ព្រះសហគមន៍កាតូលិកភូមិភាគកំពង់ចាមមានអំណរសប្បាយដោយមានលោកបូជាចារ្យជាតិខ្មែរបានក្លាយជាអភិបាលគ្រប់គ្រងក្នុងនាមសម្តេចប៉ាបសម្រាប់ភូមិភាគនេះ គឺលោកសិលា សួន ហង្សលី។
គ្រីស្តបរិស័ទមកពីគ្រប់ទីកន្លែងក្នុងប្រទេសកម្ពុជាបានជួបជុំគ្នាជាង១០០០នាក់ ដើម្បីចូលរួមក្នុងពិធីប្រគល់មុខងារជាផ្លូវការជូនលោកសិលា សួន ហង្សលី ជាអភិបាលព្រះសហគមន៍កាតូលិកភូមិភាគកំពង់ចាម ក្រោមអធិបតីភាពរបស់លោកអគ្គរាជទូត ប៉ូល ធិឆាង អ៊ិណាម លោកកាឌីណាល់ លូវីស ម៉ារីលីង រួមនិងអភិបាល និងបូជាចារ្យជិត១០០អង្គ កាលពីថ្ងៃទី១ ខែតុលា ឆ្នាំ២០២២ នៅព្រះសហគមន៍កាតូលិកកំពង់ចាមក្រុង ក្នុងខេត្តកំពង់ចាម។
លោកអគ្គរាជទូត ប៉ូល ធិឆាង អ៊ិណាម ប្រចាំប្រទេសកម្ពុជា ថៃនិងឡាវ បានសួរពីបំណងរបស់សាម៉ីខ្លួន ដែលនឹងបន្តមុខងារជាគង្វាលសម្រាប់ព្រះសហគមន៍នៅក្នុងភូមិភាគកំពង់ចាម ដោយមានជំនឿ សេចក្តីស្រឡាញ់ ចិត្តស្មោះត្រង់ និងសុខចិត្តស្តាប់បង្គាប់របស់សន្តអាសនៈ និងសម្តេចប៉ាប ហ្វ្រង់ស៊ីស្កូ។
លោកសង្កត់ធ្ងន់ទៀតថា ក្នុងមុខងារជាអភិបាលនេះ គឺជម្រុញឲ្យមានកិច្ចប្រតិបត្តិការ និងសហគ្នា ដែលណែនាំឲ្យអស់លោកបូជាចារ្យនៅក្រោមបង្គាប់ ឆ្ពោះទៅកាន់មាគ៌ានៃការសង្គ្រោះ និងជំរុញឲ្យលោកអធិដ្ឋាន ដើម្បីជាប្រយោជន៍ដល់ប្រជារាស្រ្តទាំងមូលរបស់ព្រះជាម្ចាស់ និងដល់អស់អ្នកដែលលោកនឹងជួប។
លោកសិលា សួន ហង្សលី បានឆ្លើយតបវិញថា «បាទ ! ខ្ញុំយល់ឃើញដូច្នេះហើយ»។
បន្ទាប់មកលោកអគ្គរាជទូត ក្នុងនាមសម្តេចប៉ាប បានបំពាក់ចិញ្ចៀន មួក និងខ្សែកជូនលោកអភិបាលថ្មី ហើយប្រកាសជាផ្លូវការ លោកជាអភិបាលព្រះសហគមន៍កាតូលិកសម្រាប់ភូមិភាគកំពង់ចាម។
ក្រសួងប្រកាសដំណឹងល្អដល់ប្រជាជាតិទាំងឡាយក្នុងនាមសម្តេចប៉ាបហ្វ្រង់ស៊ីស្កូ បានចេញរាជក្រឹត្យជ្រើសតាំងលោកសិលា សួន ហង្សលី ជាអភិបាលព្រះសហគមន៍ភូមិភាគកំពង់ចាម កាលពីថ្ងៃទី១៥ ខែកក្កដា ឆ្នាំ២០២២ បន្តមុខងារពីលោកអន់តូនីសាមី ស៊ូសៃរាជ្យដែលត្រូវចូលនិវត្តន៍។
