លោកអភិបាលព្រះសហគមន៍កាតូលិកកម្ពុជា ភូមិភាគភ្នំពេញ ទទួលគោរមងារពីថ្នាក់ដឹកនាំព្រះពុទ្ធសាសនា ជា “មហាឧបាសកពុទ្ធសាសនូបឧបត្ថម្ភក៏” នាព្រឹកថ្ងៃទី ៣០ មេសា ២០២២ នៅវត្តអង្គមន្ត្រី ក្នុងស្រុកត្រាំកក់ ខេត្តតាកែវ។ ពិធីនេះប្រព្រឹត្តទៅក្រោមអធិបតីភាព ព្រះអនុគណៈស្រុកត្រាំកក់ ឯកឧត្តម សេង សុមុន្នី រដ្ឋលេខាធិការក្រសួងធម្មការនិងសាសនា។
ព្រះតេជគុណ ង៉ែត ចំរើន ព្រះចៅអធិការវត្តអង្គមន្រ្តី មានថេរដីកាអំពីសម្មិទ្ធិផលនានា ដែលលោកអភិបាល ព្រះសហគមន៍កាតូលិក ភូមិភាគភ្នំពេញ អូលីវីយ៉េ បានប្រគេនដល់វត្តអង្គមន្ត្រីមាន៖ រូបសំណាកព្រះមុជ្ជលិន ព្រះអង្គប្រោសបញ្ចគី ក្រមង៉ុយ ព្រះបាទជ័យវរ្ម័នទី៧ បន្ទប់ទឹក ចង្ក្រានបាយ សួនបន្លែ កញ្ចុះ ស្ពានស្រះទឹក ដែលមានទឹកប្រាក់សរុប ២២១៧ដុល្លារ និង១៧១ដុល្លារក្នុងសម័យព្រះចៅអធិការផ្ទាល់ និងមានប្រាក់ ១២០៧ដុល្លារទៀតកាលពីមុន។
ព្រះតេជគុណ ចយ ពៅ និមន្តប្រកាសពីព្រះរាជប្រកាសនីយប័ត្រ លេខ ០១៨/២៧ រ.ប្រ.ក គណៈមហានិកាយកម្ពុជា ចុះថ្ងៃទី ៤ មករា ២០២២ ដោយសម្ដេចព្រះមហាសង្ឃរាជនៃព្រះរាជាណាចក្រកម្ពុជា ដែលមានខ្លឹមសារ ត្រាស់បង្គាប់សម្រេច៖ ផ្ដល់នូវគោរមងារជូនលោកអភិបាល អូលីវីយ៉េ ជាមហាឧបាសកពុទ្ធសាសនូឧបត្ថម្ភក៏។ ព្រះតេជគុណមានថេរដីកាថា ប្រកាសនីបត្រនេះមានប្រសិទ្ធភាពចាប់ពីថ្ងៃជូនដំណឹងនេះតទៅ។
លោកអភិបាល អូលីវីយ៉េ ថ្លែងនៅក្នុងកម្មវិធីថ្ងៃនេះថា នៅក្នុងពេលវេលាដ៏ពិសេសនាំឱ្យយើងមើលឃើញភាតរភាពជាក់ស្ដែងរវាងសាសនា និងសាសនា។ ២០០២ ខ្ញុំបានមកដល់ភូមិចំការទៀង និងមានគ្រីស្តបរិស័ទតែម្នាក់។ សកម្មភាពទី១ដែលយើងបានធ្វើគឺផ្លូវ១២០០ម៉ែត្រពីភូមិចំការទៀងមកវត្តអង្គមន្ត្រី។ តាមរយៈវិស័យអប់រំសិក្សា ព្រះសហគមន៍កាតូលិកមានភាពរីកចម្រើន និងរីកចម្រើនខាងវិស័យសិប្បកម្មផងដែរ ដោយថែរក្សាប្រពៃណីខ្មែរព្រមទាំងជួយឱ្យប្រជាជនមានការងារធ្វើ។
លោកអភិបាលបន្ថែមថា នៅក្នុងបរិវេណវត្តអង្គមន្ត្រីនិងព្រះសហគមន៍ម៉ារីញញឹម យើងធ្វើដំណើរជាមួយគ្នាជាបងប្អូន ហើយសម័យកូវីដជាឱកាសមួយដើម្បីបង្កើតទំនាក់ទំនង។ សាសនាយើងទាំង២បានធ្វើដំណើរដើម្បីកសាងសន្តិភាព។
