អូលីវីយ៉េ ជ្មីតហស្លេរ អភិបាល ព្រះសហគមន៍កាតូលិកភូមិភាគភ្នំពេញ បានត្រាស់ហៅ បេក្ខជន បេក្ខនារី ចំនួន១០៤នាក់ យ៉ាងឱឡារិក ដើម្បីរៀបចំខ្លួនទទួលអគ្គសញ្ញាជ្រមុជទឹកនារាត្រីបុណ្យចម្លងខាងមុខ។ ពិធីប្រារព្ធ នៅព្រះវិហារសន្តសិលា និងសន្តប៉ូល ភ្នំពេញថ្មី កាលពីល្ងាចថ្ងៃទី២០ កុម្ភៈ ២០២១ ដោយមានការចូលរួមដោយអស់លោកបូជាចារ្យទទួលខុសត្រូវមណ្ឌលសកម្មភាពនីយួយៗនៃព្រះសហគមន៍ភូមិភាគភ្នំពេញ។
តាមប្រសាសន៍របស់លោកអភិបាលអូលីវីយ៉េ បានថ្លែងថា ៖ «ថ្ងៃនេះព្រះសហគមន៍បានត្រាស់ហៅបងប្អូន១០៤នាក់ឱ្យធ្វើជំហានទី២នៃអគ្គសញ្ញាជ្រមុជទឹក ជាពេលវេលាមួយដែលព្រះសហគមន៍ណែនាំបងប្អូនឱ្យ មានការកែប្រែចិត្តគំនិតដើម្បីធ្វើជាមនុស្សថ្មី»។
លោកបន្ថែមថា ព្រះសហគមន៍អញ្ជើញបងប្អូននៅក្នុងការអប់រំពិសេសដោយមាន៤០ថ្ងៃជាពេលវេលា ដើម្បីត្រៀមរៀបចំចិត្តគំនិត ហើយទាំងអស់គ្នាត្រូវកែប្រែចិត្តគំនិតជារៀងរាល់ថ្ងៃដោយដឹងថាគ្រប់គ្នាមានព្រះបន្ទូលរបស់ព្រះជាម្ចាស់នៅជាមួយ មានព្រះយេស៊ូជាផ្លូវ ជាសេចក្ដីពិត និងជាជីវិត ដែលនាំឱ្យមានកែប្រែចិត្តគំនិតបាន។
លើសពីនេះទៅទៀត លោកអភិបាលព្រះសហគមន៍ក៏បានរំឭកផងដែរពីពេលវេលាកូវីដ១៩ ជាពេលវេលាដើម្បីគិតពិចារណាពីតម្លៃជីវិត និងគោលដៅជីវិតរបស់យើង។
លោកអូលីវីយ៉េ៖ «ស្នើសូមគ្រីស្តបរិស័ទទាំងអស់កែប្រែចិត្តគំនិតជារៀងរាល់ថ្ងៃ ដោយរិះគិតថា តើយើងកែអ្វីនៅក្នុងជីវិតរបស់យើង? តើយើងទៅជាមនុស្សថ្មីយ៉ាងដូចម្ដេច? លោកអភិបាលរំឭកផងដែរថា ពិធីជ្រមុជទឹកប្ដូរអ្វីដែលមាននៅខាងក្នុងខ្លួនយើង ដោយមានមនសិកាល្អ គំនិតល្អ ដោយអនុវត្តតាមវិន័យរបស់ព្រះយេស៊ូ ដោយលើកលែងទោស និងយកចិត្តទុកដាក់ចំពោះបងប្អូនឯទៀតៗ»។
ក្នុងនាមព្រះសហគមន៍ភូមិភាគភ្នំពេញ លោកអភិបាលបានអញ្ជើញបេក្ខជនទាំងនោះម្នាក់ម្ដងៗ ដោយមានគូសសញ្ញាឈើឆ្កាងលើបេក្ខជន និងប្រគល់កន្សែងពណ៌ស្វាយ ជានិមិត្តសញ្ញានៃការកែប្រែចិត្តគំនិតដល់បេក្ខជនដើម្បីត្រៀមខ្លួនទទួលអគ្គសញ្ញាជ្រមុជទឹកនាថ្ងៃបុណ្យចម្លងខាងមុខ។