ក្នុងរយៈពេលជិត៣ឆ្នាំ កន្លងមក លោកប្រ៊ុយណូ កូសម៍បានមើលការខុសត្រូវភូមិភាគកំពង់ចាមបណ្តោះអាសន្នក្នុងមុខងារជាAdministrator of Apostolic Prefect of Kampong Cham។
«ថ្ងៃនេះខ្ញុំមានចិត្តរំភើបយ៉ាងខ្លាំង នៅក្នុងពិធីប្រគល់មុខងារខណៈពេលប្រកាសលិខិតតែងតាំង របស់សម្តេចប៉ាបហ្វ្រង់ស៊ីស្កូ ដែលបានជ្រើសតាំងខ្ញុំដែលជាបូជាចារ្យ ជាអភិបាលក្នុងព្រះសហគមន៍កាតូលិកភូមិភាគកំពង់ចាម។» នេះជាការបញ្ជាក់របស់លោកសិលា សួន ហង្សលី ក្នុងថ្ងៃបុណ្យទទួលមុខងារ។
លោកបន្ថែមថា លោកគិតថា នេះគឺជាការអស្ចារ្យមួយដែលព្រះជាម្ចាស់បានធ្វើនៅក្នុងជីវិតរបស់លោក ទោះបីលោកជាមនុស្សទន់ខ្សោយ។
«ដោយសារការអស្ចារ្យនេះខ្ញុំសង្ឃឹមថា ព្រះជាម្ចាស់ និងប្រទានកម្លាំងកាយកម្លាំងចិត្ត និងដោយអំណោយទាននៃព្រះវិញ្ញាណដ៏ពិវិសុទ្ធ ខ្ញុំជឿថាព្រះវិញ្ញាណដ៏វិសុទ្ធនឹងជួយពង្រឹងជំនឿនិងសេចក្ដីក្លាហានដល់ខ្ញុំ ដើម្បីឲ្យខ្ញុំទៅមុខ ក្នុងការណែនាំភូមិភាគកំពង់ចាម។» លោកអភិបាលថ្មីបញ្ជាក់។
ព្រះសហគមន៍នៅក្នុងប្រទេសកម្ពុជា ត្រូវបានបែងចែកជា៣ភូមិភាគ ដោយសន្តអាសនៈក្នុងឆ្នាំ ១៩៦៩ ដែលមានភ្នំពេញ បាត់ដំបង និងកំពង់ចាម។ ភូមិភាគកំពង់ចាម គ្រប់ដណ្តប់ខេត្តចំនួន៨ គឺ កំពង់ចាម ត្បូងឃ្មុំ ព្រៃវែង ស្វាយរៀង ស្ទឹងត្រែង ក្រចេះ រតនគិរី និងមណ្ឌលគិរី។
លោកអភិបាលសិលា សួន ហង្សលី ប្រសូតនៅក្នុងគ្រួសារគ្រីស្តបរិស័ទ នាថ្ងៃទី១៥ ខែមេសា ឆ្នាំ១៩៧១ ក្នុងភូមិតាស្គរ ឃុំសារិកាកែវ ស្រុកល្វាឯម ខេត្តកណ្តាល ដែលនៅតំបន់នោះមានព្រះសហគមន៍កាតូលិកមាត់ក្រសាស់ ជាទីកន្លែងកំណើតរបស់អតីតអភិបាលព្រះសហគមន៍កាតូលិកភូមិភាគភ្នំពេញ លោកយ៉ូសែប ឆ្មារ សាឡាស់។
