ក្នុងថ្ងៃបុណ្យព្រះយេស៊ូសម្តែងឋានៈរបស់ព្រះអង្គ លោកអភិបាលអូលីវីយ៉េ ជ្មីតហស្លេ ជាអភិបាលនៃភូមិភាគភ្នំពេញបានប្រកាសបើកឆ្នាំមហាករុណាទិគុណសម្រាប់ភូមិភាគភ្នំពេញ កាលពីថ្ងៃទី៤ ខែមករានៅមជ្ឈមណ្ឌលសកម្មភាពសម្រាប់ភូមិភាគក្នុងរាជធានីភ្នំពេញ ដែលមានបូជាចារ្យបម្រើការងារក្នុងតំបន់ និងគ្រីស្តបរិស័ទចូលរួមប្រមាណ៥០០នាក់ដែលជាតំណាងមកពីព្រះសហគមន៍នានាក្នុងភូមិភាគ។
ឆ្នាំមហាករុណាទិគុណ ជាព្រឹត្តិការណ៍ដ៏អស្ចារ្យដែលបូជនីយេសក៍ម្នាក់ៗ អាចទទួលបានបទពិសោធអំពីធម៌មេត្តាករុណាឥតព្រំដែនរបស់ព្រះជាម្ចាស់ ណែនាំឲ្យយើងអាចផ្សះផ្សារជាមួយព្រះជាម្ចាស់និងទទួលបានការលើកលែងទោសឲ្យរួចពីបាបពេញលក្ខណៈ។
ឆ្នាំមហាករុណាទិគុណ ត្រូវបានបង្កើតឡើងរៀងរាល់២៥ឆ្នាំម្ដង តួយ៉ាងនៅឆ្នាំ២០០០ គ្រីស្តបរិស័ទបានទទួលឆ្នាំមហាករុណាទិគុណនេះ ប៉ុន្តែ ក្នុងឆ្នាំ២០១៦ សម្តេចប៉ាបហ្វ្រង់ស៊ីស្កូបានបង្កើតឆ្នាំមហាករុណាទិគុណនេះជាលក្ខណៈពិសេស ហើយក្នុងឆ្នាំនេះ កាលពីថ្ងៃទី២៤ខែធ្នូឆ្នាំ២០២៤កន្លងទៅ យើងក៏មានឱកាសចូលរួមម្តងទៀត ដែលផ្តោតសំខាន់លើ «សេចក្តីសង្ឃឹម»ដែលបានប្រកាសបើកដោយសម្តេចប៉ាបហ្វ្រង់ស៊ីស្កូ។
លោកអភិបាលអូលីវីយ៉េបានប្រកាសយកកន្លែងចំនួន៤ ធ្វើជាទីសក្ការដ្ឋាននៃបូជនីយចរ គឺមានទីសក្ការដ្ឋានព្រះនាងម៉ារីនៃទន្លេមេគង្គនៅព្រះវិហារក្សត្រីនៃសន្តិភាព(អរិយក្សត្រ) ទីសក្ការដ្ឋានមរណសាក្សីនៅកម្ពុជានៃព្រះវិហារតូចសន្តយ៉ូសែប(ផ្សារតូច) ខ្លោងទ្វារដ៏វិសុទ្ធនៅឯព្រះវិហារសន្តសិលានិងសន្តប៉ូល និងព្រះវិហារសន្តមីកាអែលក្រុងព្រះសីហនុ ហើយនៅកន្លែងនីមួយៗ មានលោកបូជាចារ្យទទួលខុសត្រូវណែនាំនិងធ្វើអគ្គសញ្ញាលើកលែងទោស។
លោកអភិបាលអូលីវីយ៉េមានប្រសាសន៍ថា៖ «នៅក្នុងឱកាសនេះ មិនមែនត្រឹមតែជាការលើកលែងទោស រំដោះបាប ប៉ុន្តែលើសពីនេះទៅទៀត ផ្លែនៃអំពើបាបយើងយកចេញទាំងអស់ យើងរួចខ្លួន»។
ក្នុងនោះបូជនីយេសក៍ម្នាក់ត្រូវមានកូនសៀវភៅតូចមួយ ដែលលោកអភិបាលអូលីវីយ៉េ ចាត់ទុកថាជាលិខិតឆ្លងដែនទៅកាន់សេចក្តីសង្ឃឹម ដែលមានពន្យល់អំពីរបៀបរៀបចំដំណើរបូជនីយចរ និងរបៀបអធិដ្ឋាន ហើយណែនាំឲ្យគ្រីស្តបរិស័ទម្នាក់ៗ មើលឃើញកំពូលនៃព្រះហឫទ័យប្រណីសន្តោសរបស់ព្រះជាម្ចាស់ចំពោះខ្លួនឯង។
