លោកអភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ រួមនឹងលោកបូជាចារ្យ លោកឧបដ្ឋាក ក្រុមបព្វជិត បព្វជិតា និងគ្រីស្តបរិស័ទដែលមកពីព្រះសហគមន៍នានាប្រមាណ២០០នាក់ បានចូលរួមពិធីប្រសិទ្ធិពរលើសាលប្រជុំ នាសហគមន៍គ្រួសារដ៍វិសុទ្ធនៃមណ្ឌលសកម្មភាពខេត្តតាកែវ។
ពិធីនេះ បានប្រារព្ធធ្វើឡើងនាថ្ងៃទី៦ ខែឧសភា ឆ្នាំ២០២៣ ដោយមានការថ្វាយអភិបូជាយ៉ាងឱឡារិកដោយផ្ទាល់ និងតាមរយៈអនឡាញដោយការផ្សាយផ្ទាល់តាមបណ្ដាញសង្គមហ្វេសបុក និងយូធូប (YouTube)ផងដែរ។
សាលប្រជុំនេះមានទីតាំងស្ថិតនៅក្នុង ភូមិផ្សារតាកោ ឃុំរកាក្នុង ក្រុងដូនកែវ ខេត្តតាកែវ ដែលមានលោកបូជាចារ្យ ឡិឈិប៉ាន ឆាលស៍ ជាបូជាចារ្យទទួលខុសត្រូវ និងលោកបូជាចារ្យ ចន ពេញ ជាបូជាចារ្យជំនួយ។
ថ្លែងក្នុងធម្មទេសនា លោកអភិបាលអូលីវីយ៉េ បានលើកឡើងដោយរំលឹកថា ៖ «កម្មវិធីនៅថ្ងៃនេះជាកម្មវិធីសម្ភោធសាលប្រជុំ ជាកន្លែងមួយដើម្បីជួបជុំគ្នាអធិដ្ឋាន ហើយនៅថ្ងៃអនាគតយើងនឹងសាងសង់ព្រះវិហារមួយយ៉ាងពិតប្រាកដសម្រាប់ព្រះសហគមន៍គ្រួសារដ៍វិសុទ្ធនាខេត្តតាកែវនេះ»។
លោកអភិបាលបានបន្តថា ៖ «ព្រះសហគមន៍ដែលមានជីវិតជាព្រះសហគមន៍ដែលអធិដ្ឋានរួមគ្នា ជាព្រះសហគមន៍បម្រើបងប្អូនឯទៀតៗ ជាព្រះសហគមន៍បន្តអប់រំជំនឿតៗគ្នាហើយព្រះសហគមន៍ដែលមានជីវិតយ៉ាងពិតប្រាកដ គឺបងប្អូនទាំងអស់ចូលរួមគ្រប់សកម្មភាពតាមអំណោយទានដែលយើងបានទទួលពីព្រះជាម្ចាស់»។
នាឱកាសនោះដែរ លោកអភិបាលរូបនេះ ក៏បានបញ្ជាក់ផងដែរថា វាជាពេលវេលាពិសេសសម្រាប់ខេត្តតាកែវទាំងមូលដែលព្រះជាម្ចាស់ប្រទានពរដល់សាលដ៍ធំដែលប្រើដើម្បីសូត្រធម៌ ប្រជុំ ទោះមិនទាន់មានព្រះវិហារ ប៉ុន្តែទាំងនេះជាសញ្ញាសម្គាល់នៃព្រះសហគមន៍នៅទីរួមខេត្តមានជីវិតដែលបានចាប់ផ្ដើមតាំងពីឆ្នាំ២០១០នៅក្នុងព្រះសហគមន៍គ្រួសារដ៍វិសុទ្ធនេះ។