ក្នុងវ័យកុមារភាពលោករស់នៅក្នុងរបបខ្មែរក្រហម និងត្រូវបានភៀសខ្លួនទៅជំរំជំរំជនភៀសខ្លួនខ្មែរថៃ ខណៈដែលប្រទេសកម្ពុជាស្ថិតនៅក្នុងសង្គ្រាមស៊ីវិល។ លោកចាប់ផ្តើមឈ្វេងយល់ជីវិតនៃការត្រាស់ហៅ នៅជំរំ ក្នុងឆ្នាំ១៩៩១ ហើយក្នុងឆ្នាំ១៩៩២ លោកបានសុំចូលទេវវិទ្យាល័យនៅក្នុងប្រទេសកម្ពុជា។ លោកត្រូវបានតែងតាំងជាបូជាចារ្យកាតូលិកនាថ្ងៃទី៩ ខែធ្នូ ឆ្នាំ២០០១ ជាបូជាចារ្យសម្រាប់ភូមិភាគភ្នំពេញ។
ក្រោយមកលោកអភិបាលអេមីល ដេតម្ប អភិបាលនៃព្រះសហគមន៍កាតូលិកភូមិភាគភ្នំពេញ បានចាត់លោកឲ្យទៅបម្រើការងារនៅតំបន់កំពត-កែប ជាមួយលោកអូលីវីយ៉េ ជ្មីតហស្លេ ដែលជាបូជាចារ្យក្នុងឆ្នាំនោះ។
លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ មានប្រសាសន៍ក្នុងបទសំភាសន៍នៅថ្ងៃដដែលថា កិច្ចការងាររបស់លោកហង្សលី ដែលបានបំពេញ នៅក្នុងភូមិភាគក្នុងនាមជាបូជាចារ្យភូមិភាគ ជាអ្នកទទួលខុសត្រូវមណ្ឌលសកម្មភាព ជាតំណាងពេញសិទ្ធិរបស់លោកផ្ទាល់ និងជានាយកទេវវិទ្យាល័យសន្តយ៉ូហាន ម៉ារី វីយ៉ាណែរ «អាចនិយាយបានថា ភូមិភាគភ្នំពេញ គឺជាសាលារៀនមួយសម្រាប់លោកលី ដែលអាចឲ្យគាត់ចូលទៅក្នុងជីវិតថ្មី គឺចាប់ផ្ដើមនៅថ្ងៃនេះ ជាអភិបាលភូមិភាគកំពង់ចាម។»
លោកអភិបាលអូលីវីយ៉េ បន្ថែមថា យើងមើលឃើញមានអំណោយទានពិសេសរបស់ព្រះជាម្ចាស់សម្រាប់ព្រះសហគមន៍នៅប្រទេសកម្ពុជា គឺនៅថ្ងៃនេះយើងមានកូនខ្មែរ ដែលទទួលខុសត្រូវនៅព្រះសហគមន៍ភូមិភាគកំពង់ចាម និងជាពេលវេលារួមគ្នាធ្វើដំណើរ នៅក្នុងព្រះសហគមន៍កាតូលិកក្នុងប្រទេសកម្ពុជានិងនៅក្នុងប្រទេសឡាវដើម្បីប្រកាសដំណឹងល្អ។
លោកស្រីគឹម ទូច អាយុ៧៨ឆ្នាំ ជាម្តាយមីងរបស់លោកអភិបាលហង្សលី មានប្រសាសន៍ថា «ត្រេកអរខ្លាំងណាស់ ដែលលោកបានឡើង ជាអភិបាល។»
លោកស្រីប្រាប់ទៀតថា គាត់គ្មានអ្វីជូនលោកអភិបាលហង្សលីនោះទេ ប៉ុន្តែលោកស្រីសង្ឃឹមថា វត្តមានរបស់លោកស្រីនឹងជួយលើកទឹកចិត្តដល់លោកអភិបាលថ្មី «ឲ្យគាត់បន្តបេសកកម្មនេះរហូតទៅ កុំងាកក្រោយ កុំអាឡោះអាល័យអ្វីទៀត។»