លោកអភិបាលបន្តថា ថ្ងៃនេះយើងបង្ហាញពីការចេះសន្ទនាចំពោះមុខគ្នា ណែនាំឱ្យយើងចេះអប់រំអំពីតម្លៃនៃគុណធម៌ ចិត្តវិញ្ញាណរបស់យើងពេញលក្ខណ: ដោយមិនត្រឹមចំណេះដឹង។ នេះជាឱកាសមួយដើម្បីបង្ហាញភាតរភាព ដែលបង្កើតមិត្តភាពដ៏ពិតប្រាកដ។ ជាពេលបង្ហាញសុខសន្តិភាពយ៉ាងជាក់ស្ដែង ហើយយើងអាចយើងចូលរួមជាមួយគ្នា។
ព្រះមង្គល សៅដារ៉ាវី ព្រះអនុគណស្រុកត្រាំកក់ មានសង្ឃដីកាថា ការដឹកនាំក្នុងការងារសាសនាក្នុងស្រុកត្រាំកក់ ជាពិសេសវត្តអង្គមន្ត្រី «អាត្មាឃើញលោកអូលីវីយ៉េជាក់ស្ដែងបានជួយច្រើន និងអាត្មាយល់ថានេះជារឿងមួយល្អណាស់។ អាត្មាបានមកចូលរួមបុណ្យផ្កា អាត្មាឃើញថាទំនាក់ទំនងល្អ។»
ឯកឧត្តម សេង សុមុន្នី រដ្ឋាលេខាធិការក្រសួងធម្មការនិងសាសនា ថ្លែងថា លោកមានការភ្ញាក់ផ្អើលនៅពេលបានឃើញលិខិតព្រះចៅអធិការវត្ត និងឆ្ងល់ថាហេតុអ្វីលោកអភិបាលអូលីវីយ៉េជាសង្ឃរាជនៃគ្រីស្តសាសនាកាតូលិក តែអាចរួបរួមគ្នាជាមួយព្រះពុទ្ធសាសនាបាន?
លោកសុមុន្នី ថ្លែងបន្តថា ដូចសម្ដេចហ៊ុនសែនបានប្រកាសថា “សុខដុមនីយកម្មសាសនាសំខាន់ណាស់ កុំឈ្លោះគ្នា កុំទាស់គ្នា”។ លោកអភិបាលគ្រីស្តសាសនាមិនប្រកាន់ទេ ហើយលោកអភិបាលក៏បានប្រគេនម៉ាស់ អាល់កុលថ្វាយសម្ដេចសង្ឃ ព្រោះសុខដុមនីយកម្មសាសនាជារឿងសំខាន់។ ព្រះទាំងឡាយមានទិសដៅតែមួយគឺ “នាំសេចក្ដីសុខដល់សត្វនិងមនុស្ស” ដូច្នេះសូមកុំប្រកាន់គ្នា។
លោកអភិបាលអូលីវីយ៉េ មានប្រសាសន៍មកកាន់អ្នកសារព័ត៌មានថា «ខ្ញុំបានចូលរួមមានទំនាក់ទំនងជាមួយវត្តតាំងពីឆ្នាំ ២០០២មកម្ល៉េះ និងស្គាល់ព្រះចៅអធិការប្រាំអង្គមកហើយ និងពីមួយឆ្នាំទៅមួយឆ្នាំ ខ្ញុំបានជួយតាមកាលៈទេសៈ និងលើកទឹកចិត្ត រួមទាំងជួយខ្លះខ្លះក្នុងការកសាងសាលាឆាន់ក្រោយពេលភ្លើងឆេះនិងបុណ្យធំៗដូចជាភ្ជំបិណ្ឌនិងចូលឆ្នាំជាដើម។»
លោកអភិបាលបញ្ជាក់ថា អំឡុងពេលកម្ពុជាជួបបញ្ហាកូវីដ១៩ លោកឃើញព្រះសង្ឃមានភាពលំបាក ក៏បានសាងសង់ផ្ទះបៃតងដើម្បីជួយព្រះសង្ឃក្នុងការដាំបន្លែធម្មជាតិ ហើយព្រះសង្ឃបានតែងតាំងលោកជាប្រធានបរិស្ថាននៃវត្តអង្គមន្រ្តីនេះ។ លោកអភិបាលអូលីវីយ៉េ បញ្ជាក់បន្ថែមថា នេះជាឱកាសមួយដើម្បីសហការគ្នា ហើយសម្មិត្ធផលមិនសំខាន់ជាងការបង្កើតទំនាក់ទំនងនៅក្នុងការសន្ទនា ទំនាក់ទំនងជាមិត្តសម្លាញ់ ទំនាក់ទំនងជាមួយបងប្អូនពុទ្ធបរិស័ទក៏ដូចជាមួយគ្រីស្តបរិស័ទ និងជារៀងរាល់ឆ្នាំនៅក្នុងបុណ្យព្រះយេស៊ូប្រសូតគណៈកម្មការវត្តនិងព្រះចៅអធិការក៏បានទៅជូនពរនៅព្រះវិហារសន្តីម៉ារីញញឹម ហើយជារៀងរាល់ឆ្នាំខ្ញុំក៏បានចូលរួមពិធីបុណ្យផ្កាដែរ និងបានចេញចូលជាគ្រួសារតែមួយ។
