កម្មវិធីនេះដឹកនាំដោយលោកបូជាចារ្យ អាប្រាហាំ ខូន រួមជាមួយលោកឧបដ្ឋាក វី សំណាង និងបងស្រី អេង សានី នាថ្ងៃទី៤ មីនា ២០២៣នេះ។
ដូនជី អេង សានី នៃក្រុមគ្រួសារឧបការគុណ មានប្រសាសន៍ថា ក្រុមបម្រើអាសនៈមានតួនាទីមួយយ៉ាងសំខាន់និងយ៉ាងជិតស្និទ្ធក្នុងពិធីអភិបូជាព្រោះពួកគាត់ត្រូវនៅក្បែរនិងបម្រើតុអាសនៈ ដូច្នេះពួកគាត់ត្រូវដឹងអំពីសម្ភារប្រើប្រាស់និងកាយវិការនានា។
ក្នុងរយៈពេលមួយថ្ងៃនោះ អ្នកចូលរួមទាំងអស់បានចូលរួមរិះគិតព្រះបន្ទូលនិង អធិដ្ឋានជាមួយគ្នា។ ដូនជីសានីបន្ថែមថា ប្រសិនបើគាត់ស្គាល់ពីអត្ថន័យពិធីបុណ្យអភិបូជា និងពិធីបុណ្យផ្សេងៗនាំឲ្យកិច្ចការបម្រើអាសនៈធ្វើដោយរលូន ហើយអាចជួយឱ្យគ្រីស្តបរិស័ទការអធិដ្ឋាន និងចូលរួមអភិបូជាដោយអំណរសប្បាយ។
ដូនជី សានី បានឱ្យដឹងទៀតថា ទោះបីជាក្រុមបម្រើអាសនៈមានខ្លះជាគ្រីស្តបរិស័ទ និងខ្លះទៀតជាពុទ្ធបរិស័ទក៏ពិតមែន ប៉ុន្តែសំខាន់គឺពួកគាត់យកចិត្តទុកដាក់នូវអ្វីដែលកំពុងធ្វើ និងស្គាល់អំពីរបៀបនៃការគោរពនិងការបម្រើក្នុងពិធីបុណ្យដែលជាលទ្ធផលមួយយើងសប្បាយចិត្ត។
អ្នកបម្រើតុសក្ការៈទាំងនោះមានខ្លះជាកូនគ្រីស្តបរិស័ទនៃព្រះវិហារព្រះកុមារយេស៊ូបឹងទំពុន និងខ្លះទៀតជាសិស្សតាមបណ្តាខេត្តនានាដែលជាពុទ្ធបរិស័ទនិងគ្រីស្តបរិស័ទកំពុងសិក្សានៅភ្នំពេញ និងកំពុងស្នាក់នៅក្នុងមណ្ឌលរបស់ព្រះសហគមន៍។
កុមារា យឿន រ៉ានុត ក្នុងវ័យ១០ឆ្នាំ ជាអ្នកបម្រើអាសនៈនៅព្រះវិហារព្រះកុមារយេស៊ូបឹងទំពុននេះ និយាយថា កម្មវិធីសំណាក់ធម៌នេះបានជួយគាត់ឲ្យចេះស្ដាប់ព្រះបន្ទូល ស្គាល់ពីឧបករណ៍ផ្សេងៗ ហើយហាត់កាយវិការពេលប្រើឧបករណ៍នោះ។
រ៉ានុតបន្ថែមថា ក្នុងនោះគាត់បានដឹងពីរបៀបប្រើប្រាស់ពណ៌ខោអាវតាមរដូវនីមួយៗ និងក្នុងពិធីបុណ្យគោរពនិងរំលឹកផ្សេងៗ។
ដូនជីសានីឲ្យដឹងទៀតថា ក្រុមបម្រើអាសនៈបានយកចិត្តទុកដាក់លើកម្មវិធីនេះដោយព្យាយាមមកតាំងពីម៉ោង ៥:០០ព្រឹក ព្រឹក ដើម្បីត្រៀមខ្លួនចូលរួមអភិបូជា និងឆ្លើយនូវសំណួរផ្សេងៗ ទោះបីជាពួកគាត់រវល់ក៏ដោយ។ នេះជាផលផ្លែមួយដែលយើងបានទទួលនិងឃើញប្អូនៗមានអំណរសប្បាយ ហើយយល់ថាព្រះសាគមន៍នីមួយៗត្រូវយកចិត្តទុកដាក់នៅក្នុងការអប់រំក្រុមផ្សេងៗដើម្បីឱ្យពិធីបុណ្យរបស់យើងមានដំណើរការល្អ៕
ដោយដាលីស