លោកបូជាចារ្យ វ៉ាំងសង់ សេន័យឆាល់ ជាប្រធានសាសនទូតក្រៅប្រទេសពីទីក្រុងប៉ារីស ប្រទេសបារាំង (MEP) និងជាបូជចារ្យដែលធ្លាប់បម្រើការងារនៅក្នុងប្រទេសកម្ពុជាមានប្រសាសន៍ថា ក្រុមអ្នកបួសរបស់លោកនៅតែបន្តជួយគាំទ្រដល់ភូមិភាគកំពង់ចាម និងព្រះសហគមន៍នៅកម្ពុជា ដោយចាត់បូជាចារ្យឲ្យមកបម្រើការងារ និងជួយឧត្ថម្ភជាថវិកា និងជំនាញសិក្សានានាសម្រាប់អ្នកបួស និងគ្រីស្តបរិស័ទមួយចំនួន។
លោកបញ្ជាក់ថា ក្រុមគ្រួសារMEP បានមកដល់ទឹកដីកម្ពុជាក្នុងឆ្នាំ១៦៥៨ ហើយទិសដៅសំខាន់របស់ក្រុមនេះ គឺចូលរួមជាមួយព្រះសហគមន៍ក្នុងស្រុក បង្កើតនិងធ្វើឲ្យព្រះសហគមន៍ក្នុងស្រុករីកចម្រើន។
លោកប្រធានMEP រូបនេះ បន្តថា នេះគឺជាលើកទីមួយដែលមានលោកអភិបាលខ្មែរក្នុងភូមិភាគកំពង់ចាម នៅក្នុងភូមិភាគភ្នំពេញធ្លាប់មានលោកឆ្មារសាឡាស់ និងបាត់ដំបងធ្លាប់មានលោកទេពអ៊ឹម។ «ថ្ងៃនេះគឺមានលោកខ្មែរទីបី គឺលោកសួនហង្សលីដែលទទួលខុសត្រូវក្នុងភូមិភាគកំពង់ចាម។ ខ្ញុំរំភើបចិត្តណាស់។»
លោកសិលា សួន ហង្សលី ជាអភិបាលជាតិខ្មែរទី៣ និងជាអភិបាលជាតិខ្មែរដំបូងសម្រាប់ភូមិភាគកំពង់ចាម។ ក្នុងឆ្នាំ១៩៧៥-១៩៧៧ ព្រះសហគមន៍នៅកម្ពុជាមានលោកអភិបាលជាតិខ្មែរដំបូងគឺ លោកយ៉ូសែប ឆ្មារ សាឡាស់ ជាអភិបាលព្រះសហគមន៍កាតូលិកភូមិភាគភ្នំពេញ និងទី២ គឺលោកប៉ូល ទេពអ៊ឹម សុត្ថា ជាអភិបាលព្រះសហគមន៍កាតូលិកភូមិភាគបាត់ដំបង។
«ខ្ញុំផ្ទាល់ខ្ញុំរំភើបណាស់ ដែលលោកលីគឺជាអភិបាលព្រះសហគមន៍យើង នៅក្នុងភូមិភាគកំពង់ចាម។» នេះជាប្រសាសន៍លោកអេនរីគេ ហ្វីការេដូ អភិបាលព្រះសហគមន៍កាតូលិកភូមិភាគបាត់ដំបង។
លោកបន្ថែមថា លោកអភិបាលហង្សលី មានបីចំណុចដែលជាសារៈសំខាន់ គឺលោកខ្មែរ លោកមានចំណេះដឹងនិងរបៀបច្រើនដែលនាំឲ្យយើងមានរីកចម្រើនច្រើន និងតាមរយៈអំណោយទានដែលគាត់មាន នឹងនាំឲ្យព្រះសហគមន៍នៅក្នុងស្រុកខ្មែរ សេចក្ដីសង្ឃឹមនិងអំណរសប្បាយដែលមកពីព្រះជាម្ចាស់ គឺជាកម្លាំងរបស់យើង។