លោកសង្កត់ធ្ងន់ថា សំខាន់សាសនាយើងទាំង២ជាគ្រួសារតែមួយ មិនមានគំនិតច្រណែន តែផ្ទុយទៅវិញយើងធ្វើដំណើររួមជាមួយគ្នាដោយសុខដុមរមនា ហើយយើងជាជនជាតិខ្មែរចង់ឱ្យប្រទេសរីកចម្រើន ដោយតាមរយៈសាសនាបានជួយយើងនៅក្នុងគុណធម៌ សីលធម៌ និងរបៀបរស់នៅដោយទទួលការអប់រំពីព្រះពុទ្ធនិងព្រះយេស៊ូ ដើម្បីទៅជាអ្នកកសាងសន្តិភាពដ៏ពិតប្រាកដ។
«គោរមងារនេះ ខ្ញុំយល់ថាមិនមែនសម្រាប់ខ្ញុំផ្ទាល់ទេ តែជាសញ្ញាសម្គាល់ដែលទទួលស្គាល់នៅក្នុងព្រះសហគនមន៍កាតូលិក និងព្រះពុទ្ធសាសនាយើងធ្វើដំណើរជាមួយគ្នា និងមហាឧបាសក ជាឋានៈដែលទទួលស្គាល់ដោយព្រះសង្ឃរាជទេព វង្ស ដែលសម្ដេចបានឯកភាព និងទទួលស្គាល់មួយយ៉ាងពិសេសដោយយល់ថា ព្រះសហគមន៍កាតូលិកចាក់គ្រឹះនៅក្នុងវប្បធម៌កម្ពុជា និងធ្វើដំណើរជាមួយបងប្អូនដោយដឹងថានៅកម្ពុជាយើងមានបាវចនាជាតិដោយគោរព ជាតិ សាសនា ព្រះមហាក្សត្រ និងព្រះពុទ្ធសាសនាជាសាសនារដ្ឋ។» លោកអភិបាលអូលីវីយ៉េបញ្ជាក់។
លោកបន្ថែមថា ទោះបីលោកជាគ្រីស្តសាសនានិកាយកាតូលិក យើងគោរពគ្នាទៅវិញទៅមកដោយប្រជាជនម្នាក់ៗមានសិទ្ធិគោរពសាសនារៀងៗខ្លួន និងថ្ងៃនេះជាសញ្ញាសម្គាល់យើងគោរពគ្នា ដែលណែនាំឱ្យយើងយល់ថា សុខដុមរមនាជាសន្តិភាព ដែលនាំឱ្យសន្តិភាពផុសឡើងនៅក្នុងប្រទេសយើង។
នៅក្នុងឱកាសនេះដែរ លោកអភិបាលសូមផ្ដាំផ្ញើដល់គ្រីស្តបរិស័ទទាំងអស់ ឱ្យរស់នៅក្នុងវប្បធម៌ផ្ទាល់ខ្លួន ទោះបីយើងជាកាតូលិកតែយើងធ្វើដំណើរជាមួយគ្នារាល់ថ្ងៃ។ លោកថា នេះជាការសន្ទនានៅក្នុងជីវិតប្រចាំ យើងមានវប្បធម៌ ប្រពៃណីរបស់យើង។ យើងមិនមែនមនុស្សប្លែកដែលរស់នៅក្នុងប្រទេសមានវប្បធម៌ សាសនា និងយើងមានសាសនាយើង ដោយយើងធ្វើជាសាក្សីពីព្រះយេស៊ូគ្រីស្តដោយណែនាំឱ្យមនុស្សទាំងអស់រស់នៅក្នុងសេចក្ដីសុខនិងសេចក្ដីស្រឡាញ់។
លោកសង្កត់ធ្ងន់ថា «ខ្ញុំសង្ឃឹមថាគ្រីស្តបរិស័ទរបស់យើងនៅក្នុងជីវិតប្រចាំ យើងធ្វើដំណើរជាមួយគ្នាជាបងប្អូដោយមានជំនឿផ្ទាល់ខ្លួន និងជាពិសេសនៅពេលថ្មីៗនេះយើងគោរពព្រះយេស៊ូដែលមានព្រះជន្មរស់ឡើងវិញ ជាសេចក្ដីសង្ឃឹមនៃការសង្គ្រោះរបស់យើងនៅថ្ងៃអនាគតនៅស្ថានបរមសុខជាមួយព្រះជាម្ចាស់ និងយើងរស់នៅជាមួយគ្នាជាគ្រួសារតែមួយនៅក្នុងជីវិតប្រចាំ។»
ដោយ៖ ដាលីស
