សម្ព័ន្ធអង្គការកាតូលិកដើម្បីមេត្តាករុណានិងការអភិវឌ្ឍ (CACD) ដឹកនាំដោយអភិបាលភូមិភាគភ្នំពេញ លោក អូលីវីយ៉េ ជ្មីតហស្ល៊ែរ បានរិះគិតរួមគ្នាអំពីរបៀបយកចិត្តទុកដាក់ក្នុងការកសាងសន្តិភាព ដោយមានការណែនាំពីសារលិខិតរបស់សម្ដេចប៉ាប ហ្វ្រង់ស៊ីស្កូ។
កម្មវិធីនេះ ប្រព្រឹត្តទៅកាលពីខែមករា នៅអង្គការការីតាសកម្ពុជា ក្នុងសង្កាត់ព្រែកហូរ ក្រុងតាខ្មៅ ខេត្តកណ្ដាល ដោយមានអ្នកចូលរូមចំនួន៤០រូប។
លោកគឹម រតនា តំណាងគណៈកម្មការនៃ CACD និងជានាយកប្រតិបត្តិនៃអង្គការការីតាសកម្ពុជាបានថ្លែងស្វាគមន៍និងស្នើឱ្យមានការសហការរួមគ្នាបន្តទៀតដោយរិះគិតពីយន្តការដើម្បីរួមគ្នាគឺធ្វើយ៉ាងណាដើម្បីធ្វើការរួមគ្នាឱ្យបានប្រសើរជាងនេះ ជាពិសេសក្នុងបរិបទកូវីដ១៩នេះ។
នាពិធីនោះដែរ លោកអភិបាលអូលីវីយ៉េ បានរំឭកអំពីអត្ថន័យនៃការប្រទានពរទាំង៥ដែលលោកបានប្រទានពរនៅក្នុងពិធីបុណ្យព្រះយេស៊ូសម្ដែងឋានៈរបស់ព្រះអង្គ។ ពរទាំង៥នោះមាន សូមឱ្យយើងពោរពេញដោយព្រះពរពី ព្រះជាម្ចាស់។ សូមឱ្យឆ្នាំនេះយើងយកព្រះបន្ទូលជាប្រភពនៃជីវិត។ សូមឱ្យយើងយកចិត្តទុកដាក់ថែរក្សា និងចូលយ៉ាងជ្រៅនៅក្នុងអត្តសញ្ញាណរបស់យើងជាគ្រីស្តបរិស័ទខ្មែរ ក្នុងបរិបទថ្មី។ សូមឱ្យយើងយកចិត្តទុកដាក់លើជំនឿរបស់យើង និងសូមឱ្យយើងថែរក្សាសញ្ញាសម្គាល់នៅក្នុងជីវិតរបស់យើង។
លោកអភិបាល ភូមិភាគភ្នំពេញ បន្ថែមទៀតថា ៖ «ជារៀងរាល់ឆ្នាំសម្ដេចប៉ាប់ហ្វ្រង់ស៊ីស្កូសរសេរសំបុត្រផ្ញើជូនពិភពលោក។ សម្ដេចប៉ាបបានឃើញអ្វីដែលបានកើតឡើងក្នុងឆ្នាំ២០២០កន្លងទៅ ជាពិសេសលោកបានយល់ថា អ្វីដែលសំខាន់គឺការបង្កើតវប្បធម៌ថ្មី ដែលនាំឱ្យយើងយកចិត្តទុកដាក់ក្នុងការកសាងសន្តិភាព»។
នៅក្នុងកម្មវិធីនេះផងដែរ ក៏មានការបង្ហាញនូវរបាយការណ៍សកម្មភាពឆ្នាំចាស់កន្លងមក និងបានរិះគិតដោយចែកជាក្រុមតូចៗ ដើម្បីរួមគ្នា អំពីសារលិខិតរបស់សម្ដេចប៉ាប ដោយក្នុងមាន៩ចំណុចយកមកពិចារណាគឺ៖ ១. ការបង្កើតវប្បធម៌ថ្មី ដែលនាំឱ្យយើងយកចិត្តទុកដាក់ក្នុងការកសាងសន្តិភាព។ ២. ការថែរក្សា និងការពារពិភពលោកដែលព្រះជាម្ចាស់បានបង្កើត។ ៣. មើលព្រះជាម្ចាស់ជាគំរូ ដោយព្រះជាម្ចាស់បង្កើតថ្ងៃទី៧ដើម្បីកោតសរសើរព្រះជាម្ចាស់ និងអ្វីដែលព្រះអង្គបានបង្កើត។ ៤. ព្រះបន្ទូល ៥. គ្រីស្តទូតបង្កើតឩបដ្ឋាក ដើម្បីយកចិត្តទុកដាក់លើអ្នកក្រីក្រ។ ៦. យកចិត្តទុកដាក់លើតម្លៃថ្លៃថ្នូររបស់មនុស្ស។ ៧. យកចិត្តទុកដាក់បង្កើតសមគ្គីភាព ដោយធ្វើដំណើរជាមួយគ្នាតរៀងទៅ។ ៨. បង្កើតកម្មវិធីសិក្សានៅក្នុងគ្រួសារ ដើម្បីបង្កើតវប្បធម៌ថ្មី និង៩. សន្តិភាពនឹងមិនប្រសើរបើយើងគ្មានវប្បធម៌នៃការយកចិត្តទុកដាក់៕
