ភ្នំពេញ – លោកអភិបាល អូលីវីយ៉េ អភិបាលព្រះសហគមន៍កាតូលិកកម្ពុជាភូមិភាគភ្នំពេញ បានជំរុញយ៉ាងទទូចដល់គ្រីស្តបរិស័ទទាំងអស់ឲ្យដើរតួនាទីយ៉ាងសកម្មជា “ស្ពាននៃភាតរភាព” និងជា “ទូតនៃសុខសន្តិភាព” នៅក្នុងសង្គម។ ការអំពាវនាវនេះបានធ្វើឡើងក្នុងឱកាសថ្ងៃបុណ្យគោរពព្រះកាយព្រះគ្រីស្ទ កាលពីថ្ងៃទី២២ ខែមិថុនា ឆ្នាំ២០២៥ នៅព្រះសហគមន៍ព្រះកុមារយេស៊ូ បឹងទំពុន។

លោកអភិបាលបានមានប្រសាសន៍ថា ព្រះជាម្ចាស់ត្រូវការមនុស្សនៅលើផែនដីនេះ ដើម្បីកសាងស្ពាននៃភាតរភាព និងជាទូតនៃសុខសន្តិភាព។

លោកអភិបាល អូលីវីយ៉េ បានពន្យល់ថា ការធ្វើជាស្ពាននៃភាតរភាព គឺថាយើងទាំងអស់គ្នាជាបងប្អូន។ លោកបានសង្កត់ធ្ងន់ថា យើងមិនត្រូវការជីកដីដើម្បីធ្វើត្រង់សេ យើងមិនចាំបាច់រៀបចំព្រំដែន ឬបិទទ្វារដាក់គ្នាទៅវិញទៅមកនោះទេ។ ផ្ទុយទៅវិញ យើងត្រូវរកវិធីដើម្បីនឹកឃើញថាយើងជាបងប្អូន ដោយមិនប្រកាន់សញ្ជាតិ ឬប្រភពដើម។

លោកអភិបាលបានបន្ថែមថា៖ «យើងដឹងថា យើងជាប្រជារាស្រ្តរបស់ព្រះជាម្ចាស់ យើងជាមនុស្សដែលរស់នៅលើផែនដីនេះ យើងមានព្រះបិតាតែមួយ ដែលស្រឡាញ់យើង ដែលបានបង្កើតយើងឲ្យរស់នៅជាក្រុមគ្រួសារ»។ លោកបានលើកឡើងថា បេសកកម្ម និងតួនាទីរបស់គ្រីស្តបរិស័ទ គឺត្រូវបង្កើតភាតរភាពនៅកន្លែងដែលខ្លួនរស់នៅ។ លោកបានរិះគន់ចំពោះទង្វើនិយាយដើម បង្កើតរឿង ឬស្អប់គ្នាទៅវិញទៅមក ដែលមិនបានជួយអ្វីឡើយ។ លោកអភិបាលបានសង្កត់ធ្ងន់ថា ទោះបីជាមានការមើលងាយ ការនិយាយដើម ឬការចង់ធ្វើបាបក៏ដោយ ក៏ត្រូវប្រកាន់ខ្ជាប់នូវព្រះបន្ទូលរបស់ព្រះយេស៊ូដែលថា៖ «ស្រឡាញ់ និងស្រឡាញ់ទៀត ស្រឡាញ់រហូតដល់ទីបញ្ចប់»។

មួយវិញទៀត លោកអភិបាលមានប្រសាសន៍ថា ព្រះជាម្ចាស់ត្រូវការយើងធ្វើជាទូតនៃសុខសន្តិភាព។ លោកបានលើកឡើងពីស្ថានការណ៍ពិភពលោកបច្ចុប្បន្ន ដែលពោរពេញទៅដោយជម្លោះ និងសង្គ្រាម ដោយយើងងាយនឹងឃើញសង្គ្រាមតាមរយៈទូរស័ព្ទ ទូរទស្សន៍ ឬឮតាមវិទ្យុ។

លោកអភិបាលបានរៀបរាប់ពីទិដ្ឋភាពដ៏ឈឺចាប់នៃការសម្លាប់មនុស្សស្លូតត្រង់ កុមារ ការបំផ្លិចបំផ្លាញលំនៅឋាន សាលារៀន មន្ទីរពេទ្យ និងការដាច់ស្បៀងអាហារនៅក្នុងតំបន់ជម្លោះ។ លោកក៏បានលើកពីការយកចិត្តទុកដាក់របស់សម្តេចប៉ាប ហ្វ្រង់ស៊ីស្កូ ដែលបានទូរស័ព្ទទៅព្រះសហគមន៍កាតូលិកតូចមួយនៅហ្គាហ្សា ដើម្បីសួរសុខទុក្ខលោកឪពុក និងគ្រីស្តបរិស័ទដែលរងគ្រោះដោយសារសង្គ្រាម។

លោកអភិបាលបានលើកទឹកចិត្តគ្រីស្តបរិស័ទថា យើងម្នាក់ៗមានសេចក្ដីសុខសន្តិភាព «អរគុណសន្តិភាព» ។ ប៉ុន្តែ ត្រូវគិតអំពីរបៀបធ្វើយ៉ាងណាដើម្បីក្លាយជាទូតនៃសុខសន្តិភាពនៅគ្រប់ទីកន្លែង។ លោកបានរំលឹកថា ព្រះយេស៊ូតែងតែប្រទានពរដោយពាក្យថា៖ «សូមសេចក្តីសុខសាន្តគង់នៅជាមួយបងប្អូន»។

លោកអភិបាល អូលីវីយ៉េ បានបញ្ជាក់ថា សូមឲ្យសញ្ញានៃសេចក្តីសុខសាន្តនេះ មិនមែនត្រឹមតែនៅក្នុងព្រះវិហារ ឬបរិវេណព្រះសហគមន៍ប៉ុណ្ណោះទេ ប៉ុន្តែត្រូវផ្សព្វផ្សាយទៅគ្រប់ទីកន្លែងដែលគ្រីស្តបរិស័ទរស់នៅក្នុងសង្គមបច្ចុប្បន្ននេះ៕