យុវជន៨រូបបានទទួលអគ្គសញ្ញាជ្រមុជទឹក ដើម្បីកែប្រែជីវិតថ្មីដោយមានជំនឿលើព្រះជាម្ចាស់ និងរួមរស់ជាមួយព្រះគ្រីស្ត។
កម្មវិធីនេះធ្វើនៅព្រះវិហារសន្តសិលានិងសន្តប៉ូល នៃមណ្ឌលសកម្មភាពភ្នំពេញថ្មី នាព្រឹកថ្ងៃទី៦ ខែកញ្ញា ឆ្នាំ២០២០កន្លងមកនេះ ដែលដឹកនាំដោយលោកបូជាចារ្យ សិលា សួន ហង្សលី និងមានគ្រីស្តបរិស័ទជាច្រើនចូលរួមអបអរសាទរផងដែរ។
នៅក្នុងពិធីបុណ្យអភិបូជា នៃអគ្គសញ្ញាជ្រមុជទឹកនេះ លោកបូជាចារ្យ លី បានណែនាំគ្រីស្តបរិស័ទទាំងអស់ ជាពិសេសយុវជនដែលទទួលអគ្គសញ្ញានេះឱ្យយកចិត្តទុកដាក់ចំពោះមុខងាររបស់ខ្លួនជាគ្រីស្តបរិស័ទ ជាពិសេសលោកបានសង្កត់ធ្ងន់ទៅលើបីចំណុចគឺ៖ ព្យាការី៖ នៅពេលដែលមាននរណាម្នាក់ធ្វើអំពើបាប សូមយកពេលវេលាទៅដាស់តឿនគាត់ដោយសេចក្ដីស្រឡាញ់។
លោកបន្តថា ៖ «ចំនុចទី២ សូមឱ្យយើងមានសេចក្ដីស្រឡាញ់ពិតប្រាកដ ដោយនឹកដល់គ្រប់វិន័យរបស់ព្រះយេស៊ូ និងគ្រប់អំពើដែលយើងធ្វើចំពោះអ្នកដទៃ ព្រោះថាបើធ្វើដោយសេចក្ដីស្រឡាញ់យើងនឹងទទួលផលផ្លែដ៏ប្រសើរសម្រាប់ខ្លួនយើង និងសម្រាប់អ្នកដទៃផងដែរ»។
លោកបូជាចារ្យ សិលា សួន ហង្សលី បានលើកឡើងទៀតថា ចំនុចទី៣ គឺលោកសូមឱ្យយកចិត្តទុកដាក់ចំពោះរបៀបនៃការអធិដ្ឋាន៖ ប្រសិនបើអធិដ្ឋានក្នុងព្រះនាមព្រះយេស៊ូ នោះព្រះជាម្ចាស់នឹងស្ដាប់[យើង]ច្រើនជាងអធិដ្ឋានក្នុងនាមខ្លួនឯង។
បន្ទាប់ពីធម្មទេសនា លោកបូជាចារ្យ ហង្សលី ដឹកនាំគ្រីស្តបរិស័ទទាំងអស់លុតជង្គង់ទូលអង្វរព្រះជាម្ចាស់តាមរយៈសន្តបុគ្គលទាំងឡាយ រួចសួរបញ្ជាក់បេក្ខជនអំពីការប្ដេជ្ញាចិត្តក្នុងការលះបង់ចោលមារសាតាំង និងប្រកាសជំនឿរបស់ខ្លួននៅមុខអាសនៈ។
យុវជនទាំង៨រូប បានទទួលអគ្គសញ្ញាជ្រមុជទឹក ក្នុងព្រះនាម ព្រះបិតា ព្រះបុត្រា និងព្រះវិញ្ញាណដ៏វិសុទ្ធ។ បន្ទាប់មកលោកបូជាចារ្យលាបប្រេងគ្រីស្មាដើម្បីផ្ដល់កម្លាំងនៃជំនឿ ហើយស្នើដល់បងធម៌បំពាក់អាវស ដែលជានិម្មិតសញ្ញានៃការពាក់ព្រះយេស៊ូដល់អស់អ្នកដេលទើបតែទទួលពិធីជ្រមុជទឹកថ្មីៗ រួចប្រគល់ទានដែលបានចម្លងពន្លឺពីទានជ័យ ដើម្បីបង្ហាញថាគ្រីស្តបរិស័ទថ្មីទទួលពន្លឺព្រះគ្រីស្តនៅជាមួយពួកគេផងដែរ។
យុវជន ស៊ុន ឌី ជាគ្រីស្តបរិស័ទដែលទើបតែទទួលអគ្គសញ្ញាជ្រមុជទឹកនេះ បាននិយាយថា ក្រោយពីទទួលការអប់រំជំនឿតាមរយៈបណ្ដាញសង្គមមក លោកចង់ទទួលជឿលើព្រះយេស៊ូយ៉ាងពិតប្រាកដហើយក៏ចង់ដឹងពីដំណើរជីវិតរបស់លោកក្នុងការដើរតាមព្រះយេស៊ូ។
លោកបានថ្លែងថា ៖ «កត្តាសំខាន់មួយទៀត ដែលធ្វើឱ្យខ្ញុំពិតជាចង់ទទួលអគ្គសញ្ញាជ្រមុជទឹក អាចជួយយើងឱ្យរួចពីអំបើបាប និងក្នុងនោះមានឃ្លាមួយក្នុងធម៌ឱព្រះបិតាបានធ្វើឱ្យខ្ញុំមានការចាប់អារម្មណ៍ជាខ្លាំងគឺ សូមប្រទានអាហារឱ្យយើងខ្ញុំនៅថ្ងៃនេះ។ ខ្ញុំយល់ថាអាហារនចែកជាពីរ គឺផ្លូវកាយ និងវិញ្ញាណ គឺព្រះកាយនិងព្រះលោហិតដែលអាចជួយរំដោះបានស្រាល និងមិនឱ្យប្រព្រឹត្តបាបធ្ងន់»។
យុវជន ស៊ុន ឌី បញ្ជាក់ទៀតថា ព្រះបន្ទូលមានសារៈសំខាន់សម្រាប់រូបលោក ព្រោះព្រះបន្ទូលជួយដឹកនាំជីវិតដោយលើកទឹកចិត្តលោកនៅពេលលោកពិបាកចិត្ត។ ម្យ៉ាងទៀតនៅថ្ងៃអនាគតខាងមុខនេះ យុវជនរូបនេះចង់ក្លាយជាអ្នកអប់រំជំនឿមួយរូបនៅក្នុងព្រះសហគមន៍នេះ៕
