នាថ្ងៃទី៤ ខែកុម្ភៈ ឆ្នាំ២០២១ នៅព្រះវិហារសន្តយ៉ូសែបផ្សារតូចនៃព្រះសហគមន៍កាតូលិកភូមិភាគភ្នំពេញ បានប្រារព្ធកម្មវិធី «អធិដ្ឋានសម្រាប់ការត្រាស់ហៅពេញមួយយប់លើកទី៩៨» ក្រោមការដឹកនាំពីលោកអីលីវីយ៉េ ជ្មីតអ៊ីស្ល៊ែរ អភិបាលនៃព្រះសហគមន៍កាតូលិកភូមិភាគភ្នំពេញ និងមានការចូលរួមពីគ្រីស្តបរិស័ទផងដែរ។
លោកអភិបាល អូលីវីយ៉េ បានថ្លែងក្នុងឱកាសនោះថា នេះជាវេលាមួយដ៏ល្អដើម្បីសូមព្រះជាម្ចាស់បើកចិត្តគំនិតយុវជនយុវនារីឱ្យដើរតាមព្រះជាម្ចាស់និងឱ្យមើលឃើញពីការត្រាស់ហៅរបស់ព្រះអង្គ។
នៅក្នុងពិធីបុណ្យអភិបូជាបើកកម្មវិធីអធិដ្ឋាននេះ លោកអភិបាលបានណែនាំគ្រីស្តបរិស័ទទាំងអស់នៅក្នុងធម្មទេសនាឱ្យយកចិត្តទុកដាក់ស្ដាប់ព្រះបន្ទូលរបស់ព្រះជាម្ចាស់។ លោកបានមានប្រសាសន៍ថា៖ «ប្រសិនបើយើងផ្ទាល់ខ្លួនមិនស្ដាប់ព្រះបន្ទូលរបស់ព្រះជាម្ចាស់ តើធ្វើដូចម្ដេចនឹងអាចឆ្លើយតបបាន?»
លោកអភិបាលរូបនេះបានផ្តល់នូវអនុសាសន៍សំខាន់ចំនួន៤ដើម្បីដើរតាមព្រះជាម្ចាស់ គឺទី១ គ្រប់គ្នានៅជិតព្រះជាម្ចាស់ដែលមានឫទ្ធានុភាពសព្វប្រការ មិនវិនិច្ឆ័យធ្វើឱ្យធ្លាក់ទឹកចិត្ត និងអស់សង្ឃឹម។ តែផ្ទុយមកវិញ ដើម្បីណែនាំឱ្យចូលទៅក្នុងព្រះពន្លឺរបស់ព្រះអង្គ ដោយស្គាល់អ្វីល្អអ្វីអាក្រក់ និងប្រកាសដំណឹងល្អឱ្យគេកែប្រែចិត្តគំនិត។
លោកបន្តទៀតថា ចំណុចទី២គឺ វិញ្ញាណក្ខន្ធរបស់សន្តសន្តី ដែលដើរតាមព្រះជាម្ចាស់ គឺជាគំរូពិសេសនៅក្នុងការយកចិត្តទុកដាក់ស្រឡាញ់ព្រះជាម្ចាស់ និងជាវិញ្ញាណក្ខន្ធអ្នកសុចរិត។ លោកអភិបាល អូលីវីយ៉េ លើកឡើងថា ៖ «ទី៣ នៅពេលយើងដើររកព្រះជាម្ចាស់ គឺយើងចូលមកស្ពាននៃសម្ព័ន្ធមេត្រីថ្មី ដោយមិននៅម្នាក់ឯង តែព្រះជាម្ចាស់បានចាប់កំណើតជាមនុស្ស ដើម្បីធ្វើដំណើរជាមួយយើងឆ្ពោះទៅរកព្រះបិតា»។ ឯអនុសាសន៍ទី៤គឺ ការយល់ពីរបៀបថ្មី ដោយចូលទៅក្នុងវប្បធម៌នៃការយកចិត្តទុដាក់ បង្កើតសមត្ថភាពនៅក្នុងភាតរភាព មានការសប្បាយ និងកសាងចិត្តគំនិតដើម្បីឱ្យមនុស្សយល់ថា [យើង]ជាមនុស្សពេញលក្ខណៈ។
លោកប្រាក់ ប៊ុនហុង បានឱ្យដឹងថា ការអធិដ្ឋានពេញមួយយប់ពិតជាជួយច្រើនសម្រាប់ជីវិតនៃការត្រាស់ហៅ។
លោកបានប្រាប់ថា៖ «ការអធិដ្ឋានបានជួយឱ្យយើងរិះគិតអំពីអ្វីដែលព្រះជាម្ចាស់ត្រាស់ហៅយើង។ ជាពេលវេលាដែលយើងអធិដ្ឋានសម្រាប់ព្រះសហគមន៍របស់យើងដែរ ដោយសារភាគច្រើនព្រះសហគមន៍របស់យើងមានបញ្ហាផ្សេងៗយើងមិនដឹង ប៉ុន្តែយើងនឹកគិតដល់ព្រះសហគមន៍ នឹកគិតដល់គ្រីស្តបរិស័ទរបស់យើងឱ្យេពួកគេខិតខំតស៊ូក្នុងជីវិតទាំងក្នុងគ្រួសារ និងឧបសគ្គផ្សេងៗដែលគាត់ជួប»។
លោកប្រាក់ ប៊ុនហុង បន្ថែមថា លោកក៏អធិដ្ឋានសម្រាប់យុវជន-យុវនារី ដែលកំពុងតែរិះគិត និងជួនកាលពួកគេមិនទាន់រកផ្លូវច្បាស់លាស់នៅក្នុងជីវិត ដូចជាជាគូស្រករ ឬជាបុព្វជិតបុព្វជីតាជាដើម ដើម្បីសូមព្រះវិញ្ញាណបំភ្លឺពួកគេឱ្យមានសេចក្ដីក្លាហានក្នុងការរិះគិត។
លោកបានបញ្ជាក់ថា ៖ «ខ្ញុំក៏រិះគិតអំពីខ្លួនឯងចំពោះការឆ្លើយតបទៅព្រះជាម្ចាស់ក្នុងជីវិតនៃការត្រាស់ហៅឱ្យបានសមរម្យ ដើម្បីបំពេញកិច្ចការរបស់ព្រះអង្គ»។
ជារៀងរាល់ថ្ងៃព្រហស្បតិ៍នៃដើមខែនីមួយៗ ព្រះសហគមន៍កាតូលិកភូមិភាគភ្នំពេញ តែងតែប្រារព្ធកម្មវិធីអធិដ្ឋានសម្រាប់ការត្រាស់ហៅនេះ ដោយផ្លាស់ប្ដូរទីតាំងវិលជុំទៅតាមមណ្ឌលសកម្មភាពទាំង៩របស់ព្រះសហគមន៍ភូមិភាគភ្នំពេញ៕