ជាមួយគ្នានោះ លោកអភិបាល អូលីវីយ៉េ ក៏បានស្នើឱ្យគ្រីស្តបរិស័ទទាំងអស់ធ្វើខ្លួនជាថ្មដែលមានជីវិតសម្រាប់ព្រះសហគមន៍ដោយធ្វើដំណើររួមជាមួយនឹងពុទ្ធបរិស័ទ និងឥស្លាមបរិស័ទក្នុងការកសាងជីវិតមួយដែលរស់នៅប្រកបដោយសេចក្ដីស្រលាញ់ សេចក្ដីសុខសាន្តនឹងកំពុងធ្វើដំណើរជាមួយព្រះយេស៊ូដែលជាផ្លូវ ជាជីវិត ជាសេចក្ដីពិត ដើម្បីស្គាល់ព្រះបិតាបន្ថែម និងដើម្បីទទួលជីវិតអស់កល្បជានិច្ច។
លោកបូជាចារ្យ ឡិឈិប៉ាន ឆាលស៍ ដែលជាបូជាចារ្យទទួលខុសត្រូវមណ្ឌលសកម្មភាពតាកែវ នេះបានប្រាប់ថា លោកពិតជាមានអំណរសប្បាយ ពិសេសនៅពេលបានសម្ភោធអគារនេះដែលជាកន្លែងប្រជុំ និងកន្លែងអធិដ្ឋានមួយនេះ។
លោកបានបន្តថា កាលពីមុនព្រះសហគមន៍មានអគារមួយតូចដែលអាចទទួលមនុស្សបានប្រហែលជា១០នាក់ដោយគ្រីស្តបរិស័ទរីកចម្រើនទៅៗតាមរយៈជំនឿ។ ដូច្នេះព្រះសហគមន៍បានរិះគិតទៅលើចំនុចនេះដែលចាប់ផ្ដើមសាងសង់បន្ទប់អធិដ្ឋាន ឬសាលប្រជុំដោយបានសុំការអនុញ្ញាតពីលោកអភិបាលនឹងជំនួយពីសប្បុរសជនដើម្បីសាងសង់អគារនេះឡើង។
ជាមួយគ្នានេះលោក ឯម និល អាយុ៦០ឆ្នាំ ជាប្រធានគណៈកម្មាព្រះសហគមន៍ និងជាគ្រីស្តបរិស័ទជំនាន់ទី១បានឱ្យដឹងដែរថា លោកចាប់ផ្ដើមមានជំនឿតាំងពីឆ្នាំ២០០៧មកម្លេះ ហើយដំណើរដែលរកទីតាំង និងស្គាល់កន្លែងព្រះជាម្ចាស់គឺយូរបន្តិច ប៉ុន្តែដោយបានស្គាល់ព្រះសហគមន៍មួយនៅភូមិចំការទៀង។
លោកបានប្រាប់ថា ៖ «ខ្ញុំសូមអរគុណដល់ព្រះជាម្ចាស់ដែលបានប្រទានពរ និងសូមផ្ដាំផ្ញើដល់បងប្អូនជំនាន់ក្រោយដើម្បីក្លាយខ្លួនជាបុត្រធីតារបស់ព្រះអង្គនោះយើងទាំងអស់គ្នាត្រូវស្វែងយល់អំពីព្រះវត្តមានព្រះជាម្ចាស់ទៅតាមព្រះបន្ទូលបានអប់រំយើងម្នាក់ៗឱ្យយើងស្គាល់ផ្លូវរបស់ព្រះអង្គដើម្បីទៅដល់ស្ថានបរមសុខនៅថ្ងៃខាងមុខ»។
សូមបញញ្ជាក់ផងដែរថា សព្វថ្ងៃនេះព្រះសហគមន៍គ្រួសារដ៍វិសុទ្ធមានគ្រីស្តបរិស័ទ ទទួលពិធីជ្រមុជទឹកចំនួន៤៣នាក់ ទោះបីជាមិនទាន់មានព្រះវិហារ ប៉ុន្តែបងប្អូនដែលបានជឿ ដែលបានផ្ញើខ្លួនទាំងស្រុងលើព្រះជាម្ចាស់ពិតជារក្សាជំនឿបានយ៉ាងរឹងម៉ាំ ហើយមានបងប្អូនដែលកំពុងឈ្វេងយល់ចំនួន៥នាក់ដែលត្រៀមធ្វើជំហានទីមួយដើម្បីក្លាយជាគ្រីស្តបរិស័ទនៅថ្ងៃខាងមុខផងដែរ៕