ក្រោយពីទទូលការត្រាស់ហៅពីលោកអភិបាលព្រះសហគមន៍ បេក្ខជន បេក្ខនារី ទាំង១០៤នាក ដែលមកពីគ្រប់មណ្ឌលសកម្មភាពទាំង៩នៃព្រះសហគមន៍កាតូលិកភូមិភាគ នឹងរៀបចំខ្លួន ដោយទទួលពិធីនានា តាមក្បួនអប់រំជំនឿ ព្រះសហគមន៍កាតូលិក ហើយគេត្រូវចូលរួមគ្រប់ពិធីទាំងឡាយនោះរហូតដល់ថ្ងៃទទួលអគ្គសញ្ញាជ្រមុជទឹក ក្នុងឱកាសបុណ្យចម្លងខាងមុខ។
បេក្ខនារី ស៊ុន ផល្លា មកពីព្រះវិហារព្រះកុមារយេស៊ូបឹងទំពុន និយាយថា ជំហានទី២នេះជាកម្មវិធីមួយដ៏ពិសេសសម្រាប់នាងផ្ទាល់ ដោយទទួលបាននូវអារម្មណ៍មួយដ៏ជិតស្និទ្ធដែលជាភាពកក់ក្ដៅ។
នាងថា៖ «អ្វីដែលខ្ញុំចាប់អារម្មណ៍លើព្រះសហគមន៍ព្រោះនេះជាសហគមន៍និងគ្រួសារតែមួយដែលមិនឱ្យខ្ញុំឯកា ព្រោះជាសេចក្ដីស្រឡាញ់»។
បេក្ខនារីបន្តទៀតថា ដើម្បីត្រៀមខ្លួនទទួលអគ្គសញ្ញាជ្រមុជទឹកខាងមុខនេះ នាងត្រូវបើកចិត្តគំនិតដោយចែករំលែកសេចក្ដីស្រឡាញ់ទៅឱ្យមនុស្សជុំវិញខ្លួន ចេះលើកលែងទោស ដោយដើរតាមព្រះជាម្ចាស់ និងកែប្រែខ្លួនរស់នៅជាគ្រីស្តបរិស័ទល្អម្នាក់។
បេក្ខជន កែវ សុខហ៊ឹង មកពីព្រះសហគមន៍សែនសុខ និយាយថា ជំហានទី២នេះធ្វើឱ្យលោកបានស្គាល់បងប្អូនមកពីច្រើនកន្លែងផ្សេងៗគ្នា និងបានទទួលមេរៀនសម្រាប់លោកទៅថ្ងៃក្រោយ។
លោកសុខហ៊ឹងបន្តថា ៖ «ជំហានទី២នេះព្រះសហគមន៍បង្រៀនខ្ញុំច្រើនពីរបៀបរស់នៅល្អៗដែលខុសកាលពីមុនដែលខ្ញុំមិនដែលបានស្គាល់ព្រះសហគមន៍ទោះបីជាយាយរបស់ខ្ញុំបង្ខំខ្ញុំឱ្យចូលវិហារយ៉ាងណាក៏ដោយក៏ខ្ញុំមិនចូល និងមិនដែលស្ដាប់ម៉ាក់ប៉ា»។
លោកប្រាប់ទៀតថា «ប៉ុន្តែនៅពេលខ្ញុំឈឺជិតស្លាប់ ខ្ញុំបានឃើញគ្រីស្តបរិស័ទរួមជាមួយយាយរបស់ខ្ញុំទៅអធិដ្ឋានដល់ព្រះជាម្ចាស់ឱ្យជួយខ្ញុំ ដែលហាក់បីដូចជាការអស្ចារ្យសម្រាប់ជីវិតខ្ញុំ។ ខ្ញុំបានឃើញការបង្រៀនរបស់ព្រះសហគមន៍គឺនៅពេលខ្ញុំស្គាល់ព្រះគ្រីស្ត ដែលបង្រៀនឱ្យខ្ញុំចេះស្រឡាញ់អ្នកដទៃផងដែរ»៕
