាក ជាពិសេសចំពោះបងប្អូនដែលបាត់បង់ផ្ទះសម្បែងកាលពីពេលថ្មីៗកន្លងមកនេះ។ លោកបន្តថា ព្រះសហគមន៍តែងតែបើកទ្វារចំហររង់ចាំទទួលពួកគាត់ជានិច្ច។

តាមការបញ្ជាក់របស់លោកបូជាចារ្យដានីញ៉ែល បានឱ្យដឹងថា ក្នុងចំណោមក្រុមគ្រួសាររងគ្រោះទាំងនោះមាន៤គ្រួសារជាគ្រីស្តបរិស័ទកាតូលិក និងបច្ចុប្បន្នកំពុងរស់នៅបណ្ដោះអាសន្ននៅក្នុងព្រះវិហារសន្តអង់ទន់ និងប៉ុន្មានគ្រួសារផ្សេងទៀតកំពុងស្នាក់អាស្រ័យបណ្ដោះអាសន្នជាមួយបងប្អូនសាច់ញាតិរបស់ពួកគេ។

ផ្ទះរបស់ប្រជាពលរដ្ឋជាង១០គ្រួសារ ត្រូវបានបាក់ចូលក្នុងទឹកទន្លេ នាថ្ងៃទី២៣ ខែឧសភា ឆ្នាំ២០២១ កន្លងទៅនេះ។

លោកដានីញ៉ែល ខណៈពេលនេះព្រះសហគមន៍កំពុងតែពិភាក្សាគ្នារកកន្លែងថ្មី ដើម្បីឲ្យពួកគាត់ស្នាក់នៅបណ្ដោះអាសន្ន។ លោកបន្ថែមថា «ខ្ញុំក៏បានធ្វើវីដេអូអំពីស្ថានភាពទាំងនេះជាភាសាកូរ៉េនៅក្នុងបណ្ដាញសង្គម ដើម្បីស្វែងរកជំនួយផងដែរ ទោះបីជាមានអ្នកមើលតិចតួច ប៉ុន្តែពួកគេមានចំណាប់អារម្មណ៍។ ដូច្នេះខ្ញុំសង្ឃឹមថា យើងនឹងអាចដោះស្រាយដោយអធិដ្ឋាន ពឹងផ្អែកលើជំនឿរបស់យើង និងបងប្អូនក្នុងព្រះសហគមន៍»។ 

លោកបូជាចារ្យ បន្ថែមថា មិត្តភក្តិខ្ញុំជាបូជាចារ្យកូរ៉េ កំពុងតែពិភាក្សាគ្នា ដើម្បីជួយតាមស្ថានភាពជាក់ស្ដែង អាចជាថវិកា ឬសម្ភារផ្សេងៗ…។ 

នៅថ្ងៃសៅរ៍សប្តាហ៍នេះ លោកអភិបាលអូលីវីយ៉េ គ្រោងនឹងទៅសួរសុខទុក្ខបងប្អូនជាង១០គ្រួសារ ដើម្បីលើកទឹកចិត្ត និងផ្តល់ក្តីសង្ឃឹមដល់ពួកគាត់ក្នុងគ្រាមានលំបាកនេះ។

ជំនួយសង្គ្រោះបន្ទាន់ដែលព្រះសហគមន៍បានចែកជូននេះ រួមមាន៖ អង្ករ១០០គីឡូក្រាមក្នុងមួយគ្រួសារ និងសម្ភារប្រើប្រាស់ចាំបាច់ក្នុងការរស់នៅប្រចាំថ្ងៃ ដែលបានមកពីការបិរច្ចាគរបស់ក្រុមគ្រួសារបងស្រីសន្តប៉ូលនៅប្រទេសកូរ៉េ ផ្ញើជូនព្រះសហគមន៍ដើម្បីឆ្លើយតបបន្ទាន់នូវតម្រូវការរបស់បងប្អូន៕
ដោយ​ដាលីស