តាមសេចក្តីរាយការណ៍ព័ត៌មានបរទេស បានឲ្យដឹងថា កងកំលាំងយោធាប្រទេសមីយ៉ានម៉ា បានធ្វើ «រដ្ឋប្រហារ»ដណ្តើមអំណាចពីរដ្ឋាភិបាលស៊ីវិល របស់លោកស្រី អ៊ុងសាន ស៊ូជី ដែលឈ្នះឆ្នោត កាលពេលវេលាអធ្រាត្រឆ្លងចូលព្រឹកថ្ងៃចន្ទទី០១ ខែកុម្ភះ ឆ្នាំ២០២១នេះ។
ប្រទេសមីយ៉ានម៉ា បានរៀបចំការបោះឆ្នោតសកលកាលពីថ្ងៃទី០៨ ខែវិច្ឆិកា ឆ្នាំ២០២០ ហើយលទ្ធផល ឈ្នះឆ្នោតបានទៅលើ គណបក្សសម្ព័ន្ធជាតិដើម្បីប្រជាធិបតេយ្យ របស់លោកស្រី អ៊ុងសាន ស៊ូជី។ លទ្ធផលនេះមានការសាទរ ពីសហគមន៍អន្តរជាតិផងដែរ។ ប៉ុន្តែ ខាងក្រុមយោធា បានបដិសេធ មិនទទួលយកលទ្ធផលឆ្នោតនេះទេ ហើយចោទថាការបោះឆ្នោតមិនតម្លាភាព និងមានបន្លំសន្លឹកឆ្នោត ។ ក្រុមនេះបានតវាតាមផ្លូវតុលាការផង ក៏មិនឈ្នះផងដែរ។ ចុងក្រោយក្រុមយោធាធ្វើ «រដ្ឋប្រហារ» បានចាប់ខ្លួន លោកស្រី អ៊ុងសាន ស៊ូជី រួមនឹងឥស្សរជនមួយចំនួនទៀតឃុំខ្លួន។ ។ ក្រុមយោធា បានលើក អនុប្រធានាធិបតីឲ្យឡើងជាប្រធានាធិបតីបណ្តោះអាសន្ន និងបានប្រកាសដាក់ ប្រទេសនេះទាំងមូលក្នុងគ្រាមានអាសន្នរយៈពេលមួយឆ្នាំ។
នេះជាសភាពការណ៍ប្រែប្រួលថ្មីគួរឲ្យព្រួយបារម្មណ៍អំពីស្ថេរភាពសន្តិសុខ និងសន្តិភាពក្នុងតំបន់ និងសហគមន៍អាស៊ាន។
