មេក្រុមកាយឫទ្ធិប្រមាណជា១១០នាក់ ដែលមកពី៩មណ្ឌលសកម្មភាពក្នុងភូមិភាគភ្នំពេញបានចូលរួមកម្មវិធីបោះជំរំដើម្បីសិក្សាបន្ថែមអំពីរបៀបដឹកនាំកូនក្រុមកាយឫទ្ធិរបស់ខ្លួននៅតាមព្រះសហគមន៍នីមួយៗ ដែលកម្មវិធីនេះរៀបចំឡើងដោយ ការិយាល័យយុវជន ជំទង់និងកុមារភូមិភាគភ្នំពេញ នៅព្រះសហគមន៍សន្តីម៉ារីញញឹមចំការទៀង ក្នុងខេត្តតាកែវ កាលពីថ្ងៃទី០១-០៣ ខែធ្នូ។
លោក ស៊ាន់ សារឿន ជាអ្នកសម្របសម្រួលការិយាល័យយុវជន ជំទង់ និងកុមារភូមិភាគភ្នំពេញឱ្យដឹងថា កម្មវិធីនេះបង្កើតឡើង ដើម្បីបណ្ដុះបណ្ដាលពង្រឹងសមត្ថភាព បង្រៀនវិធីសាស្ត្រនៃគំនិតច្នៃប្រឌិត ចែកចាយបទពិសោធ និងរបៀបប្រើប្រាស់សៀវភៅ«ខ្ញុំអាចធ្វើបាន»សម្រាប់ឆ្នាំ២០២៤ ដើម្បីឱ្យពួកគាត់មានសមត្ថភាពគ្រប់គ្រាន់ទៅបង្រៀនអប់រំដល់កុមារកាយឫទ្ធិនៅតាមព្រះសហគមន៍រៀងៗខ្លួន។
លោកបន្តថា សៀវភៅនេះបានបញ្ចូលខ្លឹមសារមេរៀនទៅតាមបរិបទឆ្នាំនីមួយៗហើយសម្រាប់ភាគទី៥នេះ យើងបានបញ្ចូលការសង្គ្រោះបឋម វប្បធម៌ទូទៅខ្លះៗ និងប្រវត្តិសាស្រ្តមួយចំនួនក្នុងប្រទេស។
លោកសង្ឃឹមថាកម្មវិធីរបស់កាយឫទ្ធិនឹងបន្តជួយដល់កុមារឱ្យមានអំណរសប្បាយ មានស្នាមញញឹម ទទួលបានការអប់រំ សុជីវធម៌ សីលធម៌ តាមរយៈខ្លឹមសារមេរៀនមួយចំនួនដែលយើងបានផ្ដល់ឱ្យពួកគាត់។
ក្រោយពីការសិក្សានិងចែកបទពិសោធដល់គ្នាទៅវិញទៅមក នៅថ្ងៃបញ្ចប់នៃកម្មវិធី តំណាងមេកាយឫទ្ធិតាមក្រុមនីមួយៗ បានបង្រៀនសាកល្បងទៅតាមមេរៀនដែលបានគ្រោងទុកក្នុងសៀវភៅ ដោយមានបញ្ជូល ចម្រៀងកាយវិការ និងល្បែងកំសាន្តផងដែរ។ បន្ទាប់មក ពួកគាត់បានសូត្រពាក្យសច្ចាទាំង១០របស់ក្រុមកាយឫទ្ធិដើម្បីរំឭកពីតួនាទីរបស់ពួកគាត់។
ពេជ្រ ស្រីពុំ អាយុ១៨ឆ្នាំ មកពីព្រះសហគមន៍គិរីវង់ ក្នុងខេត្តតាកែវ បាននិយាយថា ឆ្លងតាមអ្វីដែលនាងបានទទួលរយៈពេល៣ថ្ងៃនេះ នាងនឹងខិតខំជួយដល់កូនក្រុមកាយឫទ្ធិដែលជួបជុំគ្នានៅព្រះសហគមន៍រៀងរាល់ថ្ងៃអាទិត្យដែលមានកូនកាយឫទ្ធិប្រមាណ៦០ទៅ៧០នាក់ យល់ដឹងបន្ថែមអំពីមេរៀនសម្រាប់ឆ្នាំ២០២៤។
ជាមួយគ្នានេះ យុវ័ន ទេព សីហា អាយុ១៧ឆ្នាំ ជាមេកាយឫទ្ធិមកពីព្រះសហគមន៍សន្តីតេរេសាព្រៃកប្បាសខេត្តតាកែវ បាននិយាយថា រយៈពេល៣ថ្ងៃនេះធ្វើឱ្យគាត់ទទួលបានចំណេះដឹងក្នុងការបង្រៀនក្មេងៗ ណែនាំក្មេងៗទៅរកផ្លូវមួយដែលជាទំពាំងស្នងឫស្សីនិងការសហការគ្នាជាក្រុម។
លោកបន្តថា «អ្វីដែលខ្ញុំទទួលបានពីកម្មវិធី ខ្ញុំនឹងប្ដេជ្ញាចិត្តថា នឹងណែនាំក្មេងៗឱ្យស្គាល់អ្វីល្អ អ្វីអាក្រក់ ណែនាំឱ្យពួកគាត់ដើរលើផ្លូវមួយដែលជួយដល់សង្គម ជួយដល់ប្រទេសជាតិដើម្បីឱ្យប្រទេសជាតិយើងរីកចម្រើនតទៅមុខ»។
សីហាបន្តថា នៅព្រះសហគមន៍របស់គាត់ មេកាយឫទ្ធិនិងកូនកាយឫទ្ធិ មានកម្មវិធីសួរសុខទុក្ខចាស់ជរា អ្នកជំងឺ ក្មេងកំព្រា នៅភូមិនានា ដោយក្នុងមួយខែមានចំនួន៤ទៅ៥គ្រួសារ ហើយគាត់ក៏សូមឱ្យមេកាយឫទ្ធិទាំងអស់ដាក់ចិត្តតស៊ូបង្រៀនក្មេងៗនៅតាមព្រះសហគមន៍ សូមឱ្យពួកគាត់មានកម្លាំងកាយចិត្តគ្រប់គ្រាន់ទោះបីជាពេលខ្លះយើងជួបឧបសគ្គច្រើន មានអ្វីដែលរារាំងយើង មិនអាចឱ្យយើងអាចបន្តទៅមុខបានប៉ុន្តែយើងនៅតែមិនបោះបង់សេចសង្ឃឹមនឹងការតស៊ូដែលបានដាក់ខ្លួនបង្រៀនដល់ក្មេងៗប្រៀបដូចបានបម្រើព្រះជាម្ចាស់ដែរ។
ក្រុមមេកាយឫទ្ធិនៅក្នុងភូមិភាគភ្នំពេញបច្ចុប្បន្នមានចំនួន១៦០នាក់ ដែលកំពុងដឹកនាំក្រុមកុមារៗនៅតាមព្រះសហគមន៍នីមួយៗក្នុងភូមិភាគភ្នំពេញ។ ក្រុមកាយឫទ្ធិត្រូវបានបង្កើតឡើងក្នុងឆ្នាំ២០០៤ ដោយលោកបូជាចារ្យអូលីវីយ៉េ ជ្មីតហស្លេ ដើម្បីអប់រំយុវជន ជំទង់ និងកុមារតូចក្នុងភូមិឲ្យស្គាល់ពីតម្លៃនៃជីវិតនិងចូលរួមកសាងសង្គមរបស់ពួកគេនាពេលអនាគត៕
ដោយ ចាន់ម៉ានុត