អ្នកស្រីអ៊ឹម រដ្ឋា មក ពីព្រះសហគមន៍បុស្សខ្នុរ ក្នុងភូមិភាគកំពង់ចាម ឲ្យដឹងថា «ខ្ញុំសង្ឃឹមថា គាត់ដឹកនាំយើងល្អជាងបូជាចារ្យបរទេស ដោយសារគាត់ជាជនជាតិខ្មែរ បើគាត់និយាយយើងស្រួលស្តាប់ ពីព្រោះយើងនៅតាមស្រុក ហើយណាមួយយើងជាជនជាតិខ្មែរដូចគ្នា គាត់នឹងយល់ពីយើងបានច្រើន។»
អ្នកស្រីថា គាត់នឹងអធិដ្ឋាន សូមព្រះជាម្ចាស់ប្រទានពរដល់លោកអភិបាលថ្មីឲ្យមានកម្លាំង ដឹកនាំឲ្យមានគ្រីស្តបរិស័ទមានជំនឿជឿលើព្រះជាម្ចាស់កាន់តែច្រើនឡើង។
លោកអភិបាលហង្សលី បានឲ្យដឹងទៀតថា «ពិតមែននៅក្នុងភូមិភាគកំពង់ចាមនេះមានគ្រីស្តបរិស័ទតិចតួច ជាងភូមិភាគដទៃទៀត ប៉ុន្តែខ្ញុំជឿថាបេសកកម្មនឹងវត្តមានរបស់ខ្ញុំក្នុងនាមជាអភិបាលនៃភូមិភាគនេះ គឺមានសារៈសំខាន់។»
លោកអភិបាលថ្មី បញ្ជាក់ថា ចំណុចសំខាន់ដំបូង ដែលលោកនឹងត្រូវធ្វើគឺឈ្វេងយល់អំពីព្រះសហគមន៍នៅក្នុងតំបន់នីមួយៗ ទាំងបុគ្គលិក គណៈកម្មការ និងសហការជាមួយលោកបូជាចារ្យ និងអតីតអភិបាលព្រះសហគមន៍នេះ ពិនិត្យមើលអំពីចំណុចខ្វះខាតដែលគួរកែលម្អ ដើម្បីធ្វើដំណើរទៅខាងមុខក្នុងការប្រកាសដំណឹងល្អឲ្យបានរីកចម្រើន។
លោកអភិបាលហង្សលីបញ្ជាក់ទៀតថា កត្តាសំខាន់មួយទៀតគឺយើងត្រូវមានសេចក្ដីស្រឡាញ់នៅក្នុងព្រះសហគមន៍ រវាងលោកអភិបាលនិងគ្រីស្តបរិស័ទ លោកអភិបាលនិងព្រះសហគមន៍ ព្រមទាំងគណៈកម្មការបុគ្គលិកបព្វជិតបព្វជិតាទាំងអស់ ដើម្បីធ្វើជាសាក្សីអំពីជំនឿ ដែលមកពីព្រះយេស៊ូ។
«នៅពេលណាដែលយើងរស់នៅជាក្រុមមួយដែលមានលក្ខណៈល្អប្រសើរជាមួយគ្នា ដូច្នេះការប្រកាសដំណឹងល្អ នឹងមានប្រសិទ្ធភាព ដែលនេះគឺជាផលផ្លែ នៃព្រះវិញ្ញាណដ៏វិសុទ្ធ។» លោកអភិបាលហង្សលីបន្ថែម។
ព្រះសហគមន៍នៅក្នុងប្រទេសកម្ពុជាមានគ្រីស្តបរិស័ទប្រមាណ២ម៉ឺននាក់ ក្នុងចំណោមប្រជាជនជិត១៦លាននាក់ ដែលជាពុទ្ធបរិស័ទចំនួន៩៥%៕
ដោយ កែវ កញ្ញា