ទន្ទឹមគ្នានេះ គ្រីស្តបរិស័ទក៏មានឱកាស ធ្វើកិច្ចការធម៌មេត្តាករុណាចំនួន៧ ខាងរូបកាយ រួមមាន ផ្តល់អាហារដល់អ្នកខ្វះខាត ផ្តល់ទឹកដល់អ្នកស្រេក ផ្តល់សម្លៀកបំពាក់ដល់អ្នកគ្មាន ជួយអាសារជនបរទេស សួរសុខទុក្ខអ្នកជាប់ឃុំឃាំង សួរសុខទុក្ខអ្នកជំងឺ និងជួយធ្វើបុណ្យបញ្ចុះសព។
ជាមួយគ្នានេះ លោកអភិបាលគ្រោងនឹងរៀបចំឲ្យមានទិវានានាជាលក្ខណៈភូមិភាគ និងក្នុងតំបន់មណ្ឌលសកម្មភាព ក្នុងនោះរួមមាន ទិវាសម្រាប់បូជាចារ្យ ទិវាសម្រាប់បព្វជិត-ជិតា ទិវាសម្រាប់យុវជន ទិវាសម្រាប់គ្រូអប់រំជំនឿ ទិវាសម្រាប់គ្រួសារ ទិវាសម្រាប់ចាស់ជរា ទិវាសម្រាប់អន្តរសាសនា ទិវាសម្រាប់សិស្សានុសិស្សជាដើម។
ក្នុងពិធីនេះដែរ លោកអភិបាលសូមអញ្ជើញបងប្អូន ជាគ្រីស្តបរិស័ទនៅក្នុងភូមិភាគភ្នំពេញទាំងអស់ ទាំងលោកបូជាចារ្យ បព្វជិត-ជិតា ការិយាល័យទាំងអស់ ឲ្យមើលឃើញសញ្ញានិងពន្លឺនៃសេចក្ដីសង្ឃឹម ដើម្បីយកចិត្តទុកដាក់ធ្វើកិច្ចការក្នុង៧វិស័យ គឺមាន ទីមួយអត្តសញ្ញាណជាកាតូលិក គឹត្រូវធ្វើយ៉ាងណាដើម្បីឲ្យម្នាក់ៗចេះចេះរស់នៅនិងអនុវត្តតាមព្រះបន្ទូល ទី២ជាមួយចាស់ជរា គឺយកចិត្តទុកដាក់ដល់ចាស់ដែលគ្មានទីពឹងនិងមានបន្ទុកធ្ងន់ ទី៣ជាមួយអន្តរសាសនាគឺត្រូវមានវិធីទំនាក់ទំនងនិងរស់នៅជាមួយអ្នកកាន់សាសនាផ្សេងៗជាពិសេសពុទ្ធបរិស័ទ ទី៤ទាសករសម័យទំនើប គឺធ្វើយ៉ាងនាឲ្យគ្រីស្តបរិស័ទអាចចៀសផុតពីគ្រឿងញាណនិងធ្វើការងារបោកបញ្ឆោតដែលនាំទុក្ខទោសដល់ខ្លួននិងអ្នកដទៃ ទី៥សុខភាព គឺឲ្យគ្រីស្តបរិស័ទចេះថែរក្សាសុខភាពដើម្បីឲ្យជីវិតមានអំណររីករាយ ទី៦ប្រព័ន្ធផ្សព្វផ្សាយ គឺឲ្យគ្រីស្តបរិស័ទចេះប្រើប្រាស់ប្រព័ន្ធផ្សព្វផ្សាយឲ្យបានត្រឹមត្រូវដើម្បីប្រកាសដំណឹងល្អ និងទី៧បរិស្ថាន គឺឲ្យយើងចេះស្រឡាញ់អ្វីៗដែលជាស្នាព្រះហស្តរបស់ព្រះជាម្ចាស់។
លោកអភិបាលបន្តថា ឲ្យយើងធ្វើដំណើរ ឆ្ពោះទៅសេចក្ដីសង្ឃឹម ដើម្បីឲ្យឆ្នាំមហាករុណាទិគុណ ទៅជាឆ្នាំមួយដែលយើងមានបទពិសោធ អំពីព្រះហឫទ័យព្រះទ័យសន្តោសរបស់ព្រះជាម្ចាស់ដោយណែនាំនិងជំរុញយើងឲ្យ «យើងស្រឡាញ់ថែមទៀត ដើម្បីឲ្យយើងបម្រើថែមទៀត និងឲ្យយើងអធិដ្ឋានថែមទៀត ដើម្បីឲ្យយើងប្រកាសដំណឹងល្អថែមទៀត»។
កម្មវិធីធ្វើបូជនីយចរឆ្ពោះទៅកាន់សេចក្តីសង្ឃឹមសម្រាប់ភូមិភាគភ្នំពេញ នឹងបើកដំណើរការនៅក្នុងខែកុម្ភៈខាងមុខនេះសម្រាប់គ្រីស្តបរិស័ទទាំងអស់ ហើយនឹងបិទបញ្ចប់នៅថ្ងៃទី២៨ ខែធ្នូឆ្នាំ២០២៥នេះ។
